“Iġmagħli n-nies”
1. X’xebh hemm bejn il-konvenzjonijiet distrettwali u dawk internazzjonali u l-assemblea sinifikanti tal-Iżraelin ftit wara li telqu mill-Eġittu?
1 Ftit wara li telqu mill-Eġittu, Ġeħova qal lil Mosè biex ‘jiġmaʼ n-nies’ ħdejn il-Muntanja Sinaj ħalli jisimgħu Kliemu sabiex jibżgħu Minnu u jgħallmu lil uliedhom fil-mogħdijiet Tiegħu. (Dt. 4:10-13) Bla dubju dik kienet okkażjoni memorabbli u li tibni l-fidi! Matul il-ftit xhur li ġejjin, in-nies taʼ Ġeħova se jinġemgħu f’konvenzjonijiet distrettwali u internazzjonali biex jiġu mgħallmin minn Ġeħova. X’għandna nagħmlu sabiex nibbenefikaw bis-sħiħ?
2. X’għandna nagħmlu biex ‘inkunu lesti’ għall-konvenzjoni tagħna?
2 “Kunu lesti”: Ġeħova kkmanda lill-Iżraelin biex “ikunu lesti” għal dik l-assemblea storika ħdejn il-Muntanja Sinaj. (Eżo. 19:10, 11) Bl-istess mod, preparazzjoni tajba hi meħtieġa minn kull min se jattendi l-konvenzjonijiet, u mhux biss minn dawk li se jieħdu sehem fil-programm. Pereżempju, ħafna se jkollhom jagħmlu arranġamenti biex jieħdu l-leave mix-xogħol tagħhom. Forsi s-sitwazzjoni tiegħek hi simili għal dik taʼ Neħemija, li kien il-kuppier tas-Sultan Artaserse. Hu ried jitlaq minn xogħlu biex imur sa Ġerusalemm u jgħin biex jerġgħu jinbnew il-ħitan tagħha, imma kien jaf li s-Sultan setaʼ ma jaqbilx maʼ dan. Neħemija qal talba u mbagħad bil-kuraġġ lissen ir-rikjesta tiegħu bi kliem magħżul tajjeb. Is-sultan ippermettielu jitlaq u anki ta sapport lill-proġett tal-bini! (Neħ. 2:1-9) Minbarra li titlob il-leave lill-imgħallem tiegħek, ikkonfermajt l-arranġamenti tiegħek għall-ivvjaġġar u l-akkomodazzjoni? L-anzjani jkunu ferħanin jgħinu lil kull min ikollu bżonn l-għajnuna. Ippjana li tasal kmieni għal kull sessjoni, u kun lest li ‘toqgħod attent iktar mis-soltu’ għal dak li se tismaʼ.—Ebr. 2:1.
3. X’se jgħinna nippreparaw qalbna għall-programm?
3 Aspett importanti ieħor taʼ li nkunu ppreparati jinvolvi li nħejju qalbna biex nisimgħu u nitgħallmu. (Esd. 7:10) Il-programm tal-konvenzjoni se jkun disponibbli fuq il-Websajt jw.org/mt minn qabel u fuqu se jkun hemm it-titli tat-taħditiet kollha flimkien maʼ skrittura prinċipali jew tnejn għal kull taħdita. Dan jipprovdi materjal eċċellenti x’nikkunsidraw fil-lejla tal-Qima tal-Familja tagħna fil-ġimgħat taʼ qabel il-konvenzjoni. Xi pubblikaturi jipprintjaw il-programm u jużawh biex jieħdu noti fil-qosor waqt il-konvenzjoni.
4. Il-ġenituri kif jistgħu jużaw il-konvenzjoni biex jgħallmu lil uliedhom?
4 ‘Għallmu lil uliedkom’: Wieħed mill-għanijiet tal-konvenzjoni tal-Muntanja Sinaj jintqalilna li kien biex il-ġenituri Iżraelin setgħu “jgħallmu lil uliedhom.” (Dt. 4:10) Il-konvenzjoni tagħti lill-ġenituri opportunità eċċellenti biex jagħmlu l-istess. Il-ġenituri għandhom jaraw li wliedhom joqogħdu bilqiegħda magħhom matul is-sessjonijiet u jgħinuhom joqogħdu attenti. Fi tmiem kull jum u iktar tard fil-qima tal-familja, il-familji jistgħu jiddiskutu l-programm flimkien.
5. Kif se nibbenefikaw milli nattendu l-konvenzjoni li ġejja?
5 Il-konvenzjoni sinifikanti ħdejn il-Muntanja Sinaj għenet lill-Iżraelin japprezzaw il-privileġġ uniku tagħhom li jkunu l-poplu t’Alla. (Dt. 4:7, 8) Il-konvenzjoni li ġejja hi mħejjija biex tibbenefikana b’mod simili. Għal tlett ijiem se nkunu nistgħu noħorġu mix-xagħri aħrax tad-dinja taʼ Satana u nieħdu pjaċir b’serħan spiritwali u assoċjazzjoni li tibni fil-ġenna spiritwali tagħna. (Is. 35:7-9) B’jum Ġeħova fil-qrib, ejja ma nabbandunawx din l-opportunità biex niltaqgħu flimkien biex ninkuraġġixxu lil xulxin!—Ebr. 10:24, 25.