Kondotta li Tigglorifika lil Alla

1. Ix-​Xhieda taʼ Ġeħova għala jagħtu fil-​għajn meta jattendu l-​konvenzjonijiet distrettwali?

¹ Meta aħna nattendu l-​konvenzjoni distrettwali nagħtu fil-​għajn. F’ħafna bliet fejn isiru l-​konvenzjonijiet, l-​aġenziji tal-​aħbarijiet lokali jinformaw lill-​komunità bil-​preżenza tagħna. Il-​lukandi u r-​restoranti spiss ikunu mimlijin bid-​delegati, u n-​nies li jgħixu hemmhekk jinnotaw li ħafna viżitaturi jkunu lebsin il-​badges tal-​konvenzjoni. Dawn li ġejjin huma xi tfakkiriet li se jgħinuna nigglorifikaw lil Alla bil-​kondotta tajba tagħna meta nkunu fil-​post fejn issir il-​konvenzjoni.—1 Pt. 2:12.

2. Kif nistgħu nigglorifikaw lil Alla billi nilbsu modest waqt li nkunu fil-​post fejn issir il-​konvenzjoni?

² Ilbies Modest: L-​ilbies modest tagħna waqt li nattendu l-​programm spiss jimpressjona lil dawk li jarawna. Madankollu, l-​istil tal-​ilbies tagħna f’ħinijiet oħrajn—bħal pereżempju meta naslu fil-​lukanda, meta nieklu fir-​restoranti f’dawk l-​inħawi, u meta mmorru nixtru—jistaʼ saħansitra jħalli iktar effett fuq dawk li josservawna. Għalkemm f’dawk il-​ħinijiet m’hemmx għalfejn li nilbsu lbies bħalma nilbsu fil-​konvenzjoni, dak li nilbsu għandu jkun modest, dinjituż, u mhux każwali żżejjed. Dawk li josservawna għandhom jaraw differenza bejnna u bejn oħrajn. (Rum. 12:2) Barra minn hekk, għandna nilbsu l-​badge tal-​konvenzjoni, għax din tirreklama l-​konvenzjoni, tagħtina opportunità biex nagħtu xhieda, u biex delegati oħrajn ikunu jistgħu jagħrfuna.

3. Kif nistgħu nuru paċenzja u manjieri tajbin?

³ Paċenzja u Manjieri Tajbin: Fi żmien fejn ħafna fid-​dinja jimpurtahom biss minnhom infushom u mhumiex grati, kemm se jkunu rifreskanti l-​paċenzja u l-​manjieri tajbin tagħna għal dawk li jarawna, bħall-​impjegati tal-​lukanda u tar-​restoranti. (2 Tim. 3:1-​5) Meta nżommu l-​postijiet jew immorru fil-​kju biex nieħdu l-​pubblikazzjonijiet li jkunu ħarġu fil-​konvenzjoni, m’għandniex infittxu dak li jaqbel lilna, imma dak li jaqbel lil ħaddieħor. (1 Kor. 10:23, 24) Wara li attenda l-​ewwel konvenzjoni tiegħu, raġel interessat qal, “Ma niftakar l-​ebda taħdita li ngħatat dakinhar, imma l-​kondotta tax-​Xhieda ħalliet impressjoni dejjiema fuqi.”

4. Għala għandna nikkunsidraw li naqdu bħala volontieri fil-​konvenzjoni jekk jippermettulna ċ-​ċirkustanzi tagħna?

⁴ Volontieri: Il-​Kristjani veri huma magħrufin li jagħmlu xogħol volontarju minn rajhom. (Salm 110:3) Tistaʼ taqdi bħala volontier biex tgħin fil-​konvenzjoni? F’post fejn saret konvenzjoni waħda, madwar 600 ħu u oħt offrew ruħhom biex inaddfu qabel il-​konvenzjoni. L-​istaff qal: “Din hi l-​iktar ħaġa tal-​għaġeb li qatt rajna! Huwa diffiċli biex timmaġina li dawn in-​nies kollha huma volontieri.” Aħna għandna sebaʼ mitt sena biex ikollna l-​konvenzjonijiet distrettwali tal-​2013 u jkollna l-​opportunità mhux biss biex nisimgħu u nobdu lil Alla imma wkoll biex nigglorifikawh.

[Kaxxa f’paġni 3-6]

Tfakkiriet għall-​Konvenzjoni Distrettwali 2013

◼ Ħinijiet tal-​Programm: Il-​bibien se jinfetħu fit-​8:00 a.m. Il-​mużika se tibda fid-​9:20 a.m., it-​tlett ijiem kollha. F’dak il-​ħin, ilkoll kemm aħna għandna nsibu postna sabiex il-​programm ikun jistaʼ jibda b’mod dinjituż. L-​għanja u t-​talba tal-​għeluq tal-​Ġimgħa u s-​Sibt se jibdew fil-​4:50 p.m., u l-​Ħadd fit-​3:35 p.m.

◼ Postijiet: Il-​postijiet jistgħu jintrefgħu biss għal dawk li jgħixu fid-​dar tiegħek, għal dawk li jivvjaġġaw fl-​istess karozza miegħek, jew għal dawk li bħalissa qed tikkonduċi studju tal-​Bibbja magħhom. Is-​siġġijiet għal dawk imdaħħlin fiż-​żmien u għal dawk neqsin mis-​saħħa huma limitati, u għalhekk jistaʼ ma jkunx possibbli li l-​membri kollha tal-​familja tagħhom joqogħdu bilqiegħda ħdejhom. Jekk jogħġobkom, dawn is-​siġġijiet ħalluhom għal dawk imdaħħlin fiż-​żmien u għal dawk neqsin mis-​saħħa u għal dawk li jassistuhom.—1 Kor. 13:5.

◼ Donazzjonijiet: Nistgħu nuru l-​apprezzament tagħna għall-​arranġamenti tal-​konvenzjoni billi nikkontribwixxu volontarjament għax-​xogħol taʼ madwar id-​dinja fil-​konvenzjoni. Jekk jingħata xi ċekk, dan għandu jintgħamel pagabbli lil “IBSA (Malta).”

◼ Medikazzjoni: Jekk tieħu xi mediċina preskritta, jekk jogħġbok kun ċert li ġġib miegħek kemm għandek bżonn, ladarba fil-​konvenzjoni ma jkunx hemm mediċina disponibbli. Siringi u labar li jintużaw minn uħud dijabetiċi għandhom jintremew kif suppost bħala skart perikoluż u mhux fejn jintrema l-​iskart normali fil-​post li ssir il-​konvenzjoni jew fil-​lukanda.

◼ Żraben: Kull sena jseħħu għadd taʼ inċidenti konnessi maż-​żraben, speċjalment żraben b’takkuna għolja. Ikun aħjar li tagħżel żarbun modest li jiġik sew u li jippermettilek timxi fuq rampi, fit-​taraġ, fuq l-​ispralli, u affarijiet bħal dawn bla ma tweġġaʼ.

◼ Puxċers: Il-​puxċers m’għandhomx jinġiebu fil-​post tal-​konvenzjoni. Madankollu, jistgħu jinġiebu siġġijiet tat-​tfal li jipprovdu sigurtà (child safety seats) jekk jistgħu jitpoġġew fuq siġġu ħdejn il-​ġenituri.

◼ Fwejjaħ: Ħafna konvenzjonijiet qed isiru f’postijiet magħluqin li jiddependu minn ventilazzjoni mekkanika. Għalhekk, inkunu qed nuru qalb tajba min-​naħa tagħna jekk nillimitaw l-​użu taʼ fwejjaħ qawwijin li jistgħu jikkaġunaw irritazzjoni lil dawk li jbatu bi problemi respiratorji jew problemi relatati.—1 Kor. 10:24.

◼ Formoli Please Follow Up (S-​43): Il-​formola Please Follow Up għandha tintuża biex tipprovdi informazzjoni dwar kwalunkwe interess li jkun intwera waqt xhieda informali matul il-​konvenzjoni. Il-​formoli mimlijin jistgħu jingħataw lis-​segretarju tal-​kongregazzjoni tiegħek wara l-​konvenzjoni.

◼ Restoranti: Onora isem Ġeħova bl-​imġiba mill-​aqwa tiegħek fir-​restoranti. Ilbes b’mod li jkun xieraq għal Kristjan. Ħalli tipp jekk din tkun l-​użanza.

◼ Servizz taʼ Volontieri: Kull min jixtieq jaqdi bħala volontier għandu jmur fid-​Dipartiment tas-​Servizz tal-​Volontieri tal-​konvenzjoni. Tfal taħt is-​16-​il sena wkoll jistgħu jagħtu daqqa t’id billi jaħdmu taħt is-​superviżjoni taʼ ġenitur jew taʼ min jieħu ħsiebhom jew adult ieħor bl-​approvazzjoni taʼ xi ħadd minnhom.