KAPITLU 35

Kif Tistaʼ Ssir Ħabib t’Alla?

Wara li għadda minn esperjenza kerha, Jeremy tgħallem kemm hu importanti li tkun ħabib t’Alla. Hu qal: “Meta kelli 12-​il sena, missieri telaq il-​familja. Darba minnhom billejl, tlabt lil Ġeħova biex iġiegħel lil missieri jiġi lura.”

Jeremy kien imdejjaq ħafna u beda jaqra l-​Bibbja. Meta qara Salm 10:14, dan vera messlu qalbu. Dwar Ġeħova dan il-​vers jgħid: “L-​isfortunat, it-​tifel bla missier, jafda ruħu f’idejk. Int sirt l-​għajnuna tiegħu.” Jeremy qal: “Jien ħassejt li Ġeħova kien qed ikellimni u kien qed jgħidli li hu se jgħinni. Hu kien bħal missier għalija. Ma jistax ikolli missier aħjar minnu.”

KEMM jekk qiegħed f’sitwazzjoni bħal taʼ Jeremy u anki jekk le, il-​Bibbja turi li Ġeħova jridek tkun il-​ħabib tiegħu. Il-​Bibbja tgħidlek: ‘Ersaq qrib lejn Alla, u hu jersaq qrib lejk.’ (Ġakbu 4:8) Aħseb ftit dwar xi jfisser dan. Għalkemm ma tistax tarah, mhux tamparek, u ma jagħmilx l-​istess affarijiet bħalek, Alla Ġeħova xorta qed jistiednek biex tkun ħabib tiegħu!

Imma biex tkun ħabib t’Alla hemm bżonn tagħmel sforz. Pereżempju, jekk għandek pjanta d-​dar, taf li ma tistax tikber waħedha. Biex tikber trid tpoġġiha f’post tajjeb u ssaqqiha b’mod regulari. B’mod simili, irridu nagħmlu xi ħaġa min-​naħa tagħna biex inkunu ħbieb t’Alla. Allura x’tistaʼ tagħmel biex issaħħaħ il-​ħbiberija tiegħek m’Alla?

Li Tistudja l-​Bibbja Hu Importanti

Fi ħbiberija tajba trid tismaʼ u titkellem. Dan hu l-​istess biex tkun ħabib tajjeb t’Alla. Li taqra u tistudja l-​Bibbja huwa l-​mod kif tismaʼ x’jixtieq jgħidlek Alla.—Salm 1:2, 3.

Forsi int ma tiħux pjaċir tistudja. Ħafna żgħażagħ jippreferu jaraw it-​televixin, jilagħbu xi logħba, jew ikunu maʼ sħabhom. Imma ma tistax issir ħabib t’Alla mil-​lum għall-​għada. Int trid tismaʼ x’jixtieq jgħidlek billi tistudja l-​Kelma tiegħu.

Tinkwetax. Tistaʼ titgħallem kif tieħu pjaċir tistudja l-​Bibbja, anki jekk inti persuna li ma tiħux pjaċir tistudja. L-​ewwel ħaġa li trid tagħmel hi li tippjana meta ħa taqra l-​Bibbja. Tfajla jisimha Lais tgħid: “Jien għamilt skeda biex naqra kapitlu mill-​Bibbja l-​ewwel ħaġa filgħodu.” Maria, taʼ 15-​il sena, għandha rutina differenti. Hi tgħid: “Jien naqra ftit mill-​Bibbja kuljum qabel norqod.”

Biex tippjana kif se tibda taqra l-​Bibbja inti, ara l-​kaxxa f’paġna 292. Imbagħad, hawn taħt ikteb meta hu l-​aħjar għalik biex tagħmel madwar nofs siegħa taqra u tistudja l-​Kelma t’Alla.

․․․․․

Li tkun taf meta se taqraha huwa l-​bidu. Meta tibda tistudjaha jaf tinduna li l-​Bibbja mhux dejjem faċli biex taqraha. Forsi tħossok l-​istess bħal Jezreel, li għandu 11-​il sena. Hu qal: “Hemm xi partijiet tal-​Bibbja li huma diffiċli ħafna. Ma tantx nieħu pjaċir naqrahom.” Taqtax qalbek jekk tħossok hekk. Dejjem ftakar li meta tistudja l-​Bibbja, tkun qed tismaʼ lill-​ħabib tiegħek, Ġeħova. Meta tagħmel l-​aħjar tiegħek biex tistudja l-​Bibbja, iżjed se tieħu pjaċir tistudjaha u iżjed se titgħallem minnha!

It-​Talb Hu Importanti

It-​talb hu l-​mod kif aħna nkellmu lil Alla. Aħseb kemm it-​talb hu rigal sabiħ! Tistaʼ tkellem lil Alla Ġeħova fi x’ħin trid int, kemm matul il-​ġurnata u anki billejl. Hu dejjem se jkun lest biex jisimgħek. Mhux hekk biss, imma jrid jismaʼ dak li trid tgħidlu. Huwa għalhekk li l-​Bibbja tgħidlek: “F’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu.”—Filippin 4:6.

Bħalma turi din l-​iskrittura, lil Ġeħova tistaʼ tkellmu dwar ħafna affarijiet. Dawn jistgħu jinkludu l-​problemi u l-​anzjetajiet tiegħek. Tistaʼ tkellmu wkoll dwar affarijiet li tixtieq tirringrazzjah għalihom. Bħalma tistaʼ tirringrazzja lill-​ħbieb għall-​affarijiet tajbin li jagħmlu miegħek, tistaʼ tirringrazzja lil Ġeħova. Hu għamel miegħek iżjed minn kull ħabib ieħor.—Salm 106:1.

Hawn taħt ikteb xi affarijiet li tixtieq tirringrazzja lil Ġeħova għalihom.

․․․․․

Żgur li xi kultant tħossok qed tibżaʼ u tkun anzjuż. Imma Salm 55:22 jgħid: ‘Ixħet toqlok fuq Ġeħova, u jgħinek. Hu qatt ma jħalli lill-​ġust jogħtor.’

Hawn taħt ikteb dwar l-​affarijiet li qed jinkwetawk u li tixtieq titlob dwarhom.

․․․․․

Esperjenzah Int Stess

Hemm xi ħaġ’oħra li ma tridx tinsa li hija importanti fil-​ħbiberija tiegħek m’Alla. Is-​salmista David kiteb: “Duqu u araw li Ġeħova hu tajjeb.” (Salm 34:8) David kien għadu kif għadda minn esperjenza kerha meta kiteb dan is-​salm. Hu kien qed jipprova jaħrab mis-​Sultan Sawl li kien qed jipprova joqtlu. Din l-​esperjenza vera stressjatu lil David. Imma mbagħad kellu jmur jistaħba għand il-​Filistin li kienu l-​għedewwa tiegħu. Huma żgur kienu se jipprovaw joqtluh, imma peress li għamilha taʼ miġnun, irnexxielu jaħrab.—1 Samwel 21:10-​15.

David ma ħasibx li rnexxielu jaħrab minħabba l-​kapaċità tiegħu. Minflok, hu faħħar lil Ġeħova. Fil-​bidu tas-​salm li semmejna qabel, hu kiteb: “Jien staqsejt lil Ġeħova, u hu wiġibni, u mill-​biżaʼ kollu tiegħi ħelisni.” (Salm 34:4) David għala setaʼ jgħid lil oħrajn biex ‘iduqu u jaraw li Ġeħova hu tajjeb’?a Kien minħabba li esperjenzah hu stess.

Tistaʼ taħseb f’esperjenza li Ġeħova wriek li jimpurtah minnek? Jekk iva, iktibha hawn taħt. L-​esperjenza m’għandhiex għalfejn tkun taʼ barra minn hawn. Ipprova aħseb f’barkiet li faċli niħduhom for granted fil-​ħajja taʼ kuljum.

․․․․․

Forsi l-​ġenituri għallmuk dwar il-​Bibbja. Jekk iva, din hi barka. Imma xorta waħda, int irid ikollok ħbiberija persunali m’Alla. Biex jgħinek tibda din il-​ħbiberija, tistaʼ tuża l-​informazzjoni f’dan il-​kapitlu. Ġeħova se jbierek l-​isforzi kollha tiegħek. Il-​Bibbja tgħid: “Ibqgħu itolbu, u jingħatalkom; ibqgħu fittxu, u ssibu.”—Mattew 7:7.

AQRA IŻJED DWAR DAN IS-​SUĠĠETT FL-​EWWEL VOLUM, KAPITLI 38 U 39

[Nota taʼ taħt]

SKRITTURA PRINĊIPALI

‘Ferħanin dawk li huma konxji tal-​bżonn spiritwali tagħhom.’—Mattew 5:3.

SUĠĠERIMENT

Jekk taqra erbaʼ paġni kuljum mill-​Bibbja, tlestiha kollha f’madwar sena.

KONT TAF . . .

Il-​fatt li qed taqra dan il-​ktieb u taċċetta l-​pariri mill-​Bibbja, juri li Ġeħova jimpurtah minnek.—Ġwanni 6:44.

L-​AZZJONI LI SE NIEĦU

Biex nitgħallem iżjed meta nistudja l-​Bibbja, se ․․․․․

Biex nitlob iżjed, se ․․․․․

X’nixtieq insaqsi lill-​ġenitur(i) tiegħi dwar dan is-​suġġett? ․․․․․

INT X’TAĦSEB?

● Kif tistaʼ tieħu iżjed pjaċir meta tistudja l-​Bibbja?

● Ġeħova għala jrid jismaʼ t-​talb taʼ nies imperfetti?

● Kif tistaʼ titlob aħjar?.

[Kumment]

Meta kont iżgħar, kont nirrepeti l-​istess affarijiet fit-​talb. Issa nitlob dwar l-​affarijiet tajbin u ħżiena li jiġru matul il-​ġurnata. Peress li kull ġurnata hi differenti, dan jgħinni biex ma nirrepetix l-​istess affarijiet.”—Eve

[Kaxxa/Stampa]

Sir Af il-​Bibbja

1. Agħżel storja mill-​Bibbja li tixtieq taqra. Itlob lil Ġeħova biex jgħinek tifhem li qed taqra.

2. Idħol fl-​istorja. Tgħaġġilx biex taqra u uża l-​immaġinazzjoni tiegħek. Ipprova idħol kemm jistaʼ jkun fl-​istorja. Pereżempju, immaġina x’qed jiġri, ismaʼ x’qed jgħidu l-​karattri, xomm l-​arja u duq l-​ikel.

3. Aħseb fuq dak li qrajt. Saqsi lilek innifsek mistoqsijiet bħal:

● Ġeħova għala kiteb din l-​istorja fil-​Bibbja?

● Liema eżempji rrid nimita u liema le?

● X’lezzjonijiet importanti nistaʼ nitgħallem minn din l-​istorja?

● Din l-​istorja x’tgħallimni dwar Ġeħova u kif jaħseb?

4. Għid talba żgħira lil Ġeħova. Għidlu x’tgħallimt minn din l-​istorja u kif tixtieq tuża dak li tgħallimt. Dejjem irringrazzja lil Ġeħova għar-​rigal li tak, il-​Bibbja!

[Stampa]

“Kelmtek musbieħ għal sieqi, u dawl għal triqti.”—Salm 119:105.

[Kaxxa/Stampa]

X’Inhu l-Izjed Importanti?

Tħoss li m’għandekx ħin biex titlob u tistudja l-​Bibbja? Dan jistaʼ jkun minħabba kif tiddeċiedi li tagħmel l-​affarijiet.

Ipprova dan: Ħu barmil u fih poġġi ġebel kbir. Imbagħad imla l-​barmil sa fuq bir-​ramel. Issa għandek barmil mimli bil-​ġebel u r-​ramel.

Issa battal il-​barmil u żomm l-​istess ġebel u ramel. Erġaʼ agħmel l-​istess ħaġa imma bil-​kontra. Imla l-​barmil bir-​ramel imbagħad ipprova daħħal il-​ġebel. M’għandekx post għall-​ġebel, hux? Dan għax issa daħħalt ir-​ramel l-​ewwel fil-​barmil.

X’nitgħallmu? Il-​Bibbja tgħid: ‘Kunu ċerti minn dak li hu iktar importanti.’ (Filippin 1:10) Jekk tpoġġi affarijiet żgħar bħad-​divertiment l-​ewwel post, mhux se jkollok biżżejjed ħin għall-​affarijiet iktar importanti, jiġifieri taqdi lil Ġeħova. Imma jekk tismaʼ mill-​parir tal-​Bibbja, se jkollok biżżejjed ħin għal Ġeħova u biex tieħu pjaċir. Kollox jiddependi minn x’titfaʼ l-​ewwel fil-​barmil!

[Stampa]

Bħal pjanta, il-​ħbiberija m’Alla trid tieħu ħsiebha biex tikber