Kif Ġesù Ġie Protett

ĠEĦOVA xi kultant jagħmel affarijiet kbar biex jipproteġi lil dawk li għadhom żgħar u li ma jistgħux jipproteġu lilhom infushom. Jekk tmur passiġġata fil-​kampanja, tistaʼ forsi tara mod wieħed kif Ġeħova jagħmel dan. Imma għall-​ewwel forsi ma tindunax x’qed jiġri eżattament.

Jistaʼ jkun li tara għasfur jinżel fl-​art ħdejk. Jidher imweġġaʼ. Qed ikaxkar ġewnaħ u jitlaq jiġri malli tipprova tmur ħdejh. Iktar ma tipprova tmur warajh, l-​għasfur iktar jitlaq ’l hemm. Imbagħad, f’daqqa waħda, l-​għasfur itir. Mela mhux veru li kellu ġewnaħ ferut! Taf x’kien qed jagħmel dak l-​għasfur?—

Ftit ’il bogħod minfejn niżel l-​għasfur ħdejk, kien hemm il-​frieħ tiegħu moħbijin fil-​ħaxix. L-​għasfura omm beżgħet li int issibhom u tweġġagħhom. Għalhekk bdiet timxi fl-​art taparsi weġġgħet u ħaditek ’il bogħod minnhom. Taf min jistaʼ jipproteġina bħalma għasfura omm tipproteġi lill-​frieħ tagħha?— Fil-​Bibbja, Ġeħova jitqabbel maʼ l-​ajkla, għasfur li jgħin liż-​żgħar tiegħu.—Dewteronomju 32:​11, 12.

L-​iktar tifel prezzjuż taʼ Ġeħova hu Ibnu l-​għażiż, Ġesù. Meta Ġesù kien fis-​sema, hu kien persuna spirtu mimli qawwa bħal Missieru. Hu setaʼ jieħu ħsieb tiegħu nnifsu. Imma meta Ġesù twieled fuq l-​art bħala tarbija, ma kellux qawwa. Ried lil xi ħadd biex jipproteġih.

Biex ikun jistaʼ jagħmel dak li ried Alla fuq l-​art, Ġesù kellu jikber u jsir raġel adult u perfett. Madankollu, Satana pprova joqtol lil Ġesù qabel ma setaʼ jiġri dan. L-​istorja taʼ kif Satana pprova joqtol lil Ġesù meta kien għadu tifel u kif Ġeħova pproteġieh hija eċċitanti ħafna. Tixtieq tismagħha?—

Ftit żmien wara li Ġesù jitwieled, Satana jagħmel xi ħaġa tidher qisha stilla tiddi fis-​sema, fin-​naħa tal-​Lvant. Xi astroloġi, irġiel li jistudjaw l-​istilel, jivvjaġġaw ’il bogħod ħafna fejn tiħodhom l-​istilla sakemm jaslu Ġerusalemm. Hemmhekk jistaqsu fejn kien se jitwieled dak li kellu jkun is-​sultan tal-​Lhud. Meta xi ħadd jistaqsi lil xi rġiel li jafu x’tgħid il-​Bibbja, dawn iwieġbu: “F’Betlehem.”—Mattew 2:​1-6.

Erodi, is-​sultan ħażin f’Ġerusalemm, jismaʼ dwar dan is-​sultan ġdid li twieled ftit taż-​żmien ilu fil-​belt taʼ Betlehem li kienet qrib. Hu jgħid lill-​astroloġi: ‘Fittxu u sibu lit-​tifel, u mbagħad ejjew għiduli.’ Taf għala Erodi jrid ikun jaf fejn jistaʼ jsib lil Ġesù?— Għax Erodi qed jgħir u jrid joqtlu!

Alla kif jipproteġi lil Ibnu?— Sewwa, meta l-​astroloġi jsibu lil Ġesù, dawn jagħtuh ir-​rigali. Wara, Alla jwissi lill-​astroloġi permezz taʼ ħolma biex ma jerġgħux imorru għand Erodi. Għalhekk huma jmorru d-​dar minn triq oħra u ma jgħaddux minn Ġerusalemm. Meta Erodi jsir jaf li l-​astroloġi telqu, hu jirrabja ħafna. Biex jipprova joqtol lil Ġesù, Erodi jordna li jinqatlu t-​tfal subien kollha f’Betlehem li għandhom inqas minn sentejn! Imma sa dakinhar, Ġesù jkun laħaq telaq minn hemm.

Taf kif jaħrab Ġesù?— Wara li l-​astroloġi jitilqu biex imorru lura d-​dar, Ġeħova jwissi lil Ġużeppi, ir-​raġel taʼ Marija, biex iqum u jaħrab bil-​familja ’l bogħod lejn l-​Eġittu. Hemmhekk, Erodi l-​ħażin ma jistaʼ jagħmillu xejn lil Ġesù. Snin wara, meta Marija u Ġużeppi jitilqu b’Ġesù mill-​Eġittu, Alla jerġaʼ jwissi lil Ġużeppi. Hu jgħidlu f’ħolma biex imur joqgħod f’Nazaret, fejn Ġesù jkun protett.—Mattew 2:​7-23.

Qed tara kif Ġeħova pproteġa lil Ibnu?— Min taħseb li hu bħal dawk l-​għasafar żgħar li ommhom ħbiethom fil-​ħaxix jew bħal Ġesù meta kien għadu tifel żgħir? Int qisek bħalhom, hux veru?— Hemm uħud li jixtiequ jweġġgħu lilek ukoll. Taf min?—

Il-Bibbja tgħid li Satana hu bħal iljun jgħajjat li jrid jikolna. U l-​istess bħalma l-​iljuni spiss jattakkaw lil annimali żgħar, Satana u d-​demonji tiegħu spiss jattakkaw lit-​tfal. (1 Pietru 5:8) Imma Ġeħova hu iktar b’saħħtu minn Satana. Ġeħova jistaʼ jipproteġi lit-​tfal tiegħu jew ineħħilhom il-​ħsara li jagħmlilhom Satana.

Tiftakar minn Kapitlu 10 taʼ dan il-​ktieb x’jipprovaw iġagħluna nagħmlu x-​Xitan u d-​demonji tiegħu?— Iva, huma jipprovaw iġagħluna jkollna ċerti relazzjonijiet sesswali. Alla jgħid li mhux ir-​relazzjonijiet sesswali kollha huma tajbin. Min biss jistaʼ jkollu relazzjonijiet sesswali?— Iva, raġel u mara li huma miżżewġin lil xulxin.

Madankollu, b’dispjaċir, xi nies kbar jieħdu pjaċir jagħmlu s-​sess mat-​tfal. Meta jagħmlu hekk, is-​subien u l-​bniet jistgħu jibdew jagħmlu affarijiet ħżiena li jkunu tgħallmu mingħand il-​kbar. Huma jibdew ukoll jużaw l-​organi sesswali tagħhom b’mod ħażin. Hekk ġara ħafna żmien ilu fil-​belt taʼ Sodoma. Il-​Bibbja tgħid li n-​nies t’hemmhekk, “miż-​żgħir sal-​kbir,” ipprovaw jagħmlu s-​sess maʼ xi rġiel li kienu marru jaraw lil Lot.—Korsiv tagħna; Ġenesi 19:​4, 5.

Mela bħalma Ġesù kellu bżonn il-​protezzjoni, int ukoll trid tiġi protett mill-​kbar​—u anki minn tfal oħra​—li forsi jipprovaw jagħmlu s-​sess miegħek. Ġeneralment, dawn in-​nies taparsi jkunu l-​ħbieb tiegħek. Forsi anki jagħtuk xi ħaġa jekk twegħedhom li ma tgħid lil ħadd dwar dak li jridu jagħmlu miegħek. Imma dawn in-​nies huma egoisti, bħal Satana u d-​demonji tiegħu. Huma jridu biss li jieħdu pjaċir, u għalhekk jipprovaw jieħdu dan il-​pjaċir billi jagħmlu s-​sess mat-​tfal. Dan hu ħażin ħafna!

Taf x’jistgħu jagħmlu biex jieħdu pjaċir?— Forsi jistgħu jipprovaw jilagħbu bl-​organi sesswali tiegħek. Jew jistgħu anki jmissu l-​organi sesswali tagħhom maʼ tiegħek. Imma int m’għandek qatt tħalli lil xi ħadd jilgħab bl-​organi sesswali tiegħek. Lanqas lil ħuk jew oħtok jew lil ommok jew missierek. Dawn il-​partijiet taʼ ġismek huma persunali.

Kif tistaʼ tipproteġi lil ġismek minn nies li jagħmlu affarijiet ħżiena bħal dawn?— L-​ewwelnett, tħalli lil ħadd jilgħab bl-​organi sesswali tiegħek. Jekk xi ħadd jipprova jagħmel hekk, għidlu b’leħen sod u jgħajjat: “Ieqaf! Se nugżak!” U jekk dan il-​bniedem jgħidlek li dak li ġara huwa t-​tort tiegħek, temmnux. Dan mhux veru. Aqbad u mur ugżah, ikun min ikun! Għandek tagħmel hekk anki jekk dan jgħidlek li dak li qegħdin tagħmlu flimkien huwa sigriet bejnek u bejnu biss. Anki jekk dan il-​bniedem iwiegħdek rigali sbieħ jew ibeżżgħek għax jgħidlek li se jagħmillek xi ħaġa kerha, għandek titlaq minn ħdejh u tugżah xorta.

M’għandikx għalfejn tibżaʼ, imma trid toqgħod attent. Meta l-​ġenituri tiegħek iwissuk dwar nies jew postijiet li jistgħu jkunu taʼ periklu għalik, int trid tismaʼ minnhom. Jekk tagħmel hekk, in-​nies ħżiena mhux se jkollhom iċ-​ċans li jweġġgħuk.