Maqtugħin Apparti Biex Nagħtu Tifħir mad-Dinja Kollha
“Hallelujah! Faħħru, qaddejja tal-Mulej, faħħru isem il-Mulej. Ikun isem il-Mulej imbierek.”—SALM 113:1.
1, 2. (a) Fi qbil maʼ Salm 113:1-3, min jixraqlu t-tifħir entużjażmanti tagħna? (b) Liema mistoqsija huwa xieraq li nistaqsu?
ALLA JEHOVAH hu l-Ħallieq Grandjuż tas-sema u l-art, is-Sovran Universali tagħna għall-eternità kollha. Hu jixraqlu kompletament it-tifħir entużjażmanti tagħna. Dan huwa għala Salm 113:1-3 jikkmandana: “Ħallelujah! Faħħru, qaddejja tal-Mulej, faħħru isem il-Mulej. Ikun isem il-Mulej imbierek, minn issa u għal dejjem! Minn tlugħ ix-xemx sa nżulha ikun imfaħħar isem il-Mulej!”
2 Bħala x-Xhieda t’Alla, aħna ferħanin li nagħmluh dan. Kemm huwa eċċitanti li Alla Jehovah dalwaqt se jġiegħel li din l-għanja ferriħija taʼ tifħir li qegħdin inkantaw illum timla l-art kollha! (Salm 22:28 [Salm 22:27, NW]) Qiegħed leħnek jinstemaʼ f’dan il-kor kbir taʼ madwar id-dinja? Jekk inhu hekk, kemm jagħmlek ferħan li tkun maqtugħ apparti minn din id-dinja mifruda, u bla ferħ!
3. (a) X’inhu li jagħmel lin-nies taʼ Jehovah distinti u uniċi? (b) B’liema modi aħna maqtugħin apparti?
3 Li nfaħħru lil Jehovah f’unjoni ċertament jagħmilna distinti u uniċi. Aħna nitkellmu u ngħallmu fi qbil u nużaw l-istess metodi biex niddikjaraw ‘it-tjubija bla qjies’ taʼ Jehovah. (Salm 145:7) Iva, bħala l-poplu dedikat taʼ Jehovah, aħna maqtugħin apparti għas-servizz t’Alla tagħna, Jehovah. Alla qal lil Iżrael, il-poplu dedikat tiegħu tal-qedem, biex iżomm lilu nnifsu maqtugħ apparti mill-ġnus taʼ madwaru u biex jibqaʼ bla mniġġes mill-prattiċi taʼ dawk il-ġnus. (Eżodu 34:12-16) Hu ta lill-poplu tiegħu liġijiet biex jgħinhom jagħmlu dan. Bl-istess mod illum, Jehovah tana l-Kelma Qaddisa tiegħu, il-Bibbja. L-istruzzjonijiet tagħha juruna kif nistgħu nżommu ruħna maqtugħin apparti minn din id-dinja. (2 Korintin 6:17; 2 Timotju 3:16, 17) M’aħniex maqtugħin apparti għax iżolajna ruħna f’monasterji u kunventi, bħalma jagħmlu l-patrijiet u s-sorijiet taʼ Babilonja l-Kbira. Billi nsegwu l-eżempju taʼ Ġesù Kristu, aħna wħud li nfaħħru lil Jehovah fil-pubbliku.
Imitaw Lill-Wieħed Ewlieni Li Jfaħħar Lil Jehovah
4. Ġesù kif stabbilixxa l-eżempju f’li jfaħħar lil Jehovah?
4 Ġesù qatt ma warrab mill-iskop tiegħu biex ifaħħar lil Jehovah. U dan għamlu apparti mid-dinja. Fis-sinagogi u fit-tempju f’Ġerusalemm, hu faħħar l-isem qaddis t’Alla. Kemm jekk fuq il-quċċata taʼ muntanja u kemm f’xatt il-baħar, kulfejn kienu jinġabru l-folol, Ġesù ppriedka pubblikament il-veritajiet taʼ Jehovah. Hu ddikjara: “[I]nfaħħrek, Missier, Sid is-sema u l-art.” (Mattew 11:25) Saħansitra waqt li kien għaddej ġuri quddiem Ponzju Pilatu, Ġesù xehed: “Jien għalhekk twelidt, u għalhekk ġejt fid-dinja, biex nixhed għall-verità.” (Ġwann 18:37) Ġesù apprezza l-importanza tax-xogħol tiegħu. Kulfejn kien, Ġesù ta xiehda għal Jehovah u faħħru pubblikament.
5. Salm 22:23 [Salm 22:22, NW] għal min japplika, u x’għandha tkun l-attitudni tagħna?
5 F’Salm 22:23 [Salm 22:22, NW], aħna nsibu din l-istqarrija profetika rigward il-Wieħed Ewlieni li jfaħħar lil Jehovah: “[I]nxandar ismek lil ħuti; [i]nfaħħrek f’nofs il-ġemgħa.” U f’Lhud 2:11, 12, l-appostlu Pawlu japplika dawn il-versi għall-Mulej Ġesù u għal dawk li lilhom Alla Jehovah qaddes għal glorja fis-sema. Bħalu, huma ma jistħux ifaħħru l-isem taʼ Jehovah f’nofs il-kongregazzjoni. Għandna aħna l-istess attitudni mentali meta nattendu l-laqgħat tal-kongregazzjoni tagħna? Il-parteċipazzjoni entużjażmanti tagħna fil-laqgħat tfaħħru lil Jehovah, kemm billi nkunu moħħna hemm u kemm billi nieħdu sehem. Imma t-tifħir ferrieħi tagħna jieqaf hemm?
6. Ġesù liema inkarigu tahom lid-dixxipli tiegħu, u dawk li jħobbu d-dawl kif jigglorifikawh lil Alla?
6 Skond Mattew 5:14-16, il-Mulej Ġesù inkariga wkoll lis-segwaċi tiegħu biex iħallu d-dawl tagħhom jiddi sabiex oħrajn ifaħħru lil Jehovah. Hu qal: “Intom id-dawl tad-dinja. . . . Hekk għandu jiddi d-dawl tagħkom quddiem il-bnedmin, biex jaraw l-għemejjel tajba tagħkom u jagħtu glorja lil Missierkom li hu fis-smewwiet.” Dawk li jħobbu d-dawl iġibu glorja lil Alla. Jagħmluh huma dan sempliċement billi jgħidu u jagħmlu affarijiet ħelwin u umanitarji? Le, minflok dan jagħmluh billi jigglorifikaw lil Jehovah f’unjoni. Iva, dawk li jħobbu d-dawl jiddedikaw lilhom infushom lil Alla u jsiru dawk li jfaħħruh bil-ferħ. Għamiltu int dan il-pass hieni?
Ferħ Milli Nfaħħru Lil Jehovah
7. Dawk li jfaħħru lil Jehovah għala huma daqshekk mimlijin ferħ, u liema ferħ kellhom fil-jum taʼ Pentekoste tas-sena 33 E.K.?
7 Dawk li jfaħħru lil Jehovah għala huma daqshekk ferriħin? Għaliex il-ferħ huwa frotta taʼ l-ispirtu qaddis t’Alla. F’Galatin 5:22, huwa mniżżel preċiż wara l-imħabba. Id-dixxipli taʼ Ġesù fl-ewwel seklu wrew din il-frotta taʼ l-ispirtu taʼ Jehovah. Iva, fil-jum taʼ Pentekoste tas-sena 33 E.K., meta Alla ferraʼ l-ispirtu tiegħu fuq madwar 120 mid-dixxipli taʼ Ġesù, ilkoll bdew ifaħħru lil Jehovah b’ilsna differenti. Lhud devoti li kienu ġew Ġerusalemm minn ħafna ġnus baqgħu ‘mħawdin.’ Huma esklamaw: “Aħna lkoll qegħdin nisimgħuhom ixandru bl-ilsna tagħna l-għeġubijiet taʼ Alla”! (Atti 2:1-11) X’kien ir-riżultat taʼ dan it-tifħir taʼ l-għaġeb lil Jehovah b’ħafna lingwi differenti? Madwar 3,000 Lhud u proseliti Lhud aċċettaw l-aħbar tajba tas-Saltna rigward il-Messija. Huma tgħammdu, irċevew l-ispirtu qaddis, u bil-ħerqa żiedu leħinhom bħala wħud li jfaħħru lil Jehovah. (Atti 2:37-42) X’barka kienet dik!
8. Wara Pentekoste, x’għamlu l-Kristjani biex iżidu l-ferħ tagħhom?
8 Ir-rapport ikompli: “Kuljum kienu jmorru fit-tempju flimkien, jaqsmu l-ħobż fi djarhom, u jissieħbu fl-ikel bi qlub ferħana u safja; u kienu jfaħħru lil Alla, u l-poplu kollu kien iġibhom. U minn jum għal ieħor il-Mulej kien iżidilhom magħhom lil dawk li jkunu salvi.” (Atti 2:46, 47) Kien biss il-fatt li assoċjaw flimkien u li ssieħbu fl-ikel li ġabilhom ferħ kbir? Le, il-ferħ prinċipali tagħhom kien ġej milli jum wara jum kienu jfaħħru lil Jehovah. U l-ferħ tagħhom intensifika meta raw eluf iwieġbu għall-messaġġ tagħhom taʼ salvazzjoni. L-istess ħaġa nistgħu ngħidu għalina llum.
Dawk Li Jfaħħru Bil-Ferħ Fil-Ġnus Kollha
9. (a) Meta u fejn beda Alla jagħti lil nies taʼ kull ġens l-opportunità biex jisimgħu l-aħbar tajba tiegħu? (b) L-ispirtu qaddis għala ġie mferraʼ fuq Kornelju u sħabu qabel il-magħmudija tagħhom?
9 Jehovah ma riedx li l-attività taʼ tixrid taʼ dawl mill-qaddejja tiegħu tkun illimitata għal ġens wieħed. B’seħħ mis-sena 36 E.K., għalhekk, hu ta lil nies mill-ġnus kollha l-opportunità li jisimgħu l-aħbar tajba tiegħu. Għad-direzzjoni t’Alla, Pietru mar fid-dar t’uffiċjal Ġentil taʼ l-armata f’Ċesarea. Hemmhekk sab lil Kornelju miġbur mal-ħbieb intimi u mal-familja tiegħu. Hekk kif semgħu b’attenzjoni l-kliem taʼ Pietru, huma eżerċitaw fidi f’Ġesù fi qlubhom. Dan kif nafuh? Għaliex l-ispirtu qaddis t’Alla niżel fuq dawk il-kredenti Ġentili. Normalment, l-għotja taʼ l-ispirtu t’Alla kienet tingħata biss wara l-magħmudija, imma f’dik l-okkażjoni Jehovah indika l-approvazzjoni tiegħu taʼ dawk li ma kinux Lhud qabel ma ġew mgħaddsin fl-ilma. Li kieku Jehovah m’għamilx hekk, Pietru ma setax ikun żgur li Alla issa kien qiegħed jaċċetta lill-Ġentili bħala l-qaddejja Tiegħu u li huma kkwalifikaw għall-magħmudija taʼ l-ilma.—Atti 10:34, 35, 47, 48.
10. Kif kien imbassar minn żmien il-qedem li nies mill-ġnus kollha kellhom ifaħħru lil Jehovah?
10 Minn żmien il-qedem, Jehovah bassar li nies mill-ġnus kollha kellhom ifaħħruh. Hu kellu jkollu dawk li jfaħħruh f’kull pajjiż. Bħala prova taʼ dan, l-appostlu Pawlu kkwota profeziji mill-Iskrittura Ebrajka. Hu qal lill-kongregazzjoni internazzjonali taʼ Kristjani f’Ruma: “Ilqgħu lil xulxin bħalma Kristu wkoll laqaʼ lilkom, għall-glorja taʼ Alla. Jiena ngħidilkom li Kristu sar qaddej tal-Lhud ċirkonċiżi minħabba l-fedeltà taʼ Alla, biex iseħħu l-wegħdiet li għamel lill-Patrijarki, u biex il-pagani [“ġnus,” NW] wkoll ifaħħru lil Alla minħabba l-ħniena tiegħu bħalma hu miktub [f’Salm 18:50 (Salm 18:49, NW)]: ‘Għalhekk jiena nfaħħrek fost il-ġnus u ngħanni tifħir ismek.’ U ttenni tgħid [f’Dewteronomju 32:43]: ‘Ifirħu, intom ġnus, flimkien mal-poplu tiegħu.’ U terġaʼ [f’Salm 117:1]: ‘Faħħru lill-Mulej, intom ġnus kollha, ħa jfaħħruh il-popli kollha.’” (Korsiv tagħna.)—Rumani 15:7-11.
11. Alla kif għen lil nies minn kull ġens biex jitgħallmu l-veritajiet tiegħu, u x’kien ir-riżultat?
11 In-nies ma jistgħux ifaħħru f’unità lil Jehovah jekk ma jpoġġux it-tama tagħhom f’Ġesù Kristu, il-wieħed li Alla ħatar biex isaltan fuq nies tal-ġnus kollha. Biex jgħinhom japprezzaw il-veritajiet Tiegħu li jwasslu għall-ħajja eterna, Alla stabbilixxa programm internazzjonali taʼ tagħlim. Hu qiegħed jagħti d-direzzjoni permezz tal-klassi taʼ l-irsir leali tiegħu. (Mattew 24:45-47, NW) B’liema riżultat? Iktar minn ħames miljun leħen ferrieħi qegħdin ikantaw it-tifħir lil Jehovah f’iktar minn 230 pajjiż. U miljuni oħrajn qegħdin juru interess f’li jagħmlu bħalhom. Araw kemm attendew għall-Mafkar fis-sena 1996: 12,921,933. X’meravilja!
Imbassra Folla Kbira Taʼ Wħud Li Jfaħħru Bil-Ferħ
12. Liema viżjoni li tqanqlek esperjenza l-appostlu Ġwanni, u x’inhi r-realtà ħajja taʼ din il-viżjoni?
12 Ġo viżjoni, l-appostlu Ġwanni ra “kotra kbira” minn kull ġens. (Apokalissi 7:9) X’inhi t-tema tat-tifħir li din il-kotra kbira qiegħda tkanta flimkien mal-fdal midluk t’Alla? Ġwanni jgħidilna: “Is-salvazzjoni nafuha lil Alla tagħna li qiegħed fuq it-tron, u lill-Ħaruf.” (Apokalissi 7:10) Dan qiegħed jiġi ddikjarat bil-qlubija f’kull parti tad-dinja. Waqt li nxejru friegħi tal-palm, biex ngħidu hekk, aħna f’unità qegħdin insellmu lil Alla bħala s-Sovran Universali u qegħdin nistqarru bil-ferħ quddiem is-sema u l-art li s-salvazzjoni “nafuha” lilu u lil Ibnu, il-Ħaruf, Ġesù Kristu. Min jaf x’eċċitament ħass l-appostlu Ġwanni x’ħin ra din il-viżjoni li tqanqlek tal-kotra kbira! U x’eċċitament għandna aħna llum f’li naraw, u saħansitra nkunu parti minn, dik ir-realtà ħajja taʼ dak li ra Ġwanni!
13. X’inhu li jagħmel lix-Xhieda taʼ Jehovah maqtugħin apparti mid-dinja?
13 Bħala qaddejja taʼ Jehovah, aħna kburin li nġorru ismu. (Isaija 43:10, 12) Il-fatt li aħna Xhieda taʼ Jehovah jagħmilna differenti minn din id-dinja. Kemm aħna ferħanin li nġorru l-isem distint t’Alla u li l-iskop tagħna huwa li nagħmlu x-xogħol divin tiegħu f’ħajjitna! L-iskop grandjuż taʼ Jehovah biex jissantifika l-isem qaddis tiegħu u biex jivvindika s-sovranità universali tiegħu permezz tas-Saltna ta sinjifikat lil ħajjitna. U hu għenna biex ikollna post fl-iskop divin tiegħu rigward ismu u Saltnatu. Dan hu għamlu bi tliet modi.
Fdati Bil-Verità
14, 15. (a) Liema huwa mod wieħed kif Alla għenna biex ikollna post fl-iskop divin tiegħu rigward ismu u Saltnatu? (b) Is-Saltna li ġiet stabbilita fl-1914 E.K. kif inhi differenti minn dik li ġiet megħluba fis-sena 607 Q.E.K.?
14 L-ewwel, Jehovah fada lin-nies tiegħu bil-verità. L-iktar rivelazzjoni eċċitanti hija dik li s-Saltna tiegħu bdiet tmexxi fl-1914. (Apokalissi 12:10) Dan il-gvern tas-sema huwa differenti mis-saltna tipika f’Ġerusalemm, fejn slaten mil-linja taʼ David kienu jingħataw it-tron. Dik is-saltna ġiet megħluba, u b’seħħ mis-sena 607 Q.E.K., Ġerusalemm ġiet issuġġettata kompletament għall-ħakma taʼ potenzi dinjin Ġentili. Is-Saltna ġdida li Jehovah stabbilixxa fl-1914 hija potenza tas-sema li qatt ma se tkun suġġetta lejn xi ħaddieħor ħlief Jehovah, u lanqas ma se tinġieb f’rovina. (Danjel 2:44) Barra minn hekk, it-tmexxija tagħha hija differenti. Kif? Apokalissi 11:15 iwieġeb: “Ilħna qawwija nstemgħu fis-sema jgħidu: ‘Is-saltna tad-dinja saret taʼ Sidna u tal-Messija tiegħu, u hu se jsaltan għal dejjem taʼ dejjem.’”—Korsiv tagħna.
15 ‘Is-saltna taʼ Sidna u tal-Messija tiegħu’ teżerċita awtorità fuq id-dinja kollha kemm hi taʼ bnedmin. Din l-espressjoni ġdida tas-sovranità taʼ Jehovah, li tinkludi lil Ibnu Messjaniku u lill-144,000 aħwa taʼ Ġesù, li l-biċċa l-kbira minnhom jinsabu rxoxtati għal glorja fis-sema, m’hijiex sempliċement taʼ interess akkademiku—xi suġġett taʼ teorija li l-istudenti forsi jieħdu gost jiddiskutu. Le, din is-Saltna tas-sema hija gvern taʼ veru. U l-prospett hieni tagħna li ngħixu għal dejjem f’perfezzjoni bħala riżultat tat-tmexxija tagħha jagħtina raġuni biżżejjed biex inkomplu nifirħu. Li niġu fdati b’dawn il-veritajiet tal-Kelma taʼ Jehovah jqanqalna biex nitkellmu tajjeb dwarha. (Salm 56:11 [Salm 56:10, NW]) Qiegħed int tagħmel dan regolarment billi tgħid lil kulħadd li s-Saltna Messjanika t’Alla qiegħda issa tmexxi fis-smewwiet?
Megħjunin Mill-Ispirtu Qaddis u Minn Fratellanza Mad-Dinja Kollha
16, 17. Liema huma t-tieni u t-tielet modi li bihom Alla għenna biex ikollna post fl-iskop divin tiegħu?
16 It-tieni mod kif Alla għenna biex ikollna post fl-iskop divin tiegħu huwa billi tana l-ispirtu qaddis tiegħu, li jagħmilha possibbli għalina biex nipproduċu l-frott sabiħ tiegħu f’ħajjitna u biex niksbu l-approvazzjoni tiegħu. (Galatin 5:22, 23) Barra minn hekk, Pawlu kiteb lill-Kristjani midlukin: ‘Aħna ħadna l-ispirtu taʼ Alla, biex nagħrfu d-doni li Alla għoġbu jagħtina.’ (1 Korintin 2:12) Billi nwieġbu għall-ispirtu taʼ Jehovah, ilkoll kemm aħna nistgħu issa nkunu nafu u nifhmu l-affarijiet tajbin preżenti li hu b’qalb tajba tana—il-wegħdi, il-liġijiet, il-prinċipji tiegħu, eċċ.—Qabbel Mattew 13:11.
17 Inkwantu għat-tielet mod kif Alla qiegħed jgħinna, għandna l-fratellanza tagħna mad-dinja kollha u l-arranġament organizzazzjonali meraviljuż taʼ Jehovah għall-qima. L-appostlu Pietru tkellem dwar dan meta ħeġġiġna parir biex ‘inħobbu lill-aħwa.’ (1 Pietru 2:17) Il-familja internazzjonali maħbuba tagħna t’aħwa rġiel u nisa tgħinna naqdu lil Jehovah b’qalbna mimlija ferħ, bħalma jikkmanda Salm 100:2: “Aqdu bil-ferħ lill-Mulej, idħlu quddiemu b’għana ferrieħi.” Vers 4 jkompli jgħid: “Idħlu b’għana taʼ ħajr mill-bibien tiegħu, bit-tifħir fil-btieħi tat-tempju tiegħu; roddulu ħajr u bierku ismu!” Mela kemm jekk qegħdin inxandru pubblikament u kemm jekk qegħdin nattendu l-laqgħat tagħna, aħna nistgħu nesperjenzaw il-ferħ. X’paċi u sigurtà sibna fil-btieħi sbieħ tat-tempju spiritwali taʼ Jehovah!
Faħħru Bil-Ferħ Lil Jehovah!
18. Għala nistgħu nifirħu f’li nfaħħru lil Jehovah minkejja l-persekuzzjoni jew xi problemi oħrajn li jiġu fuqna?
18 Ikunu x’ikunu ċ-ċirkostanzi diffiċli, il-persekuzzjoni, jew xi problemi oħrajn li jistgħu jiġu fuqna, ejjew nifirħu li aħna qegħdin fid-dar taʼ qima taʼ Jehovah. (Isaija 2:2, 3) Ftakar li dak il-ferħ huwa kwalità fil-qalb. Ħutna l-Kristjani bikrin kienu wħud li faħħru lil Jehovah bil-ferħ minkejja l-ħafna tbatijiet u t-telf li esperjenzaw. (Lhud 10:34) Sħabna fit-twemmin illum huma preċiż bħalhom.—Mattew 5:10-12.
19. (a) Liema ordnijiet ripetuti jqanqluna biex infaħħru lil Jehovah? (b) Il-ħajja eterna tagħna tiddependi fuq liema ħaġa, u x’inhi d-determinazzjoni tagħna?
19 Ilkoll kemm aħna li naqdu lil Jehovah nitgħaxxqu li nobdu l-ordnijiet tal-Bibbja biex infaħħruh. Ripetutament fil-ktieb t’Apokalissi nsibu li t-tifħir lejn Alla huwa akkumpanjat mill-espressjoni “Ħallelujah!” (Apokalissi 19:1-6) Fis-sitt versi taʼ Salm 150, jintqalilna għal 13-il darba biex infaħħru lil Jehovah. Dan huwa appell universali lill-ħolqien kollu biex jingħaqad f’li jkanta tifħir lil Jehovah bil-ferħ. Il-ħajja eterna tagħna tiddependi fuq li aħna ningħaqdu f’li nkantaw dan ir-ritornell kbir taʼ Ħallelujah! Iva, l-uniċi nies li se jgħixu għal dejjem huma dawk li jagħtu tifħir bla waqfien lil Jehovah. Għalhekk, aħna ddeterminati biex inżommu qrib ferm tal-kongregazzjoni leali mad-dinja kollha hekk kif joqrob it-tmiem. Imbagħad, nistgħu nittamaw li naraw il-kliem finali taʼ Salm 150 imwettaq kompletament: “Kull ma jieħu n-nifs, ħa jfaħħar il-Mulej! Ħallelujah!” (w97 7/1)
Kif Twieġeb Int?
◻ X’inhu li jagħmel lin-nies taʼ Jehovah distinti u uniċi?
◻ Il-qaddejja taʼ Jehovah għala huma tant ferħanin?
◻ X’inhu li jagħmilna maqtugħin apparti mid-dinja?
◻ Alla b’liema tliet modi għenna biex ikollna post fl-iskop divin tiegħu?
[Stampa f’paġna 28]
Kulfejn kien, Ġesù ta xiehda għal Jehovah u faħħru pubblikament