Taqtax Qalbek!

1. Aħna għala ferħanin u kburin li aħna Xhieda taʼ Ġeħova?

AĦNA ferħanin u kburin li aħna Xhieda taʼ Ġeħova! Aħna l-​poplu taʼ Ġeħova u nagħtu prova li aħna x-​xhieda tiegħu billi nippritkaw lil oħrajn u ngħallmuhom dwaru. Aħna kuntenti ħafna li nistgħu ngħinu lil xi ħadd li għandu “attitudni xierqa lejn il-​ħajja taʼ dejjem” jibda jemmen bil-​verità. (Atti 13:48) Aħna nħossuna bħal Ġesù. Hu “ħass ferħ kbir” meta d-​dixxipli tiegħu qalulu l-​esperjenzi tajbin li kellhom meta marru jippritkaw.—Lq. 10:1, 17, 21.

2. Kif nistgħu nuru li x-​xogħol tal-​ippritkar hu importanti ħafna għalina?

² Ix-​xogħol tal-​ippritkar hu importanti ħafna għalina. L-​appostlu Pawlu qal lil Timotju: “Oqgħod attent il-​ħin kollu għalik innifsek u għat-​tagħlim tiegħek.” Imbagħad kompla jgħidlu: “Għax jekk tagħmel dan issalva kemm lilek innifsek u kemm lil dawk li jisimgħuk.” (1 Tim. 4:16) Mela l-​ippritkar isalva l-​ħajja tan-​nies. Aħna noqogħdu attenti għalina nfusna għax irridu nkunu ubbidjenti lejn is-​Saltna t’Alla. Għalhekk irridu ngħixu ħajjitna b’mod li nġibu tifħir lil Ġeħova u billi nuru li nemmnu fl-​aħbar tajba. (Flp. 1:27) Aħna nuru li qegħdin ‘noqogħdu attenti għat-​tagħlim tagħna’ billi nippreparaw sew qabel il-​ministeru u billi nitolbu lil Ġeħova biex jgħinna qabel nippritkaw lil oħrajn.

3. Meta nippritkaw kulħadd se jkun interessat fil-​messaġġ tas-​Saltna? Agħti eżempju.

³ Għalkemm nagħmlu l-​almu tagħna biex nippritkaw, ħafna nies fit-​territorju tagħna jaf ma jkunux interessati fil-​messaġġ tas-​Saltna. Ikkunsidra l-​esperjenza taʼ Ħuna Georg Lindal, li mill-​1929 sal-​1947 ipprietka waħdu f’partijiet differenti tal-​Iżlanda. Hu qassam eluf taʼ kotba imma ħadd m’aċċetta l-​verità. Hu kiteb: “Xi wħud ma kinux jaqblu maʼ dak li tgħid il-​Bibbja, imma l-​biċċa l-​kbira tan-​nies ma kinux interessati.” Iktar tard, missjunarji li ggradwaw mill-​Iskola taʼ Gilegħad ukoll marru hemm biex jgħinu fix-​xogħol tal-​ippritkar. Imma wara li ppritkaw għal xi snin in-​nies xorta ma wrewx interess. Fl-​aħħar, wara disaʼ snin, xi nies mill-​Iżlanda ddedikaw ħajjithom lil Ġeħova u tgħammdu.b

4. Kif nistgħu nħossuna meta n-​nies ma jaċċettawx il-​messaġġ tal-​aħbar tajba?

⁴ Meta n-​nies ma jkunux iridu jistudjaw il-​Bibbja magħna, aħna nħossuna ddiżappuntati. Forsi nħossuna bħall-​appostlu Pawlu, li ħass “niket kbir u wġigħ bla waqfien” minħabba li ħafna Lhud ma ridux jemmnu li Ġesù kien il-​Messija. (Rum. 9:1-​3) Ejja ngħidu li qed tistudja l-​Bibbja maʼ xi ħadd. Int taħdem iebes biex tkun għalliem tajjeb u titlob ħafna għall-​istudent tiegħek. Imma hu mhux japplika dak li qed jitgħallem, u għalhekk għandek bżonn twaqqaf l-​istudju. Jew forsi qatt ma studjajt maʼ xi ħadd li wasal għall-​magħmudija. Ifisser dan li hu t-​tort tiegħek u li Ġeħova mhux kuntent bil-​mod kif tipprietka? F’dan l-​artiklu se nwieġbu żewġ mistoqsijiet: (1) X’juri li qed nagħmlu x-​xogħol tal-​ippritkar b’mod tajjeb? (2) X’għandna nistennew meta nippritkaw lil oħrajn?

X’JURI LI QED NAGĦMLU X-​XOGĦOL TAL-​IPPRITKAR B’MOD TAJJEB?

5. Għala x-​xogħol li nagħmlu għal Ġeħova mhux dejjem se jkollu r-​riżultat li nixtiequ?

⁵ Il-​Bibbja tgħid li persuna li tagħmel ir-​rieda t’Alla ‘tirnexxi f’kulma tagħmel.’ (Salm 1:3) Però, dan ma jfissirx li kulma nagħmlu għal Ġeħova se jkollu r-​riżultat li nixtiequ. Il-​ħajja tagħna hi mimlija inkwiet minħabba l-​imperfezzjonijiet tagħna u taʼ oħrajn. (Ġob 14:1) Ukoll, dawk li jiħduha kontrina kultant jipprovaw iwaqqfuna mix-​xogħol tal-​ippritkar. (1 Kor. 16:9; 1 Tess. 2:18) Allura, Ġeħova kif jara jekk ix-​xogħol tal-​ippritkar hux qed nagħmluh b’mod tajjeb? Ejja naraw xi prinċipji mill-​Bibbja li jgħinuna nsibu t-​tweġiba għal din il-​mistoqsija.

6. Kif nafu li Ġeħova japprezza x-​xogħol li nagħmlu anke meta n-​nies ma jisimgħux il-​messaġġ tas-​Saltna?

⁶ Ġeħova jinnota l-​isforzi li nagħmlu u li aħna m’aħniex qed naqtgħu qalbna. Meta nippritkaw b’żelu għax inħobbuh, Ġeħova jkun kuntent bina anke meta n-​nies ma jisimgħux. Pawlu kiteb: “Alla mhux inġust biex jinsa għemilkom u l-​imħabba li wrejtu għal ismu, peress li qdejtu lill-​qaddisin u għadkom taqduhom.” (Ebr. 6:10) Ġeħova jiftakar l-​isforz li nagħmlu u l-​imħabba li għandna għalih, anke jekk qatt ma kellna student li wasal għall-​magħmudija. Għalhekk, il-​kliem li Pawlu qal lill-​Korintin: “It-​taħbit tagħkom fil-​Mulej m’huwiex għalxejn,” japplika għalik ukoll anke jekk ix-​xogħol iebes li għamilt ma rriżultax f’dak li xtaqt inti.—1 Kor. 15:58.

7. X’nistgħu nitgħallmu minn dak li qal l-​appostlu Pawlu dwar il-​ministeru tiegħu?

⁷ L-​appostlu Pawlu kien missjunarju tajjeb ħafna. Pereżempju, hu fforma kongregazzjonijiet ġodda f’ħafna bliet. Imma meta xi nies maqdruh u qalu li ma kienx għalliem tajjeb, hu ma qagħadx jgħid kemm irnexxielu jgħin nies isiru Kristjani. Minflok, Pawlu qal li għamel iktar xogħol. (2 Kor. 11:23) Bħal Pawlu aħna rridu niftakru li l-​iktar ħaġa importanti għal Ġeħova hi li nagħmlu l-​almu tagħna u ma naqtgħux qalbna.

8. Xi rridu niftakru dwar il-​ministeru tagħna?

⁸ Ix-​xogħol tal-​ippritkar iferraħ lil Ġeħova. Ġesù bagħat 70 dixxiplu jippritkaw il-​messaġġ tas-​Saltna, u meta waqfu mill-​ippritkar huma marru lura ferħanin ħafna. Għala? Huma qalu: “Anki d-​demonji jintgħamlu sottomessi lejna f’ismek.” Imma Ġesù kkoreġiehom billi qalilhom: “Tifirħux b’dan, li l-​ispirti jintgħamlu sottomessi lejkom, imma ifirħu għax isimkom tnaqqax fis-​smewwiet.” (Lq. 10:17-​20) Ġesù kien jaf li mhux dejjem kien se jkollhom riżultati tajbin fil-​ministeru tagħhom. Fil-​fatt, aħna ma nafux kemm irnexxielhom jgħinu nies isiru Kristjani. Id-​dixxipli kellhom jifhmu li l-​ferħ ma kienx se jiġi biss minħabba li n-​nies jaċċettaw il-​messaġġ tagħhom, imma wkoll billi jkunu jafu li Ġeħova huwa kuntent bl-​isforzi tagħhom.

9. Skont Galatin 6:7-​9, x’jiġri jekk aħna ma naqtgħux qalbna u nibqgħu nippritkaw?

⁹ Jekk nibqgħu nissaportu l-​provi li niffaċċjaw fil-​ministeru se nirċievu l-​ħajja taʼ dejjem. Meta nagħmlu l-​almu tagħna biex nippritkaw u ngħallmu l-​aħbar tajba, aħna nkunu qed ‘niżirgħu għall-​ispirtu’ billi nħallu l-​ispirtu t’Alla jaħdem fil-​ħajja tagħna. Jekk “ma negħjewx,” Ġeħova jwegħedna li se jagħtina l-​ħajja taʼ dejjem, anke jekk ma nkunu għenna lil ħadd biex jasal għall-​magħmudija.—Aqra Galatin 6:7-​9.

X’GĦANDNA NISTENNEW META NIPPRITKAW LIL OĦRAJN?

10. Għala meta nippritkaw xi wħud jisimgħu u oħrajn le?

¹⁰ Biex persuna taċċetta l-​verità, spiss jiddependi minn dak li jkollha f’qalbha. Ġesù spjega dan billi ġab tixbiha taʼ raġel li żeraʼ ż-​żerriegħa. Ir-​raġel żeraʼ ż-​żerriegħa f’ħamrija differenti, imma dik li nżergħet fil-​ħamrija t-​tajba għamlet il-​frott. (Lq. 8:5-​8) Ġesù qal li l-​ħamrija differenti tirrappreżenta lin-​nies li jaġixxu b’modi differenti meta jisimgħu l-​messaġġ tal-​Kelma t’Alla. (Lq. 8:11-​15) Bħal dak ir-​raġel, aħna ma nistgħux inkabbru xi ħaġa fil-​qalb tan-​nies. Ir-​responsabbiltà tagħna hi li nkomplu niżirgħu ż-​żerriegħa tas-​Saltna. Bħalma qal l-​appostlu Pawlu, “kull wieħed jirċievi l-​premju tiegħu skond il-​ħidma tiegħu,” u mhux skont ir-​riżultat li jkollu.—1 Kor. 3:8.

11. Ġeħova għala kien kuntent bl-​ippritkar taʼ Noè minkejja li n-​nies ma semgħux? (Ara l-​istampa tal-​qoxra.)

¹¹ Matul l-​istorja ħafna qaddejja taʼ Ġeħova ppritkaw lil nies li ma ridux jisimgħu. Pereżempju, Noè kien “predikatur tal-​ġustizzja” għal madwar 40 jew 50 sena. (2 Pt. 2:5) Bla dubju, hu ttama li oħrajn kienu se jisimgħu l-​messaġġ tiegħu, imma Ġeħova ma qallux li kien se jiġri hekk. Minflok meta qallu biex jibni l-​arka, Ġeħova qal: “Trid tidħol fl-​arka, int u wliedek u martek u n-​nisa taʼ wliedek miegħek.” (Ġen. 6:18) Ukoll, meta Ġeħova qallu kemm kellha tkun kbira l-​arka, Noè jaf induna li ħafna nies ma kinux se jisimgħu l-​messaġġ, għax ma kienx se jkun hemm ħafna spazju fl-​arka. (Ġen. 6:15) Bħalma nafu lanqas persuna waħda ma semgħet il-​messaġġ taʼ Noè. (Ġen. 7:7) Ġeħova ħaseb li Noè m’għamilx ix-​xogħol tal-​ippritkar b’mod tajjeb? Żgur li le! Ġeħova kien kuntent b’Noè għax għamel dak kollu li kien qallu.—Ġen. 6:22.

12. Il-​profeta Ġeremija kif baqaʼ jipprietka bil-​ferħ minkejja li ma kienx faċli?

¹² Il-​profeta Ġeremija wkoll ipprietka għal iktar minn 40 sena minkejja li n-​nies ma ridux jisimgħu l-​messaġġ tiegħu u ħaduha kontrih. Hu tant ħassu skuraġġit minħabba li n-​nies bdew iwaqqgħuh għaċ-​ċajt li kien qed jaħsibha jiqafx mill-​inkarigu tiegħu. (Ġer. 20:8, 9) Imma Ġeremija ma qatax qalbu! X’għenu biex jibqaʼ jipprietka bil-​ferħ? Hu ffoka fuq żewġ affarijiet importanti. L-​ewwel, il-​messaġġ li kien qed iwassal lin-​nies kien se jagħtihom “futur u tama.” (Ġer. 29:11) It-​tieni, Ġeħova għażel lilu biex iwettaq dan l-​inkarigu. (Ġer. 15:16) Aħna wkoll naqsmu messaġġ taʼ tama man-​nies u anki lilna, Ġeħova għażilna biex nagħmlu dan ix-​xogħol. Meta niffokaw fuq dawn iż-​żewġ affarijiet importanti, aħna nistgħu nkunu ferħanin, tkun xi tkun ir-​reazzjoni taʼ nies.

13. X’nistgħu nitgħallmu mit-​tixbiha taʼ Ġesù li nsibuha f’​Marku 4:26-​29?

¹³ Jieħu ż-​żmien biex xi ħadd jibni l-​fidi tiegħu. Ġesù għallem dan fit-​tixbiha tar-​raġel li jiżraʼ ż-​żerriegħa u mbagħad imur jorqod. (Aqra Marku 4:26-​29.) Wara li r-​raġel jiżraʼ ż-​żerriegħa hi tibda tikber bil-​mod, u r-​raġel ma jkun jistaʼ jagħmel xejn biex tikber malajr. Int ukoll jaf ikollok tistenna għal tul taʼ żmien sakemm l-​istudent tiegħek jibda japplika dak li jkun qed jitgħallem. Għalhekk, bħalma bidwi jkollu jistenna l-​ħxejjex tiegħu jikbru, aħna wkoll irridu nistennew il-​fidi tal-​istudent tikber. Mela tħossokx skuraġġit jew taqtaʼ qalbek jekk l-​istudent tiegħek qed idum biex jagħmel progress. Bħal bidwi aħna rridu nkunu paċenzjużi u nistennew lill-​istudent biex jieħu d-​deċiżjoni li jitgħammed.—Ġak. 5:7, 8.

14. Liema eżempju jurina li n-​nies jistgħu jdumu biex jisimgħu l-​messaġġ tagħna?

¹⁴ F’xi pajjiżi jieħu ħafna żmien biex xi ħadd jasal għall-​magħmudija. Ikkunsidra l-​esperjenza taʼ Gladys u Ruby Allen, li huma aħwa. Fl-​1959, huma ġew inkarigati biex imorru jaqdu bħala pijunieri regolari f’parti mit-​territorju taʼ Quebec, il-​Kanada.c In-​nies t’hemmhekk ma kinux jisimgħu l-​messaġġ tagħhom għax kienu jibżgħu mill-​ġirien tagħhom u mill-​qassisin. Gladys tiftakar: “Għamilna sentejn immorru nippritkaw minn dar għal dar tmien sigħat kuljum u ħadd ma kien jiftħilna! Meta n-​nies kienu jarawna wara l-​bieb, kienu jerġgħu jidħlu ’l ġewwa. Imma aħna ma qtajniex qalbna.” Bil-​mod il-​mod l-​attitudni tan-​nies inbidlet u xi wħud bdew jisimgħu l-​messaġġ. Illum, hemm tliet kongregazzjonijiet f’dan it-​territorju.—Is. 60:22.

15. X’nitgħallmu dwar ix-​xogħol taʼ li nagħmlu dixxipli mill-​1 Korintin 3:6, 7?

¹⁵ Biex xi ħadd isir dixxiplu hemm bżonn l-​għajnuna taʼ ħafna aħwa. L-​aħwa fil-​kongregazzjoni kollha jistgħu jgħinu biex xi ħadd jasal għall-​magħmudija. (Aqra l-​1 Korintin 3:6, 7.) Pereżempju, ħu jħalli fuljett jew rivista maʼ xi ħadd li jkun interessat. Imma hu ma jistax jerġaʼ jmur meta jkun jistaʼ l-​inkwilin, allura jgħid lil ħu ieħor biex imur hu. Dan il-​ħu jirnexxilu jibda studju tal-​Bibbja. Imbagħad, il-​ħu għall-​istudju jieħu aħwa differenti biex jinkuraġġixxu lill-​istudent. Kull ħu jew oħt li tiltaqaʼ mal-​istudent se tkun tistaʼ tgħinu biex ikompli jitgħallem dwar Ġeħova. B’hekk, dawk kollha li ħadmu iebes biex jgħinu lill-​istudent se jifirħu meta jarawh jitgħammed.—Ġw. 4:35-​38.

16. Għala tistaʼ tibqaʼ kuntent fil-​ministeru tiegħek anke jekk għandek saħħa batuta?

¹⁶ Forsi m’għadekx tipprietka jew tgħallem daqskemm kont qabel minħabba li issa għandek saħħa batuta. Imma inti xorta tistaʼ tkun ferħan b’dak li qed tagħmel. Aħseb dwar l-​esperjenza tas-​Sultan David u l-​irġiel tiegħu meta huma ħelsu lill-​familji tagħhom mill-​Għamalekin. Mitejn raġel tant kienu għajjenin li ma setgħux imorru biex jiġġieldu, għalhekk huma qagħdu jieħdu ħsieb l-​affarijiet. David u l-​irġiel tiegħu rebħu l-​ġlieda u huma ħadu ħafna affarijiet li jiswew il-​flus mingħand l-​għedewwa tagħhom. Imbagħad David ordna biex l-​affarijiet li ħadu jinqasmu bejn dawk li ġġieldu fil-​gwerra u bejn dawk li ħadu ħsieb l-​affarijiet. (1 Sam. 30:21-​25) Din l-​istorja tgħallimna xi ħaġa dwar ix-​xogħol taʼ li nagħmlu dixxipli. Forsi inti ma tistax tagħmel daqskemm tixtieq fix-​xogħol tal-​ippritkar u t-​tagħlim, imma jekk inti tagħmel l-​almu tiegħek xorta tistaʼ tkun ferħan kull darba li xi ħadd isir jaf lil Ġeħova u jitgħammed.

17. Għal xiex għandna nirringrazzjaw lil Ġeħova?

¹⁷ Aħna nirringrazzjaw lil Ġeħova talli japprezza dak kollu li nagħmlu għalih. Hu jaf li aħna ma nistgħux nisforzaw lin-​nies biex jisimgħu l-​messaġġ tagħna jew jibdew jaqdu lilu. Imma hu jaf kemm aħna naħdmu iebes għalih u kemm inħobbuh, u għalhekk se jippremjana. Hu jgħallimna wkoll kif inkunu ferħanin fix-​xogħol tal-​ippritkar anke jekk ma nistgħux nagħmlu ħafna. (Ġw. 14:12) Nistgħu nkunu ċerti li Ġeħova se jkun kuntent bina jekk aħna ma naqtgħux qalbna!