Uża b’mod effettiv aspetti tal-​ktieb Il-​Bibbja X’Tgħallem

Hekk kif student tal-​Bibbja jsir jaf dak li verament tgħallem il-​Bibbja u japplika dak li jitgħallem, hu se jikber u ‘jagħti l-​frott’ spiritwali. (Salm 1:1-​3) Aħna nistgħu ngħinu lill-​istudent tagħna jagħmel progress billi nużaw tajjeb xi aspetti t’għajnuna tal-​ktieb Il-​Bibbja X’Tgħallem?

Il-​mistoqsijiet tal-​introduzzjoni: Kull kapitlu jibda b’mistoqsijiet li se jitwieġbu fil-​lezzjoni. Tistaʼ ssaqsi dawn il-​mistoqsijiet mingħajr ma tistenna tweġiba ħalli tqanqal l-​entużjażmu tal-​istudent għad-​diskussjoni li se jkollkom. Jew tistaʼ tistiednu jwieġeb fil-​qosor kull mistoqsija. Jekk jesprimi idea ħażina, m’hemmx għalfejn tikkoreġih f’dan il-​mument. Il-​kummenti tiegħu se jgħinuk tagħraf liema punti għandhom bżonn attenzjoni u enfasi.—Prov. 16:23; 18:13.

L-​appendiċi: Jekk l-​istudent jifhem u jaċċetta l-​materjal tal-​kapitlu, tistaʼ sempliċement tinkuraġġih jirrivedi waħdu l-​appendiċi relatata mal-​kapitlu. Fl-​istudju li jmiss, tistaʼ tieħu ftit minuti biex tagħmel ċert li fehem l-​appendiċi. Inkella, jekk taħseb li se jibbenefika iktar, tistaʼ twarrab xi ħin mill-​istudju biex tiddiskuti l-​materjal fl-​appendiċi jew porzjon minnu, billi taqra l-​paragrafi u ssaqsi mistoqsijiet li tkun ħejjejt minn qabel.

Il-​kaxxa bħala reviżjoni: Il-​kaxxa bħala reviżjoni fl-​aħħar taʼ kull kapitlu fiha stqarrijiet li jwieġbu l-​mistoqsijiet tal-​introduzzjoni. Tistaʼ tuża din il-​kaxxa biex tagħmel ċert li l-​istudent tiegħek jifhem u kapaċi jispjega l-​punti prinċipali. Aqraw kull stqarrija flimkien b’leħen għoli u kif ukoll l-​iskritturi li hemm magħhom. Imbagħad stieden lill-​istudent tiegħek juża l-​iskrittura jew l-​iskritturi biex jispjega għala din l-​istqarrija hi minnha.—Atti 17:2, 3.