Serje Ġdida t’Artikli Biex Nibdew Studji tal-​Bibbja

1. Liema serje ġdida se tibda tidher fl-​edizzjoni pubblika tat-​Torri tal-​Għassa, u din għal xiex ġiet disinjata?

¹ B’seħħ mix-​xahar id-​dieħel, se tibda tidher serje ġdida t’artikli fl-​edizzjoni pubblika tat-​Torri tal-​Għassa sabiex tgħinna nibdew studji tal-​Bibbja. Din hi intitolata “Tgħallem mill-​Kelma t’Alla.” Filwaqt li xi wħud fit-​territorju żgur se jieħdu gost jaqraw kull artiklu f’din is-​serje, dawn l-​artikli fil-​fatt huma disinjati biex jiġu diskussi.

2. X’se jkun fihom dawn l-​artikli?

² X’Se Jkun Fihom l-​Artikli f’Din is-​Serje Ġdida?: It-​titlu u s-​sottitli huma f’għamla taʼ mistoqsijiet li jsiru lill-​inkwilin matul id-​diskussjoni. L-​iskritturi prinċipali huma ċitati, u mhux kwotati, sabiex l-​inkwilin ikun jistaʼ jieħu gost jitgħallem direttament mill-​Kelma t’Alla. Il-​paragrafi huma qosra sabiex ikunu jistgħu jiġu diskussi proprju fuq l-​għatba tal-​bieb. Kull artiklu jirreferi għall-​ktieb Il-​Bibbja X’Tgħallem?, u b’hekk tiġi megħjun ħalli meta jkun xieraq tkompli l-​istudju fuq din il-​pubblikazzjoni.

3. Meta nippritkaw minn dar għal dar, kif nistgħu nużaw din is-​serje t’artikli biex nibdew studju tal-​Bibbja fuq l-​għatba tal-​bieb?

³ Kif Tuża l-​Artiklu: Meta toffri r-​rivisti tistaʼ tistaqsi mistoqsija li tqajjem l-​interess tal-​inkwilin dwar is-​suġġett prinċipali tal-​artiklu. Pereżempju, il-​ħarġa tal-​1 taʼ Jannar tiddiskuti l-​valur tal-​Bibbja. Forsi tistaʼ tistaqsih: “Tqisha int il-​Bibbja bħala li hi l-​Kelma t’Alla jew sempliċement bħala ktieb tajjeb? [Agħti ċans għal tweġiba.] Għandi xi ħaġa interessanti dwar dan is-​suġġett.” Aqra l-​ewwel mistoqsija, aqra l-​ewwel paragrafu, u mbagħad fittex l-​iskrittura ċitata. Erġaʼ aqra l-​mistoqsija, u stieden lill-​inkwilin jikkummenta. Ikkunsidra kemm jistaʼ jkun materjal, skont kemm ikun xieraq, billi tuża l-​mistoqsijiet numerati bħala bażi għal diskussjoni. Qabel titlaq, iġbed l-​attenzjoni lejn il-​mistoqsija li jkun imiss u agħmel arranġamenti speċifiċi biex tmur lura u tiddiskutiha. Erġaʼ mur biex tiddiskuti xi ħaġa oħra mill-​artiklu kull ġimgħa sakemm tkun tistaʼ tiħodlu l-​ħarġa li jkun imiss. Alternattiva oħra hi li tuża l-​metodu dirett u sempliċement toffri studju tal-​Bibbja lill-​inkwilin. Imbagħad uża l-​artiklu tar-​rivista biex turi kif isir l-​istudju.

4. Kif nistgħu nużaw dawn l-​artikli meta nagħmlu żjajjar lura?

⁴ Tistaʼ wkoll tuża din is-​serje ġdida b’mod effettiv fuq xi rotta bir-​rivisti jew żjajjar lura oħrajn. Tistaʼ sempliċement tgħid: “It-​Torri tal-​Għassa fih serje ġdida t’artikli. Ħalli nurik kif tużaha.” Nittamaw li din is-​serje ġdida tgħin lil ħafna iktar uħud “jaslu għall-​għarfien eżatt dwar il-​verità.”—1 Tim. 2:4.