X’Raġuni Għandek Int Biex ‘Tifraħ’?
1. X’raġuni għandna biex nifirħu fl-aħħar taʼ kull xahar?
1 Meta jasal l-aħħar taʼ kull xahar u lkoll nintalbu biex nagħmlu r-rapport tas-servizz tal-għalqa, x’raġuni jkollok int biex ‘tifraħ’? (Gal. 6:4) Kemm jekk aħna pijunieri speċjali li nirrapportaw 130 siegħa fil-ministeru u kemm jekk aħna pubblikaturi approvati li nistgħu nirrapportaw kull 15-il minuta, ilkoll kemm aħna għandna nifirħu li stajna nagħtu servizz b’ruħna kollha lil Ġeħova.—Salm 100:2.
2. Għala għandna nħabirku kemm nistgħu fis-servizz taʼ Ġeħova?
2 Bħala l-Mulej Sovran tal-univers, Ġeħova jistħoqqlu l-aqwa nett li nistgħu nagħtu. (Mal. 1:6) Sforz l-imħabba li għandna għalih, iddedikajna ħajjitna biex nagħmlu r-rieda tiegħu. B’hekk, fl-aħħar tal-ġurnata jew fl-aħħar tax-xahar, jekk aħna ċerti li tajna “l-ewwel frott” mill-ħin, mit-talenti, u mis-saħħa tagħna fis-servizz taʼ Ġeħova, mela allura personalment għandna raġuni biex ‘nifirħu.’ (Prov. 3:9) Madankollu, jekk il-kuxjenza tagħna tgħidilna li stajna għamilna aħjar, mela allura għandna nikkunsidraw dak li nistgħu nagħmlu biex nitjiebu.—Rum. 2:15.
3. Għala mhuwiex għaqli li tqabbel lilek innifsek m’oħrajn?
3 ‘Ma Nqabblux Ruħna maʼ Ħaddieħor’: Mhuwiex għaqli li nqabblu lilna nfusna m’oħrajn jew magħna nfusna meta konna iktar b’saħħitna. Iċ-ċirkustanzi jinbidlu. L-abbiltajiet ivarjaw. It-tqabbil spiss iwassal għal kompetizzjoni jew għal sentimenti taʼ li ma tkun tiswa għal xejn. (Gal. 5:26; 6:4) Ġesù ma kienx iqabbel lin-nies. Minflok, hu faħħar lil persuna skont dak li setgħet tagħmel.—Mk. 14:6-9.
4. X’lezzjonijiet taʼ valur nistgħu nitgħallmu mill-parabbola tat-talenti li qal Ġesù?
4 Fil-parabbola tat-talenti li qal Ġesù, kull ħaddiem irċieva talenti “skond l-abbiltà tiegħu.” (Mt. 25:15) Meta s-sid ġie lura u talab rapport dwar ix-xogħol tagħhom, dawk li kienu ħadmu b’mod diliġenti skont l-abbiltajiet u ċ-ċirkustanzi tagħhom ġew imfaħħrin u ferħu maʼ sidhom. (Mt. 25:21, 23) Hekk kif b’mod simili nibqgħu beżlin fix-xogħol tal-ippritkar tas-Saltna, nistgħu nkunu ċerti mill-approvazzjoni divina u jkollna raġuni biex nifirħu!