“Pawlu radd ħajr lil Alla u għamel il-kuraġġ”

Meta l-​kongregazzjoni f’Ruma semgħet li kien ġej Pawlu, grupp t’aħwa vvjaġġaw madwar 64 kilometru biex jiltaqgħu miegħu. L-​imħabba mingħajr egoiżmu tagħhom kif affettwat lil Pawlu? “Malli lemaħhom, Pawlu radd ħajr lil Alla u għamel il-​kuraġġ.” (At 28:15) Għalkemm Pawlu kien magħruf li jinkuraġġixxi l-​kongregazzjonijiet li kien iżur, din id-​darba waqt li kien priġunier, kien hu li rċieva l-​inkuraġġiment.—2Ko 13:10.

Illum, l-​indokraturi li jżuru l-​kongregazzjonijiet jivvjaġġaw minn kongregazzjoni għal oħra biex jinkuraġġixxu lill-​aħwa. Bħall-​poplu kollu t’Alla, xi drabi huma wkoll iħossuhom għajjenin, ansjużi, u skuraġġiti. Id-​darba li jmiss li l-​indokratur u martu jiġu fil-​kongregazzjoni tiegħek, x’tistaʼ tagħmel biex tgħinhom jagħmlu l-​kuraġġ, u b’hekk ‘tinkuraġġixxu lil xulxin’?—Rum 1:11, 12.

• 

  Appoġġja l-​laqgħat tas-​servizz tal-​għalqa. L-​indokratur li jżur il-​kongregazzjonijiet jiġi inkuraġġit meta l-​pubblikaturi jagħmlu sagrifiċċji biex jibbenefikaw bis-​sħiħ mill-​ġimgħa speċjali t’attività. (1Te 1:2, 3; 2:20) Ikkunsidra li tagħmel pijunier awżiljarju matul ix-​xahar li jkun qed iżur il-​kongregazzjoni. Tistaʼ int toffri li taħdem miegħu jew maʼ martu fil-​ministeru jew tieħu lil xi ħadd minnhom miegħek fuq studju tal-​Bibbja? Huma jieħdu pjaċir jaħdmu maʼ pubblikaturi differenti, inkluż dawk li huma ġodda jew dawk li jħossu li ma tantx huma tajbin f’li jippritkaw.

• 

  Kun ospitabbli. Tistaʼ int toffrilhom post fejn joqogħdu jew tistidinhom għall-​ikel? Dan juri lill-​indokratur li jżur il-​kongregazzjonijiet u l-​mara tiegħu li int tħobbhom. Huma ma jistennew xejn elaborat.—Lq 10:38-42.

• 

  Ismaʼ mid-​direzzjoni u l-​pariri tiegħu u applikahom. L-​indokratur li jżur il-​kongregazzjonijiet bi mħabba jgħinna naraw kif nistgħu ntejbu s-​servizz li nagħtu lil Ġeħova. Jistaʼ jkun li xi kultant ikollu jagħti parir sod. (1Ko 5:1-5) Hu jieħu pjaċir meta nkunu ubbidjenti u nissottomettu ruħna.—Eb 13:17.

• 

  Esprimi l-​apprezzament tiegħek. Għid lill-​indokratur li jżur il-​kongregazzjonijiet u ’l martu kif ibbenefikajt mill-​isforzi tagħhom. Tistaʼ tagħmel dan wiċċ imb wiċċ jew permezz taʼ nota jew kard.—Kol 3:15.