Mistoqsijiet mill-​Qarrejja

Kif kienu mpoġġijin il-​lasti li bihom kienet tinġarr l-​arka tal-​patt, ladarba l-​1 Slaten 8:8 jindika li setgħu jidhru mill-​Post Qaddis?

Meta Jehovah ta l-​pjanta tat-​tabernaklu lil Mosè fix-​xagħri, fattur prinċipali kien l-​arka tal-​patt. Din il-​kaxxa rettangolari miksija bid-​deheb kien fiha t-​twavel tal-​Liġi u xi affarijiet oħrajn. Kienet tinżamm fil-​parti taʼ ġewwanett, l-​Iktar Qaddis. Fuq l-​għatu taʼ l-​Arka kien hemm żewġ statwi tad-​deheb taʼ kerubini bi ġwenħajhom miftuħin. Fuq kull naħa taʼ l-​Arka, kien hemm il-​ħoloq sabiex tkun tistaʼ tinġarr permezz taʼ żewġ lasti magħmulin mill-​injam taʼ l-​akaċja miksijin bid-​deheb. Loġikament, il-​lasti kienu jiddaħħlu fil-​ħoloq għat-​tul taʼ l-​Arka. B’hekk, bl-​Arka f’postha fl-​Iktar Qaddis tat-​tabernaklu, li kien iħares lejn il-​lvant, il-​lasti kienu jkunu għat-​tul mit-​tramuntana għan-​nofsinhar. L-​istess kien jgħodd iktar tard meta l-​Arka kienet fit-​tempju li bena Salamun.​—Eżodu 25:10-​22; 37:​4-9; 40:17-​21.a

Purtiera kienet tissepara l-​Iktar Qaddis mill-​Post Qaddis (il-kamra taʼ barra). Il-​qassisin fil-​Post Qaddis ma setgħux jittawlu fl-​Iktar Qaddis u jaraw l-​Arka, li fuqha Alla kien jippreżenta lilu nnifsu. (Lhud 9:1-7) Għaldaqstant, l-​1 Slaten 8:8 forsi jikkonfondi xi ftit lil dak li jkun: “Il-​bsaten [jew, lasti] kienu tant twal li rjushom kienu jidhru mill-​post qaddis quddiem is-​santwarju [il-kamra taʼ ġewwanett], imma ma kinux jidhru minn barra.” Dan il-​punt jissemma wkoll fit-​2 Kronaki 5:9. Kif setaʼ xi ħadd jara dawn il-​lasti mill-​Post Qaddis tat-​tempju?

Xi wħud immaġinaw li l-​lasti kienu jmissu mal-​purtiera, u b’hekk kienu jidhru mqabbżin ’il barra. Imma dan ma setax ikun ladarba l-​lasti kienu għat-​tul mit-​tramuntana għan-​nofsinhar, għax il-​purtiera kienet parallela mal-​lasti. (Numri 3:38) Hemm spjegazzjoni iktar raġunevoli. Il-​lasti setgħu kienu jidhru jekk il-​purtiera kienet tkun xi naqra mberrqa minn mal-​ħajt tat-​tempju jew meta l-​qassis il-​kbir kien jidħol fl-​Iktar Qaddis. Il-​purtiera kienet tgħatti għalkollox l-​Arka nfisha, imma l-​lasti, li kienu itwal fuq iż-​żewġ naħat, għandhom mnejn kienu jidhru meta kienet titberraq il-​purtiera. Waqt li din l-​ispjegazzjoni tidher li hi raġunevoli, ma nistgħux inkunu dommatiċi dwarha.

Ovvjament, hemm ħafna dettalji li forsi għad irridu nsiru nafuhom. L-​appostlu Pawlu semma xi ftit aspetti fl-​ittra tiegħu lil-​Lhud. Imbagħad qal: “Fuq dawn mhux il-​waqt issa li nitkellmu ħaġa, ħaġa.” (Lhud 9:5, Saydon) L-​irxoxt li ġej taʼ wħud leali għandu joffrilna opportunitajiet li jqanqluna biex nitgħallmu minn irġiel bħal Mosè, Aron, Besalel, u oħrajn li kienu involuti personalment fix-​xogħol u l-​iskop tat-​tabernaklu.—Eżodu 36:1.

[Nota taʼ taħt]