Xi wħud isibuha diffiċli li jħobbu lil Alla. Għalihom, Alla hu kkomplikat, ’il bogħod minnhom, jew saħansitra kattiv. Ikkunsidra dawn il-​kummenti:

• “Jien tlabt lil Alla għall-​għajnuna, imma fl-​istess ħin ħassejt li kien ’il bogħod minni, kważi ma jintlaħaqx. Għalija, Alla kien entità astratta, mingħajr sentimenti.”—Marco, l-​Italja.

• “Għalkemm xtaqt naqdi sinċerament lil Alla, ħassejt li kien ’il bogħod wisq. Ħsibt li kien Alla aħrax u moħħu biss biex jikkastigana. Ma kontx nemmen li kellu sentimenti teneri.”—Rosa, il-​Gwatemala.

• “Taʼ tifla li kont, kont nemmen li Alla kien joqgħod ifittex l-​iżbalji tagħna, lest biex jikkastigana jekk ikun ħaqqna. Iktar tard ħassejt li ma kienx jimpurtah minni. Alla kien qisu prim ministru li jieħu ħsieb imexxi pajjiż—imma li ma kienx verament interessat fiċ-​ċittadini personalment.”—Raymonde, il-​Kanada.

X’taħseb int? Huwa Alla xi ħadd li ma tistax tħobbu? Xi Kristjani ilhom jistaqsu din il-​mistoqsija għal sekli sħaħ. Fil-​fatt, matul il-​Medju Evu, ħafna mill-​Kristjaneżmu lanqas biss kienu jitolbu lil Alla li Jistaʼ Kollox. Għala le? In-​nies kienu jitwerwru minnu. L-​istorjografu Will Durant qal: “Kif jistaʼ sempliċi midneb jissogra jersaq bit-​talb lejn tron li kien daqshekk ’il bogħod u tal-​biżaʼ?”

Alla kif beda jitqies li hu “’l bogħod u tal-​biżaʼ”? X’tgħallem il-​Bibbja verament dwar Alla? Jekk issir taf il-​verità dwar Alla, tistaʼ ssir tħobbu?

DAK LI ĦAFNA JEMMNU

‘Ma lħaqniex ftehim dwar jekk nistgħux biss nitkellmu dwar isem Alla, u jekk inhu hekk, x’jistaʼ jkun dak l-​isem.’—Il-​Professur David Cunningham, Theological Studies.

IL-​VERITÀ MILL-​BIBBJA

Alla qal: “Jien Ġeħova. Dak hu ismi.” (Isaija 42:8) Ġeħova huwa isem bl-​Ebrajk li jfisser “Hu Jġiegħel li Jsir.”—Ġenesi 2:4, nota taʼ taħt.

Ġeħova jridna nużawh ismu. Il-​Bibbja tgħid: “Sejħu ismu. Għarrfu l-​għemejjel tiegħu fost il-​popli. Xandru li ismu qiegħed fl-​għoli.”—Isaija 12:4.

Ġesù użah l-​isem t’Alla. Fit-​talb, Ġesù qal lil Ġeħova: “Għarrafthom ismek [lid-​dixxipli] u nibqaʼ ngħarrfu.” Ġesù għala għarraf l-​isem divin lid-​dixxipli tiegħu? Hu kompla: “Sabiex l-​imħabba li biha ħabbejtni tkun fihom u jien inkun f’unjoni magħhom.”—Ġwanni 17:26.

GĦALA HU IMPORTANTI

“Bniedem li ma jafx lil Alla b’ismu, ma jafux tassew bħala persuna,” kiteb it-​teologu Walter Lowrie, “u ma jistax iħobbu, jekk jafu biss bħala sempliċi forza.”

Raġel jismu Viktor kien imur il-​knisja kull ġimgħa, imma ma kienx iħoss li verament kien jafu lil Alla. “Imbagħad tgħallimt li Alla jismu Ġeħova, u kien bħallikieku introduċewni miegħu uffiċjalment,” jgħid hu. “Ħassejtni qisni li sa fl-​aħħar iltqajt maʼ Dak li tant kont smajt dwaru. Bdejt narah bħala Persuna reali, u bdejt niżviluppa ħbiberija miegħu.”

Mill-​banda l-​oħra, Ġeħova jersaq eqreb lejn nies li jużaw ismu. Lil “dawk li jaħsbu fuq ismu,” Alla jwegħedhom: “Nagħdirhom, sewwasew bħalma raġel jagħder lil ibnu li jaqdih.” (Malakija 3:16, 17) Ukoll, Alla jippremja lil dawk li jsejħulu b’ismu. Il-​Bibbja tgħid: “Kulmin isejjaħ isem Ġeħova jiġi salvat.”—Rumani 10:13.

DAK LI ĦAFNA JEMMNU

“It-​Trinità hi waħda. Ma nistqarrux tliet allat, imma Alla wieħed fi Tliet Persuni: ‘It-​Trinità konsustanzjali’. It-​Tliet Persuni ma jaqsmux bejniethom in-​natura waħda taʼ Alla, imma kull waħda mill-​Persuni hi Alla kollu kemm hu. ‘Il-​Missier hu dak l-​istess li hu l-​Iben, l-​Iben dak l-​istess li hu l-​Missier, il-​Missier u l-​Iben dak l-​istess li hu l-​Ispirtu s-​Santu, jiġifieri Alla wieħed fin-​natura tiegħu’.”—Il-​Katekiżmu tal-​Knisja Kattolika.

IL-​VERITÀ MILL-​BIBBJA

Ġesù, Bin Alla, qatt ma stqarr li kien ugwali maʼ Missieru jew tal-​istess sustanza tiegħu. Minflok, hu qal: “Sejjer għand il-​Missier, għax il-​Missier akbar minni.” (Ġwanni 14:28) Ukoll, lil wieħed mis-​segwaċi tiegħu qallu: “Jien tielaʼ għand Missieri u Missierkom, Alla tiegħi u Alla tagħkom.”—Ġwanni 20:17.

L-​ispirtu qaddis mhuwiex persuna. Il-​Kristjani tal-​bidu “mtlew bl-​ispirtu qaddis,” u Ġeħova qal: “Inferraʼ ftit mill-​ispirtu tiegħi fuq kull xorta taʼ bnedmin.” (Atti 2:1-​4, 17) L-​ispirtu qaddis mhuwiex parti minn Trinità. Huwa l-​forza attiva t’Alla.

GĦALA HU IMPORTANTI

L-​istudjużi Kattoliċi Karl Rahner u Herbert Vorgrimler jispjegaw li t-​Trinità “ma setgħetx tkun magħrufa mingħajr rivelazzjoni, u saħansitra wara r-​rivelazzjoni ma tistax tinftiehem kompletament.” Tistaʼ verament tħobb lil xi ħadd li ma tistax issir tafu jew tifhmu? Id-​duttrina tat-​Trinità, mela, hi taʼ xkiel għal min irid ikun jaf u jħobb lil Alla.

Marco, li ssemma qabel, qies it-​Trinità bħala xkiel. Hu jgħid: “Jien kont naħseb li Alla kien qed jaħbi l-​identità tiegħu minni, u dan wassal biex hu sar iktar imbiegħed, misterjuż, u li ma nistax nersaq lejh.” Però, “Alla mhux Alla tat-​taħwid.” (1 Korintin 14:33, Saydon) Hu ma ħebiex l-​identità tiegħu minna. Hu jridna nsiru nafuh. Ġesù qal: “Aħna nqimu dak li nafu.”—Ġwanni 4:22.

“Meta sirt naf li Alla mhux parti minn Trinità,” jgħid Marco, “sa fl-​aħħar setaʼ jkolli relazzjoni personali miegħu.” Jekk inqisu lil Ġeħova bħala Persuna distinta u mhux xi stranġier misterjuż, ikun bil-​wisq eħfef biex inħobbuh. Il-​Bibbja tgħid: “Min ma jħobbx ma sarx jaf lil Alla, għax Alla hu mħabba.”—1 Ġwanni 4:8.

DAK LI ĦAFNA JEMMNU

“L-​erwieħ taʼ dawk li jmutu fl-​istat tad-​dnub mejjet wara mewthom jinżlu minnufih fl-​infern, fejn isofru għal dejjem il-​pieni tal-​infern, ‘in-​nar taʼ dejjem.’” (Il-​Katekiżmu tal-​Knisja Kattolika) Xi mexxejja reliġjużi jgħidu li l-​infern huwa stat taʼ qtugħ u separazzjoni għalkollox minn Alla.

IL-​VERITÀ MILL-​BIBBJA

“Ir-​ruħ li qed tidneb—din tmut.” (Eżekjel 18:4) Il-​mejtin “ma jafu assolutament xejn.” (Ekkleżjasti 9:5) Jekk ir-​ruħ tmut u ma tkun taf xejn, kif tistaʼ ssofri fin-​“nar taʼ dejjem” jew inkella tħoss l-​uġigħ taʼ separazzjoni għal dejjem minn Alla?

Fil-​Bibbja, il-​kliem bl-​Ebrajk u bil-​Grieg li spiss jiġi tradott “infern” fil-​fatt jirreferi għall-​qabar komuni tal-​bniedem. Pereżempju, meta Ġob sofra minħabba marda taʼ wġigħ, hu talab: “O li fil-​qabar [“fl-​infern,” Douay-​Rheims Version] kont taħbini.” (Ġob 14:13) Ġob ma riedx jistrieħ f’post taʼ turment jew xi mkien maqtugħ minn Alla, imma fil-​qabar.

GĦALA HU IMPORTANTI

Il-​kattiverija ma tħabbibniex m’Alla; pjuttost tbegħedna minnu. “Minn tfuliti ġejt mgħallem id-​duttrina tan-​nar tal-​infern,” tgħid Rocío, li tgħix il-​Messiku. “Tant kont nitwerwer li ma kontx nistaʼ nimmaġina li Alla kellu xi kwalità tajba. Kont naħseb li hu rrabjat u intolleranti.”

L-​istqarrijiet ċari tal-​Bibbja dwar il-​ġudizzji t’Alla u l-​qagħda tal-​mejtin biddlu ħarset Rocío dwar Alla. “Ħassejtni ħielsa—li piż emozzjonali kbir tneħħa minn fuq spallejja,” tgħid hi. “Bdejt nemmen li Alla jrid l-​aħjar għalina, li jħobbna, u li jien nistaʼ nħobb lilu. Hu bħal missier li jaqbad id uliedu u li jixtiqilhom il-​ġid.”—Isaija 41:13.

Ħafna stinkaw biex jgħixu ħajja taʼ devozzjoni minħabba l-​biżaʼ min-​nar tal-​infern, imma Alla ma jridekx taqdih minħabba li titwerwer minnu. Minflok, Ġesù qal: “Ħobb lil Ġeħova Alla tiegħek.” (Marku 12:29, 30) Iktar minn hekk, meta nirrealizzaw li llum Alla ma jaġixxix bl-​inġustizzja, aħna nistgħu nafdaw fil-​ġudizzji futuri tiegħu. Bħal sieħeb Ġob, Eliħu, bil-​fiduċja nistgħu ngħidu: “Ma jistax ikun li l-​Alla l-​veru jaġixxi bil-​ħażen, u li Dak li Jistaʼ Kollox jaġixxi b’mod inġust!”—Ġob 34:10.

Darba f’Ġerusalemm, Ġesù kien qed jitkellem dwar Missieru, Ġeħova, u jikxef lill-​mexxejja reliġjużi foloz taʼ żmienu. (Ġwanni 8:12-​30) Dak li qal f’din l-​okkażjoni jgħallimna kif nistgħu neżaminaw twemmin popolari dwar Alla llum. Ġesù qal: “Jekk tibqgħu fil-​kelma tiegħi, tkunu tassew dixxipli tiegħi, u tkunu tafu l-​verità, u l-​verità teħliskom.”—Ġwanni 8:31, 32.

“Ibqgħu fil-​kelma tiegħi.’ Hawn Ġesù juri kif għandna neżaminaw jekk tagħlim reliġjuż ikunx “il-​verità” jew le. Meta tismaʼ stqarrija dwar Alla, staqsi lilek innifsek: ‘Dan jaqbel maʼ kliem Ġesù u l-​bqija tal-​Iskrittura Mqaddsa?’ Imita lil dawk li semgħu lill-​appostlu Pawlu jitkellem u li “kienu jeżaminaw bir-​reqqa l-​Iskrittura kuljum biex jaraw jekk dak li semgħu [tgħallmu] kienx minnu.”—Atti 17:11.

Marco, Rosa, u Raymonde, li ssemmew fl-​ewwel artiklu taʼ din is-​serje, eżaminaw bir-​reqqa t-​twemmin tagħhom billi studjaw il-​Bibbja max-​Xhieda taʼ Ġeħova. X’tgħallmu?

Marco: “Dak li għallimna l-​Bibbja uża l-​Iskrittura biex iwieġeb kull mistoqsija li kellna jien u marti. Imħabbitna għal Ġeħova bdiet tikber, u aħna sirna eqreb taʼ xulxin bħala koppja miżżewġa!”

Rosa: “Għall-​ewwel, kont naħseb li l-​Bibbja mhi xejn għajr ktieb taʼ filosofija li jipprova jispjega lil Alla billi juża raġunar uman. Però, gradwalment sibt it-​tweġibiet għall-​mistoqsijiet tiegħi mill-​Bibbja. Issa, Ġeħova hu reali għalija. Hu Xi Ħadd li nistaʼ nafdah.”

Raymonde: “Jien tlabt lil Alla għall-​għajnuna biex nitgħallem dwaru. Ftit wara, jien u żewġi bdejna nistudjaw il-​Bibbja. Sa fl-​aħħar, tgħallimna l-​verità dwar Ġeħova! Konna se ntiru bil-​ferħ meta sirna nafu x’tip taʼ Alla hu.”

Il-​Bibbja mhux sempliċement tikxef biss il-​gideb dwar Alla; imma wkoll tirrivela l-​verità dwar il-​kwalitajiet li jiġbduk tiegħu. Hi l-​Kelma ispirata tiegħu, u tgħinna “nkunu nafu dak li ngħatalna b’qalb tajba minn Alla.” (1 Korintin 2:12) Għala ma tarax għalik innifsek kif il-​Bibbja tistaʼ twieġeb mistoqsijiet komuni imma fundamentali dwar Alla, l-​iskop tiegħu, u l-​futur tagħna? Aqra t-​tweġibiet għal ftit minn dawn il-​mistoqsijiet taħt “Tagħlim tal-​Bibbja > Mistoqsijiet Dwar il-​Bibbja Mweġbin” f’www.pr2711.com/mt. Tistaʼ wkoll titlob studju tal-​Bibbja minn fuq din il-​Websajt jew mingħand wieħed mix-​Xhieda taʼ Ġeħova. Aħna fiduċjużi li jekk tagħmel dan, se ssib li hu iktar faċli li tħobb lil Alla milli qatt ħsibt.