Nikkultivaw il-Biżaʼ t’Alla

“Ibżaʼ minn Jehovah u dur lil hinn mill-​ħażen.”—Proverbji 3:7.

1. Il-​ktieb taʼ Proverbji għal min kien miktub?

IL-​KTIEB Bibliku taʼ Proverbji fih abbundanza taʼ pariri spiritwali. Jehovah ipprovda dan il-​ktieb taʼ gwida inizzjalment biex jistruwixxi lill-​ġens tipiku tiegħu taʼ Iżrael. Illum, jipprovdi qwiel għaqlin għall-​ġens Kristjan u qaddis tiegħu, ‘li fuqu waslu t-​tmimijiet tas-​sistemi taʼ affarijiet.’—1 Korintin 10:11; Proverbji 1:1-5; 1 Pietru 2:9.

2. It-​twissija fi Proverbji 3:7 għala hi ferm f’waqtha llum?

² Billi niftħu Proverbji 3:7, naqraw: “Issirx għaref f’għajnejk stess. Ibżaʼ minn Jehovah u dur lil hinn mill-​ħażen.” Minn żmien l-​ewwel ġenituri tagħna lil hawn, meta s-​Serpent ħajjar lil Eva bil-​wegħda taʼ li huma jkunu ‘jafu t-​tajjeb u l-​ħażin,’ is-​sempliċi għerf uman ma rnexxielux iwieġeb għall-​ħtiġijiet tal-​bnedmin. (Ġenesi 3:4, 5; 1 Korintin 3:19, 20) F’ebda perijodu taʼ l-​istorja ma kien dan iktar ċar milli f’dan is-​seklu 20​—dawn “l-​aħħar jiem” meta l-​umanità, li qiegħda taħsad il-​frott taʼ ħsieb ateistiku, evoluzzjonarju, hija kkastigata bir-​razziżmu, bil-​vjolenza, u b’kull xorta taʼ immoralità. (2 Timotew 3:1-5, 13; 2 Pietru 3:3, 4) Hija ‘diżordni ġdida dinjija’ li la l-​ĠM u lanqas ir-​reliġjonijiet maqsumin tad-​dinja ma jistgħu jgibuha f’postha.

3. Liema żviluppi kienu pprofetizzati għal żmienna?

³ Il-​Kelma profetika t’Alla tgħarrafna li forzi demoniċi marru ’l quddiem lejn “is-​slaten taʼ l-​art abitata kollha, biex jiġimgħuhom flimkien għall-​gwerra tal-​jum il-​kbir t’Alla li Jistaʼ Kollox . . . lejn il-​post li hu msejjaħ bl-​Ebrajk Ħar-Magedon.” (Rivelazzjoni 16:14, 16) Dalwaqt terrur mingħand Jehovah se jiġi fuq dawk is-​slaten, jew ħakkiema. Se jkun bħat-​twerwir li ġie fuq il-​Kangħaniti meta Ġożwè u l-​Iżraeliti ġew biex jesegwixxu ġudizzju fuqhom. (Ġożwè 2:9-11) Imma llum huwa l-​wieħed iffigurat bil-​quddiem minn Ġożwè, Kristu Ġesù​—is-​“Sultan tas-​slaten u Mulej tal-​mulejiet”—​li se ‘jolqot lill-​ġnus, u jirgħahom b’virga tal-​ħadid’ f’espressjoni “tar-​rabja tal-​korla t’Alla li Jistaʼ Kollox.”—Rivelazzjoni 19:15, 16.

4, 5. Min se jsib salvazzjoni, u għala?

⁴ Min se jsib salvazzjoni f’dak iż-​żmien? Dawk salvati se jkunu, mhux dawk imwerwrin bit-​twerwir, imma dawk kollha li kkultivaw biżaʼ reverenzjali taʼ Jehovah. Minflok ma jkunu għorrief f’għajnejhom stess, dawn ‘iduru lil hinn mill-​ħażen.’ Bl-​umiltà, jitimgħu lil imħuħhom b’dak li hu tajjeb, sabiex il-​ħażen ma jidħolx fil-​ħsieb tagħhom. Huma jgħożżu rispett bnin lejn is-​Sovran Mulej Jehovah, l-​“Imħallef taʼ l-​art kollha,” li wasal biex jagħti l-​mewt lil kulmin jiggranfa mal-​ħażen, sewwa sew bħalma ġab fix-​xejn lis-​Sodomiti moralment ħżiena. (Ġenesi 18:25) Tabilħaqq, għan-​nies t’Alla stess, “il-​biżaʼ taʼ Jehovah huwa bir tal-​ħajja, biex wieħed idur lil hinn min-​nases tal-​mewt.”—Proverbji 14:27.

⁵ F’dan il-​jum taʼ ġudizzju divin, dawk kollha li jiddedikaw lilhom infushom għalkollox lil Jehovah bil-​biżaʼ taʼ li xi darba ma jogħġbuhx se jiġu li jirrealizzaw il-​verità mistqarra b’mod figurattiv fi Proverbji 3:8: “Jalla [l-biżaʼ taʼ Jehovah] isir fejqan għal żokortok u serħan għall-​għadam tiegħek.”

Nonoraw Lil Jehovah

6. Liema ħaġa għandha tqanqalna biex nagħtu kas taʼ Proverbji 3:9?

⁶ Il-​biżaʼ tagħna taʼ apprezzament lejn Jehovah, flimkien maʼ mħabba intensa lejh, għandhom iqanqluna biex nagħtu kas taʼ Proverbji 3:9: “Onora lil Jehovah bl-​affarijiet taʼ valur tiegħek u bl-​ewwel frott tal-​prodott kollu tiegħek.” Aħna ma niġux imġegħlin biex nonoraw lil Jehovah bl-​offerti tagħna. Dawn għandhom ikunu volontarji, kif indikat xi 12-il darba minn Eżodu 35:29 sa Dewteronomju 23:23 rigward is-​sagrifiċċji f’Iżrael tal-​qedem. Dan l-​ewwel frott lil Jehovah għandu jkun l-​għotjiet l-​aqwanett li nistgħu noffru, b’rikonoxximent lejn it-​tjubija u l-​qalb tajba bl-​imħabba li gawdejna minn idu. (Salm 23:6) Għandhom jirriflettu d-​deċiżjoni tagħna taʼ li ‘nibqgħu . . . infittxu l-​ewwel is-​saltna u t-​tjieba tiegħu.’ (Mattew 6:33) U x’jirriżulta milli nonoraw lil Jehovah bl-​affarijiet taʼ valur tagħna? “Allura l-​imħażen tiegħek taʼ provisti se jkunu mimlijin bi kwantità kbira; u b’inbid ġdid il-​btieti tiegħek stess se jfuru.”—Proverbji 3:10.

7. Liema l-​ewwel frott għandna noffru lil Jehovah, u x’se jkun ir-​riżultat?

⁷ Il-​mod primarju kif Jehovah iberikna huwa spiritwali. (Malakija 3:10) Għalhekk, l-​ewwel frott li noffrulu għandu jkun primarjament spiritwali. Għandna nużaw il-​ħin, l-​enerġija, u l-​forza vitali tagħna f’li nagħmlu r-​rieda tiegħu. Din mill-​banda l-​oħra se tmantnina, bl-​istess mod bħalma attività bħal din saret “ikel” li jsaħħaħ għal Ġesù. (Ġwann 4:34) L-​imħażen spiritwali tagħna taʼ provista se jkunu mimlijin, u l-​ferħ tagħna, issimbolizzat mill-​inbid ġdid, se jfur. Barra minn hekk, hekk kif nitolbu b’fiduċja għal suffiċjenza taʼ ikel materjali għal kull jum, nistgħu b’mod konsistenti nikkontribwixxu ġenerożament mill-​mezzi tagħna b’appoġġ għax-​xogħol tas-​Saltna mad-​dinja kollha. (Mattew 6:11) Kulma għandna, inklużi l-​assi materjali, ġie għandna mingħand il-​maħbub Missierna tas-​sema. Hu se jferraʼ iktar barkiet, bil-​patt li nużaw dawn l-​affarijiet taʼ valur għat-​tifħir tiegħu.—Proverbji 11:4; 1 Korintin 4:7.

Twiddib Taʼ Mħabba

8, 9. Kif għandna nħarsu lejn it-​twiddib u d-​dixxiplina?

⁸ Fil-​versi 11 u 12, Proverbji kapitlu 3 mill-​ġdid jitkellem dwar ir-​relazzjoni hienja taʼ bejn missier u ibnu li teżisti ġewwa familji devoti, kif ukoll bejn Jehovah u t-​tfal spiritwali u maħbubin tiegħu fuq l-​art. Naqraw: “Id-​dixxiplina taʼ Jehovah, O ibni, tiċħadhiex; u taborrix it-​twiddib tiegħu, għaliex lil dak li lilu Jehovah iħobb hu jwiddeb, saħansitra bħalma missier jagħmel lil iben li fih isib gost.” Nies tad-​dinja jistmerru t-​twiddib. In-​nies taʼ Jehovah għandhom jieħdu pjaċir bih. L-​appostlu Pawlu kkwota dawn il-​kelmiet minn Proverbji, billi qal: “Ibni, iċċekkinx id-​dixxiplina mingħand Jehovah, lanqas ma tintelaq meta tiġi kkorreġut minnu; għax lil min Jehovah iħobb hu jiddixxiplinah . . . Veru, ebda dixxiplina ma tidher għalissa li tkun taʼ ferħ, imma taʼ niket; madankollu wara lil dawk li tħarrġu fiha tagħtihom frott taʼ paċi, jiġifieri, it-​tjieba.”—Ebrej 12:5, 6, 11.

⁹ Iva, it-​twiddib u d-​dixxiplina huma parti neċessarja mit-​taħriġ taʼ kull wieħed minna, kemm jekk nirċevuh mingħand ġenituri, kemm jekk permezz tal-​kongregazzjoni Kristjana, u kemm jekk waqt li nimmeditaw fuq l-​Iskrittura matul l-​istudju persunali tagħna. Hija kwistjoni taʼ ħajja u mewt għalina li nagħtu kas id-​dixxiplina, bħalma Proverbji 4:1, 13 jistqarr ukoll: “Isimgħu, O wlied, id-​dixxiplina taʼ missier u oqogħdu attenti, sabiex tkunu tafu l-​fehma. Aqbad mad-​dixxiplina; titlaqhiex. Issalvagwardjaha, għax hi nfisha hi ħajtek.”

L-​Akbar Hena

10, 11. X’inhuma xi ftit aspetti tal-​kliem li jgħaxxqek fi Proverbji 3:13-18?

¹⁰ X’espressjonijiet sbieħ isegwu issa, tabilħaqq “kliem li jgħaxxaq u korrett taʼ verità”! (Ekkleżjasti 12:10) Dawn il-​kelmiet imnebbħin taʼ Salamun jiddeskrivu l-​vera hena. Huma l-​kelmiet li għandna nnaqqxu fi qlubna. Naqraw:

¹¹ “Hieni hu r-​raġel li sab l-​għerf, u r-​raġel li jikseb id-​dehen, għax li jkollok lilu bħala qligħ hu aħjar milli jkollok il-​fidda bħala qligħ u li jkollok lilu bħala prodott milli d-​deheb innifsu. Huwa iktar prezzjuż mill-​qroll, u l-​għaxqiet l-​oħra kollha tiegħek ma jistgħux jintgħamlu ugwali għalih. Tul taʼ jiem qiegħed f’idu l-​leminija; f’idu x-​xellugija hemm rikkezzi u glorja. Il-​mogħdijiet tiegħu huma mogħdijiet taʼ gost, u t-​toroq kollha tiegħu huma paċi. Huwa siġra tal-​ħajja għal dawk li qegħdin jaħtfuh, u dawk li qegħdin jibqgħu jaħtfuh sew għandhom jissejħu henjin.”—Proverbji 3:13-18.

12. L-​għerf u d-​dehen kif għandhom ikunu taʼ benefiċċju għalina?

¹² L-​għerf​—kemm-il darba huwa msemmi dan fil-​ktieb taʼ Proverbji, 46 darba b’kollox! “Il-​biżaʼ taʼ Jehovah huwa l-​bidu taʼ l-​għerf.” Dan hu l-​għerf prattiku, divin, ibbażat fuq għarfien tal-​Kelma t’Alla li permezz tiegħu n-​nies tiegħu jistgħu jkollhom korsa taʼ sigurtà minn ġot-​tempesti perikolużi li jqumu b’qilla fid-​dinja taʼ Satana. (Proverbji 9:10) Id-​dehen, li l-​ktieb taʼ Proverbji jirreferi għalih 19-il darba, jimxi id f’id maʼ l-​għerf, billi jgħinna nikkumbattu l-​makakkeriji taʼ Satana. F’li jwettaq l-​atti makakki tiegħu, l-​Avversarju l-​kbir għandu warajh eluf taʼ snin taʼ esperjenza. Imma aħna għandna xi ħaġa bil-​wisq iktar taʼ valur mill-​esperjenza bħala għalliem​—id-​dehen divin, l-​abbiltà li niddistingwu t-​tajjeb mill-​ħażin u li nagħżlu l-​mogħdija korretta li rridu naqbdu. Dan hu dak li Jehovah igħallimna permezz tal-​Kelma tiegħu.—Proverbji 2:10-13; Efesin 6:11.

13. Liema ħaġa tistaʼ tipproteġina matul żminijiet ekonomiċi ebsin, u kif?

¹³ Il-​kaos ekonomiku fid-​dinja taʼ llum huwa ħabbâr tat-​twettieq tal-​profezija f’​Eżekjel 7:19: “Fit-​toroq huma se jarmu lill-​istess fidda tagħhom, u ħaġa mistkerrha d-​deheb tagħhom stess se jsir. La l-​fidda tagħhom u lanqas id-​deheb tagħhom ma se jkunu jistgħu jeħilsuhom f’jum il-​furja taʼ Jehovah.” Il-​ġid materjali kollu fuq l-​art lanqas jibda jitqabbel mal-​qawwa li ssalva taʼ l-​għerf u d-​dehen. L-​għaref Sultan Salamun stqarr f’okkażjoni oħra: “L-​għerf hu għal protezzjoni l-​istess bħalma l-​flus huma għal protezzjoni; imma l-​vantaġġ taʼ l-​għarfien hu li l-​għerf innifsu jżomm ħajjin lis-​sidien tiegħu.” (Ekkleżjasti 7:12) Henjin tabilħaqq huma dawk kollha li llum jimxu fil-​mogħdijiet taʼ gost taʼ Jehovah u li bil-​għerf jagħżlu t-​“tul taʼ jiem,” il-​ħajja taʼ dejjem li hi l-​għotja t’Alla lil kulmin qiegħed jeżerċita fidi fis-​sagrifiċċju taʼ rahan taʼ Ġesù!—Proverbji 3:16; Ġwann 3:16; 17:3.

Nikkultivaw L-​Għerf Veru

14. Jehovah b’liema modi wera għerf eżemplari?

¹⁴ Huwa xieraq li aħna l-​bnedmin, li aħna maħluqin fix-​xbiha t’Alla, nistinkaw biex nikkultivaw għerf u dehen, kwalitajiet li Jehovah innifsu wera f’li jwettaq ix-​xogħlijiet meraviljużi taʼ ħolqien tiegħu. “Jehovah innifsu fil-​għerf sejjes l-​art. Hu ffissa b’mod sod is-​smewwiet fid-​dehen.” (Proverbji 3:19, 20) Hu ssokta jagħmel ħlejjaq ħajjin, mhux permezz taʼ xi proċess taʼ evoluzzjoni mistiku li ma jistax jiġi spjegat, imma permezz taʼ atti diretti taʼ ħolqien, kull wieħed “skond ix-​xorta tiegħu” u għal għan taʼ għerf. (Ġenesi 1:25) Meta fl-​aħħarnett il-​bniedem ġie maħluq b’intelliġenza u abbiltajiet bil-​wisq superjuri għal dawk taʼ l-​annimali, l-​applaws taʼ l-​ulied anġeliċi t’Alla bil-​fors li dewa u dewa mill-​ġdid minn ġos-​smewwiet. (Qabbel Ġob 38:1, 4, 7.) Il-​previżjoni bid-​dehen taʼ Jehovah, l-​għerf tiegħu, u l-​imħabba tiegħu jidhru ċar fil-​produzzjonijiet kollha tiegħu fuq l-​art.—Salm 104:24.

15. (a) Għala m’huwiex biżżejjed sempliċement li tikkultiva l-​għerf? (b) Proverbji 3:25, 26 għandu jqajjem fina liema fiduċja?

¹⁵ Għandna bżonn mhux biss li nikkultivaw il-​kwalitajiet taʼ għerf u dehen imma wkoll li nżommu sod magħhom, qatt ma nillaxkaw fl-​istudju tagħna tal-​Kelma tiegħu. Hu jwissina: “Ibni, jalla ma jitilqux lil hemm minn quddiem għajnejk. Issalvagwardja l-​għerf prattiku u l-​abbiltà tal-​ħsieb, u huma se juru li jkunu ħajja għal ruħek u tiżjina għal gerżumtek.” (Proverbji 3:21, 22) B’hekk nistgħu nimxu fis-​sigurtà u fil-​paċi tal-​moħħ, saħansitra matul ir-​resqa bħal ħalliel tal-​jum taʼ “qerda f’daqqa” li se tfaqqaʼ fuq id-​dinja taʼ Satana. (1 Tessalonkin 5:2, 3) Matul it-​tribulazzjoni l-​kbira nfisha, “mhux se jkollok bżonn tibżaʼ minn xi ħaġa f’daqqa li tkexkex, lanqas mit-​tempesta fuq dawk li huma mill-​agħar, għaliex ġejja. Għax Jehovah innifsu se jagħti prova li jkun, effettivament, il-​fiduċja tiegħek, u hu ċertament li se jżomm lil sieqek li ma tinqabadx.”—Proverbji 3:23-26.

Imħabba Għal Li Nagħmlu T-​Tajjeb

16. Liema azzjoni hi meħtieġa mill-​Kristjani minbarra ż-​żelu fil-​ministeru?

¹⁶ Dawn huma jiem biex nuru żelu f’li nippridkaw din l-​aħbar tajba tas-​Saltna għal xiehda lill-​ġnus kollha. Imma dan ix-​xogħol taʼ għoti taʼ xiehda jrid jiġi appoġġjat minn attività Kristjana oħra, kif deskritta fi Proverbji 3:27, 28: “Iżżommx lura t-​tajjeb minn dawk li lilhom jistħoqq, meta jinzerta li jkun fil-​qawwa taʼ idek li tagħmel dan. Tgħidx lil sieħbek: ‘Mur, u ejja lura u għada se nagħti,’ meta hemm xi ħaġa miegħek.” (Qabbel Ġakbu 2:14-17.) Bil-​parti l-​kbira tad-​dinja taħt il-ħatfa tal-​faqar u l-​ġuħ, kien hemm sejħiet urġenti għalina biex ngħinu lil sħabna, speċjalment lil ħutna spiritwali. Kif wieġbu x-​Xhieda taʼ Jehovah?

17-19. (a) Liema ħtieġa urġenti ġiet imwettqa matul l-​1993, u b’liema tweġiba? (b) Liema ħaġa turi li ħutna assedjati minn diversi affarijiet qegħdin ‘joħorġu kompletament rebbiħin’?

¹⁷ Ħu eżempju wieħed: Matul is-​sena li għaddiet, sejħa urġenti għall-​għajnuna ġiet minn dik li qabel kienet il-​Yugoslavia. Il-​fratellanza f’pajjiżi ġirien wieġbu b’mod meraviljuż. Matul ix-​xhur kesħin silġ tax-​xitwa l-​oħra, kienet ħaġa possibbli li diversi convoys bil-​għajnuna jippenetraw l-​inħawi tal-​gwerra, billi ġarrew pubblikazzjonijiet riċenti, ilbies li jsaħħan, ikel, u mediċini lil Xhieda fil-​bżonn. Darba minnhom, l-​aħwa applikaw biex idaħħlu 15-il tunnellata taʼ provisti taʼ għajnuna, imma meta rċevew il-​permess, dan kien għal 30 tunnellata! Xhieda taʼ Jehovah fl-​Awstrija malajr bagħtu tliet trakkijiet oħrajn. B’kollox, 25 tunnellata waslu fid-​destinazzjoni maħsuba tagħhom. Kemm tgħaxxqu ħutna li rċevew dawn il-​provisti kotrana spiritwali u materjali!

¹⁸ Dawk li rċevew il-​provisti kif wieġbu? Iktar kmieni din is-​sena, anzjan kiteb: “L-​aħwa rġiel u nisa f’Sarajevo huma ħajjin u jinsabu tajbin, u dak li huwa l-​iktar importanti, għadna b’saħħitna spiritwalment biex nissaportu din il-​gwerra assurda. Is-​sitwazzjoni kienet diffiċli ferm dwar l-​ikel. Jalla Jehovah iberikkom u jippremjakom għall-​isforzi li għamiltu għalina. L-​awtoritajiet għandhom rispett speċjali lejn ix-​Xhieda taʼ Jehovah minħabba l-​mod taʼ ħajja eżemplari tagħhom u minħabba r-​rispett tagħhom lejn l-​awtoritajiet. Aħna grati wkoll għall-​ikel spiritwali li bgħattulna.”—Qabbel Salm 145:18.

¹⁹ Dawn l-​aħwa fil-​periklu wrew apprezzament, ukoll, permezz tal-​ministeru taʼ l-​għalqa żeluż tagħhom. Bosta ġirien jiġu għandhom jitolbu studji tal-​Bibbja fid-​dar. Fil-​belt taʼ Tuzla, fejn waslu ħames tunnellati taʼ ikel, 40 pubblikatur irrapportaw 25 siegħa kull wieħed fis-​servizz bħala medja matul ix-​xahar, b’appoġġ mill-​isbaħ għad-​disaʼ pijunieri fil-​kongregazzjoni. Kellhom attendenza sabiħa ferm taʼ 243 fil-​Mafkar tal-​mewt taʼ Ġesù. Dawn l-​aħwa għeżież qegħdin tabilħaqq ‘joħorġu kompletament rebbiħin permezz tiegħu li ħabbna.’—Rumani 8:37.

20. Liema “ugwaljar” seħħ f’dik li qabel kienet l-​Unjoni Sovjetika?

²⁰ Il-​ġenerożità murija fil-​convoys kbar ħafna taʼ ikel u lbies li jsaħħan mibgħutin bil-​baħar f’dik li qabel kienet l-​Unjoni Sovjetika wkoll patta għaliha ż-​żelu taʼ l-​aħwa hemmhekk. Per eżempju, f’Moska l-​attendenza tal-​Mafkar din is-​sena kienet 7,549, imqabbla maʼ 3,500 s-​sena l-​oħra. Matul l-​istess perijodu, il-​kongregazzjonijiet f’dik il-​belt żdiedu minn 12 għal 16. Fil-​pajjiż kollu li qabel kien l-​Unjoni Sovjetika (inħallu barra l-​Istati Baltiċi), iż-​żjieda f’kongregazzjonijiet kienet 14 fil-​mija, f’pubblikaturi tas-​Saltna 25 fil-​mija, u f’pijunieri 74 fil-​mija. Xi spirtu taʼ żelu u taʼ li wieħed jissagrifika lilu nnifsu! Ifakkar lil dak li jkun fl-​ewwel seklu meta kien hemm “ugwaljar.” Il-​Kristjani li kellhom ġid spiritwali u materjali għamlu għotjiet ġenerużi lil dawk f’postijiet inqas iffavoriti, waqt li ż-​żelu taʼ dawn il-​milqutin ġab ferħ u inkuraġġiment lid-​donaturi.—2 Korintin 8:14.

Obgħod Il-​Ħażin!

21. X’kuntrast hemm bejn l-​għorrief u l-​istupidi fil-​kelmiet taʼ l-​aħħar taʼ Proverbji kapitlu 3?

²¹ It-​tielet kapitlu taʼ Proverbji mbagħad jippreżenta serje taʼ kuntrasti, u jagħlaq b’din it-​twissija: “Issirx għajjur għall-​bniedem taʼ vjolenza, lanqas ma tagħżel xi waħda mill-​mogħdijiet tiegħu. Għax il-​qarrieqi hu xi ħaġa mistmerra għal Jehovah, imma l-​intimità Tiegħu hi mar-​retti. Is-​saħta taʼ Jehovah hi fuq id-​dar tal-​wieħed mill-​agħar, imma l-​post fejn igħammru t-​twajbin ibierku. Jekk għandu x’jaqsam maʼ dawk li jwaqqgħu għaċ-​ċajt, hu nnifsu se jiddieħak; imma lill-​ġwejdin se jurihom favur. Unur huwa dak li l-​għorrief se jiġu li jippossjedu, imma l-​istupidi qegħdin jeżaltaw id-​diżunur.”—Proverbji 3:29-35.

22. (a) Kif nistgħu aħna nevitaw id-​destin taʼ l-​istupidi? (b) L-​għorrief liema ħaġa jobogħdu, u liema ħaġa jikkultivaw, b’liema premju?

²² Kif nistgħu nevitaw li niġu magħdudin fost l-​istupidi? Irridu nitgħallmu nobogħdu l-​ħażin, iva, nitqażżu dak li Jehovah jitqażżeż​—il-​modi qarriqin kollha taʼ din id-​dinja vjolenti u ħatja tad-​demm. (Ara wkoll Proverbji 6:16-19.) B’kuntrast, irridu nikkultivaw dak li hu tajjeb​—l-​istat taʼ li tkun rett, it-​tjieba, u l-​istat taʼ li tkun ġwejjed—​sabiex bl-​umiltà u bil-​biżaʼ taʼ Jehovah nistgħu naslu għal “rikkezzi u glorja u ħajja.” (Proverbji 22:4) Dan se jkun il-​premju għalina lkoll li napplikaw lealment it-​twissija: “Afda f’Jehovah b’qalbek kollha.” [w93 12/15]

X’Inhu L-​Kumment Tiegħek?

◻ It-​test tat-​tema taʼ dan l-​istudju kif japplika llum?

◻ Kif nistgħu aħna nonoraw lil Jehovah?

◻ Għala m’għandniex inċekknu d-​dixxiplina?

◻ L-​akbar hena fejn trid tinstab?

◻ Kif nistgħu aħna nħobbu t-​tajjeb u nobogħdu l-​ħażin?

[Stampa f’paġna 17]

Dawk li joffru l-​aqwa tagħhom b’sagrifiċċju lil Jehovah se jiġu mberkin b’mod abbundanti