Qed tistinka int biex timita l-​maturità taʼ Kristu?

1, 2. X’inhi l-​mira taʼ kull Kristjan? Agħti eżempju.

MARA tad-​dar għal xiex tfittex meta tkun qed tagħżel il-​frott frisk fis-​suq? X’aktarx li ma tfittixx għall-​akbar jew l-​irħas frott. Minflok, tfittex għall-​frott li jkun ifuħ, li jidher frisk, u li hu tajjeb biex jittiekel. Hi trid frott li jkun misjur.

² B’mod simili, Alla jrid li l-​qaddejja tiegħu jkunu maturi. Wara li individwu jitgħallem dwar Ġeħova u jiddeċiedi li jitgħammed, ir-​relazzjoni tiegħu m’Alla tkompli tikber. Il-​mira tiegħu hi li jsir Kristjan matur. Din il-​maturità ma tirreferix għal li wieħed jikber fl-​età. Imma tirreferi għal li wieħed jikber spiritwalment, jiġifieri, li jkollu relazzjoni iktar mill-​qrib maʼ Ġeħova. L-​appostlu Pawlu ried li l-​Kristjani f’Efesu jsiru maturi. Hu ħeġġiġhom biex ikunu magħqudin fil-​fidi u jibqgħu jitgħallmu dwar Ġesù ħalli kull wieħed minnhom isir “raġel li kiber għalkollox, għall-​qjies taʼ statura li jiġi mill-​milja tal-​Kristu.”—Efesin 4:13.

3. Il-​kongregazzjoni f’Efesu kif inhi simili għan-​nies taʼ Ġeħova llum?

³ Il-​kongregazzjoni f’Efesu diġà kienet ilha teżisti għal diversi snin meta Pawlu kiteb l-​ittra. Ħafna wħud f’dik il-​kongregazzjoni diġà kienu Kristjani maturi u tal-​esperjenza. Imma, kien għad hemm xi wħud fosthom li kellhom bżonn isaħħu iktar ir-​relazzjoni tagħhom maʼ Ġeħova. B’mod simili llum, ħafna aħwa rġiel u nisa ilhom jaqdu lil Ġeħova għal żmien twil u saru Kristjani maturi. Madanakollu, xi wħud fil-​kongregazzjonijiet għadhom ma waslux sa dak il-​punt. Pereżempju, eluf taʼ nies jitgħammdu kull sena, u allura xi wħud għad iridu jilħqu l-​maturità. Xi ngħidu għalik?—Kolossin 2:6, 7.

KRISTJAN KIF JISTAʼ JIKBER?

4, 5. Il-​Kristjani maturi kif inhuma differenti minn xulxin, imma lkoll kemm huma x’għandhom komuni? (Ara l-​ewwel stampa.)

⁴ Meta tħares lejn il-​frott misjur fis-​suq, int tinnota li mhux kull frotta hi eżattament bħal frotta oħra. Però, il-​frott kollu għandu ċerti affarijiet komuni li juru li hu misjur. L-​istess hu minnu fejn jidħlu l-​Kristjani maturi. Mhumiex eżattament l-​istess. Jiġu minn pajjiżi u sfondi differenti. Għandhom etajiet u gosti differenti. Iżda l-​Kristjani maturi kollha għandhom ċerti kwalitajiet komuni li juru li huma maturi. X’inhuma ftit minn dawn il-​kwalitajiet?

⁵ Kristjan matur jimita lil Ġesù u ‘jimxi mill-​qrib wara l-​passi tiegħu.’ (1 Pietru 2:21) Ġesù qal li hu importanti ħafna li dak li jkun iħobb lil Ġeħova b’qalbu kollha, b’ruħu kollha, u b’moħħu kollu u jħobb lill-​proxxmu bħalu nnifsu. (Mattew 22:37-​39) Kristjan matur jistinka biex jobdi dan il-​kmand. Il-​mod kif jgħix ħajtu juri li r-​relazzjoni tiegħu maʼ Ġeħova u l-​imħabba profonda li għandu għal ħaddieħor huma l-​iktar affarijiet importanti għalih.

6, 7. (a) X’inhuma xi kwalitajiet oħra li juru li Kristjan hu matur? (b) X’għandna nistaqsu lilna nfusna?

⁶ L-​imħabba hi biss waħda mill-​ħafna kwalitajiet li juri Kristjan matur. (Galatin 5:22, 23) Hu juri wkoll il-​ħlewwa, ir-​rażan, u s-​sabar fit-​tul, jew il-​paċenzja. Dawn il-​kwalitajiet jistgħu jgħinuh ikampa waqt sitwazzjonijiet diffiċli mingħajr ma jsir frustrat. Jgħinuh ukoll biex jissaporti d-​diżappunti mingħajr ma jaqtaʼ qalbu. Fl-​istudju persunali tiegħu, Kristjan matur jibqaʼ jfittex għal prinċipji Bibliċi li jgħinuh ikun jaf x’inhu tajjeb u x’inhu ħażin. Imbagħad, meta juża l-​kuxjenza tiegħu li tkun imħarrġa fuq il-​Bibbja, se jkun jistaʼ jieħu deċiżjonijiet għaqlin. Kristjan matur hu umli, u għalhekk jemmen li l-​gwida u l-​livelli taʼ Ġeħova dejjem huma aħjar minn tiegħu.a (Ara n-​nota taʼ taħt.) Hu jipprietka l-​aħbar tajba b’żelu u jagħmel kulma jistaʼ biex jgħin lill-​kongregazzjoni tibqaʼ magħquda.

⁷ Ilna kemm ilna naqdu lil Ġeħova, kull wieħed u waħda minna jistaʼ jistaqsi lilu nnifsu: ‘Hemm bidliet li nistaʼ nagħmel f’ħajti biex nimita lil Ġesù iktar mill-​qrib? Hemm lok fejn nitjieb?’

“L-​IKEL SOLIDU HU GĦAN-​NIES MATURI”

8. Ġesù kemm kien midħla tal-​Bibbja u kemm kien jifhimha?

⁸ Ġesù Kristu kien midħla sew tal-​Iskrittura u kien jifhimha b’mod tajjeb. Anke meta kellu 12-​il sena, hu uża l-​Iskrittura meta tkellem mal-​għalliema fit-​tempju. “Dawk kollha li kienu qed jisimgħuh baqgħu mistagħġbin b’kemm kien jifhem u bit-​tweġibiet tiegħu.” (Luqa 2:46, 47) Iktar tard, meta kien qed jipprietka, hu b’sengħa uża l-​Kelma t’Alla biex isikket lill-​għedewwa tiegħu.—Mattew 22:41-​46.

9. (a) Kristjan matur liema skeda taʼ studju jkollu? (b) Għala nistudjaw il-​Bibbja?

⁹ Individwu li jrid ikun Kristjan matur jimita l-​eżempju taʼ Ġesù u jkun irid jifhem il-​Bibbja kemm jistaʼ jkun. B’mod regulari dan ifittex fl-​Iskrittura għal veritajiet profondi, għax hu jaf li “l-​ikel solidu hu għan-​nies maturi.” (Ebrej 5:14) Kristjan matur irid ikollu “għarfien eżatt” tal-​Bibbja. (Efesin 4:13) Allura staqsi lilek innifsek: ‘Naqra jien il-​Bibbja kuljum? Għandi skeda għall-​istudju persunali? Nagħmel il-​qima bħala familja kull ġimgħa?’ Meta tistudja l-​Bibbja, fittex għal prinċipji li jistgħu jgħinuk tkun taf kif Ġeħova jaħseb u kif iħossu. Imbagħad uża dawn il-​prinċipji meta tiġi biex tieħu deċiżjonijiet. Dan se jgħinek tersaq saħansitra eqreb lejn Ġeħova.

10. Kristjan matur kif iħossu dwar il-​pariri u l-​prinċipji t’Alla?

¹⁰ Kristjan matur irid jagħmel iktar milli sempliċement ikun jaf x’tgħid il-​Bibbja. Irid iħobb il-​pariri u l-​prinċipji t’Alla. Imbagħad juri din l-​imħabba billi minn qalbu jagħmel dak li jrid Alla u mhux dak li jrid hu. Hu anke jbiddel il-​mod kif jgħix, jaħseb, u jaġixxi. Pereżempju, hu jimita lil Ġesù u jilbes il-​personalità l-​ġdida, li “nħolqot skond ir-​rieda t’Alla fil-​ġustizzja u l-​lealtà vera.” (Aqra Efesin 4:22-​24.) Hu importanti li tiftakar li Alla uża l-​ispirtu qaddis tiegħu biex jiggwida l-​kittieba tal-​Bibbja. Għalhekk, meta Kristjan jistudja l-​Bibbja, l-​ispirtu qaddis t’Alla jgħinu jikber fl-​għarfien, fl-​imħabba, u fir-​relazzjoni tiegħu maʼ Ġeħova.

KUNU MAGĦQUDIN

11. Ġesù x’esperjenza meta kien fuq l-​art?

¹¹ Ġesù kien raġel perfett. Madanakollu, meta kien fuq l-​art, Ġesù kien imdawwar minn bnedmin imperfetti. Il-​ġenituri tiegħu u ħutu subien u bniet kienu kollha imperfetti. Anke l-​iktar segwaċi mill-​qrib taʼ Ġesù wrew kwalitajiet bħalma huma l-​kburija u l-​egoiżmu. Pereżempju, fil-​lejl taʼ qabel il-​mewt tiegħu, id-​dixxipli tiegħu argumentaw bejniethom “dwar min minnhom kien jidher li hu l-​akbar.” (Luqa 22:24) Minkejja r-​raġunar imperfett tagħhom, Ġesù kien jaf li s-​segwaċi tiegħu dalwaqt kienu se jsiru Kristjani maturi u jifformaw kongregazzjoni magħquda. Dak l-​istess lejl, Ġesù talab biex ikunu magħqudin billi qal lil Missieru tas-​sema: “Ħalli jkunu lkoll ħaġa waħda, sabiex bħalma int, Missier, f’unjoni miegħi u jien f’unjoni miegħek, huma wkoll ikunu f’unjoni magħna, . . . sabiex ikunu ħaġa waħda bħalma aħna ħaġa waħda.”—Ġwanni 17:21, 22.

12, 13. (a) X’inhi l-​mira tagħna bħala Kristjani? (b) Ħu kif tgħallem jagħmel kulma jistaʼ biex ikun hemm l-​għaqda?

¹² Kristjan matur jagħmel kulma jistaʼ biex il-​kongregazzjoni tibqaʼ magħquda. (Aqra Efesin 4:1-​6, 15, 16.) Bħala Kristjani, il-​mira tagħna hi li nkunu ‘magħqudin flimkien b’mod armonjuż,’ jiġifieri, li naħdmu flimkien f’unità. Biex ikollna dan it-​tip taʼ unità, Kristjan irid ikun umli. Għalhekk, anke meta jiġi effettwat mill-​imperfezzjonijiet t’oħrajn, Kristjan matur jaħdem iebes biex iżomm l-​unità tal-​kongregazzjoni b’saħħitha. Għalhekk, staqsi lilek innifsek: ‘Kif nirreaġixxi jien meta ħu jew oħt tagħmel żball? Kif inħossni meta xi ħadd iweġġagħni? Għandi ħabta ma nibqax inkellimha t-​tali persuna? Jew nipprova nirranġa r-​relazzjoni?’ Kristjan matur irid jegħleb il-​problema u mhux ikun problema għal ħaddieħor.

¹³ Ikkunsidra l-​eżempju taʼ Uwe. Fil-​passat, kien iħalli l-​imperfezzjonijiet tal-​aħwa rġiel u nisa jkidduh. Imbagħad iddeċieda li juża l-​Bibbja u l-​kotba Insight on the Scriptures biex jistudja l-​ħajja taʼ David. Għala studja fuq David? Għax David ukoll kellu problemi maʼ xi wħud mill-​qaddejja t’Alla. Pereżempju, is-​Sultan Sawl ipprova joqtol lil David, xi nies riedu jħaġġruh, u anke martu stess iddieħqet bih. (1 Samwel 19:9-​11; 30:1-​6; 2 Samwel 6:14-​22) Imma minkejja dak li għamillu ħaddieħor, David kien iħobb lil Ġeħova u fada fih. Ukoll, David wera l-​ħniena. Uwe ammetta li kellu bżonn jagħmel l-​istess ħaġa. Permezz tal-​istudju tiegħu tal-​Bibbja, tgħallem li kellu bżonn ibiddel il-​mod kif iħossu dwar l-​imperfezzjonijiet taʼ ħutu. Kellu bżonn jinsa l-​iżbalji tagħhom u jagħmel kulma jistaʼ biex il-​kongregazzjoni tkun magħquda. Hija l-​mira tiegħek biex tagħmel l-​istess ħaġa?

AGĦŻEL ĦBIEB MINN FOST DAWK LI JAGĦMLU R-​RIEDA T’ALLA

14. Ġesù kif għażel il-​ħbieb tiegħu?

¹⁴ Ġesù Kristu kien dħuli maʼ kulħadd. L-​irġiel u n-​nisa, il-​kbar u ż-​żgħar, u anke t-​tfal ċkejknin, ħassewhom komdi maʼ Ġesù. Imma hu għażel il-​ħbieb tal-​qalb tiegħu bir-​reqqa. Hu qal lill-​appostli tiegħu: “Intom ħbiebi jekk tagħmlu dak li qed nordnalkom.” (Ġwanni 15:14) Ġesù għażel il-​ħbieb tal-​qalb tiegħu minn fost dawk li b’lealtà segwewh u li kienu jħobbu u jaqdu lil Ġeħova. Tagħżel int bħala ħbieb lil dawk li jħobbu lil Ġeħova b’qalbhom kollha? Dan għala hu importanti?

15. Iż-​żgħażagħ kif jistgħu jibbenefikaw meta jkunu ħbieb maʼ Kristjani maturi?

¹⁵ Ħafna drabi l-​iktar frott li jkun tajjeb u misjur ikun kiber fid-​dawl u s-​sħana tax-​xemx. B’mod simili, l-​imħabba mill-​qalb taʼ ħutna rġiel u nisa tistaʼ tgħinek issir Kristjan matur. Int żagħżugħ jew żagħżugħa li qed tipprova tiddeċiedi x’se tagħmel b’ħajtek? Jekk iva, ikun għaqli li tagħżel bħala l-​ħbieb tiegħek lil dawk li ilhom jaqdu lil Ġeħova u li jgħinu biex il-​kongregazzjoni tkun magħquda. Forsi għaddew minn problemi f’ħajjithom u kellhom ikampaw maʼ provi waqt li kienu qed jaqdu lil Ġeħova. Dawn l-​uħud jistgħu jgħinuk tagħżel l-​aqwa mod taʼ ħajja. Meta tqattaʼ l-​ħin magħhom, jistgħu jgħinuk tieħu deċiżjonijiet għaqlin u timmatura bħala Kristjan.—Aqra Ebrej 5:14.

16. Aħwa akbar fl-​età fil-​kongregazzjoni kif għenu lil oħt meta kienet żagħżugħa?

¹⁶ Helga tiftakar li fl-​aħħar sena tagħha tal-​iskola, il-​biċċa l-​kbira minn sħabha tal-​klassi kienu qed jitkellmu dwar il-​miri li kellhom għall-​futur. Ħafna minnhom riedu jmorru l-​università ħalli jkollhom karriera tajba. Imma Helga tkellmet maʼ ħbieb maturi fil-​kongregazzjoni tagħha. Hi tgħid: “Ħafna minnhom kienu akbar minni, u tgħidx kemm għenuni. Ħeġġewni biex nidħol fis-​servizz full-​time. Wara dan, stajt inqattaʼ ħames snin naqdi bħala pijuniera. Issa, snin wara, jien ferħana li stajt inqattaʼ ħafna minn żgħożiti fis-​servizz taʼ Ġeħova. Xejn ma jiddispjaċini li għamilt dan.”

17, 18. Kif nistgħu naqdu lil Ġeħova bl-​aħjar mod?

¹⁷ Meta nimitaw lil Ġesù, se nikbru biex insiru Kristjani maturi. Se nersqu eqreb lejn Ġeħova u x-​xewqa tagħna biex naqduh ukoll se tikber. Individwu jaqdi lil Ġeħova bl-​aħjar mod meta jkun matur. Ġesù ħeġġeġ lis-​segwaċi tiegħu: “Għandu jiddi d-​dawl tagħkom quddiem il-​bnedmin, biex jaraw l-​għemejjel tajbin tagħkom u jagħtu glorja lil Missierkom li hu fis-​smewwiet.”—Mattew 5:16.

¹⁸ Aħna tgħallimna kif Kristjan matur jistaʼ jkun t’appoġġ kbir għall-​kongregazzjoni. Mod ieħor kif Kristjan juri li hu matur hu bil-​mod kif juża l-​kuxjenza tiegħu. Il-​kuxjenza tagħna kif tistaʼ tgħinna nieħdu deċiżjonijiet għaqlin? U kif nistgħu nirrispettaw il-​kuxjenza t’oħrajn? Se nwieġbu dawn il-​mistoqsijiet fl-​artiklu li jmiss.