It-​Tweġiba taʼ Ġeħova Għal Talba mill-​Qalb

“Biex in-​nies ikunu jafu li int, li ismek hu Ġeħova, int waħdek l-​Iktar Għoli fuq l-​art kollha.”—SALM 83:18.

1, 2. Ħafna liema esperjenza kellhom, u x’mistoqsijiet jistgħu jiġu mistoqsijin?

FTIT tas-​snin ilu, waħda mara kienet imnikkta ħafna minħabba traġedja li seħħet fl-​inħawi fejn kienet toqgħod. Peress li kienet ġejja minn familja Kattolika Rumana, hi marret għand il-​qassis tal-​post għall-​għajnuna, imma lanqas biss ried ikellimha. Għalhekk, hi talbet lil Alla: “Ma nafx min int . . . , imma naf li qiegħed hemmhekk. Jekk jogħġbok għinni ħalli nsir nafek!” Ftit taż-​żmien wara, żaruha x-​Xhieda taʼ Ġeħova u tawha l-​faraġ u l-​għarfien li kienet fittxet. Fost affarijiet oħrajn, għallmuha li Alla għandu isem persunali, Ġeħova. Meta saret tafu baqgħet verament impressjonata. “Immaġina ftit,” qalet hi, “dan kien l-​Alla li ili nixtieq insir nafu mindu kont għadni tifla!”

² Ħafna kellhom esperjenza simili. Spiss, l-​ewwel darba li raw l-​isem taʼ Ġeħova kien meta qraw Salm 83:18 fil-​Bibbja. Fit-​Traduzzjoni tad-​Dinja l-​Ġdida, dan il-​vers jgħid: “Biex in-​nies ikunu jafu li int, li ismek hu Ġeħova, int waħdek l-​Iktar Għoli fuq l-​art kollha.” Iżda, qatt ħsibt dwar għala nkiteb Salm 83? Liema ġrajjiet kellhom iġiegħlu lil kulħadd jirrikonoxxi li Ġeħova hu l-​uniku Alla veru? Dan is-​salm liema messaġġ għandu għalina llum? Aħna se nikkunsidraw dawn il-​mistoqsijiet f’dan l-​artiklu.a

Konfoffa Kontra l-​Poplu taʼ Ġeħova

3, 4. Min kitbu Salm 83, u liema theddida jiddeskrivi?

³ Skond is-​sopraskrizzjoni, Salm 83 huwa “melodija t’Asaf.” Il-​kompożitur taʼ dan is-​salm x’aktarx li kien dixxendent tal-​Levita Asaf, mużiċist prominenti matul ir-​renju tas-​Sultan David. F’dan is-​salm, is-​salmista jitlob bil-​ħerqa lil Ġeħova biex jaġixxi ħalli jappoġġa s-​sovranità Tiegħu u jġiegħel li Ismu jsir magħruf. Is-​salm x’aktarx li nkiteb xi żmien wara l-​mewt taʼ Salamun. Għala? Għaliex kemm matul ir-​renju taʼ David u kemm matul ir-​renju taʼ Salamun, is-​sultan taʼ Tir kien ħabib taʼ Israel. Sakemm inkiteb Salm 83, l-​abitanti taʼ Tir kienu daru kontra Israel u bdew iżommu maʼ l-​għedewwa tiegħu.

⁴ Is-​salmista jsemmi għaxart iġnus li kienu qed jikkonfoffaw biex jeqirdu l-​poplu t’Alla. Dawn l-​għedewwa li kien imdawwar bihom Israel huma msemmijin kif ġej: “It-​tined t’Edom u l-​Ismagħelin, Mowab u l-​Ħagrin, Gebal u Għammon u Għamalek, il-​Filistja flimkien maʼ l-​abitanti taʼ Tir. Anki l-​Assirja ssieħbet magħhom.” (Salm 83:6-8) Dan is-​salm għal liema ġrajja storika jirreferi? Xi wħud jissuġġerixxu li dan is-​salm jirreferi għall-​attakk fuq Israel li sar meta ngħaqdu flimkien Ammon, Mowab, u l-​abitanti tal-​Muntanja Segħir fi żmien Ġeħosafat. (2 Kron. 20:1-26) Oħrajn jemmnu li dan is-​salm jitkellem dwar l-​ostilità ġenerali li ġarrab Israel mill-​ġirien tiegħu matul l-​istorja kollha tiegħu.

5. Il-​Kristjani llum liema benefiċċju jiksbu minn Salm 83?

⁵ Kien x’kien il-​każ, huwa evidenti li Alla Ġeħova nebbaħ il-​kitba taʼ din l-​għanja bħala talba fi żmien meta l-​ġens tiegħu kien fil-​periklu. Dan is-​salm jipprovdi wkoll inkuraġġiment għall-​qaddejja t’Alla llum, li matul l-​istorja tagħhom ħabbtu wiċċhom m’attakk wara l-​ieħor minn għedewwa determinati li jeqirduhom. U dan żgur li se jsaħħaħna fil-​futur qarib meta Gog taʼ Magog jiġmaʼ l-​forzi tiegħu f’attentat finali biex jeqred lil kulmin iqim lil Alla bl-​ispirtu u l-​verità.—Aqra Eżekjel 38:2, 8, 9, 16.

Kwistjoni taʼ Interess Primarju

6, 7. (a) Is-​salmista x’jitlob fil-​kliem li jibda bih Salm 83? (b) X’kien l-​interess primarju tas-​salmista?

⁶ Ismaʼ hekk kif is-​salmista jesprimi s-​sentimenti tiegħu f’talba: “O Alla, ħa ma jkunx hemm skiet min-​naħa tiegħek; tibqax imbikkem, u tibqax kwiet, O Divin. Għax, ara, l-​għedewwa tiegħek qamu f’rewwixta; u dawk mimlijin mibegħda għalik refgħu rashom. B’makakkerija huma jkomplu jgħidu diskors kunfidenzjali kontra l-​poplu tiegħek . . . Għax b’qalbhom kollha u f’unità kkonsultaw flimkien; għamlu patt kontrik.”—Salm 83:1-3, 5.

⁷ X’kien l-​interess primarju tas-​salmista? M’għandniex xi ngħidu, hu kien inkwetat ħafna dwar is-​sigurtà persunali tiegħu u dik tal-​familja tiegħu. Madankollu, fit-​talba tiegħu ffoka l-​attenzjoni fuq it-​tmaqdir li kien qed jinġieb fuq l-​isem taʼ Ġeħova u t-​theddid kontra l-​ġens li kien iġorr dan l-​isem. Jalla lkoll kemm aħna nżommu ħarsa bilanċjata bħal din hekk kif nissaportu l-​aħħar jiem diffiċli taʼ din id-​dinja qadima.—Aqra Mattew 6:9, 10.

8. X’kien l-​objettiv tal-​ġnus biex jikkonfoffaw kontra Israel?

⁸ Skond is-​salmista, l-​għedewwa taʼ Israel qalu: “Ejjew ħa nqaċċtuhom darba għal dejjem u ma jibqgħux ġens iżjed, biex l-​isem taʼ Israel ma jitfakkarx iktar.” (Salm 83:4) X’mibegħda kellhom dawn il-​ġnus għall-​poplu magħżul t’Alla! Imma kellhom motiv ieħor biex jikkonfoffaw kontra Israel. Huma b’għira xxennqu għall-​art taʼ Israel u ftaħru: “Ejjew nieħdu taħt idejna l-​postijiet fejn jgħammar Alla.” (Salm 83:12) Ġrat xi ħaġa simili fi żmienna? Iva!

“Il-​Post Qaddis Fejn Tgħammar Int”

9, 10. (a) Fi żmien il-​qedem, x’kien il-​post qaddis fejn jgħammar Alla? (b) Liema barkiet jitgawdew illum mill-​fdal midluk u n-​“nagħaġ oħrajn”?

⁹ Fi żmien il-​qedem, l-​Art Imwiegħda kienu jirreferu għaliha bħala l-​post qaddis fejn jgħammar Alla. Ftakar fl-​għanja tar-​rebħa li kantaw l-​Israelin wara li nħelsu mill-​Eġittu: “Int bil-​qalb tajba bl-​imħabba tiegħek mexxejt lill-​poplu li fdejt; int bis-​saħħa tiegħek se tieħdu lejn il-​post qaddis fejn tgħammar int.” (Eżo. 15:13) Iktar tard, dak “il-​post” kien fih tempju bis-​saċerdozju tiegħu u belt kapitali, Ġerusalemm, b’linja taʼ slaten li kienu dixxendenti taʼ David u li qagħdu bil-​qiegħda fuq it-​tron taʼ Ġeħova. (1 Kron. 29:23) Kellu raġun Ġesù jsejjaħ lil Ġerusalemm “il-​belt tas-​Sultan il-​kbir.”—Mt. 5:35.

¹⁰ Xi ngħidu għal żmienna? Fis-​sena 33 E.K., twieled ġens ġdid, “l-​Israel t’Alla.” (Gal. 6:16) Dan il-​ġens, magħmul mill-​aħwa midlukin taʼ Ġesù Kristu, wettaq l-​inkarigu li Israel tal-​laħam kien fl-​aħħar mill-​aħħar falla li jwettaq, jiġifieri, li jkunu xhieda għall-​isem t’Alla. (Is. 43:10; 1 Pt. 2:9) Lilhom, Ġeħova għamlilhom l-​istess wegħda li kien għamel lil Israel tal-​qedem: “Inkun Alla tagħhom, u huma jkunu l-​poplu tiegħi.” (2 Kor. 6:16; Lev. 26:12) Fl-​1919, Ġeħova ġab il-​fdal taʼ “l-​Israel t’Alla” f’qagħda approvata, u dak iż-​żmien, huma ħadu f’idejhom “art,” jiġifieri, qasam spiritwali t’attività li fih gawdew ġenna spiritwali. (Is. 66:8) Mis-​snin tletin, miljuni taʼ “nagħaġ oħrajn” issieħbu magħhom. (Ġw. 10:16) L-​hena u l-​prosperità spiritwali taʼ dawn il-​Kristjani taʼ żmienna jagħtu evidenza qawwija li s-​sovranità taʼ Ġeħova hija retta. (Aqra Salm 91:1, 2.) Kemm jirrabjah dan lil Satana!

11. X’għadha l-​mira prinċipali taʼ l-​għedewwa t’Alla?

¹¹ Matul iż-​żmien tat-​tmiem, Satana xewwex lill-​aġenti tiegħu fuq l-​art biex jopponu lill-​fdal tal-​midlukin u lil sħabhom in-​nagħaġ oħrajn. Hekk ġara fl-​Ewropa tal-​Punent taħt in-​Nazi u fl-​Ewropa tal-​Lvant taħt il-​gvern Komunista taʼ l-​Unjoni Sovjetika. Dan ġara wkoll f’bosta artijiet oħrajn, u se jerġaʼ jiġri, speċjalment matul l-​attakk finali taʼ Gog taʼ Magog. F’dan l-​attakk, l-​opponenti jistgħu b’regħba jaħtfu l-​proprjetà u kulma jippossiedu n-​nies taʼ Ġeħova, bħalma għamlu l-​għedewwa fl-​imgħoddi. Madankollu, il-​mira prinċipali taʼ Satana minn dejjem kienet li toħloq firda bejnietna bħala poplu sabiex ħadd ma jibqaʼ jiftakar l-​isem “Xhieda taʼ Ġeħova” li hu mogħti minn Alla. Ġeħova kif jirreaġixxi għal din l-​isfida għas-​sovranità tiegħu? Erġaʼ agħti daqqa t’għajn lejn il-​kliem tas-​salmista.

Ir-​Rebħa li Għamel Ġeħova fil-​Passat Isservi t’Eżempju

12-14. Is-​salmista jikteb dwar liema żewġ rebħiet storiċi qrib il-​belt taʼ Megiddo?

¹² Innota l-​fidi soda li kellu s-​salmista fl-​abbiltà taʼ Ġeħova li jħawwad il-​pjanijiet tal-​ġnus li kienu għedewwa tagħhom. Hu jinseġ flimkien żewġ rebħiet deċiżivi li kellu Israel fuq l-​għedewwa tiegħu ħdejn il-​belt tal-​qedem taʼ Megiddo, li kienet tiddomina pjanura fil-​wied bl-​istess isem. Matul is-​sajf, qiegħ ix-​Xmara Kison, li jkun qoxqox, jistaʼ jidher iserrep tul il-​pjanura fil-​wied. Wara xita bil-​qliel fix-​xitwa, ix-​xmara tfur u tgħarraq il-​pjanura. Forsi għal din ir-​raġuni, ix-​xmara tissejjaħ ukoll “l-​ilmijiet taʼ Megiddo.”—Mħ. 4:13; 5:19.

¹³ Madwar 15-il kilometru minn Megiddo għan-​naħa l-​oħra tal-​wied hemm l-​għolja taʼ More, li fi żmien l-​Imħallef Gidegħon, it-​truppi magħqudin tal-​Midjanin, l-​Għamalekin, u n-​nies tal-​lvant inġemgħu għall-​gwerra. (Mħ. 7:1, 12) L-​armata żgħira taʼ Gidegħon fl-​aħħar kien fiha 300 raġel biss, imma bl-​għajnuna taʼ Ġeħova, huma għelbu l-​armata enormi taʼ l-​għadu. Kif? Huma segwew id-​direzzjoni t’Alla, billi dawru l-​kamp taʼ l-​għadu bil-​lejl u żammew f’idhom ġarar li fihom kien hemm moħbijin torċi mqabbdin. Meta Gidegħon ta s-​sinjal, l-​irġiel tiegħu kissru l-​ġarar u minnufih tfaċċaw it-​torċi li kienu moħbijin fihom. Fl-​istess ħin, bdew idoqqu l-​qarn tagħhom u jgħajtu: “Is-​sejf taʼ Ġeħova u taʼ Gidegħon!” L-​għedewwa spiċċaw f’konfużjoni sħiħa, u bdew joqtlu lil xulxin; dawk li ħelsuha ħarbu għan-​naħa l-​oħra tax-​Xmara Ġordan. Sadanittant, Israelin oħrajn ngħaqdu maʼ Gidegħon biex jiġru wara l-​għadu. B’kollox, inqatlu 120,000 suldat taʼ l-​għadu.—Mħ. 7:19-25; 8:10.

¹⁴ Madwar sitt kilometri lil hinn mill-​għolja taʼ More, in-​naħa l-​oħra tal-​wied minn Megiddo, hemm il-​Muntanja Tabor. Hawnhekk, żmien qabel, l-​Imħallef Barak kien ġabar 10,000 truppa taʼ l-​Israelin biex jiħduha kontra l-​armata taʼ Ġabin, is-​sultan Kangħani taʼ Ħasor, li kienet immexxija mill-​kap militari tiegħu Sisera. Din l-​armata taʼ Kangħan kellha 900 karru tal-​gwerra armat bi xfafar twal tal-​ħadid qattiela li kienu jduru mar-​roti. Hekk kif it-​truppi taʼ Israel, li ma tantx kienu armati tajjeb, inġabru fuq il-​Muntanja Tabor, l-​armata taʼ Sisera ġiet imħajra tmur lejn il-​wied. Imbagħad “Ġeħova tefaʼ f’konfużjoni lil Sisera u l-​karrijiet kollha tal-​gwerra tiegħu u lill-​kamp tiegħu.” X’aktarx li f’daqqa waħda niżlet xita bil-​qliel u ġiegħlet lill-​karrijiet jeħlu fit-​tajn minħabba li faret ix-​Xmara Kison. L-​armata kollha nqatlet mill-​Israelin.—Mħ. 4:13-16; 5:19-21.

15. (a) Is-​salmista x’jitolbu jagħmel lil Ġeħova? (b) L-​isem tal-​battalja finali t’Alla fiex ifakkarna?

¹⁵ Is-​salmista jitlob b’qalbu kollha lil Ġeħova biex jagħmel xi ħaġa simili lill-​ġnus li jheddu l-​eżistenza taʼ Israel fi żmienu. Hu jitlob: “Agħmlilhom kif għamilt lil Midjan, kif għamilt lil Sisera, kif għamilt lil Ġabin fil-​wied taʼ Kison. Huma nqerdu għalkollox f’Għajn-dor; saru demel għall-​art.” (Salm 83:9, 10) Huwa sinifikanti li l-​gwerra finali t’Alla kontra d-​dinja taʼ Satana tissejjaħ Ħar-Magedon (li tfisser il-​“Muntanja taʼ Megiddo”), jew Armageddon. Dan l-​isem ifakkarna fil-​battalji deċiżivi li seħħew qrib Megiddo. Ir-​rebħa taʼ Ġeħova f’dawk il-​gwerer tal-​qedem tiżgurana dwar iċ-​ċertezza tat-​trijonf tiegħu fil-​battalja t’Armageddon.—Riv. 16:13-16.

Itlob għall-​Ivvindikar tas-​Sovranità taʼ Ġeħova

16. Illum, l-​opponenti kif ‘inksielhom wiċċhom bid-​diżunur’?

¹⁶ Matul dawn l-​“aħħar jiem,” Ġeħova ġab fix-​xejn l-​isforzi kollha li saru biex jeliminaw lill-​poplu tiegħu. (2 Tim. 3:1) Minħabba f’hekk, l-​opponenti ġew imġegħlin jistħu. Dan hu ffigurat bil-​quddiem f’Salm 83:16, li jgħid: “Iksilhom wiċċhom bid-​diżunur, sabiex in-​nies ifittxu lil ismek, O Ġeħova.” F’pajjiż wara l-​ieħor, l-​opponenti fallew kompletament fl-​isforzi tagħhom biex isikktu lix-​Xhieda taʼ Ġeħova. F’dawk il-​pajjiżi, il-​waqfa soda u s-​sabar li wrew l-​aduraturi taʼ l-​uniku Alla veru servew bħala xiehda għal dawk b’attitudni xierqa, u ħafna nies ‘fittxew lil isem Ġeħova.’ F’għadd taʼ pajjiżi fejn ix-​Xhieda taʼ Ġeħova darba kienu persegwitati bl-​aħrax, issa hemm għaxriet t’eluf, saħansitra mijiet t’eluf, taʼ wħud henjin li jfaħħru lil Ġeħova. Xi trijonf għal Ġeħova! U x’mistħija għall-​għedewwa tiegħu!—Aqra Ġeremija 1:19.

17. Liema sitwazzjoni kritika qed tiffaċċja l-​umanità, u liema kliem dalwaqt se niftakru?

¹⁷ M’għandniex xi ngħidu, aħna nafu li l-​battalja għadha ma spiċċatx. U nkomplu nxandru l-​aħbar tajba—saħansitra lill-​opponenti. (Mt. 24:14, 21) Madankollu, dalwaqt mhux se jkun hemm iktar l-​opportunità li issa hija miftuħa għal dawn l-​opponenti biex jindmu u jiksbu s-​salvazzjoni. It-​taqdis taʼ isem Ġeħova hu bil-​wisq iktar importanti mis-​salvazzjoni tal-​bniedem. (Aqra Eżekjel 38:23.) Meta l-​ġnus jingħaqdu fl-​isforz imbassar biex jeqirdu l-​poplu t’Alla mad-​dinja kollha, aħna se niftakru dan il-​kliem tat-​talba tas-​salmista: “Ħa jistħu u jitħawdu għal dejjem, u ħa jiġu avviliti u jgħibu.”—Salm 83:17.

18, 19. (a) X’hemm lest għall-​opponenti stinati tas-​sovranità taʼ Ġeħova? (b) L-​ivvindikar finali li riesaq tas-​sovranità taʼ Ġeħova kif jeffettwak?

¹⁸ Tmiem umiljanti qed jistenna lill-​opponenti determinati tas-​sovranità taʼ Ġeħova. Il-​Kelma t’Alla tirrivela li dawk li “ma jobdux l-​aħbar tajba”—u li minħabba din ir-​raġuni se jiġu meqrudin f’Armageddon—se jieħdu “qerda għal dejjem.” (2 Tess. 1:7-9) Il-​qerda tagħhom u s-​salvazzjoni taʼ dawk li jqimu lil Ġeħova bil-​verità se jkunu evidenza konvinċenti li Ġeħova hu l-​uniku Alla veru. Fid-​dinja l-​ġdida, din ir-​rebħa kbira m’hijiex se tintesa. Dawk li jiġu lura fl-​“irxoxt . . . tan-​nies sewwa u . . . taʼ dawk li m’humiex sewwa” se jsiru jafu dwar l-​att kbir taʼ Ġeħova. (Atti 24:15) Fid-​dinja l-​ġdida, se jaraw evidenza konvinċenti dwar kemm hu għaqli li tgħix taħt is-​sovranità taʼ Ġeħova. U l-​ġwejdin fosthom malajr se jikkonvinċu ruħhom li Ġeħova hu l-​uniku Alla veru.

¹⁹ X’futur meraviljuż ħejja Missierna tas-​sema kollu mħabba għall-​aduraturi leali tiegħu! Ma tħossokx int imqanqal li titlob biex Ġeħova ma jdumx ma jipprovdi t-​tweġiba finali għat-​talba li s-​salmista talab lil Ġeħova: “Ħa jiġu avviliti u jgħibu [l-għedewwa tiegħek]; biex in-​nies ikunu jafu li int, li ismek hu Ġeħova, int waħdek l-​Iktar Għoli fuq l-​art kollha”?—Salm 83:17, 18.

[Nota taʼ taħt]

Tistaʼ Tispjega?

• Liema sitwazzjoni ffaċċja Israel meta nkiteb Salm 83?

• X’kien l-​interess primarju tal-​kittieb taʼ Salm 83?

• Illum min hu l-​mira taʼ l-​oppożizzjoni minn Satana?

• Ġeħova fl-​aħħar kif se jwieġeb it-​talba li hemm imniżżla f’Salm 83:18?

[Mappa f’paġna 15]

(Għall-formazzjoni sħiħa tat-​test, ara pubblikazzjoni)

Il-​battalji miġġildin qrib Megiddo tal-​qedem kif inhuma konnessi mal-​futur tagħna?

Xmara Kison

Ħaroset

Il-​Muntanja Karmel

Wied taʼ Ġeżragħel

Megiddo

Tagħnak

Il-​Muntanja Gilbogħa

Bir taʼ Ħarod

More

Għajn-dor

Il-​Muntanja Tabor

Baħar tal-​Galilija

Xmara Ġordan

[Stampa f’paġna 12]

X’qanqal lil wieħed salmista biex jikteb talba mill-​qalb?