Imxi fit-​Triq taʼ l-​Integrità

“Iżda jien nimxi [“fl-​integrità tiegħi,” “Karm Żammit”].”—SALM 26:11.

1, 2. (a) L-​integrità tal-​bniedem għala hija parti importanti mill-​kwistjoni tas-​sovranità t’Alla? (b) Il-​ħlejjaq intelliġenti kif jistgħu juru li jappoġġaw is-​sovranità taʼ Ġeħova?

META Satana rribella fil-​ġnien taʼ l-​Għeden, hu qajjem il-​kwistjoni universali dwar jekk Alla kellux id-​dritt li jaħkem fuq il-​ħlejjaq kollha Tiegħu. Xi żmien wara, hu sfida lil Alla u qallu li l-​bnedmin jaqduh biss għax hekk jaqblilhom. (Ġob 1:9-11; 2:4) Għaldaqstant, l-​integrità tal-​bniedem saret parti importanti mill-​kwistjoni tas-​sovranità universali taʼ Ġeħova.

² Għalkemm is-​sovranità t’Alla ma tiddependix mill-​integrità tal-​ħlejjaq tiegħu, il-​bnedmin u l-​ulied spirti t’Alla jistgħu juru fuq liema naħa jinsabu f’din il-​kwistjoni. Kif? Billi jagħżlu jekk iridux jimxu bl-​integrità jew le. Għaldaqstant, l-​integrità taʼ individwu hija bażi soda fuqiex jistaʼ jiġi ġudikat.

3. (a) Ġob u David x’riedu li Ġeħova jeżamina u jiġġudika? (b) Liema mistoqsijiet iqumu dwar l-​integrità?

³ Ġob setaʼ jgħid b’fiduċja: “Ħa jiżinni Alla b’miżien tajjeb, u jagħraf [“l-​integrità tiegħi,” KŻ].” (Ġob 31:6) Is-​Sultan David taʼ Iżrael tal-​qedem talab lil Ġeħova biex jeżamina l-​integrità tiegħu meta qal: “Agħmel ħaqq miegħi int, Mulej! [“Għax jien imxejt fl-​integrità tiegħi,” “KŻ”], sħiħa fil-​Mulej it-​tama tiegħi.” (Salm 26:1) Kemm huwa vitali li aħna wkoll nimxu fit-​triq taʼ l-​integrità! Imma x’inhi l-​integrità, u xi jfisser li timxi fit-​triq tagħha? X’se jgħinna nżommu l-​integrità?

“Imxejt fl-​Integrità Tiegħi”

4. X’inhi l-​integrità?

⁴ L-​integrità ġġorr il-​ħsieb taʼ li wieħed ikun rett, bla ħtija, ġust, u bla difett. Madankollu, l-​integrità tinvolvi iktar milli wieħed jagħmel is-​sewwa. Din tfisser sodizza morali jew devozzjoni lejn Alla mill-​qalb u b’mod komplet. Satana qajjem dubji dwar il-​motivi taʼ Ġob meta qal lil Alla: “Issa midd idek u olqtu f’għadmu u laħmu [taʼ Ġob], u ara jisħtekx f’wiċċek.” (Ġob 2:5) L-​integrità teħtieġ qalb motivata b’mod xieraq flimkien m’aġir addattat.

5. X’juri li mhux bilfors irridu nkunu perfetti biex inżommu l-​integrità?

⁵ Madankollu, ma jfissirx li rridu nkunu perfetti biex nuru l-​integrità. Is-​Sultan David kien imperfett u żbalja bl-​ikrah matul ħajtu. Minkejja dan, il-​Bibbja titkellem dwaru bħala bniedem li mexa bl-​integrità, jew “bis-​safa tal-​qalb.” (1 Slaten 9:4) Għala? Għax David kien iħobb lil Ġeħova. Qalbu kienet devota lejn Alla. Hu kien lest li jagħraf fejn żbalja, jaċċetta t-​twiddib, u jirranġa triqatu. Tabilħaqq, l-​integrità taʼ David tidher fid-​devozzjoni b’qalb sħiħa u fl-​imħabba li kellu għal Alla tiegħu, Ġeħova.—Dewteronomju 6:5, 6.

6, 7. X’jinvolvi li nimxu bl-​integrità?

⁶ L-​integrità m’hijiex limitata għal xi aspett partikulari tal-​kondotta umana, bħal per eżempju d-​devozzjoni reliġjuża. Din tinkludi kull qasam taʼ ħajjitna. David ‘mexa’ fl-​integrità tiegħu. “Il-​verb ‘timxi’ jimplika ‘mod t’għajxien’ jew ‘stil taʼ ħajja,’” tgħid The New Interpreter’s Bible. Meta tkellem dwar dawk li “triqthom bla ħtija,” is-​salmista kanta: “Henjin dawk li jħarsu l-​preċetti [t’Alla], u li jfittxuh b’qalbhom kollha. Huma ma jagħmlux ħażen, imma jimxu fit-​triqat tal-​Mulej.” (Salm 119:1-3) L-​integrità titlob li kontinwament infittxu li nagħmlu r-​rieda t’Alla u nimxu fit-​triqat tiegħu.

⁷ Sabiex nimxu bl-​integrità rridu nuru devozzjoni leali lejn Alla, anki f’ċirkustanzi mhux favorevoli. Meta nissaportu l-​provi, jew nibqgħu sodi minkejja l-​problemi li jinqalgħu, jew nirreżistu tentazzjonijiet minn din id-​dinja ħażina, l-​integrità tagħna toħroġ fil-​beraħ. Aħna ‘nferrħu qalb Ġeħova’ ħalli hu jkun jistaʼ jwieġeb lil dak li qed jgħajru. (Proverbji 27:11) Għaldaqstant, aħna għandna għalxiex inkunu determinati li nagħmlu bħal Ġob: “Insostni sa ma mmut [“l-​integrità tiegħi,” KŻ].” (Ġob 27:5) Salm kapitlu 26 jurina x’jistaʼ jgħinna nimxu bl-​integrità.

‘Irfina l-​Kliewi Tiegħi u Qalbi’

8. X’tistaʼ titgħallem mill-​fatt li David talab lil Ġeħova biex jeżaminalu l-​kliewi u qalbu?

⁸ David talab: “Ġarrabni, Mulej, u għarbilni, [“irfina l-​kliewi tiegħi,” “NW”] u qalbi.” (Salm 26:2) Il-​kliewi jinsabu misturin fil-​ġewwieni tal-​ġisem. B’mod figurattiv, il-​kliewi jirrappreżentaw l-​iktar ħsibijiet u emozzjonijiet profondi tal-​bniedem. U l-​qalb figurattiva hija dak kollu li l-​bniedem hu minn ġewwa—il-​motivazzjonijiet, is-​sentimenti, u l-​abbiltà mentali tiegħu. Meta David talab lil Ġeħova biex jeżaminah, hu talbu biex ifittixlu u jirfinalu l-​iktar ħsibijiet u sentimenti profondi.

9. Ġeħova b’liema mod jirfinalna l-​kliewi u l-​qalb figurattivi?

⁹ David talab biex jiġu rfinuti l-​kliewi tiegħu u qalbu. Ġeħova kif jirfinana minn ġewwa? David kanta: “Mbierek lill-​Mulej li tani l-​fehma; mqar billejl [“il-​kliewi tiegħi kkoreġewni,” NW].” (Salm 16:7) Dan xi jfisser? Ifisser li l-​pariri mingħand Alla waslu sal-​ġewwieni nett taʼ David, baqgħu hemm, u kkoreġewlu l-​iktar ħsibijiet u emozzjonijiet profondi. L-​istess ħaġa tistaʼ tiġri lilna jekk aħna nirriflettu b’apprezzament fuq il-​pariri li nirċievu permezz tal-​Kelma t’Alla, ir-​rappreżentanti tiegħu, u l-​organizzazzjoni tiegħu u nħalluhom jinżlu fil-​fond taʼ qalbna. Jekk nitolbu regolarment lil Ġeħova biex jirfinana b’dan il-​mod inkunu nistgħu nimxu bl-​integrità.

‘Tjubitek Quddiemi’

10. X’għen lil David jimxi skond is-​sewwa t’Alla?

¹⁰ David kompla: “Tjubitek quddiem għajnejja, mxejt skond is-​sewwa tiegħek.” (Salm 26:3) David kien jafhom sew l-​atti taʼ tjubija t’Alla, u kien jimmedita fuqhom b’apprezzament. “Bierek, ruħ tiegħi, il-​Mulej,” hu kanta, “u la tinsiex il-​ġid kollu li għamel miegħek.” Filwaqt li ftakar f’wieħed mill-​għemejjel taʼ “ġid” li għamel Alla, David kompla: “Il-​Mulej jagħmel is-​sewwa, u l-​ħaqq mal-​maħqurin kollha. Hu għarraf lil Mosè l-​ħsieb tiegħu, l-​għemejjel tiegħu lil ulied Iżrael.” (Salm 103:2, 6, 7) Forsi David kellu f’moħħu l-​moħqrija li batew l-​Iżraelin taħt l-​Eġizzjani fi żmien Mosè. Jekk inhu hekk, il-​fatt li David irrifletta fuq kif Ġeħova għarraf lil Mosè bil-​ħelsien x’aktarx li messlu qalbu u għamlu iktar determinat li jimxi skond is-​sewwa t’Alla.

11. X’jistaʼ jgħinna nimxu fit-​triq taʼ l-​integrità?

¹¹ Xi ħaġa oħra li se tgħinna nimxu fit-​triq taʼ l-​integrità hija li nistudjaw il-​Kelma t’Alla regolarment u nimmeditaw fuq dak li nitgħallmu minnha. Per eżempju, meta niftakru kif Ġużeppi ħarab minn quddiem il-​mara taʼ Putifar meta din ipprovat tħajru għall-​immoralità, żgur se nħossuna inkuraġġiti biex naħarbu minn sitwazzjonijiet simili li jistaʼ jkollna fuq il-​post tax-​xogħol, fl-​iskola, jew xi mkien ieħor. (Ġenesi 39:7-12) Xi ngħidu dwar meta niġu mħajrin b’ġid materjali jew fama u qawwa fid-​dinja sekulari? Għandna l-​eżempju taʼ Mosè, li ċaħad il-​glorja u r-​rikkezzi taʼ l-​Eġittu. (Ebrej 11:24-26) Jekk inżommu f’moħħna s-​sabar taʼ Ġob, żgur li se nsaħħu d-​determinazzjoni tagħna li nibqgħu leali lejn Ġeħova minkejja l-​mard u l-​problemi. (Ġakbu 5:11) Xi ngħidu jekk niġu persegwitati? Għandna l-​esperjenza taʼ Danjel fil-​ħofra taʼ l-​iljuni. Żgur li nimtlew bil-​kuraġġ meta niftakru fiha!—Danjel 6:17-23 (6:16-22, NW).

“Ma Qgħadtx man-​Nies Giddieba”

12, 13. Liema tip taʼ sħubija għandna nevitaw?

¹² Billi rrefera għal fattur ieħor li saħħaħlu l-​integrità tiegħu, David qal: “Ma qgħadtx man-​nies giddieba, ma sseħibtx maʼ nies qarrieqa. Nobgħod il-​ġemgħa tal-​ħżiena, ma nagħmilhiex mal-​midinbin.” (Salm 26:4, 5) David sempliċement ma riedx jagħmilha mal-​ħżiena. Hu kien jobgħodha s-​sħubija ħażina.

¹³ U aħna? Nirrifjutaw li noqogħdu maʼ nies giddieba permezz taʼ programmi fuq it-​televixin, vidjos, films, sites taʼ l-​Internet, jew mezzi oħrajn? Inżommu ’l bogħod minn nies qarrieqa li jaħbu x’inhuma? Fl-​iskola jew fuq ix-​xogħol jistaʼ jkun hemm xi wħud li jagħmluha taʼ ħbieb għal skopijiet makakki. Aħna verament nixtiequ nkunu ħbieb tal-​qalb taʼ wħud li ma jimxux skond is-​sewwa t’Alla? Għalkemm isostnu li huma sinċieri, l-​apostati wkoll għandhom mnejn jidħqu bina biex iġagħluna nieqfu milli naqdu lil Ġeħova. Xi ngħidu jekk hemm xi wħud fil-​kongregazzjoni Kristjana li qed jgħixu ħajja doppja? Dawn ukoll qed jaħbu x’inhuma tassew. Jayson, li issa qed jaqdi bħala qaddej ministerjali, kellu ħbieb bħal dawn f’żgħożitu. Dwarhom, hu jgħid: “Darba, wieħed minnhom qalli: ‘Ma tagħmilx differenza x’nagħmlu issa għax meta tiġi s-​sistema l-​ġdida, se mmutu u daqshekk. Lanqas biss se nindunaw li tlifna xi ħaġa.’ Dan il-​kliem ġabni f’sensija. Jien ma rridx inkun mejjet meta tiġi s-​sistema l-​ġdida.” Jayson kien għaqli u ma baqax jissieħeb maʼ wħud bħal dawn. “Titqarrqux,” wissa l-​appostlu Pawlu. “Kumpanija ħażina tħassar id-​drawwiet siewja.” (1 Korintin 15:33) Kemm hu vitali li nevitaw sħubija ħażina!

“Inxandar Għeġubijietek Kollha”

14, 15. Kif nistgħu ‘nduru madwar l-​artal’ taʼ Ġeħova?

¹⁴ “Naħsel fis-​safa jdejja, u ndur madwar l-​artal tiegħek, Mulej,” kompla David. Għala? “Biex ngħannilek ir-​radd taʼ ħajr, u nxandar għeġubijietek kollha.” (Salm 26:6, 7) David ried jibqaʼ nadif moralment sabiex ikun jistaʼ jqim lil Ġeħova u juri d-​devozzjoni tiegħu lejn Alla.

¹⁵ Kull ħaġa li kellha x’taqsam mal-​qima pura fit-​tabernaklu u iktar tard fit-​tempju kienet ‘rappreżentazzjoni tipika u dell taʼ l-​affarijiet tas-​sema.’ (Ebrej 8:5; 9:23) L-​artal ta stampa tal-​fatt li Ġeħova kien lest li jaċċetta s-​sagrifiċċju taʼ Ġesù Kristu bħala fidwa għall-​umanità. (Ebrej 10:5-10) Aħna naħslu idejna fis-​safa u ‘nduru madwar l-​artal’ taʼ Ġeħova billi neżerċitaw fidi f’dan is-​sagrifiċċju.—Ġwanni 3:16-18.

16. Kif nibbenefikaw meta nxandru m’oħrajn lgħeġubijiet t’Alla?

¹⁶ Meta naħsbu dwar dak kollu li sar possibbli permezz tal-​fidwa, ma timteliex qalbna bi gratitudni lejn Ġeħova u lejn Ibnu l-​uniġenitu? B’din il-​gratitudni f’qalbna, allura, ejja nxandru m’oħrajn l-​għeġubijiet t’Alla—mill-​ħolqien tal-​bniedem fil-​ġnien taʼ l-​Għeden sat-​tiġdid komplet taʼ l-​affarijiet kollha fid-​dinja l-​ġdida t’Alla. (Ġenesi 2:7; Atti 3:21) U kemm jipproteġina spiritwalment ix-​xogħol tax-​xandir tas-​Saltna u taʼ li nagħmlu dixxipli! (Mattew 24:14; 28:19, 20) Iktar ma nħabirku f’dan ix-​xogħol iktar se jkollna tama qawwija għall-​futur, fidi iżjed b’saħħitha fil-​wegħdi t’Alla, u mħabba iżjed soda għal Ġeħova u għal bnedmin oħra bħalna.

“Inħobb id-​Dar taʼ l-​Għamara Tiegħek”

17, 18. X’għandha tkun l-​attitudni tagħna lejn il-​laqgħat Kristjani?

¹⁷ It-​tabernaklu, bl-​artal għas-​sagrifiċċji, kien iċ-​ċentru tal-​qima lil Ġeħova f’Iżrael. David esprima l-​għaxqa tiegħu f’dan il-​post u talab: “Mulej, nħobb id-​dar taʼ l-​għamara tiegħek, il-​post fejn jgħammar sebħek.”—Salm 26:8.

¹⁸ Inħobbu aħna niltaqgħu f’postijiet fejn nitgħallmu dwar Ġeħova? Kull Sala tas-​Saltna bil-​programm kontinwu taʼ tagħlim spiritwali sservi bħala ċ-​ċentru tal-​qima vera fil-​komunità. Barra minn hekk, kull sena jkollna l-​konvenzjonijiet, l-​assembleat tas-​circuit, u l-​jiem t’assemblea speċjali. F’dawn il-​laqgħat jiġu diskussi l-​“preċetti,” jew it-​tfakkiriet, taʼ Ġeħova. Jekk nitgħallmu ‘nħobbuhom ħafna,’ se nkunu ħerqanin biex nattendu l-​laqgħat u waqt li nkunu hemm noqogħdu attenti. (Salm 119:167) Kemm huwa rifreskanti li nkunu maʼ sħabna fit-​twemmin li jixtiqulna l-​ġid u li jgħinuna nibqgħu mexjin bl-​integrità!—Ebrej 10:24, 25.

‘Tgħoddnix Magħhom’

19. David taʼ liema dnubiet ma xtaqx li jinsab ħati?

¹⁹ Ladarba kien konxju bis-​sħiħ tal-​konsegwenzi li jistaʼ jkollu jekk ma jibqax jimxi skond is-​sewwa t’Alla, David talab: “Tgħoddnix man-​nies midinba, anqas maʼ min ixerred id-​dmija; dawk li għandhom f’idejhom il-​ħażen, u f’leminthom rigali qarrieqa.” (Salm 26:9, 10) David ma xtaqx li Ġeħova jgħoddu maʼ nies ħżiena li huma ħatjin tal-​ħażen jew li jieħdu rigali qarrieqa.

20, 21. X’jistaʼ jġagħalna nimxu bħan-​nies li m’għandhomx il-​biżaʼ t’Alla?

²⁰ Id-​dinja taʼ llum tinsab mgħaddsa fi prattiċi immorali. It-​televixin, ir-​rivisti, u l-​films jippromwovu ‘żína, nuqqas taʼ ndafa, u kondotta laxka.’ (Galatin 5:19) Xi wħud saru lsiera tal-​pornografija, li spiss twassal għal kondotta immorali. Iż-​żgħażagħ b’mod speċjali malajr jinfluwenzaw ruħhom b’affarijiet bħal dawn. F’ċerti pajjiżi, il-​ħruġ maʼ xi ħadd tassess oppost huwa drawwa, u ż-​żgħażagħ jiġu mġagħlin jaħsbu li huma jridu jagħmlu l-​istess. Ħafna żgħażagħ jinvolvu ruħhom b’mod romantiku, avolja jkunu għadhom żgħar wisq biex jiżżewġu. Sabiex jissodisfaw ix-​xewqat sesswali li jkunu qed jinġemgħu fihom, huma ma jdumux ma jinvolvu ruħhom f’kondotta immorali sal-​punt li jaqgħu fiż-​żína.

²¹ L-​adulti bl-​ebda mod m’huma ħelsin minn influwenzi ħżiena. Prattiċi diżonesti fin-​negozju u t-​tendenza li wieħed jieħu deċiżjonijiet ibbażati fuq motivi egoistiċi huma indikazzjonijiet taʼ nuqqas taʼ integrità. Jekk nimxu bħalma timxi d-​dinja, inkunu biss qed nitbiegħdu minn Ġeħova. Ejja ‘nobogħdu d-​deni u nħobbu l-​ġid’ u nkomplu nimxu fit-​triq taʼ l-​integrità.—Għamos 5:15.

“Eħlisni Int, u Ħenn Għalija”

22-24. (a) X’inkuraġġiment issib fil-​kliem li jagħlaq bih Salm 26? (b) Liema nassa se tiġi diskussa fl-​artiklu li jmiss?

²² David temm jitkellem m’Alla b’dan il-​kliem: “Iżda jien nimxi [“fl-​integrità tiegħi,” “KŻ”], eħlisni int, u ħenn għalija. Jien b’riġli wieqaf fil-​wita; fil-​ġemgħat, Mulej, lilek inbierek.” (Salm 26:11, 12) Id-​determinazzjoni taʼ David li jibqaʼ jżomm l-​integrità hija marbuta mat-​talba tiegħu għall-​ħelsien. Kemm huwa inkuraġġanti dan! Minkejja l-​istat midneb tagħna, Ġeħova se jgħinna jekk aħna nkunu determinati li nimxu fit-​triq taʼ l-​integrità.

²³ Jalla l-​mod kif ngħixu juri li aħna nirrispettaw u napprezzaw is-​sovranità t’Alla f’kull aspett taʼ ħajjitna. Ilkoll kemm aħna nistgħu nitolbu lil Ġeħova biex jeżaminalna u jirfinalna l-​iktar ħsibijiet u sentimenti profondi. Nistgħu nżommu l-​verità tiegħu quddiemna l-​ħin kollu billi nistudjaw il-​Kelma tiegħu bir-​reqqa. Għaldaqstant, ejja nevitaw akkost taʼ kollox is-​sħubija ħażina u nfaħħru lil Ġeħova fil-​ġemgħat. Jalla nipparteċipaw biż-​żelu fix-​xogħol tax-​xandir tas-​Saltna u taʼ li nagħmlu dixxipli, u qatt ma nħallu lid-​dinja tipperikola r-​relazzjoni prezzjuża tagħna m’Alla. Hekk kif nagħmlu l-​aħjar li nistgħu biex nimxu fit-​triq taʼ l-​integrità, nistgħu nkunu fiduċjużi li Ġeħova se japprovana.

²⁴ Ladarba l-​integrità tinvolvi kull aspett tal-​ħajja, irridu noqogħdu attenti għal nassa perikoluża ħafna—l-​abbuż taʼ l-​alkoħol. Dan se jiġi diskuss fl-​artiklu li jmiss.

Tiftakar Int?

• Il-​ħlejjaq intelliġenti għala jistgħu b’mod xieraq jiġu ġudikati skond l-​integrità tagħhom?

• X’inhi l-​integrità, u x’jinvolvi li nimxu fit-​triq tagħha?

• X’se jgħinna nimxu fit-​triq taʼ l-​integrità?

• Biex nibqgħu nżommu l-​integrità, liema perikli rridu noqogħdu attenti għalihom u nevitawhom?

[Stampa f’paġna 14]

Int titlob lil Ġeħova regolarment biex jeżaminalek l-​iktar ħsibijiet profondi?

[Stampa f’paġna 14]

Iżżomm int l-​atti taʼ tjubija taʼ Ġeħova quddiem għajnejk?

[Stampi f’paġna 15]

Aħna nferrħu qalb Ġeħova meta nżommu l-​integrità minkejja l-​provi

[Stampi f’paġna 17]

Tieħu vantaġġ mill-​provvedimenti taʼ Ġeħova biex jgħinuk timxi fit-​triq taʼ l-​integrità?