Kun Dejjem Lest Biex Toffri Studju tal-​Bibbja

1. X’inhu involut f’li nwettqu l-​inkarigu li tana Ġesù f’Mattew 28:19, 20?

¹ Ġesù tana inkarigu biex ‘nagħmlu dixxipli, u ngħallmuhom.” (Mt. 28:19, 20) Għalhekk, irridu nkunu dejjem lesti biex noffru studji tal-​Bibbja u mhux biss fil-​ġurnata waħda fi tmiem il-​ġimgħa li tiġi mwarrba speċjalment għal dan. Is-​suġġerimenti li ġejjin jistgħu jkunu t’għajnuna.

2. Lil min nistgħu noffru studju tal-​Bibbja?

² Offri Studju tal-​Bibbja: Iktar ma noffru studji tal-​Bibbja, iktar se jkollna opportunitajiet biex nibdew wieħed. (Ekk. 11:6) Ipprovajt il-​metodu dirett? Kongregazzjoni fl-​Istati Uniti għamlet sforz ħabrieki biex tagħmel dan għal xahar sħiħ. Kemm ferħu meta bdew 42 studju tal-​Bibbja ġdid! Taqbadx u tassumi li l-​uħud interessati li żżur jafu li int lest tistudja l-​Bibbja magħhom. Meta terġaʼ żżurhom, għax ma toffrilhomx studju? Jekk jgħidu le, ma jkun ġara xejn. Tistaʼ tkompli tkabbar l-​interess. Staqsejt lill-​ġirien, lill-​qraba, lill-​kollegi tax-​xogħol, u lil sħabek tal-​iskola jekk iridux jistudjaw il-​Bibbja miegħek? Tistaʼ wkoll tistaqsi l-​istudenti tal-​Bibbja tiegħek jekk għandhomx ħbieb jew qraba li kieku jieħdu pjaċir bi studju tal-​Bibbja.

3. Liema għodda utli għandna biex nibdew studji, u meta nistgħu nużawha?

³ Għodda Utli: Għodda taʼ valur biex tibda studji tal-​Bibbja hi l-​fuljett Tixtieq Tkun Taf il-​Verità? Tistaʼ tagħtih lill-​inkwilini sew jekk jaċċettaw letteratura oħra u sew jekk le. Jistaʼ jintuża meta jinħadem territorju tan-​negozju, meta tingħata xhieda fit-​toroq, meta jintbagħtu l-​ittri, u meta jsiru ż-​żjajjar lura. Ukoll, jistaʼ jitħalla fid-​djar fejn ma jwieġeb ħadd. Għala ma ġġorrux miegħek meta tuża t-​trasport pubbliku, meta tmur tixtri, u meta tkun ix-​xogħol? Il-​paġna taʼ wara tispjega fil-​qosor l-​arranġament tagħna għal studju tal-​Bibbja u tintroduċi l-​ktieb Il-​Bibbja X’Tgħallem?

4. Kif nistgħu nużaw il-​fuljett Taf il-​Verità biex nibdew studju?

⁴ Wara li tagħti l-​fuljett lill-​individwu, tistaʼ tiġbed l-​attenzjoni tiegħu lejn il-​mistoqsijiet fuq l-​ewwel paġna u tistaqsih, “Liema minn dawn il-​mistoqsijiet tinteressak l-​iktar?” Imbagħad ikkunsidraw flimkien it-​tweġiba mill-​fuljett, u aqra jew għid fi kliemek dak li hemm fil-​paġna taʼ wara, li jispjega l-​arranġament tagħna għal studju tal-​Bibbja. Imbagħad tistaʼ turih fejn jistaʼ jsib iktar informazzjoni fuq is-​suġġett fil-​ktieb Il-​Bibbja X’Tgħallem?, offri l-​ktieb, u agħmel arranġamenti biex tmur lura u tkompli d-​diskussjoni.

5. Għala għandna nkunu dejjem lesti biex noffru studju tal-​Bibbja?

⁵ Fit-​territorju tagħna għad hemm dawk li jixxennqu jitgħallmu dak li l-​Bibbja tgħallem verament. Billi nkunu dejjem lesti biex noffru studju tal-​Bibbja se jkollna iktar opportunitajiet biex nesperjenzaw il-​ferħ li jiġi milli ngħinu lil oħrajn jaqbdu t-​triq li tieħu għall-​ħajja.—Mt. 7:13, 14.