Kristjani​—Kunu Kburin bl-​Identità Tagħkom!

“Min jiftaħar, ħa jiftaħar b’Ġeħova.”—1 KORINTIN 1:31.

1. Liema tendenza tidher ċara fl-​attitudni tan-​nies lejn ir-​reliġjon?

“APATEIŻMU.” Kummentatur dwar kwistjonijiet reliġjużi dan l-​aħħar uża din il-​kelma biex jiddeskrivi l-​attitudni li ħafna nies għandhom lejn it-​twemmin tagħhom. Hu spjega: “L-​akbar żvilupp fir-​reliġjon moderna żgur li m’huwiex ir-​reliġjon​—huwa l-​attitudni li hi deskritta l-​aħjar bħala ‘apateiżmu.’” Meta spjega l-​apateiżmu, hu ddeskrivieh “bħala nuqqas taʼ interess fir-​reliġjon taʼ dak li jkun.” Hu osserva li ħafna nies “jemmnu f’Alla . . . ; imma xejn ma jinteressahom fih.”

2. (a) Għala ma nissorprendux ruħna mill-​fatt li n-​nies saru apatetiċi spiritwalment? (b) L-​indifferenza b’liema mod hija taʼ periklu għall-​Kristjani veri?

² Din it-​tendenza lejn l-​apatija ma tissorprendix lill-​istudenti tal-​Bibbja. (Luqa 18:8) U meta nitkellmu dwar ir-​reliġjon b’mod ġenerali, nistennew li nsibu dan in-​nuqqas taʼ interess. Ir-​reliġjon falza ilha ħafna tqarraq bil-​bnedmin u tiddiżappuntahom. (Rivelazzjoni 17:​15, 16) Madankollu, għall-​Kristjani ġenwini l-​ispirtu taʼ nofs qalb u n-​nuqqas taʼ żelu li jidher kullimkien huwa perikoluż. Ma nistgħux nissograw li nsiru apatetiċi dwar it-​twemmin tagħna u nitilfu ż-​żelu fis-​servizz tagħna lil Alla u għall-​verità tal-​Bibbja. Ġesù wissa kontra din il-​bruda meta avża lill-​Kristjani taʼ l-​ewwel seklu li kienu jgħixu f’Laodiċija: “La int kiesaħ u lanqas sħun. Nixtieq li kont kiesaħ inkella sħun . . . Għax int fietel.”​—Rivelazzjoni 3:​15-​18.

Naraw Min Aħna

3. Il-​Kristjani b’liema aspetti taʼ l-​identità tagħhom għandhom għalxiex ikunu kburin?

³ Biex jiġġieldu l-​apatija spiritwali, il-​Kristjani jrid ikollhom ħarsa ċara dwar min huma, u jridu jkunu kburin b’mod raġunevoli bl-​identità differenti tagħhom. Bħala qaddejja taʼ Ġeħova u dixxipli taʼ Kristu, fil-​Bibbja nistgħu nsibu deskrizzjonijiet taʼ min aħna. Aħna “xhieda” taʼ Ġeħova, “ħaddiema sħab m’Alla,” hekk kif ninsabu attivi naqsmu “l-​aħbar tajba” maʼ oħrajn. (Isaija 43:10; 1 Korintin 3:9; Mattew 24:14) Aħna nies li ‘nħobbu lil xulxin.’ (Ġwanni 13:34) Il-​Kristjani veri huma individwi li “bl-​użu għandhom is-​sensi tagħhom imħarrġin biex jagħrfu jagħżlu kemm it-​tajjeb u kemm il-​ħażin.” (Ebrej 5:​14) Aħna “dawwala fid-​dinja.” (Filippin 2:​15) Aħna nistinkaw biex ‘inżommu kondotta tajba fost il-​ġnus.’​—1 Pietru 2:​12; 2 Pietru 3:​11, 14.

4. Aduratur taʼ Ġeħova kif jistaʼ jiddetermina x’m’huwiex?

⁴ L-​aduraturi veri taʼ Ġeħova jafu wkoll x’m’humiex. “M’humiex parti mid-​dinja,” sewwasew bħalma l-​Mexxej tagħhom, Ġesù Kristu, ma kien ebda parti mid-​dinja. (Ġwanni 17:16) Huma jibqgħu separati mill-​“ġnus,” li qegħdin “fi dlam mentali u mbegħdin mill-​ħajja li jagħti Alla.” (Efesin 4:​17, 18) Bħala riżultat, is-​segwaċi taʼ Ġesù ‘jwarrbu dak kollu li hu kontra r-​rieda t’Alla u x-​xewqat tad-​dinja u jgħixu sewwa b’moħħ f’loku u b’devozzjoni lejn Alla f’din is-​sistema.’​—Titu 2:​12.

5. X’jindika t-​tħeġġiġ biex ‘niftaħru b’Ġeħova’?

⁵ Il-​fatt li jkollna ħarsa ċara dwar l-​identità tagħna u dwar ir-​relazzjoni li għandna mal-​Ħakkiem Sovran taʼ l-​univers iqanqalna ‘niftaħru b’Ġeħova.’ (1 Korintin 1:31) X’tip taʼ ftaħir hu dan? Bħala Kristjani veri, aħna kburin li għandna lil Ġeħova bħala Alla tagħna. Aħna nsegwu t-​twissija: “Min irid jiftaħar, b’dan għandu jiftaħar: li għandu d-​dehen biex jagħrafni, għax jien hu l-​Mulej, li nagħmel it-​tjieba, il-​ħaqq, u s-​sewwa fuq l-​art.” (Ġeremija 9:23 [9:​24, NW]) Aħna ‘niftaħru’ bil-​privileġġ li għandna li nafu lil Alla u li hu jużana biex ngħinu lill-​oħrajn.

L-​Isfida

6. Għala xi wħud isibuha taʼ sfida li jżommu ċar f’moħħhom l-​identità tagħhom bħala Kristjani?

⁶ Huwa minnu li m’huwiex dejjem faċli li nżommu ċar f’moħħna l-​identità unika tagħna bħala Kristjani. Żagħżugħ li trabba bħala Kristjan jiftakar li għal xi żmien hu għadda minn żmien taʼ dgħjufija spiritwali: “Kultant kont inħoss li ma kontx naf għala jien wieħed mix-​Xhieda taʼ Ġeħova. Kont ili fil-​verità minn ċkuniti. Ġieli kont inħoss li din sempliċement kienet reliġjon bħall-​kumplament tar-​reliġjonijiet stabbiliti l-​oħra.” Oħrajn għandhom mnejn ħallew l-​identità tagħhom tiġi influwenzata mid-​divertiment tad-​dinja, mill-​mezzi taʼ komunikazzjoni, u mill-​ħarsa lejn il-​ħajja li hi komuni bħalissa u li m’hijiex fi qbil maʼ dik t’Alla. (Efesin 2:​2, 3) Kultant il-​Kristjani jgħaddu minn perijodi taʼ inċertezzi u jerġgħu jibdew jikkunsidraw il-​valuri u l-​miri tagħhom.

7. (a) Liema tip taʼ eżami persunali huwa xieraq li jagħmlu l-​qaddejja t’Alla? (b) Liema periklu moħbi jistaʼ jkun hemm?

⁷ Huwa ħażin li kultant neżaminaw sew lilna nfusna? Le. Għandek mnejn tiftakar li l-​appostlu Pawlu inkuraġġixxa lill-​Kristjani biex jibqgħu jeżaminaw lilhom infushom: “Ibqgħu għarblu jekk intomx fil-​fidi, ibqgħu agħtu prova taʼ x’intom.” (2 Korintin 13:5) L-​appostlu hawn kien qed jinkuraġġihom biex jagħmlu sforz xieraq biex jidentifikaw kwalunkwe dgħjufija spiritwali li setgħet żviluppat, bil-​mira li jieħdu l-​passi meħtieġa biex jirranġawha. Meta Kristjan jgħarbel jekk huwiex fil-​fidi, irid jiddetermina jekk kliemu u l-​għemejjel tiegħu humiex fi qbil maʼ dak li jgħid li jemmen. Madankollu, jekk ma jsirx kif suppost, eżami tagħna nfusna se jkun bla sens u jistaʼ jeqridna spiritwalment jekk iġagħalna nħossu li rridu nfittxu l-​“identità” tagħna jew infittxu tweġibiet li m’humiex konnessi mar-​relazzjoni tagħna maʼ Ġeħova jew barra l-​kongregazzjoni Kristjana.a Aħna qatt ma rridu ‘nġarrbu nawfraġju fil-​fidi tagħna’!​—1 Timotju 1:​19.

M’Aħniex Meħlusin mill-​Isfidi

8, 9. (a) Mosè kif esprima s-​sentimenti tiegħu taʼ inċertezzi? (b) Ġeħova kif irreaġixxa meta Mosè ħassu limitat? (ċ) Kif tiġi effettwat meta Ġeħova jserraħlek moħħok?

⁸ Għandhom il-​Kristjani li kultant ikollhom xi inċertezzi jħossuhom li fallew? Dażgur li le! Tabilħaqq, huma jistgħu jsibu l-​faraġ mill-​fatt li jafu li dawn is-​sentimenti m’humiex ġodda. Ix-​xhieda leali t’Alla fil-​passat esperjenzawhom ukoll. Per eżempju, ejja nikkunsidraw lil Mosè, li wera fidi, lealtà, u devozzjoni straordinarja. Meta ngħata inkarigu li deher kbir wisq, Mosè staqsa b’inċertezza: “Min jien?” (Eżodu 3:11) Milli jidher, it-​tweġiba li kellu f’moħħu kienet, ‘Jien ma jien xejn!’ jew ‘M’iniex kapaċi!’ Diversi aspetti mill-​isfond taʼ Mosè setgħu ġagħluh iħossu li ma kienx adegwat: Hu kien jappartjeni lil ġens taʼ lsiera. Ġie miċħud mill-​Iżraelin. Ma kienx kelliemi fluwenti. (Eżodu 1:​13, 14; 2:​11-​14; 4:​10) Hu kien ragħaj, xogħol li l-​Eġizzjani ma kinux jaħmluh. (Ġenesi 46:34) Mhux taʼ b’xejn li ma ħassux adegwat biex isir il-​ħellies tal-​poplu t’Alla mill-​jasar!

⁹ Ġeħova serraħlu moħħu lil Mosè billi tah żewġ wegħdi qawwija: “Jiena nkun miegħek, u dan ikun is-​sinjal li jien bgħattek: meta tkun ħriġt il-​poplu mill-​Eġittu, intom tqimu lil Alla fuq din il-​muntanja.” (Eżodu 3:​12) Alla kien qed jgħid lill-​qaddej dubjuż tiegħu li Hu kien se jkun dejjem miegħu. Barra minn hekk, Ġeħova kien qed jindika li ma kienx se jfalli milli jeħles lill-​poplu tiegħu. Tul is-​sekli, Alla pprovda wegħdi simili li jagħtu appoġġ. Per eżempju, permezz taʼ Mosè, hu qal lill-​ġens taʼ Iżrael hekk kif kienu se jidħlu fl-​Art Imwiegħda: “Agħmlu l-​ħila u qawwu qalbkom. . . . Il-​Mulej, Alla tiegħek, se jimxi miegħek; m’hux se jħallik, u anqas jitilqek.” (Dewteronomju 31:6) Ġeħova saħħaħ ukoll lil Ġożwè: “Ħadd ma jiqaflek kemm iddum ħaj. . . . Inkun miegħek; ma nħallikx, ma nitilqekx.” (Ġożwè 1:5) U hu jwiegħed lill-​Kristjani: “Żgur ma nitilqikx u żgur ma nabbandunakx.” (Ebrej 13:5) Ladarba għandna appoġġ qawwi bħal dan żgur li għandna għalxiex inkunu kburin li aħna Kristjani!

10, 11. Il-​Levita Asaf kif ġie megħjun iżomm l-​attitudni xierqa lejn il-​valur tas-​servizz tiegħu lil Ġeħova?

¹⁰ Xi ħames sekli wara Mosè, Levita leali jismu Asaf kiteb sinċerament rigward id-​dubji li kellu, jiġifieri jekk kienx jiswa li wieħed jgħix ħajja retta. Waqt li kien qed jissielet biex jaqdi ’l Alla minkejja l-​provi u t-​tentazzjonijiet, Asaf ra li xi wħud li kienu jiddieħqu b’Alla bdew jitqawwew u jistagħnu. Asaf kif ġie effettwat? “Iżda jien għal ftit ma għotrux riġlejja,” ammetta hu. “Għal ftit ma żlaqtx fil-​mixi tiegħi. Għax ġietni l-​għira għall-​kburin, xħin rajt il-​ħżiena jimxu ’l quddiem.” Hu beda jiddubita kemm jiswa li tkun aduratur taʼ Ġeħova. “Mela għal xejn żammejt qalbi safja, u ħsilt idejja b’sinjal taʼ ndafa,” ħaseb Asaf. “Kuljum ġejt imsawwat.”​—Salm 73:​2, 3, 13, 14.

¹¹ Asaf kif kampa maʼ dawn l-​emozzjonijiet li nikktuh? Ipprova hu jinjora dak li kien qed iħoss? Le. Hu esprimiehom fit-​talb lil Alla, bħalma naraw f’Salm 73. Asaf biddel fehmtu meta żar is-​santwarju tat-​tempju. Waqt li kien hemm, hu rrealizza li meta tqis kollox, xejn ma jistaʼ jkun aħjar minn ħajja taʼ devozzjoni lejn Alla. Ladarba ġedded l-​apprezzament spiritwali tiegħu, hu fehem li Ġeħova jobgħod il-​ħażen u li fiż-​żmien xieraq il-​ħżiena kienu se jieħdu l-​kastig. (Salm 73:​17-​19) Fil-​proċess, Asaf saħħaħ is-​sens taʼ identità tiegħu bħala qaddej privileġġat taʼ Ġeħova. Hu qal lil Alla: “Jiena dejjem miegħek; inti żżommni minn idi l-​leminija; skond il-​ħsieb tiegħek tmexxini, mbagħad fis-​sebħ tilqagħni.” (Salm 73:​23, 24) Asaf reġaʼ beda jħossu kburi b’Alla tiegħu.​—Salm 34:3 (34:​2, NW).

Kienu Jafu Sew Min Kienu

12, 13. Agħti eżempji taʼ karattri Bibliċi li kienu kburin bir-​relazzjoni tagħhom m’Alla.

¹² Mod wieħed kif insaħħu s-​sens tagħna taʼ identità Kristjana hu billi neżaminaw u nimitaw il-​fidi taʼ l-​aduraturi leali li minkejja l-​inkwiet kienu tassew kburin bir-​relazzjoni tagħhom m’Alla. Ikkunsidra lil Ġużeppi, bin Ġakobb. Taʼ età żgħira, hu ġie mibjugħ bil-​qerq bħala lsir u meħud l-​Eġittu, mijiet taʼ kilometri ’l bogħod minn missieru li kellu l-​biżaʼ t’Alla u ’l bogħod sew mill-​atmosfera kollha mħabba u appoġġ li kellu d-​dar. Meta kien l-​Eġittu, Ġużeppi ma setaʼ jmur għand l-​ebda bniedem għal pariri fi qbil mar-​rieda t’Alla, u kellu jiffaċċja sitwazzjonijiet taʼ sfida li ġarrbulu l-​valuri morali tiegħu u wrew kemm kien jistrieħ fuq Alla. Però, hu għamel sforz ħabrieki biex jibqaʼ jiftakar sew min kien bħala qaddej t’Alla, u baqaʼ leali lejn dak li kien jaf li hu tajjeb. Hu kien kburi li kien aduratur taʼ Ġeħova anki f’ambjent kiefer, u ma beżax jesprimi kif iħossu.​—Ġenesi 39:​7-​10.

¹³ Tmien sekli wara, tfajla Iżraelija li ttieħdet fil-​jasar u li saret qaddejja tal-​ġeneral Sirjan Nagħman ma nsietx l-​identità tagħha bħala aduratriċi taʼ Ġeħova. Meta ġietha l-​opportunità, bil-​qlubija tat xiehda dwar Ġeħova meta identifikat lil Eliżew bħala profeta taʼ l-​Alla veru. (2 Slaten 5:​1-​19) Snin wara dan, is-​Sultan żagħżugħ Ġosija, minkejja li kien f’ambjent korrott, ordna li jsiru riformi reliġjużi permanenti, sewwa t-​tempju t’Alla, u mexxa lill-​poplu lura lejn Ġeħova. Hu kien iħossu kburi bil-​fidi u l-​qima tiegħu. (2 Kronaki, kapitli 34, 35) Danjel u t-​tliet sħabu Ebrej f’Babilonja qatt ma nsew l-​identità tagħhom bħala qaddejja taʼ Ġeħova, u saħansitra meta ġew imġarrbin u ttantati, huma żammew l-​integrità tagħhom. Jidher ċar li huma kienu kburin li kienu qaddejja taʼ Ġeħova.​—Danjel 1:​8-​20.

Kun Kburi bl-​Identità Kristjana Tiegħek

14, 15. X’jinvolvi li niftaħru bl-​identità Kristjana tagħna?

¹⁴ Dawn il-​qaddejja t’Alla kellhom suċċess għaliex ikkultivaw sens xieraq taʼ kburija bir-​relazzjoni tagħhom m’Alla. Xi ngħidu għalina llum? X’jinvolvi li niftaħru bl-​identità Kristjana tagħna?

¹⁵ L-​ewwelnett, dan jinkludi apprezzament profond għall-​fatt li aħna wħud mill-​poplu li jġorr l-​isem taʼ Ġeħova, li għandu l-​barka u l-​approvazzjoni tiegħu. Alla m’għandux dubji dwar min huma dawk li huma tiegħu. L-​appostlu Pawlu, li għex fi żmien taʼ taħwid reliġjuż kbir, kiteb: “Ġeħova jafhom lil dawk li huma tiegħu.” (2 Timotju 2:19; Numri 16:5) Ġeħova hu kburi b’dawk li “huma tiegħu.” Hu jiddikjara: “Min imiss lilkom imiss il-​mimmi taʼ [“għajnejja,” NW].” (Żakkarija 2:12 [2:8 NW]) Jidher ċar li Ġeħova jħobbna. Mill-​banda l-​oħra, ir-​relazzjoni tagħna miegħu għandha tkun ibbażata fuq imħabba profonda għalih. Pawlu kiteb: “Jekk xi ħadd iħobb lil Alla, Alla jkun jafu lil dan.”​—1 Korintin 8:3.

16, 17. Għala jistgħu l-​Kristjani, kemm żgħar u kemm kbar, ikunu kburin bil-​wirt spiritwali tagħhom?

¹⁶ Iż-​żgħażagħ li trabbew bħala Xhieda taʼ Ġeħova jagħmlu tajjeb li jeżaminaw jekk l-​identità Kristjana tagħhom hijiex qed tissaħħaħ permezz taʼ relazzjoni persunali m’Alla. Huma ma jistgħux sempliċement jiddependu mill-​fidi tal-​ġenituri tagħhom. Dwar kull qaddej t’Alla, Pawlu kiteb: “Jara sidu jekk iżommx wieqaf jew jaqax.” Għalhekk, Pawlu jkompli: “Kull wieħed minna se jagħti kont tiegħu nnifsu lil Alla.” (Rumani 14:​4, 12) Ovvjament, ma tistax iżżomm relazzjoni intima u dejjiema maʼ Ġeħova mbilli tkompli tradizzjoni tal-​familja b’nofs qalb.

¹⁷ Matul l-​istorja, kien hemm lista sħiħa taʼ xhieda taʼ Ġeħova. Din tibda mir-​raġel leali Abel—xi 60 seklu ilu—u twassal għall-​“folla kbira” taʼ Xhieda llum u għall-​folol t’aduraturi taʼ Ġeħova li se jgawdu futur dejjiemi. (Rivelazzjoni 7:9; Ebrej 11:4) Aħna fost l-​iktar grupp reċenti f’din il-​lista twila t’aduraturi leali. Kemm għandna wirt spiritwali għani!

18. Il-​valuri u l-​livelli tagħna kif jagħmluna differenti ħafna mid-​dinja?

¹⁸ L-​identità Kristjana tagħna tinkludi wkoll ġabra taʼ valuri, kwalitajiet, livelli, u karatteristiċi li jidentifikawna bħala Kristjani. Din hija t-​“Triq,” l-​uniku mod taʼ ħajja li jirnexxi u li jogħġob lil Alla. (Atti 9:2; Efesin 4:​22-​24) Il-​Kristjani ‘jaċċertaw ruħhom minn kollox’ u ‘jżommu sod mat-​tajjeb’! (1 Tessalonikin 5:​21) Aħna nifhmu sew id-​differenza kbira li hemm bejn il-​Kristjanità u d-​dinja mbiegħda minn Alla. Ġeħova jurina ċar x’inhi d-​differenza bejn il-​qima vera u dik falza. Permezz tal-​profeta tiegħu Malakija, hu ddikjara: “Mill-​ġdid tagħrfu tagħżlu bejn il-​ġust u l-​ħażin, bejn min jaqdi ’l Alla u min ma jaqdihx.”​—Malakija 3:​18.

19. Il-​Kristjani veri x’qatt ma se jiġrilhom?

¹⁹ Peress li hu importanti ferm li niftaħru b’Ġeħova f’din id-​dinja mħawda u bla direzzjoni, x’jistaʼ jgħinna nibqgħu kburin b’mod xieraq b’Alla tagħna u nibqgħu niftakru sew min aħna bħala Kristjani? Se nsibu suġġerimenti t’għajnuna fl-​artiklu li jmiss. Waqt li tikkunsidrahom, tistaʼ tkun ċert minn dan: Il-​Kristjani veri qatt ma se jsiru vittmi taʼ l-​“apateiżmu.”

[Nota taʼ taħt]

Tiftakar Int?

• Il-​Kristjani kif jistgħu ‘jiftaħru b’Ġeħova’?

• X’tgħallimt mill-​eżempji taʼ Mosè u Asaf?

• Liema karattri Bibliċi kienu kburin bis-​servizz tagħhom lil Alla?

• X’inhu involut f’li niftaħru bl-​identità Kristjana tagħna?

[Stampa f’paġna 14]

Għal xi żmien, Mosè kien iħossu inċert minnu nnifsu

[Stampi f’paġna 15]

Ħafna qaddejja tal-​qedem taʼ Ġeħova tgħaxxqu bl-​identità notevoli tagħhom