Kapitlu 10

Is-​Saltna t’Alla Taħkem

1, 2. Il-​gvernijiet umani kif taw prova li m’humiex adekwati?

FORSI int għaddejt mill-​esperjenza taʼ li tixtri xi tagħmir, biex imbagħad issib li ma kienx jaħdem. Nagħmlu mod li ċempilt lil xi ħadd biex isewwihulek. Ftit wara li “sewwa” l-​apparat, madankollu, dan waqaf. Kemm kien taʼ diżappunt dak!

² Huwa simili inkwantu għall-​gvernijiet umani. Il-​bnedmin minn dejjem xtaqu gvern li kellu jassigura l-​paċi u l-​hena. Madankollu, sforzi qawwijin biex isewwu l-​ħsarat fis-​soċjetà ma kinux verament taʼ suċċess. Partita trattati taʼ paċi ġew magħmulin—u mbagħad miksurin. Iktar minn hekk, liema gvern kien kapaċi jneħħi għalkollox il-​faqar, il-​preġudizzju, il-​kriminalità, il-​mard, u r-​rovina ekoloġika? Il-​ħakma tal-​bniedem ma tistax tissewwa. Saħansitra l-​għaref sultan Salamun taʼ Iżrael staqsa: “Kif jistaʼ l-​bniedem jifhem triqtu?”—Proverbji 20:24.

3. (a) X’kienet it-​tema taʼ l-​ippridkar taʼ Ġesù? (b) Xi nies kif jiddeskrivuha s-​Saltna t’Alla?

³ Tiddisprax! Gvern dinji stabbli m’huwiex sempliċi ħolma. Kien it-​tema taʼ l-​ippridkar taʼ Ġesù. Hu sejjaħlu “s-​Saltna taʼ Alla,” u għallem lis-​segwaċi tiegħu biex jitolbu għalih. (Luqa 11:2; 21:31) M’għandniex xi ngħidu, is-​Saltna t’Alla hija kultant imsemmija fi gruppi reliġjużi. Fil-​fatt, miljuni jitolbu għaliha kuljum meta jirrepetu t-​Talba tal-​Mulej (imsejħa wkoll il-​Missierna jew talba mudell). Imma n-​nies iwieġbu b’diversi modi meta jiġu mistoqsijin: “X’inhi s-​Saltna t’Alla?” Xi wħud jgħidu, “Hija f’qalbek.” Oħrajn isejħulha s-​sema. Il-​Bibbja tagħti tweġiba ċara, bħalma se naraw.

SALTNA BI SKOP

4, 5. Jehovah għala għażel li jġiegħel li ssir manifestazzjoni ġdida tas-​sovranità tiegħu, u din x’se twettaq?

⁴ Alla Jehovah minn dejjem kien Sultan, jew Ħakkiem Sovran, taʼ l-​univers. Il-​fatt li hu ħalaq l-​affarijiet kollha jelevah għal dik il-​pożizzjoni eżaltata. (1 Kronaki 29:11; Salm 103:19; Atti 4:24) Imma s-​Saltna li Ġesù ppriedka dwarha hija sussidjarja, jew sekondarja, għas-​sovranità universali t’Alla. Dik is-​Saltna Messjanika għandha skop speċifiku, imma x’inhu?

⁵ Bħalma huwa spjegat f’Kapitlu 6, l-​ewwel par uman irribellaw kontra l-​awtorità t’Alla. Minħabba l-​kwistjonijiet li ġew imqajmin, Jehovah għażel li jġiegħel li ssir manifestazzjoni ġdida tas-​sovranità tiegħu. Alla ħabbar l-​iskop tiegħu li jipproduċi ‘nisel’ li kellu jfarrak lis-​Serpent, Satana, u jneħħi l-​effetti tad-​dnub li ntiret mill-​umanità. In-​‘nisel’ primarju huwa Ġesù Kristu, u “s-​Saltna taʼ Alla” hija l-​aġenzija li se tegħleb kompletament lil Satana. Permezz taʼ din is-​Saltna, Ġesù Kristu se jirrestawra l-​istat taʼ ħakkiem għal fuq l-​art f’isem Jehovah u se jivvindika għal dejjem is-​sovranità t’Alla bi dritt.—Ġenesi 3:15; Salm 2:2-9.

6, 7. (a) Is-​Saltna fejn qiegħda, u min huma s-​Sultan u l-​ħakkiema mseħbin tiegħu? (b) Min huma s-​sudditi tas-​Saltna?

⁶ Skond traduzzjoni waħda tal-​kliem taʼ Ġesù lil Fariżej mill-​agħar, hu qal: “Is-​saltna t’Alla hi ġo fikom.” (Luqa 17:21, KŻ) Ried Ġesù jfisser li s-​Saltna kienet fil-​qlub mill-​agħar taʼ dawk l-​irġiel korrotti? Le. Traduzzjoni iktar eżatta tal-​Grieg oriġinali tinqara: “Is-​Saltna taʼ Alla fostkom qiegħda.” (Bibbja bil-​Malti taʼ l-​Għaqda Biblika) Ġesù, li kien f’nofshom, b’hekk irrefera għalih innifsu bħala s-​Sultan futur. Mhux talli m’hijiex xi ħaġa li individwu jkollu f’qalbu, imma talli s-​Saltna t’Alla hija gvern reali li qiegħed jopera u li għandu ħakkiem u sudditi. Din hija gvern tas-​sema, għax tissejjaħ kemm is-​“Saltna tas-​Smewwiet” u kemm is-​“Saltna taʼ Alla.” (Mattew 13:11; Luqa 8:10) Fil-​viżjoni, il-​profeta Danjel lemaħ il-​Ħakkiem tagħha “bħal iben taʼ bniedem” miġjub quddiem Alla li Jistaʼ Kollox u mogħti “ħakma, ġieħ, u saltna” dejjiema “biex lilu jaqdi kull ġens, u poplu, u lsien.” (Danjel 7:13, 14) Min hu dan is-​Sultan? Sewwa, il-​Bibbja lil Ġesù Kristu ssejjaħlu “Bin il-​bniedem.” (Mattew 12:40; Luqa 17:26) Iva, Jehovah innomina lil Ibnu, Ġesù Kristu, biex ikun Sultan.

⁷ Ġesù ma jaħkimx waħdu. Miegħu hemm 144,000 li ġew “mifdijin mill-​art” biex ikunu slaten u qassisin imseħbin miegħu. (Apokalissi 5:9, 10; 14:1, 3; Luqa 22:28-30) Is-​sudditi tas-​Saltna t’Alla se jkunu familja globali taʼ bnedmin li huma sottomessi lejn it-​tmexxija taʼ Kristu. (Salm 72:7, 8) Kif, iżda, nistgħu nkunu żguri li s-​Saltna attwalment se tivvindika s-​sovranità t’Alla u tirrestawra kundizzjonijiet taʼ ġenna lill-​art tagħna?

IR-​REALTÀ TAS-​SALTNA T’ALLA

8, 9. (a) Kif nistgħu nagħtu tixbieha taʼ kemm huma taʼ min joqgħod fuqhom il-​wegħdi t’Alla dwar is-​Saltna? (b) Għala nistgħu nkunu żguri mir-​realtà tas-​Saltna?

⁸ Immaġina li nar qeridlek id-​dar. Issa ħabib li għandu l-​mezzi jwiegħed li jgħinek tibni d-​dar tiegħek mill-​ġdid u jipprovdi l-​ikel għall-​familja tiegħek. Jekk dak il-​ħabib dejjem qallek il-​verità, ma kontx temmnu? Suppost li l-​għada ġejt lura d-​dar mix-​xogħol u sibt li l-​ħaddiema diġà kienu qegħdin jibdew inaddfu t-​tifrik li ħalla n-​nar u li l-​ikel kien ġie pprovdut għall-​familja tiegħek. Bla dubju kont tkun kompletament fiduċjuż li hekk kif jgħaddi ż-​żmien, l-​affarijiet mhux biss kienu se jiġu rrestawrati imma kellhom ikunu saħansitra aħjar minn qabel.

⁹ Bl-​istess mod, Jehovah jagħtina assiguranza dwar ir-​realtà tas-​Saltna. Bħalma huwa muri fil-​ktieb taʼ Lhud, ħafna aspetti tal-​Liġi kienu dell bil-​quddiem taʼ l-​arranġament tas-​Saltna. (Lhud 10:1) Tidwil bil-​quddiem dwar is-​Saltna t’Alla kien evidenti wkoll fis-​saltna taʼ l-​art taʼ Iżrael. Dak ma kienx xi gvern ordinarju, għax il-​ħakkiema qagħdu bil-​qiegħda fuq “it-​tron tal-​Mulej.” (1 Kronaki 29:23) Iktar minn hekk, kien ġie mbassar: “Ix-​xettru m’huwiex se jdur fil-​ġenb minn Ġuda, lanqas il-​ħatar tal-​kmandant minn bejn riġlejh, sakemm jiġi Xilo; u lilu se tappartjeni l-​ubbidjenza tal-​popli.” (Ġenesi 49:10, NW)a Iva, kien f’din il-​linja taʼ slaten Ġudeani li Ġesù, is-​Sultan permanenti tal-​gvern t’Alla, kellu jitwieled.—Luqa 1:32, 33.

10. (a) Il-​pedament tas-​Saltna Messjanika t’Alla meta ġie mqiegħed? (b) Il-​ħakkiema sħab prospettivi taʼ Ġesù lil liema xogħol importanti kellhom ikunu qegħdin jagħtu spinta?

¹⁰ Il-​pedament tas-​Saltna Messjanika t’Alla ġie mqiegħed meta ġew magħżulin l-​appostli taʼ Ġesù. (Efesin 2:19, 20; Apokalissi 21:14) Dawn kienu l-​ewwel mill-​144,000 li kellhom jaħkmu fis-​sema bħala slaten imseħbin maʼ Ġesù Kristu. Waqt li qegħdin fuq l-​art, dawn il-​ħakkiema mseħbin prospettivi kellhom jagħtu spinta lil kampanja taʼ xiehda, billi jżommu mal-​kmand taʼ Ġesù: “Morru . . . agħmlu dixxipli mill-​ġnus kollha, u għammduhom fl-​isem tal-​Missier u taʼ l-​Iben u taʼ l-​Ispirtu s-​Santu.”—Mattew 28:19.

11. Ix-​xogħol taʼ l-​ippridkar tas-​Saltna kif qiegħed isir illum, u x’qiegħed iwettaq?

¹¹ Il-​kmand biex jagħmlu dixxipli qiegħed issa jiġi obdut fuq skala li qatt ma kien hawn bħalha. Ix-​Xhieda taʼ Jehovah qegħdin jipproklamaw l-​aħbar tajba tas-​Saltna madwar il-​globu kollu, f’armonija mal-​kliem profetiku taʼ Ġesù: “Din il-​Bxara t-​tajba tas-​Saltna tixxandar fid-​dinja kollha, biex il-​ġnus kollha jkollhom xhieda. Imbagħad jiġi t-​tmiem.” (Mattew 24:14) Bħala aspett wieħed tax-​xogħol taʼ l-​ippridkar tas-​Saltna, programm edukattiv kbir ferm qiegħed jiġi mwettaq. Dawk li jissottomettu ruħhom lejn il-​liġijiet u l-​prinċipji tas-​Saltna t’Alla diġà qegħdin jesperjenzaw paċi u unità li l-​gvernijiet umani ma jistgħux jiksbu. Dan kollu jagħti evidenza ċara li s-​Saltna t’Alla hija realtà!

12. (a) Għala huwa xieraq li wieħed isejjaħ lill-​proklamaturi tas-​Saltna Xhieda taʼ Jehovah? (b) Is-​Saltna t’Alla kif inhi differenti mill-​gvernijiet umani?

¹² Jehovah qal lill-​Iżraeliti: “Intom ix-​xhieda tiegħi, . . . [i]l-qaddej tiegħi li jiena ħtart.” (Isaija 43:10-12) Ġesù, “ix-​Xhud Leali,” b’mod żeluż iddikjara l-​aħbar tajba tas-​Saltna. (Rivelazzjoni 1:5, NW; Mattew 4:17) Mela huwa xieraq li l-​proklamaturi tas-​Saltna tal-​lum iġibu fuqhom l-​isem maħtur b’mod divin Xhieda taʼ Jehovah. Imma x-​Xhieda għala jqattgħu daqs dak ħin u sforz ikellmu lil oħrajn dwar is-​Saltna t’Alla? Dan jagħmluh għaliex is-​Saltna hija l-​unika tama għall-​bnedmin. Il-​gvernijiet umani llum jew għada jispiċċaw, imma s-​Saltna t’Alla qatt ma se tispiċċa. Isaija 9:5, 6 [9:6, 7, NW] isejjaħ lill-​Ħakkiem tagħha, Ġesù, il-​“Prinċep tas-​sliem” u jżid: “Kbira tkun saltnatu, u s-​sliem bla qjies.” Is-​Saltna t’Alla m’hijiex bħall-​gvernijiet tal-​bniedem—illum hawn u għada telqu. Tabilħaqq, Danjel 2:44 jgħid: “Alla tas-​sema jqajjem saltna li ma tinqered qatt, u li l-​ħakma tagħha ma tgħaddix għal poplu ieħor. . . . Hi tibqaʼ wieqfa għal dejjem.”

13. (a) X’inhuma xi problemi li s-​Saltna t’Alla se tittratta magħhom b’suċċess? (b) Għala nistgħu nkunu żguri li l-​wegħdi t’Alla se jiġu mwettqin?

¹³ Liema sultan uman jistaʼ jwassal biex jiġu eliminati l-​gwerer, il-​kriminalità, il-​mard, il-​ġuħ, u n-​nuqqas taʼ djar? Barra minn hekk, liema ħakkiem taʼ l-​art jistaʼ jirxoxta lil dawk li mietu? Is-​Saltna t’Alla u s-​Sultan tagħha se jittrattaw maʼ dawn il-​kwistjonijiet. Is-​Saltna m’hijiex se toħroġ difettuża, bħal xi tagħmir li jaħdem ħażin u li jkollu bżonn it-​tiswija kontinwament. Minflok, is-​Saltna t’Alla se jkollha suċċess għax Jehovah iwiegħed: “Kelmti . . . toħroġ minn fommi, u ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.” (Isaija 55:11) L-​iskop t’Alla m’huwiex se jfalli, imma l-​ħakma tas-​Saltna meta kellha tibda?

ĦAKMA TAS-​SALTNA—META?

14. Id-​dixxipli taʼ Ġesù liema fehma żbaljata kellhom rigward is-​Saltna, imma Ġesù x’kien jaf dwar l-​istat taʼ ħakkiem tiegħu?

¹⁴ “Mulej, hu dan iż-​żmien li fih int se terġaʼ twaqqaf is-​Saltna taʼ Israel?” Din il-​mistoqsija mqajma mid-​dixxipli taʼ Ġesù rrivelat li kienu għadhom ma jafux l-​iskop tas-​Saltna t’Alla u ż-​żmien maħtur biex il-​ħakma tagħha tibda. Billi wissiehom biex ma jispekulawx dwar il-​kwistjoni, Ġesù qal: “M’hix biċċa tagħkom li tkunu tafu l-​waqt u ż-​żmien li l-​Missier għażel bis-​setgħa tiegħu.” Ġesù kien jaf li l-​istat taʼ ħakkiem tiegħu għal fuq l-​art kien irriżervat għall-​futur, ħafna wara l-​irxoxt u t-​tlugħ tiegħu fis-​sema. (Atti 1:6-11; Luqa 19:11, 12, 15) L-​Iskrittura kienet bassritu dan. Kif?

15. Salm 110:1 kif jitfaʼ dawl fuq iż-​żmien u l-​waqt għall-​istat taʼ ħakkiem taʼ Ġesù?

¹⁵ Billi b’mod profetiku rrefera għal Ġesù bħala “Mulej,” is-​Sultan David qal: “Il-​kelma tal-​Mulej lil Sidi: ‘Oqgħod fuq il-​lemin tiegħi, sa ma nqiegħed l-​egħdewwa tiegħek mirfes taħt riġlejk.’” (Salm 110:1; qabbel Atti 2:34-36.) Din il-​profezija tindika li l-​istat taʼ ħakkiem taʼ Ġesù ma kellux jibda immedjatament wara t-​tlugħ tiegħu fis-​sema. Minflok, kellu jistenna fuq in-​naħa tal-​lemin t’Alla. (Lhud 10:12, 13) Kemm kellha ddum din l-​istennija? Meta kellu jibda l-​istat taʼ ħakkiem tiegħu? Il-​Bibbja tgħinna nsibu t-​tweġibiet.

16. X’ġara fis-​sena 607 Q.E.K., u dan kif kien relatat mas-​Saltna t’Alla?

¹⁶ L-​unika belt fl-​art kollha li fuqha Jehovah poġġa ismu kienet Ġerusalemm. (1 Slaten 11:36) Kienet ukoll il-​kapitali taʼ saltna taʼ l-​art approvata minn Alla tipika tas-​Saltna tas-​sema t’Alla. Għalhekk, il-​qerda taʼ Ġerusalemm mill-​Babilonjani fis-​sena 607 Q.E.K. kienet sinjifikanti ħafna. Din il-​ġrajja mmarkat il-​bidu taʼ interruzzjoni twila taʼ ħakma diretta t’Alla fuq il-​poplu tiegħu fuq l-​art. Madwar sitt sekli wara, Ġesù indika li dan il-​perijodu taʼ ħakma interrotta kien għadu sejjer, għax hu qal: “Ġerusalemm tibqaʼ tintrifes taħt saqajn il-​ġnus sa ma jkun għadda żmien il-​ġnus.”—Luqa 21:24.

17. (a) X’inhu “żmien il-​ġnus,” u kemm kellu jdum? (b) “Żmien il-​ġnus” meta beda u ntemm?

¹⁷ Matul “żmien il-​ġnus,” gvernijiet dinjin kellhom jiġu mħollijin jinterrompu stat taʼ ħakkiem approvat minn Alla. Dak il-​perijodu beda bil-​qerda taʼ Ġerusalemm fis-​sena 607 Q.E.K., u Danjel indika li dan kellu jibqaʼ sejjer għal “sebaʼ żminijiet.” (Danjel 4:20-22 [4:23-25, NW]) Dak kemm huwa twil? Il-​Bibbja turi li tliet “żminijiet” u nofs jammontaw għal 1,260 jum. (Apokalissi 12:6, 14) Id-​doppju taʼ dak il-​perijodu, jew sebaʼ żminijiet, kellu jkun 2,520 jum. Imma l-​ebda ħaġa notevoli ma ġrat fi tmiem dak il-​perijodu qasir taʼ żmien. Billi napplikaw “jum għal sena” għall-​profezija taʼ Danjel u ngħoddu 2,520 sena mis-​sena 607 Q.E.K., madankollu, naslu għas-​sena 1914 E.K.—Numri 14:34; Eżekjel 4:6.

18. Ġesù x’għamel ftit wara li rċieva l-​qawwa tas-​Saltna, u dan kif effettwa lill-​art?

¹⁸ Beda Ġesù jsaltan fis-​sema f’dak iż-​żmien? Raġunijiet Skritturali għala qegħdin ngħidu li beda se jiġu diskussi fil-​kapitlu li jmiss. M’għandniex xi ngħidu, il-​bidu tal-​ħakma taʼ Ġesù ma kellux ikun immarkat minn paċi immedjata fuq l-​art. Apokalissi 12:7-12 juri li sewwa sew wara li jirċievi s-​Saltna, Ġesù kellu jwaddab lil Satana u lill-​anġli demonji ’l barra mis-​sema. Dan kellu jfisser gwaj għall-​art, imma jqawwilek qalbek meta taqra li x-​Xitan “żmien ftit” biss baqagħlu. Dalwaqt, se nkunu nistgħu nithennew mhux biss minħabba li s-​Saltna t’Alla taħkem imma wkoll minħabba li se ġġib barkiet għall-​art u għall-​umanità ubbidjenti. (Salm 72:7, 8) Kif nafu li dan se jiġri dalwaqt?

[Nota taʼ taħt]

ITTESTJA L-​GĦARFIEN TIEGĦEK

X’inhi s-​Saltna t’Alla, u minfejn taħkem?

Min jaħkem fis-​Saltna, u min huma s-​sudditi tagħha?

Jehovah kif assigurana li s-​Saltna tiegħu hija realtà?

“Żmien il-​ġnus” meta beda u ntemm?

[Kaxxa f’paġna 94]

XI ĠRAJJIET IMPORTANTI RELATATI MAS-​SALTNA T’ALLA

• Jehovah iħabbar l-​iskop tiegħu biex jipproduċi ‘nisel’ li kellu jfarrak ras is-​Serpent, Satana x-​Xitan.—Ġenesi 3:15.

• Fl-​1943 Q.E.K., Jehovah jindika li dan in-​‘nisel’ kellu jkun dixxendent uman t’Abraham.—Ġenesi 12:1-3, 7; 22:18.

• Il-​patt tal-​Liġi mogħti lil Iżrael fis-​sena 1513 Q.E.K. jipprovdi “dell tal-​ġid li għandu jiġi.”—Eżodu 24:6-8; Lhud 10:1.

• Is-​saltna taʼ l-​art taʼ Iżrael tibda fl-​1117 Q.E.K., u tkompli iktar tard fil-​linja taʼ David.—1 Samwel 11:15; 2 Samwel 7:8, 16.

• Ġerusalemm tiġi meqruda fis-​sena 607 Q.E.K., u jibda “żmien il-​ġnus.”—2 Slaten 25:8-10, 25, 26; Luqa 21:24.

• Fis-​sena 29 E.K., Ġesù jiġi midluk bħala Sultan Innominat u jibda l-​ministeru tiegħu fuq l-​art.—Mattew 3:16, 17; 4:17; 21:9-11.

• Fis-​sena 33 E.K., Ġesù jitlaʼ fis-​sema, biex hemmhekk jistenna fuq il-​leminija t’Alla sakemm tibda l-​ħakma tiegħu.—Atti 5:30, 31; Lhud 10:12, 13.

• Ġesù jiġi mogħti t-​tron fis-​Saltna tas-​sema fl-​1914 E.K. hekk kif “żmien il-​ġnus” jintemm.—Apokalissi 11:15.

• Satana u d-​demonji tiegħu jiġu mitfugħin ’l isfel lejn il-​viċinanza taʼ l-​art u jġibu iktar gwaj għall-​umanità.—Apokalissi 12:9-12.

• Ġesù jindokra l-​ippridkar mad-​dinja kollha taʼ l-​aħbar tajba tas-​Saltna t’Alla.—Mattew 24:14; 28:19, 20.