Qatt Tieqaf Tkabbar l-​Apprezzament Tiegħek

“Kemm huma [“prezzjużi,” “NW”] ħsibijietek għalija, o Alla! Kemm hu bla tarf l-​għadd tagħhom!”—SALM 139:17.

1, 2. Għala għandna napprezzawha l-​Kelma t’Alla, u s-​salmista kif esprima l-​apprezzament tiegħu?

KIENET sejba rimarkevoli. Waqt li kienu qed isiru xi tiswijiet fit-​tempju taʼ Ġeħova f’Ġerusalemm, il-​Qassis il-​Kbir Ħilkija sab “il-​ktieb tal-​liġi tal-​Mulej mogħtija permezz taʼ Mosè,” mingħajr ebda dubju l-​kopja oriġinali li kienet tlestiet madwar 800 sena qabel! Tistaʼ timmaġina kif ħassu s-​Sultan Ġosija, li kien jibżaʼ minn Alla, meta tqiegħed il-​ktieb quddiemu? Tabilħaqq, hu għożżu u immedjatament qal lil Safan, is-​segretarju, biex jaqrahulu.​—2 Kronaki 34:​14-​18.

² Illum, il-​Kelma t’Alla tistaʼ tinqara, kollha jew partijiet minnha, minn biljuni taʼ nies. Imma jagħmel dan il-​fatt l-​Iskrittura taʼ inqas valur, inqas importanti? Dażgur li le! Wara kollox, fiha l-​ħsibijiet taʼ Dak li Jistaʼ Kollox innifsu u nkitbet għall-​benefiċċju tagħna. (2 Timotju 3:​16) Filwaqt li esprima s-​sentimenti tiegħu dwar il-​Kelma t’Alla, is-​salmista David kiteb: “Kemm huma [“prezzjużi,” NW] ħsibijietek għalija, o Alla! Kemm hu bla tarf l-​għadd tagħhom!”​—Salm 139:17.

3. X’juri li David kellu fehma spiritwali profonda?

³ L-​apprezzament taʼ David għal Ġeħova, il-​Kelma tiegħu, u l-​arranġament tiegħu għall-​qima vera qatt ma naqas. Il-​ħafna salmi sbieħ li kkompona David esprimew kif kien iħossu. Per eżempju, f’Salm 27:4 hu kiteb: “Ħaġa waħda tlabt lill-​Mulej, ħaġa waħda nfittex: li ngħammar f’dar il-​Mulej tul il-​jiem kollha taʼ ħajti; biex nitgħaxxaq bil-​ħlewwa tal-​Mulej jien u nħares [“b’apprezzament,” NW] lejn it-​tempju tiegħu.” Bl-​Ebrajk oriġinali, l-​espressjoni ‘tħares b’apprezzament’ tfisser li ddum tikkontempla, tifli, tħares b’gost, titgħaxxaq, tammira. Bla dubju, David kellu fehma spiritwali profonda u kien raġel li verament japprezza l-​provvedimenti spiritwali taʼ Ġeħova u tgħaxxaq b’kull verità spiritwali li Alla rrivela. L-​eżempju tiegħu f’li juri apprezzament jistħoqqlu li nimitawh.​—Salm 19:​8-​12 (19:​7-​11, NW).

Apprezza l-​Privileġġ li Għandek l-​Għarfien tal-​Verità tal-​Bibbja

4. X’ġiegħel lil Ġesù ‘jħoss ferħ kbir bl-​ispirtu qaddis’?

⁴ Il-​fatt li niksbu dehen tal-​Kelma t’Alla ma jiddependix mill-​intellett jew mill-​edukazzjoni tad-​dinja, li għandha t-​tendenza li ġġiegħel lil dak li jkun jitkabbar. Minflok, jiddependi mill-​ħniena mhix mistħoqqa taʼ Ġeħova li hu juri maʼ dawk li huma umli, li għandhom qalb onesta, u li huma konxji tal-​bżonn spiritwali tagħhom. (Mattew 5:3; 1 Ġwanni 5:​20) Meta Ġesù rrifletta fuq il-​fatt li isem xi bnedmin imperfetti kien qed jinkiteb fis-​sema, hu “ħass ferħ kbir bl-​ispirtu qaddis u qal: ‘Jien infaħħrek quddiem kulħadd, Missier, Mulej tas-​sema u l-​art, għax int ħbejt sew dawn l-​affarijiet mill-​għorrief u l-​intellettwali, u kxifthom liċ-​ċkejknin.’”​—Luqa 10:​17-21.

5. Id-​dixxipli taʼ Ġesù għala ma kellhomx jieħdu ħafif ħafif il-​veritajiet tas-​Saltna li huma rivelati lilhom?

⁵ Wara li qal dik it-​talba mill-​qalb, Ġesù dar lejn id-​dixxipli tiegħu u qal: “Henjin l-​għajnejn li jaraw dak li qed taraw intom. Għax ngħidilkom, Ħafna profeti u slaten xtaqu jaraw dak li qed taraw intom imma ma rawhx, u jisimgħu dak li qed tisimgħu intom imma ma semgħuhx.” Iva, Ġesù inkuraġġixxa lis-​segwaċi leali tiegħu biex ma jiħdux ħafif ħafif il-​veritajiet tas-​Saltna li ġew rivelati lilhom. Dawn il-​veritajiet ma ġewx rivelati lill-​qaddejja t’Alla taʼ ġenerazzjonijiet taʼ qabel, u żgur li ma ġewx magħrufin lill-​“għorrief u l-​intellettwali” taʼ żmien Ġesù!​—Luqa 10:​23, 24.

6, 7. (a) Liema raġunijiet għandna biex napprezzaw il-​verità divina? (b) X’kuntrast naraw illum bejn ir-​reliġjon vera u dik falza?

⁶ Fi żmienna, aħna għandna saħansitra iktar raġunijiet għala għandna nuru apprezzament għall-​veritajiet divini, għax Ġeħova, permezz taʼ l-​“ilsir leali u għaqli,” ta lill-​poplu tiegħu saħansitra dehen iktar profond tal-​Kelma tiegħu. (Mattew 24:45; Danjel 12:10) Dwar iż-​żmien tat-​tmiem, il-​profeta Danjel kiteb: “Ħafna bnedmin għad jifluh sewwa u jikbru fl-​għaqal.” (Danjel 12:4) Ma taqbilx int li llum l-​għarfien t’Alla ‘kiber’ u li l-​qaddejja taʼ Ġeħova huma mitmugħin tajjeb spiritwalment?

⁷ X’kuntrast naraw bejn il-​prosperità spiritwali li jgawdi l-​poplu t’Alla u l-​konfużjoni reliġjuża taʼ Babilonja l-​Kbira! B’riżultat taʼ dan, ħafna li huma diżappuntati jew diżgustati bir-​reliġjon falza qed iduru lejn il-​qima vera. Dawn huma wħud bħal nagħaġ li ‘ma jridux jieħdu sehem [maʼ Babilonja l-​Kbira] fi dnubietha’ jew ‘jirċievu parti mill-​kastigi tagħha.’ Ġeħova u l-​qaddejja tiegħu jistiednu lil uħud bħal dawn biex jiġu fil-​kongregazzjoni Kristjana vera.​—Rivelazzjoni 18:​2-4; 22:17.

Uħud li Japprezzaw Jinġemgħu biex Iqimu ’l Alla

8, 9. Il-​kliem taʼ Ħaggaj 2:7 kif qed jitwettaq illum?

⁸ Dwar id-​dar spiritwali tiegħu għall-​qima, Ġeħova bassar: “Inqanqal [jew, “irriegħed,” NW] il-​ġnus kollha, u l-​ġid kollu tal-​popli jiġi kollu hawn, u nimla dan it-​tempju bil-​glorja.” (Ħaggaj 2:7) Din il-​profezija taʼ l-​għaġeb kellha twettiq fi żmien Ħaggaj meta l-​fdal tal-​poplu t’Alla reġaʼ bena t-​tempju f’Ġerusalemm. Illum, il-​kliem taʼ Ħaggaj qed ikollu iktar twettiq b’konnessjoni mat-​tempju spiritwali kbir taʼ Ġeħova.

⁹ Miljuni diġà nġemgħu lejn it-​tempju figurattiv sabiex iqimu lil Alla “bl-​ispirtu u l-​verità,” u kull sena mijiet t’eluf li huma deskritti bħala “l-​ġid kollu tal-​popli” għadhom qed jinġemgħu. (Ġwanni 4:​23, 24) Per eżempju, ir-​rapport dinji għas-​sena 2006 juri li 248,327 tgħammdu b’simbolu tad-​dedikazzjoni tagħhom lil Ġeħova. Dan jirrappreżenta medja taʼ 680 individwu ġdid kuljum! L-​imħabba tagħhom għall-​verità u x-​xewqa tagħhom biex jaqdu lil Ġeħova bħala proklamaturi tas-​Saltna jagħtu evidenza li huma verament inġibdu minn Alla.​—Ġwanni 6:​44, 65.

10, 11. Irrakkonta esperjenza li turi kif in-​nies bdew japprezzaw il-​verità tal-​Bibbja.

¹⁰ Ħafna minn dawn l-​uħud taʼ qalb onesta qed jinġibdu lejn il-​verità minħabba li huma ‘jagħrfu jagħżlu bejn il-​ġust u l-​ħażin, bejn min jaqdi ’l Alla u min ma jaqdihx.’ (Malakija 3:​18) Ikkunsidra l-​eżempju taʼ Wayne u Virginia, koppja miżżewġa li kienu membri tal-​knisja Protestanta imma li kellhom ħafna mistoqsijiet mhux imweġbin. Huma kienu jobogħduha l-​gwerra u ħassewhom konfużi u mħassbin meta raw lill-​kleru jbierek lis-​suldati u l-​armamenti. Hekk kif komplew jikbru fl-​età, huma ħassewhom injorati mill-​oħrajn fil-​knisja, avolja Virginia kienet għallmet ir-​reliġjon fl-​iskola taʼ nhar taʼ Ħadd għal għadd taʼ snin. “Ħadd ma kien jiġi jarana jew jesprimi interess fil-​benesseri spiritwali tagħna,” qalu huma. “Dak kollu li riedet il-​knisja kien il-​flus tagħna. Aħna bdejna nħossuna konfużi.” Huma saru saħansitra iktar diżappuntati meta l-​knisja tagħhom adottat attitudni permissiva lejn l-​omosesswalità.

¹¹ Sadanittant, it-​tifla tat-​tifla taʼ Wayne u Virginia u iktar tard it-​tifla tagħhom saru Xhieda taʼ Ġeħova. Għalkemm Wayne u Virginia għall-​ewwel ma ħadux pjaċir b’dan, iktar tard huma bidlu fehmiethom u aċċettaw studju tal-​Bibbja. “Fi tliet xhur biss,” qal Wayne, “tgħallimna iktar affarijiet dwar il-​Bibbja milli konna tgħallimna matul is-​70 sena taʼ qabel! Qatt ma konna nafu li isem Alla hu Ġeħova, u ma konna nafu xejn dwar is-​Saltna u dwar l-​art li se tintgħamel Ġenna.” Din il-​koppja sinċiera ma damitx ma bdiet tattendi l-​laqgħat Kristjani u beda jkollha sehem fil-​ministeru. “Irridu ngħidu lil kulħadd dwar il-​verità,” tgħid Virginia. It-​tnejn li huma issa għandhom fuq it-​80 sena, u tgħammdu fl-​2005. Huma qalu: “Sibna familja Kristjana vera.”

Apprezza l-​Fatt li Int ‘Armat għal Kull Għemil Tajjeb’

12. Ġeħova x’jipprovdi dejjem għall-​qaddejja tiegħu, u x’għandna nagħmlu biex nibbenefikaw?

¹² Ġeħova dejjem jgħin lill-​qaddejja tiegħu biex jagħmlu r-​rieda tiegħu. Per eżempju, Noè rċieva istruzzjoni ċara u speċifika dwar kif jibni l-​arka​—proġett li kellu jsir tajjeb mill-​ewwel! U hekk ġara. Għala? Minħabba li Noè “għamel kull ma ordnalu Alla.” (Ġenesi 6:​14-​22) Illum ukoll, Ġeħova jarma bis-​sħiħ lill-​qaddejja tiegħu biex jagħmlu r-​rieda tiegħu. M’għandniex xi ngħidu, ix-​xogħol primarju tagħna hu li nippridkaw l-​aħbar tajba tas-​Saltna stabbilita t’Alla u li ngħinu lil dawk li jistħoqqilhom isiru dixxipli taʼ Ġesù Kristu. U bħalma kien minnu fil-​każ taʼ Noè, is-​suċċess tagħna jiddependi mill-​ubbidjenza. Aħna għandna nsegwu b’ubbidjenza d-​direzzjoni li Ġeħova jipprovdi permezz tal-​Kelma u l-​organizzazzjoni tiegħu.​—Mattew 24:14; 28:​19, 20.

13. Ġeħova b’liema mezz jipprovdilna t-​taħriġ?

¹³ Sabiex inkunu nistgħu nwettqu dak ix-​xogħol, għandna nitgħallmu ‘nimmaniġġaw sew’ l-​għodda primarja tagħna​—il-​Kelma t’Alla​—li “tiswa biex tgħallem, twiddeb, tikkoreġi, tiddixxiplina fis-​sewwa, sabiex il-​bniedem t’Alla jkun kapaċi għalkollox, armat bis-​sħiħ għal kull għemil tajjeb.” (2 Timotju 2:​15; 3:​16, 17) Bħal fl-​ewwel seklu, Ġeħova jagħtina taħriġ taʼ valur kbir permezz tal-​kongregazzjoni Kristjana. Illum il-​ġurnata, biex jgħinuna fil-​ministeru, kull ġimgħa jsiru l-​Iskola tal-​Ministeru Teokratiku u l-​Laqgħa tas-​Servizz fid-​99,770 kongregazzjoni li hawn madwar id-​dinja. Turih int l-​apprezzament tiegħek għal dawn il-​laqgħat importanti billi tattendi regolarment u billi tapplika l-​affarijiet li titgħallem?​—Ebrej 10:​24, 25.

14. Il-​qaddejja taʼ Ġeħova kif juru l-​apprezzament tagħhom għall-​privileġġ taʼ li jaqdu lil Alla? (Inkludi kummenti mit-​tabella f’paġni 27-30.)

¹⁴ Waqt li jħabirku fil-​ministeru, miljuni mill-​poplu t’Alla madwar id-​dinja qed juru l-​apprezzament tagħhom għat-​taħriġ li jirċievu. Per eżempju, matul is-​sena taʼ servizz 2006, 6,741,444 pubblikatur tas-​Saltna qattgħu total taʼ 1,333,966,199 siegħa f’kull aspett taʼ dan ix-​xogħol, u dan jinkludi s-​6,286,618-il studju tal-​Bibbja li kkonduċew fid-​djar. Dawn huma biss ftit mid-​dettalji inkuraġġanti li hemm imniżżlin fir-​rapport minn madwar id-​dinja. Aħna nistidnuk tagħti ħarsa iktar mill-​qrib lejn dan ir-​rapport u tinkuraġġixxi ruħek bih, sewwasew bħalma l-​aħwa fl-​ewwel seklu bla dubju inkuraġġew ruħhom bir-​rapporti taʼ tkabbir fix-​xogħol taʼ l-​ippridkar fi żmienhom.​—Atti 1:​15; 2:​5-​11, 41, 47; 4:4; 6:7.

15. Għala ħadd m’għandu jħossu skuraġġit minħabba s-​servizz li jagħti lil Ġeħova b’ruħu kollha?

¹⁵ L-​għajta kbira taʼ tifħir li titlaʼ lejn Alla kull sena tirrifletti l-​apprezzament profond li l-​qaddejja taʼ Ġeħova għandhom għall-​privileġġ li jafu lil Ġeħova u li jagħtu xiehda għalih. (Isaija 43:10) Veru, is-​sagrifiċċju taʼ tifħir li jagħmlu xi wħud minn ħutna li huma mdaħħlin fiż-​żmien, morda, jew batuti jistaʼ jitqabbel maż-​żewġ muniti li tefgħet l-​armla. Imma jalla ma ninsewx li Ġeħova u Ibnu verament japprezzaw lil dawk kollha li jaqdu lil Alla b’ruħhom kollha, hekk kif jagħmlu dak kollu li jistgħu.​—Luqa 21:​1-4; Galatin 6:4.

16. Liema għodda tat-​tagħlim ipprovda Alla f’dawn l-​aħħar snin?

¹⁶ Minbarra li jħarriġna għall-​ministeru permezz taʼ l-​organizzazzjoni tiegħu, Ġeħova jarmana b’għodda eċċellenti tat-​tagħlim. F’dawn l-​aħħar għaxriet taʼ snin din l-​għodda inkludiet il-​kotba Il-​Verità li Twassal għal Ħajja Eterna, Int Tistaʼ Tgħix Għal Dejjem Fil-​Ġenna Fuq L-​Art, Għarfien Li Jwassal Għall-​Ħajja Taʼ Dejjem u, bħalissa, Il-​Bibbja X’Tgħallem Verament? Dawk li verament japprezzaw dawn il-​provvedimenti jagħmlu użu tajjeb minnhom fil-​ministeru.

Agħmel Użu Tajjeb mill-​Ktieb Il-​Bibbja X’Tgħallem?

17, 18. (a) Liema partijiet mill-​ktieb Il-​Bibbja X’Tgħallem? tieħu pjaċir tuża fil-​ministeru tiegħek? (b) X’qal wieħed indokratur tas-​circuit dwar il-​ktieb Il-​Bibbja X’Tgħallem?

¹⁷ Bid-​19-il kapitlu, l-​appendiċi dettaljat, u l-​lingwa ċara u sempliċi tiegħu, il-​ktieb Il-​Bibbja X’Tgħallem Verament? qed jagħti prova li hu barka għall-​ministeru. Per eżempju, kapitlu 12 jiddiskuti s-​suġġett “Ngħixu Kif Jogħġob ’l Alla.” Dan il-​materjal jispjega lill-​istudent kif hu jistaʼ jsir ħabib t’Alla, xi ħaġa li ħafna lanqas biss qatt ħasbu dwarha jew qatt ma ħasbu li kienet possibbli. (Ġakbu 2:​23) Din l-​għajnuna għall-​istudju tal-​Bibbja kif qed tintlaqaʼ?

¹⁸ Indokratur tas-​circuit fl-​Awstralja jirrapporta li l-​ktieb Il-​Bibbja X’Tgħallem? jolqot lin-​nies mill-​ewwel u ma jdumx ma jqanqal lill-​inkwilini biex jibdew konversazzjoni. Hu żied jgħid li “l-​ktieb tant hu faċli biex tużah li għen lil ħafna pubblikaturi tas-​Saltna jerġgħu jiksbu kunfidenza u ferħ fil-​ministeru. Mhux taʼ b’xejn li l-​ktieb ġie msejjaħ Ingott tad-​Deheb!”

19-21. Irrakkonta xi esperjenzi li jenfasizzaw il-​valur tal-​ktieb Il-​Bibbja X’Tgħallem?

¹⁹ “Bilfors li Alla bagħtek,” qalet waħda mara fil-​Gujana lill-​pijunier li żarha. Ir-​raġel li kien qed jgħix magħha reċentement kien telaq lilha u liż-​żewġt itfal żgħar tagħhom. Il-​pijunier fetaħ il-​ktieb Il-​Bibbja X’Tgħallem? f’kapitlu 1 u qralha paragrafu 11 taħt is-​sottitlu “Alla Kif Iħossu dwar l-​Inġustizzji li Niffaċċjaw?” “Il-​punti verament laqtuha,” qal il-​pijunier. “Fil-​fatt, kellha tqum, tmur fuq in-​naħa taʼ wara tal-​ħanut tagħha, u tibki bikja tajba.” Din il-​mara aċċettat li tibda studju regulari tal-​Bibbja m’oħt li tgħix fil-​lokal u qed tkompli tagħmel progress.

²⁰ José, li jgħix Spanja, tilef lil martu f’aċċident tat-​traffiku. Hu beda jieħu d-​drogi biex isib il-​faraġ, u wkoll kiseb għajnuna professjonali. Madankollu, il-​psikoloġi ma setgħux iwieġbu l-​mistoqsija li tant iddisturbat lil José: “Alla għala ppermetta li marti tmut?” Darba waħda José ltaqaʼ maʼ Francesc li kien jaħdem għall-​istess kumpanija. Francesc issuġġerielu li jiddiskutu kapitlu 11 tal-​ktieb Il-​Bibbja X’Tgħallem? bit-​titlu “Alla Għala Jippermetti s-​Sofferenza?” L-​ispjegazzjoni Skritturali u t-​tixbiha taʼ l-​għalliem u l-​istudent verament impressjonaw lil José. Hu beda jistudja bil-​ħeġġa kollha, attenda l-​assemblea tas-​circuit, u issa qed jattendi l-​laqgħat kollha fis-​Sala tas-​Saltna lokali.

²¹ Roman, negozjant mill-​Polonja li għandu 40 sena, minn dejjem kellu rispett għall-​Kelma t’Alla. Imma minħabba li x-​xogħol kien jiħodlu ħafna mill-​ħin tiegħu, hu ftit għamel progress fl-​istudju tiegħu tal-​Bibbja. Minkejja dan, hu attenda konvenzjoni distrettwali u rċieva kopja tal-​ktieb Il-​Bibbja X’Tgħallem? Minn dakinhar ’il quddiem kien jidher ċar li hu beda jagħmel progress. Hu jgħid: “B’dan il-​ktieb, it-​tagħlim bażiku kollu tal-​Bibbja qisu jinġabar kollu flimkien biex jifforma stampa waħda, bħal jigsaw puzzle.” Issa Roman qed jistudja l-​Bibbja regolarment u qed jagħmel progress kbir.

Kompli Kabbar l-​Apprezzament

22, 23. Kif nistgħu nkomplu nuru l-​apprezzament tagħna għat-​tama li għandna quddiemna?

²² Bħalma ġie spjegat fil-​Konvenzjoni Distrettwali eċċitanti “Il-​Ħelsien fil-​Qrib!,” il-​Kristjani veri jixxennqu għall-​“ħelsien taʼ dejjem” li Alla wiegħed u li għamlu possibbli bit-​tixrid tad-​demm taʼ Ġesù Kristu. M’hemm l-​ebda mod aħjar biex nuru l-​apprezzament tagħna mill-​qalb għal din it-​tama prezzjuża milli nkomplu nżommu lilna nfusna ndaf “mill-​għemejjel mejtin sabiex nagħtu servizz sagru lil Alla l-​ħaj.”​—Ebrej 9:​12, 14.

²³ Iva, huwa tassew miraklu li ’l fuq minn sitt miljun proklamatur tas-​Saltna qed jissaportu lealment fis-​servizz t’Alla meta l-​pressjoni biex ikunu egoisti hija qawwija iktar minn qatt qabel. Dan huwa wkoll prova li l-​qaddejja taʼ Ġeħova japprezzaw profondament l-​unur li jaqdu lil Alla, billi jafu li ‘t-​taħbit tagħhom fil-​Mulej m’huwiex għalxejn.’ Jalla dan l-​apprezzament jibqaʼ dejjem jikber!—1 Korintin 15:58; Salm 110:​3, Saydon.

Int Kif Twieġeb?

• Is-​salmista x’jgħallimna dwar l-​apprezzament għal Alla u l-​provvedimenti spiritwali tiegħu?

• Il-​kliem f’Ħaggaj 2:7 kif qed jitwettaq illum?

• Ġeħova kif jarma lill-​qaddejja tiegħu biex jaqduh b’mod effettiv?

• X’tistaʼ tagħmel int biex turi l-​apprezzament tiegħek għat-​tjubija taʼ Ġeħova?

[Tabella f’paġna 27]

RAPPORT TAS-SENA TA’ SERVIZZ 2006 TAX-XHIEDA TA’ ĠEĦOVA MADWAR ID-DINJA

(Ara bound volume)

[Stampi f’paġna 25]

Ġeħova jarmana bis-​sħiħ sabiex nagħmlu r-​rieda tiegħu

IL-​BIBBJA X’TGĦALLEM Verament?