Int Tistaʼ Tkun Għalliem!
1. Kull pubblikatur tas-Saltna liema opportunità speċjali għandu?
1 Wieħed mill-iktar aspetti premjanti tal-ministeru hu li tgħallem il-verità lil xi ħadd. Għandek tgħożżha l-esperjenza li tara lill-individwu jwieġeb għall-messaġġ tas-Saltna u li tgħinu jersaq eqreb lejn is-Sovran taʼ l-univers. (Ġk. 4:8) Kull pubblikatur tas-Saltna għandu jkollu l-mira li jgħallem lil min hu bil-ġuħ għall-verità u li jarah jagħmel bidliet sinifikanti fil-personalità, l-attitudni, u l-imġiba tiegħu.—Mt. 28:19, 20.
2. Xi wħud għala joqogħdu lura milli jikkonduċu studju tal-Bibbja, u x’se jgħinhom jegħlbu din il-problema?
2 Strieħ fuq Ġeħova: Fil-passat, qaddejja leali ma kinux iħossuhom kapaċi jwettqu l-inkarigu li tahom Ġeħova. Minħabba li Mosè, Ġeremija, Għamos, u nies ordinarji oħrajn straħu fuq Alla Ġeħova, huma rnexxielhom jegħlbu d-dubji jew in-nuqqas taʼ ċertezzi tagħhom stess biex iwettqu xogħol importanti. (Eżo. 4:10-12; Ġer. 1:6, 7; Għam. 7:14, 15) L-appostlu Pawlu wkoll ‘għamel il-qalb.’ Kif? Hu wera li dan kien “permezz t’Alla tagħna.” (1 Tess. 2:2) Iva, ilkoll kemm aħna nistgħu nafdaw f’Ġeħova biex jipprovdilna l-għajnuna, l-għerf, u s-saħħa li għandna bżonn ħalli nikkonduċu studji tal-Bibbja progressivi.—Is. 41:10; 1 Kor. 1:26, 27; 1 Pt. 4:11.
3, 4. Liema taħriġ għandna disponibbli biex jgħinna ngħallmu l-Kelma t’Alla?
3 Aċċetta t-Taħriġ: L-Istruttur Grandjuż tagħna, Alla Ġeħova, jipprovdi taħriġ permezz taʼ programm regulari t’edukazzjoni spiritwali sabiex aħna nkunu nistgħu nsiru kapaċi għalkollox bħala għalliema. (Is. 54:13; 2 Tim. 3:16, 17) Aċċetta dan it-taħriġ billi tieħu vantaġġ sħiħ minn opportunitajiet biex iżżid il-fehma tiegħek taʼ l-Iskrittura u ttejjeb l-abbiltà tiegħek biex tgħallem il-veritajiet tal-Bibbja. Għalkemm dan primarjament hu l-iskop taʼ l-Iskola tal-Ministeru Teokratiku u l-Laqgħa tas-Servizz, il-laqgħat kollha tal-kongregazzjoni jħarrġuna biex ngħallmu mill-Kelma t’Alla.
4 Stinka biex titgħallem modi sempliċi kif tgħallem anki veritajiet spiritwali profondi. Il-ktieb Ministry School, f’paġna 227, jispjega: “Trid tifhem sew is-suġġett tiegħek int stess jekk se tagħmlu jinftiehem għal oħrajn.” Meta nikkummentaw fil-laqgħat niġu megħjunin biex inżommu l-punti prinċipali f’moħħna ħalli nkunu nistgħu nużawhom fil-futur. Allura, ipprepara sew, u l-fiduċja tiegħek fl-abbiltà tiegħek biex tgħallem se tikber.
5. Liema taħriġ ieħor għandna fil-kongregazzjoni biex jgħinna nagħmlu progress bħala għalliema?
5 Mill-bidunett, il-ministri Kristjani żgur li tgħallmu minn xulxin waqt li ħadu sehem fix-xogħol taʼ li jagħmlu dixxipli. (Lq. 10:1) Jekk inhu possibbli, mur maʼ pubblikaturi t’esperjenza, inkluż pijunieri, anzjani, u indokraturi li jivvjaġġaw, fuq l-istudji tal-Bibbja. Innota kif jużaw tixbihat sempliċi u għodod oħrajn li jinsabu fil-pubblikazzjonijiet tagħna għall-istudju biex jispjegaw il-veritajiet Skritturali. Itlobhom suġġerimenti dwar kif tistaʼ ssir għalliem aħjar. (Prov. 1:5; 27:17) Apprezza dan it-taħriġ kollu għal dak li tassew hu—taħriġ provdut minn Alla.—2 Kor. 3:5.
6. X’inhu meħtieġ bażikament biex issir għalliem tal-Kelma t’Alla?
6 Strieħ fuq Ġeħova, u bbenefika mit-taħriġ li jipprovdi. Itlob dwar il-progress tiegħek. (Salm 25:4, 5) Int ukoll tistaʼ tesperjenza l-ferħ li jiġi meta tgħin lil xi ħadd isir bħalek, għalliem tal-Kelma t’Alla!