Il-Qawwa taʼ Ġesù fuq id-Demonji

TIFTAKAR għala wieħed mill-​anġli t’Alla sar Satana x-​Xitan?— Dan kien egoist u xtaq li jingħata qima, u b’hekk dar kontra Alla. Kien hemm anġli oħrajn li marru maʼ Satana?— Iva, kien hemm. Il-​Bibbja ssejħilhom l-​‘anġli taʼ Satana,’ jew demonji.—Rivelazzjoni 12:9.

Jemmnu f’Alla dawn l-​anġli, jew demonji, ħżiena?— ‘Id-​demonji jemmnu li Alla jeżisti,’ tgħid il-​Bibbja. (Ġakbu 2:19) Imma issa dawn qed jibżgħu. Ir-​raġuni hi li huma jafu li Alla se jagħtihom kastig talli għamlu affarijiet ħżiena. X’għamlu ħażin?—

Il-​Bibbja tgħid li dawn l-​anġli telqu mid-​dar tagħhom fis-​sema fejn suppost jgħixu u niżlu fuq l-​art biex jgħixu bħala bnedmin. Huma għamlu dan għax xtaqu jkollhom relazzjonijiet sesswali man-​nisa sbieħ fuq l-​art. (Ġenesi 6:​1, 2; Ġuda 6) Int x’taf dwar ir-​relazzjonijiet sesswali?—

Ir-​relazzjonijiet sesswali huma meta raġel u mara jersqu qrib xulxin b’mod speċjali ħafna. Wara, tarbija tkun tistaʼ tikber ġewwa ommha. Imma hu ħażin li l-​anġli jkollhom relazzjonijiet sesswali. Alla jrid li raġel u mara biss li jiżżewġu lil xulxin ikollhom relazzjonijiet sesswali. B’hekk, jekk titwieled tarbija, ir-​raġel u l-​mara jkunu jistgħu jieħdu ħsiebha.

Meta l-​anġli għamlu ġisem taʼ bniedem għalihom u għamlu s-​sess man-​nisa fuq l-​art, it-​trabi tagħhom kibru u saru ġganti. Dawn kienu kattivi ħafna, u kienu jweġġgħu lin-​nies. Għalhekk, Alla għamel dilluvju kbir biex jeqred lill-​ġganti u lin-​nies ħżiena kollha. Imma hu qabbad lil Noè jibni arka, jew dgħajsa kbira, biex isalva lil dawk il-​ftit nies li għamlu dak li kien tajjeb. L-​Għalliem il-​Kbir qal li huwa importanti li niftakru x’ġara fid-​Dilluvju.—Ġenesi 6:​3, 4, 13, 14; Luqa 17:​26, 27.

Meta ġie d-​Dilluvju, taf xi ġralhom l-​anġli ħżiena?— Huma ma baqgħux jużaw il-​ġisem taʼ bniedem li kienu għamlu, u marru lura fis-​sema. Imma ma setgħux ikunu iktar anġli t’Alla, u għalhekk saru anġli taʼ Satana, jew demonji. U xi ġralhom it-​tfal tagħhom, il-​ġganti?— Dawn mietu fid-​Dilluvju. U l-​istess ġralhom in-​nies l-​oħra kollha li m’obdewx lil Alla.

Minn dakinhar tad-​Dilluvju, Alla ma ħalliex lid-​demonji jsiru bħall-​bnedmin iktar. Imma għalkemm ma nistgħux narawhom, id-​demonji xorta għadhom jipprovaw iġagħlu lin-​nies jagħmlu affarijiet ħżiena ħafna. Huma qed jaqilgħu ħafna iktar inkwiet minn qatt qabel. Dan għaliex huma tkeċċew mis-​sema ’l isfel lejn l-​art.

Taf għala ma nistgħux narawhom lid-​demonji?— Għax huma spirti, jiġifieri m’għandhomx ġisem bħal tal-​bnedmin. Imma nistgħu nkunu ċerti li huma ħajjin. Il-​Bibbja tgħid li Satana qiegħed ‘iqarraq bin-​nies fid-​dinja kollha,’ u d-​demonji tiegħu qed jgħinuh.​—Rivelazzjoni 12:​9, 12.

Jistgħu x-​Xitan u d-​demonji tiegħu iqarrqu, jew jidħqu, bina wkoll?— Iva, jistgħu jekk ma noqogħdux attenti. Imma m’għandniex għalfejn nibżgħu. L-​Għalliem il-​Kbir qal: ‘Ix-​Xitan m’għandu ebda setgħa fuqi.’ Jekk nibqgħu ħbieb t’Alla, hu se jipproteġina mix-​Xitan u d-​demonji tiegħu.​—Ġwanni 14:30.

Huwa importanti li nkunu nafu x’inhuma l-​affarijiet ħżiena li d-​demonji jipprovaw iġagħluna nagħmlu. Mela aħseb ftit. Id-​demonji x’affarijiet ħżiena għamlu meta ġew fuq l-​art?— Qabel id-​Dilluvju, huma kellhom relazzjonijiet sesswali man-​nisa, xi ħaġa li ma kinitx sew li l-​anġli jagħmluha. Illum id-​demonji jieħdu pjaċir meta n-​nies ma jobdux il-​liġi t’Alla dwar ir-​relazzjonijiet sesswali. Ħalli nistaqsik, Min biss jistaʼ jkollu relazzjonijiet sesswali?— Sewwa weġibt, il-​miżżewġin biss.

Illum xi subien u bniet żgħar ikollhom relazzjonijiet sesswali, imma dan hu ħażin għalihom. Il-​Bibbja turi li Alla għamel l-​organi, jew il-​partijiet, ġenitali tar-​raġel (penis) u tal-​mara (vulva). Ġeħova ħalaq dawn il-​partijiet tal-​ġisem għal skop speċjali li għandhom igawduh biss il-​miżżewġin. Id-​demonji jifirħu meta n-​nies jagħmlu affarijiet li Ġeħova ma jridhomx jagħmlu. Per eżempju, id-​demonji jieħdu pjaċir meta tifel u tifla joqogħdu jmissu l-​partijiet ġenitali taʼ xulxin. Aħna ma rridux inferrħu lid-​demonji, hux tassew?—

Hemm xi ħaġa oħra li d-​demonji jħobbu imma li Ġeħova jobgħod. Taf x’inhi?— Il-​vjolenza. (Salm 11:5) Il-​vjolenza ssir meta n-​nies ikunu kattivi u jweġġgħu lil oħrajn. Ftakar, il-​ġganti, jew it-​tfal tad-​demonji, hekk kienu għamlu.

Id-demonji jieħdu pjaċir ukoll ibeżżgħu lin-​nies. Xi kultant huma taparsi jsiru nies li diġà mietu. Jistgħu anki jimitaw il-​leħen taʼ dawk li mietu. B’dan il-​mod, id-​demonji jidħqu b’ħafna nies u jġagħluhom jemmnu li n-​nies mejtin huma ħajjin u jistgħu jitkellmu maʼ min għadu ħaj. Iva, id-​demonji jġagħlu lil ħafna nies jemmnu bil-​fatati.

Mela aħna rridu noqogħdu attenti li Satana u d-​demonji tiegħu ma jidħqux bina. Il-​Bibbja twissi: ‘Satana jipprova jagħmel lilu nnifsu jidher anġlu tajjeb, u l-​qaddejja tiegħu jagħmlu l-​istess.’ (2 Korintin 11:​14, 15) Imma, fil-​fatt, id-​demonji huma ħżiena. Ejja naraw kif huma jistgħu jipprovaw iġagħluna nkunu bħalhom.

In-nies minfejn jitgħallmu ħafna dwar il-​vjolenza u s-​sess ħażin u lispirti u l-​fatati?— Mhux billi jaraw ċerti programmi u films tat-​televixin, jilagħbu logħob tal-​kompjuter, jidħlu fl-​Internet, u jaqraw kotba tal-​komiks? Jekk nagħmlu dawn l-​affarijiet se nersqu eqreb lejn Alla jew eqreb lejn ix-​Xitan u d-​demonji tiegħu? Int x’taħseb?—

Min taħseb li jixtieqna nisimgħu u naraw affarijiet ħżiena?— Iva, Satana u d-​demonji tiegħu jixtiequ hekk. Mela, jien u int xi rridu nagħmlu?— Irridu naqraw, nisimgħu, u naraw affarijiet li huma tajbin għalina u li se jgħinuna naqdu lil Ġeħova. Tistaʼ taħseb f’xi ftit minn dawn l-​affarijiet tajbin li nistgħu nagħmlu?—

Jekk nagħmlu t-​tajjeb, m’hemmx għalfejn nibżgħu mid-​demonji. Ġesù hu b’saħħtu iktar minnhom, u huma jibżgħu minnu. Darba waħda d-​demonji għajtu lil Ġesù: “Ġejt biex teqridna?” (Marku 1:24) M’aħniex se nieħdu pjaċir meta jiġi ż-​żmien biex Ġesù jeqred lil Satana u d-​demonji tiegħu?— Sakemm jiġi dak iż-​żmien, nistgħu nibqgħu ċerti li Ġesù se jipproteġina mid-​demonji jekk aħna nibqgħu ħbieb tiegħu u taʼ Missieru tas-​sema.