Dak “Alla Tas-​Sliem” Jimpurtah Minn Dawk Milqutin Minn Xi Afflizzjoni

IL-​BIBBJA tagħmilha ċara li David tal-​qedem kien jaf x’jiġifieri l-​afflizzjoni. Għal diversi snin hu għex bħala maħrub, segwit bla ħniena minn sultan mill-​agħar u stinat, li kien iddeterminat li joqtlu. Matul dan il-​perijodu t’afflizzjoni, David ħeba lilu nnifsu f’postijiet imwarrbin. Imma għamel xi ħaġa iżjed minn hekk. Talab bis-​serjetà lil Jehovah dwar l-​għawġ tiegħu. “B’leħen qawwi lill-​Mulej insejjaħ,” kiteb iżjed tard rigward l-​esperjenza kerha tiegħu. “[I]nressaq quddiemu t-​tnehid tiegħi, id-​dwejjaq tiegħi quddiemu nqiegħed.”—Salm 142:2, 3 [Salm142:1, 2, New World Translation].

Illum, xi wħud għandhom mnejn jiżżuffjettaw b’kemm David kien jistrieħ fuq Alla. Għandhom mnejn jgħidu li t-​talb huwa biss teknika psikoloġika biex isserraħ moħħ dak li jkun u li f’termini prattiċi huwa ħela taʼ ħin. Madankollu, il-​fiduċja li David kellu f’Alla kienet f’waqtha, għaliex l-​għedewwa tiegħu eventwalment ġew megħlubin. Hu u jiftakar fl-​esperjenza tiegħu, David kiteb: “Dan il-​fqajjar [“afflitt,” NW] sejjaħ u l-​Mulej semgħu, u mid-​dwejjaq tiegħu kollha ħelsu.” (Salm 34:7 [Salm 34:6, NW]) Dak Alla veru, li David dar lejh, x’imkien ieħor hu msejjaħ “Alla tas-​sliem.” (Filippin 4:9; Lhud 13:20) Se jserraħna mill-​afflizzjoni, b’mod li se jirriżulta f’paċi għalina?

Jehovah Jimpurtah Minnek

Jehovah m’huwiex indifferenti rigward l-​għawġ tal-​poplu tiegħu. (Salm 34:16 [Salm 34:15, NW]) Hu attent għall-​bżonnijiet mhux biss tal-​qaddejja tiegħu bħala grupp imma wkoll taʼ kull individwu li jibżaʼ minnu. Meta ddedika t-​tempju f’Ġerusalemm tal-​qedem, Salamun talab bil-​ħerqa lil Jehovah biex jagħti widen “[i]mqar jekk bniedem waħdu jonkella l-​poplu tiegħek kollu taʼ Israel, jitlob u jitkarrab bil-​ħniena; kull meta xi ħadd jistqarr il-​ġrieħi taʼ qalbu u n-​niket tiegħu.” (Korsiv tagħna.) (2 Kronaki 6:29) Bħalma rrikonoxxa Salamun, kull individwu għandu l-​afflizzjoni partikulari tiegħu x’jissaporti. Għal xi ħadd jistaʼ jkun xi mard fiżiku. Għal xi ħadd ieħor, inkwiet emozzjonali. Xi wħud jistgħu jsofru afflizzjoni bil-​mewt taʼ xi ħadd maħbub. Il-​qgħad, l-​għaks ekonomiku, u l-​problemi tal-​familja huma wkoll afflizzjonijiet komuni f’dawn iż-​żminijiet diffiċli.

Aħseb għal mument dwar ‘il-​ġrieħi taʼ qalbek u n-​niket tiegħek.’ Forsi f’xi waqtiet ħassejtek bħalma ħassu s-​salmista David, li kiteb: “Fittixt min jagħdirni, u ma sibt ’il ħadd; u min ifarraġni, u ma kelli ’l ħadd.” Madankollu tistaʼ tibqaʼ ċert li Alla jimpurtah mis-​sitwazzjoni tiegħek, għaliex iktar tard fl-​istess salm, David kiteb: “Għax jismaʼ l-​fqajrin il-​Mulej, ma jistmellx l-​imjassrin tiegħu.”—Salm 69:21, 34 [Salm 69:20, 33, NW].

Billi napplikaw il-​kliem taʼ David f’sens akbar, nistgħu nibqgħu żguri li l-​Ħallieq taʼ l-​umanità jagħti widen għat-​talb taʼ dawk li huma mjassrin, biex ngħidu hekk, mill-​afflizzjonijiet tagħhom. Iżjed minn hekk, hu jirreaġixxi għall-​istat li jkunu fih. Ikkunsidra l-​istqarrijiet li ġejjin li jikxfu l-​mogħdrija li Jehovah għandu għal dawk milqutin minn xi afflizzjoni.

“La taħqrux l-​armla jew l-​iltim; għax jekk taħqruhom, u huma jsejjħuli, jien żgur nismagħha l-​għajta tagħhom; u l-​qilla tiegħi tixgħel.”—Eżodu 22:21-23 [Eżodu 22:22-24, NW].

“Mbagħad Alla, lill-​magħżulin tiegħu li jgħajjtulu lejl u nhar, sejjer ma jagħmlilhomx ħaqq? Se joqgħod itawwal magħhom?”—Luqa 18:7.

“Għax hu jeħles lill-​fqir li jsejjaħlu, u lill-​imsejken li m’għandux min jgħinu. Iħenn għad-​dgħajjef u għall-​fqajjar; il-​ħajja tal-​fqajrin isalva. Jeħlishom mill-​qerq u mill-​moħqrija; demmhom għażiż quddiem għajnejh.”—Salm 72:12-14.

“Min imiss lilkom [il-poplu t’Alla fuq l-​art] imiss il-​mimmi taʼ għajnej[ja].”—Żakkarija 2:12 [Żakkarija 2:8, NW].

Dawn il-​ftit eżempji juru l-​interess profond tal-​Ħallieq tagħna fil-​ġid tal-​poplu tiegħu. Għalhekk, għandna raġuni valida sabiex insegwu t-​twissija taʼ l-​appostlu Pietru: “Ixħtu fuqu l-​ħsibijiet kollha tagħkom għax hu jaħseb fikom.” (1 Pietru 5:7) Imma kif se jgħinna Alla matul iż-​żminijiet t’afflizzjoni?

Kif Alla Jgħin Lil Dawk Milqutin Minn Xi Afflizzjoni

Bħalma rajna, meta David sofra minn afflizzjoni, hu talab bis-​serjetà lil Alla għall-​gwida. Fl-​istess ħin, ħa l-​inizjattiva biex itaffi s-​sitwazzjoni, billi ħaddem moħħu biex jaħrab minn dawk li kienu qegħdin jipprovaw jaqbduh. B’hekk, serħan fuq Jehovah flimkien maʼ sforz persunali għen lil David biex jissaporti l-​għawġ tiegħu. X’nistgħu nitgħallmu minn dan?

Meta niġu ffaċċjati minn xi afflizzjoni, ċertament li m’huwiex żbaljat għalina li nieħdu inizjattiva raġonevoli biex insolvu l-​problema. Per eżempju, jekk Kristjan isib ruħu mingħajr impjieg, m’huwiex hu se jagħmel ħiltu biex isib ix-​xogħol? Jew jekk qiegħed isofri minn tbatija fiżika, m’huwiex hu se jfittex assistenza medika? Tabilħaqq, saħansitra Ġesù, li kellu l-​qawwa li jfejjaq kull xorta taʼ mard, irrikonoxxa li ‘t-​tabib jeħtiġuh dawk li huma morda.’ (Mattew 9:12; qabbel 1 Timotju 5:23.) M’għandniex xi ngħidu, ċertu għawġ ma jistax jitneħħa; wieħed sempliċement irid jissaportih. Minkejja dan, Kristjan veru ma jqisx is-​sofferenza bħala virtù fiha nfisha, bħalma jagħmlu xi wħud. (Qabbel 1 Slaten 18:28.) Minflok, hu jagħmel dak li jistaʼ biex ikampa maʼ l-​afflizzjoni tiegħu.

Fl-istess ħin, iżda, huwa raġonevoli li nieħdu l-​kwistjoni quddiem Jehovah fit-​talb. Għala? L-​ewwel, billi nistrieħu fuq il-​Ħallieq tagħna, aħna niġu mgħejjunin biex ‘nagħrfu nagħżlu l-​aħjar.’ (Filippin 1:10) Per eżempju, meta nfittxu xi impjieg, serħan bit-​talb fuq Alla se jgħinna biex ma naċċettawx xogħol li jkun f’konflitt mal-​prinċipji tal-​Bibbja. Se nevitaw ukoll li ‘noħorġu barra mit-​triq tal-​fidi’ minħabba l-​imħabba għall-​flus. (1 Timotju 6:10) Verament, meta nieħdu deċiżjonijiet tqal​—rigward impjieg jew xi aspett ieħor tal-​ħajja—​jeħtieġ li nsegwu t-​twissija taʼ David: “Ħalli xortik f’idejn il-​Mulej, u hu jgħinek u jwieżnek; hu qatt ma jħalli l-​ġust jitfixkel.”—Salm 55:23 [Salm 55:22, NW].

It-talb jgħinna wkoll biex inżommu l-​bilanċ mentali tagħna, sabiex l-​afflizzjoni tagħna ma tirkibniex. L-​appostlu Pawlu kiteb: “Fit-​talb kollu tagħkom itolbu u uru lil Alla xi jkollkom bżonn, u iżżuh ħajr.” B’liema riżultat? “[I]s-sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu Ġesù.” (Filippin 4:6, 7) Iva, sliem, is-​sliem t’Alla. Dak is-​sliem “jgħaddi kull ma l-​moħħ jistaʼ jifhem,” sabiex ikun jistaʼ jagħmilna stabbli meta nkunu mtaqqlin b’emozzjonijiet li jinkwetawna. Se ‘jżommilna qalbna u moħħna sħaħ,’ u b’hekk jgħinna nevitaw li nirreaġixxu bil-​għaġġla u bla għaqal, għax dan jistaʼ jżid maʼ l-​afflizzjoni tagħna.—Koħèlet 7:7.

It-talb jistaʼ jagħmel saħansitra iżjed. Jistaʼ jagħmel differenza f’kif tiżviluppa sitwazzjoni. Ikkunsidra eżempju mill-​Bibbja. Meta l-​appostlu Pawlu kien fil-​ħabs ġewwa Ruma, inkuraġġixxa lil Kristjani sħabu biex jitolbu għalih. Għala? “Dan wisq aktar nitlobkom tagħmluh,” kitbilhom, “biex nerġaʼ nkun magħkom mill-​aktar fis.” (Lhud 13:19) Pawlu kien jaf li t-​talb persistenti taʼ sħabu fit-​twemmin setaʼ jagħmel differenza rigward meta kellu jinħeles.—Filemon 22.

Sejjer it-​talb ibiddel ir-​riżultat taʼ l-​afflizzjoni tiegħek? Jistaʼ jkun. Għandna nirrealizzaw, iżda, li Jehovah mhux dejjem iwieġeb it-​talb tagħna bil-​mod li nippretendu aħna. Pawlu, per eżempju, talab ripetutament rigward ix-​‘xewka f’ġismu’​—forsi xi problema fiżika relatata mal-​vista t’għajnejh. Minflok ma neħħa l-​afflizzjoni, Alla qal lil Pawlu: “Biżżejjed għalik il-​grazzja tiegħi; għax il-​qawwa tiegħi tidher fl-​aqwa tagħ[h]a fejn hemm id-​dgħajjef.”—2 Korintin 12:7-9.

Mela xi drabi l-​għawġ tagħna mhux se jitneħħa. Minflok, se jkollna l-​opportunità li nagħtu prova taʼ kemm nistrieħu fuq il-​Ħallieq tagħna. (Atti 14:22) Barra minn hekk, nistgħu nibqgħu żguri li saħansitra jekk Jehovah ma jneħħix l-​afflizzjoni, hu se ‘jagħtina l-​qawwa u l-​għajnuna biex inkunu nifilħu għaliha.’ (1 Korintin 10:13) Iva, huwa xieraq li Jehovah jissejjaħ “Alla taʼ kull faraġ. Hu jfarraġna fl-​hemm kollu tagħna.” (2 Korintin 1:3, 4) Hu jagħtina dak li neħtieġu biex nissaportu bi sliem konsiderevoli.

Dalwaqt​—Dinja Mingħajr Afflizzjoni!

Il-​Ħallieq iwiegħed li permezz tas-​Saltna tiegħu, dalwaqt se jtemm l-​afflizzjonijiet taʼ l-​umanità. Kif se jwettqu dan? Billi jneħħi lil Satana x-​Xitan, ix-​xewwiexi ewlieni taʼ l-​afflizzjoni u l-​għadu fuq quddiem tas-​sliem, dak li l-​Bibbja tidentifikah bħala “l-​alla taʼ din id-​dinja.” (2 Korintin 4:4) Imma l-​kontroll tiegħu fuq l-​umanità dalwaqt se jispiċċa. Il-​fatt li se jiġi eliminat se jiftaħ it-​triq għal barkiet bla għadd li se jiġu fuq dawk li jibżgħu minn Alla. Il-​Bibbja twiegħed li Jehovah se “jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 21:1-4.

Tidher inkredibbli dinja mingħajr afflizzjoni? Tant drajna ngħixu maʼ l-​għawġ li diffiċli biex nimmaġinaw li ma jkunx jeżisti. Imma ħelsien mill-​biżaʼ, l-​anzjetà, u l-​gwaj huwa sewwa sew dak li Alla kellu f’moħħu għall-​umanità meta ħalaqna, u l-​iskop tiegħu se jirnexxi.—Isaija 55:10, 11.

Imma kif u meta se jiġi s-​sliem litterali madwar il-​globu kollu? Ejjew naraw fl-​artikli li jmiss. (w97 4/15)

[Kaxxa f’paġna 5]

Il-​Ħafna Aspetti taʼ l-​Afflizzjoni

▪ Madwar kwart taʼ miljun mill-​popolazzjoni tad-​dinja jgħixu f’faqar estrem, u miljuni iżjed jgħixu f’kundizzjonijiet sotto-umani li jheddu l-​għajxien tagħhom.

▪ Iżjed minn 200 miljun tifel u tifla m’għandhomx x’jieklu biżżejjed.

▪ Kull sena d-​dijarrea toqtol madwar tliet miljun tifel u tifla taħt il-​ħames snin.

▪ Mard li jittieħed qatel xi 16.5 miljun ruħ fl-​1993 biss. Peress li xi pajjiżi jikkategorizzaw il-​mard b’modi differenti, in-​numru eżatt għandu mnejn li huwa ħafna iżjed.

▪ Huwa stmat li madwar 500 miljun ruħ qegħdin jiġu effettwati minn xi tip taʼ problema mentali.

▪ Ir-​rati taʼ suwiċidji qegħdin jikbru iżjed malajr fost iż-​żgħażagħ milli fost kwalunkwe età oħra.

▪ “Il-​ġuħ u l-​qgħad saru tbajjaʼ fuq id-​dinja,” jistqarr The Unesco Courier. “Hemm 35 miljun ruħ bla xogħol fis-​sebgħa mill-​iżjed pajjiżi għonja tad-​dinja, u fil-​Brażil biss hemm 20 miljun ħaddiem li għalihom li jkollhom impjieg lanqas biss ifisser li jkollhom biżżejjed x’jieklu.”

[Stampi f’paġna 6]

It-​talb jistaʼ jgħinna niffokaw fuq il-​wegħda t’Alla għal dinja mingħajr afflizzjoni