Għandek Int Ruħ Immortali?

Aħna sempliċement bnedmin tad-​demm u l-​laħam? Jew nikkonsistu f’xi ħaġa oħra minbarra l-​elementi li aħna maħluqin bihom? Hija l-​ħajja tagħna temporanja? Jew hemm xi parti inviżibbli minna li tibqaʼ tgħix wara l-​mewt?

GĦALKEMM ir-​reliġjonijiet tad-​dinja żviluppaw ħafna twemmin differenti dwar il-​ħajja wara l-​mewt, ħafna minnhom jaqblu fuq idea bażika waħda: Xi ħaġa ġewwa persuna hija immortali u tibqaʼ tgħix wara l-​mewt. Ħafna nies jemmnu li din il-​“ħaġa” hija r-​ruħ. Int x’temmen? Għandna aħna ġisem fiżiku u wkoll ruħ? X’inhi r-​ruħ? Għandhom il-​bnedmin ruħ immortali? Kemm hu vitali li nkunu nafu l-​verità dwar x’aħna!

“Il-​Bniedem Sar Ruħ Ħajja”

Hija r-​“ruħ” parti mill-​bniedem li tinfired mill-​ġisem fil-​mewt u tibqaʼ tgħix? Skond il-​Holman Illustrated Bible Dictionary, “spiss ir-​ruħ tiġi meqjusa bħala l-​persuna kollha kemm hi.” Per eżempju, Ġenesi 2:7 (Karm Żammit) jgħid: “Il-​Mulej Alla sawwar il-​bniedem bit-​trab taʼ l-​art, u nefaħ f’imnifsejh nifs il-​ħajja; u l-​bniedem sar ruħ ħajja.” L-​ewwel bniedem, Adam, kien ruħ.

Il-fehma li l-​kelma “ruħ” tistaʼ tfisser il-​persuna kollha kemm hi hija appoġġata minn skritturi oħrajn. Per eżempju, il-​Bibbja titkellem dwar ir-​ruħ li tkun qed taħdem. (Levitiku 23:​30, NW) Ir-​ruħ tiġi deskritta bħala li qed turi nuqqas taʼ paċenzja, qed tiġi turmentata, qed tinfena, qed tibżaʼ, u hi dipressa. (Mħallfin 16:​16, NW; Ġob 19:​2, KŻ; Salm 119:​28, KŻ; Atti 2:​43; 1 Tessalonikin 5:​14) Billi jirreferi għar-​ruħ bħala persuna, Rumani 13:1 jgħid: “Ħa tkun kull ruħ sottomessa lejn l-​awtoritajiet superjuri.” U fl-​1 Pietru 3:​20, naqraw: “Fi żmien Noè, . . . ftit nies, jiġifieri, tmien erwieħ, inġarrew mill-​ilma u ġew salvati.” Xejn f’dawn l-​iskritturi ma jindika li r-​ruħ hija xi entità f’għamla taʼ spirtu li tibqaʼ tgħix wara l-​mewt.

Xi ngħidu dwar l-​annimali u l-​pjanti? Huma dawn erwieħ? Ikkunsidra kif il-​Bibbja tiddeskrivi l-​ħolqien taʼ l-​annimali. “Ħa jkunu miżgħuda l-​ilmijiet b’kotra t’erwieħ ħajjin,” ikkmanda Alla. Fil-​jum taʼ ħolqien taʼ wara, Alla qal: “Ħa tnissel l-​art erwieħ ħajjin skond ġenshom, l-​annimali domestiċi u l-​annimali li jitkaxkru u l-​bhejjem salvaġġi taʼ l-​art skond ġenshom.” (Ġenesi 1:​20, 24, NW) Għalhekk, il-​ħlejjaq ħajjin kollha​—umani jew annimali​—huma erwieħ. Fil-​Bibbja, il-​pjanti m’humiex imsejħin erwieħ.

Il-kelma “ruħ” tintuża wkoll b’mod ieħor. F’Ġob 33:​22 naqraw: “Toqrob ruħu lejn il-​qabar, u ħajtu lejn dar il-​mejtin.” Hawnhekk, it-​termini “ruħu” u “ħajtu” jintużaw bħala sinonimi, waħda tenfasizza t-​tifsira taʼ l-​oħra. Allura, “ruħ” tistaʼ tirreferi wkoll għall-​ħajja li wieħed igawdi bħala ruħ ħajja, jew persuna. Għalhekk, l-​Iskrittura tirreferi għall-​għedewwa taʼ Mosè li kienu qed ifittxu biex joqtluh bħala ‘l-​irġiel kollha li kienu qed ifittxu lil ruħu.’ (Eżodu 4:​19, NW) U rigward Ġesù Kristu, il-​Bibbja tgħid: ‘Bin il-​bniedem ġie biex jagħti ruħu [ħajtu] b’fidwa għal ħafna.’​—Mattew 20:28.

It-tifsira Biblika għal “ruħ” hija sempliċi u konsistenti. Il-​kelma tistaʼ tirreferi għal bniedem jew annimal jew għall-​ħajja li ħlejqa tgawdi bħala ruħ ħajja. Bħalma se naraw, din il-​fehma hija fi qbil maʼ dak li l-​Bibbja tgħid li jiġri lir-​ruħ fil-​mewt.

“Ir-​Ruħ li Tidneb, Tmut”

Il-​Bibbja tgħid: “Ir-​ruħ li tidneb, tmut.” (Eżekjel 18:​4, KŻ) Il-​profeta mnikket Elija “beda jitlob li ruħu tmut.” (1 Slaten 19:​4, NW) Bl-​istess mod, Ġona “baqaʼ jitlob li ruħu tmut.” (Ġona 4:8) Iva, ir-​ruħ tmut meta l-​persuna tmut; m’hijiex immortali. Ladarba persuna hija ruħ, meta tgħid li xi ħadd miet tkun qisek qed tgħid li ruħu mietet.

Imma xi ngħidu dwar versi Bibliċi li jitkellmu dwar il-​fatt li r-​ruħ toħroġ u terġaʼ lura? Rigward dak li ġralha Rakel meta wildet lil binha, il-​Bibbja tgħid: “Hi u ħierġa ruħha​—għax kienet qiegħda tmut​—sejjħet ismu Benoni, iżda missieru semmieh Benjamin.” (Ġenesi 35:18) U rigward l-​irxoxt taʼ bin armla, l-​1 Slaten 17:22 jgħid: “Il-​Mulej samaʼ leħen Elija [fit-talb], u ruħ it-​tifel reġgħet lura fih, u ħa l-​ħajja.” Jindikaw dawn il-​versi li r-​ruħ hija xi parti inviżibbli li tistaʼ taħrab mill-​ġisem jew tidħol fih?

Ftakar li tifsira waħda għall-​kelma “ruħ” hija “ħajja.” Għalhekk, ruħ Rakel kienet ħierġa minnha fis-​sens li ħajjitha kienet qed tintemm. Fil-​fatt, xi Bibbji jittraduċu din il-​frażi “ħierġa ruħha” bħala “ħajjitha kienet qed tgħib” (Knox) u “hi ħadet l-​aħħar nifs tagħha” (Jerusalem Bible). B’mod simili, fil-​każ taʼ bin l-​armla, it-​tifel reġaʼ ħa l-​ħajja.​—1 Slaten 17:23.

In-​Natura tal-​Bniedem

B’mod ċar, il-​Bibbja turi x’inhu l-​bniedem. Hu m’għandux ruħ; hu ruħ. Minħabba dak li hu l-​bniedem​—in-​natura tiegħu​—kwalunkwe tama għal ħajja futura għall-​mejtin tiddependi minn irxoxt, jew qawmien. Il-​Bibbja twiegħed: “Tistagħġbux b’dan, għax ġejja s-​siegħa li fiha dawk kollha li qegħdin fl-​oqbra tat-​tifkira jisimgħu leħnu [taʼ Ġesù] u joħorġu, dawk li għamlu t-​tajjeb għal irxoxt taʼ ħajja, dawk li pprattikaw affarijiet vili għal irxoxt taʼ ġudizzju.” (Ġwanni 5:​28, 29) Din il-​wegħda ċerta taʼ rxoxt​—mhux it-​tagħlim taʼ l-​immortalità tar-​ruħ—hija l-​bażi għal tama vera għall-​mejtin.

Kemm hu vitali li niksbu għarfien eżatt taʼ x’inhu l-​irxoxt u xi jfisser għall-​umanità! Għarfien dwar Alla u Kristu wkoll huwa essenzjali, għax f’talba Ġesù qal: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.” (Ġwanni 17:3) Ix-​Xhieda taʼ Ġeħova fil-​komunità tiegħek se jkunu ferħanin biex jgħinuk tistudja l-​Bibbja sabiex tkun tistaʼ tkabbar l-​għarfien tiegħek dwar Alla, Ibnu, u l-​wegħdi Tiegħu. Aħna nistidnuk tikkuntattja lix-​Xhieda taʼ Ġeħova jew tikteb lill-​pubblikaturi taʼ din ir-​rivista.

[Stampi f’paġna 4]

Huma kollha erwieħ

[Sors]

Mogħża: CNPC​—Centro Nacional de Pesquisa de Caprinos (Sobral, CE, Brasil)