Min Se Jkun Interessat f’Dan l-Artiklu?
1. Meta naqraw il-kopja tagħna tat-Torri tal-Għassa jew Stenbaħ! x’għandna nikkunsidraw, u għala?
1 It-Torri tal-Għassa u Stenbaħ! jiġu mħejjijin b’tali mod li jilħqu lin-nies madwar l-art kollha. Għalhekk, l-artikli jitkellmu dwar varjetà kbira taʼ suġġetti. Aħna u naqraw kull artiklu fil-kopja persunali tagħna, għandna nikkunsidraw lil min se jinteressa b’mod partikulari, u mbagħad nagħmlu ċert li noffruh lil dik il-persuna.
2. Liema suġġetti li jkollna fir-rivisti għandhom mnejn ikunu taʼ interess partikulari għal oħrajn?
2 Tiddiskuti r-rivista kurrenti tat-Torri tal-Għassa suġġett Bibliku li int u xi ħadd minn sħabek tax-xogħol ġieli tkellimtu dwaru? Hemm xi artiklu dwar il-ħajja tal-familja li jistaʼ jkun t’għajnuna għal xi ħadd minn qrabatek? Taf b’xi ħadd li qed jippjana li jsiefer xi mkien li ssemma dan l-aħħar fi Stenbaħ!? Hemm xi rivista li se tkun taʼ interess partikulari għal ċerti negozji jew aġenziji tal-gvern fit-territorju tiegħek? Pereżempju, rivista li titkellem dwar l-isfidi li jiffaċċjaw l-anzjani tistaʼ tkun taʼ interess partikulari għal membri taʼ djar tal-anzjani. L-aġenziji li jinforzaw il-liġi għandhom mnejn ikunu interessati f’xi rivista dwar il-kriminalità.
3. Irrakkonta esperjenza li turi l-valur taʼ li toffri ħarġiet speċifiċi tar-rivisti lil dawk li naħsbu li se jkunu interessati fil-kontenut tagħhom.
3 Riżultati: Wara li rċivew ir-rivista Stenbaħ! t’Ottubru, 2011 dwar “Kif Trabbi Tfal Responsabbli,” koppja fl-Afrika t’Isfel ċemplu 25 skola fit-territorju tal-kongregazzjoni tagħhom. Tnejn u għoxrin minnhom aċċettaw kopji tar-rivista u qassmuhom lill-istudenti tagħhom. Koppja oħra f’dak il-pajjiż kellhom l-istess idea u ħallew kopji tar-rivista fl-iskejjel fit-territorju tagħhom. L-għalliema taʼ waħda mill-iskejjel iddeċidew li jużaw ir-rivista fil-lezzjonijiet tal-iskola. Il-koppja rrakkontaw l-esperjenza tagħhom maʼ indokratur tas-circuit. Hu mbagħad ħeġġeġ lill-kongregazzjonijiet fis-circuit tiegħu biex jagħmlu l-istess fl-iskejjel tat-territorji tagħhom. L-uffiċċju tal-fergħa tant irċieva talbiet għal iktar rivisti li dik il-ħarġa kellha terġaʼ tiġi stampata!
4. Għala rridu nqassmu r-rivisti lil kemm jistaʼ jkun nies?
4 Ir-rivisti tagħna jiddiskutu t-tifsir veru wara l-ġrajjiet kurrenti u jdawru l-attenzjoni lejn il-Bibbja u s-Saltna t’Alla. Huma l-uniċi rivisti fid-dinja li qed ‘ixandru l-paċi.’ (Is. 52:7) Għalhekk, irridu nqassmuhom lil kemm jistaʼ jkun nies. Mod tajjeb kif tagħmel dan hu billi tistaqsi lilek innifsek, ‘Min se jkun interessat f’dan l-artiklu?’