Il-​Ħarsa tal-​Bibbja

Huwa Prattiku li Nkunu Paċifiċi?

FL-​IKTAR priedka famuża tiegħu, Ġesù Kristu qal: “Henjin dawk li jġibu l-​paċi.” Hu qal ukoll: “Henjin il-​ġwejdin, għax għad jirtu l-​art.” (Mattew 5:​5, 9) Li tkun paċifiku jinvolvi iktar milli tkun fil-​paċi jew li tħossok kalm. Individwu paċifiku jieħu l-​inizjattiva biex ikun t’għajnuna u jippromwovi l-​paċi b’mod attiv.

Huwa l-​kliem taʼ Ġesù, kwotat fil-​paragrafu taʼ qabel, prattiku għal żmienna? Xi wħud jaħsbu li sabiex dak li jkun jirnexxi f’din id-​dinja moderna, hu għandu jġiegħel lil oħrajn iħossuhom inferjuri, ikun aggressiv, u anki vjolenti. Taħseb li huwa iktar għaqli li tirritalja billi tpatti l-​aggressjoni bl-​aggressjoni? Jew huwa prattiku li tkun paċifiku? Ejja nikkunsidraw għala għandna nirriflettu fuq il-​kliem taʼ Ġesù: “Henjin dawk li jġibu l-​paċi.”

◼ QALB KALMA “Qalb kalma hija l-​ħajja tal-​ġisem,” jgħid Proverbji 14:30 (NW). Ħafna rapporti mediċi jindikaw li r-​rabja u l-​ostilità jistgħu jikkaġunaw puplesiji u attakki tal-​qalb. Reċentement, ġurnal mediku, meta kien qed jitkellem rigward nies b’mard tal-​qalb, qabbel rabja bla kontroll mal-​velenu. Il-​ġurnal stqarr ukoll li “jekk tirrabja ħafna jistaʼ jkun li timrad ħafna.” Madankollu, dawk li jfittxu l-​paċi jistgħu jiżviluppaw “qalb kalma” u jaħsdu l-​benefiċċji.

Eżempju wieħed taʼ dan hu Jim, raġel taʼ 61 sena li issa huwa għalliem tal-​Bibbja f’komunità fejn jitkellmu l-​Vjetnamiż. Hu jispjega: “Wara sitt snin fil-​militar u tliet perijodi nikkumbatti fil-​gwerra fil-​Vjetnam, sirt naf mill-​esperjenza persunali x’inhuma tassew il-​vjolenza, ir-​rabja, u l-​frustrazzjoni. Il-​passat tiegħi nikkitni ferm tant li ma bediex iħallini norqod sew. L-​istress flimkien maʼ problemi fl-​istonku u n-​nervi ma damux ma effettwawli saħħti.” Kif kiseb serħan? Hu jwieġeb: “Studju tal-​Bibbja max-​Xhieda taʼ Ġeħova salvali ħajti. Minħabba li tgħallimt l-​iskop t’Alla għal dinja ġdida taʼ paċi u kif nistaʼ nilbes ‘il-​personalità l-​ġdida,’ ksibt qalb kalma. Minħabba f’hekk, is-​saħħa tiegħi tjiebet ħafna.” (Efesin 4:​22-​24; Isaija 65:17; Mikea 4:​1-4) Ħafna oħrajn ikkonkludew mill-​esperjenza persunali tagħhom li jekk tiżviluppa attitudni paċifika tistaʼ ttejjeb is-​saħħa emozzjonali, fiżika, u spiritwali.​—Proverbji 15:13.

◼ RELAZZJONIJIET IKTAR FERĦANIN Ir-​relazzjonijiet tagħna m’oħrajn se jmorru għall-​aħjar meta nuru attitudni paċifika. Il-​Bibbja ssemmi li “rabja u korla u twerżiq u tagħjir” għandhom ‘jitwarrbu flimkien maʼ kull ħażen.’ (Efesin 4:​31) Dawk li juru mġiba aggressiva spiss jimbottaw lil oħrajn u jsibu lilhom infushom waħedhom, mingħajr ħbieb li jistgħu jistrieħu fuqhom. Proverbji 15:18 jgħid: “Min jagħdab ħafna jġib l-​inkwiet, min jimxi bis-​sabar isikket il-​ġlied.”

Andy, anzjan Kristjan li għandu 42 sena u li joqgħod fil-​belt taʼ New York, trabba f’ambjent aggressiv. Hu jispjega: “Fl-​età taʼ tmien snin tefgħuni fir-​ring tal-​boksing u ġejt imħarreġ biex niġġieled. Ma kontx inħares lejn l-​opponenti bħala li kienu nies. Minflok, kont naħseb ‘agħti jew aqlaʼ.’ Ma domtx ma involvejt ruħi fi grupp li kien involut fil-​ħażen. Konna nidħlu f’ħafna ġlied fit-​toroq u fi ġlied bl-​għajat. Mhux l-​ewwel darba li kelli l-​armi tan-​nar ippontati lejn rasi u ġejt mhedded bis-​skieken. Ħafna mill-​ħbiberiji tiegħi kienu mimlijin inkwiet u bbażati fuq il-​biżaʼ.”

X’għen lil Andy ifittex il-​paċi? Hu jgħid: “Ġurnata minnhom mort laqgħa f’Sala tas-​Saltna tax-​Xhieda taʼ Ġeħova, u mill-​ewwel stajt inħoss lispirtu kollu mħabba fost in-​nies t’hemmhekk. Minn dak iż-​żmien ’l hawn, is-​sħubija tiegħi maʼ dawn in-​nies li jħobbu l-​paċi għenitni biex niżviluppa qalb kalma, u maż-​żmien għenitni nbiddel il-​mod taʼ kif kont naħseb qabel. Għamilt ħafna ħbiberiji dejjiema.”

◼ TAMA GĦALL-​FUTUR L-​iktar raġuni importanti għala għandna nkunu paċifiċi hija sempliċement din: Dan juri unur u rispett għar-​rieda tal-​Ħallieq tagħna li rrivelalna hu stess. Il-​Kelma t’Alla stess, il-​Bibbja, tħeġġiġna: “Fittex is-​sliem u imxi warajh.” (Salm 34:15 [34:​14, NW]) Il-​fatt li nagħrfu l-​eżistenza t’Alla Ġeħova u mbagħad nitgħallmu u nobdu t-​tagħlim tiegħu li jagħti l-​ħajja jiftaħ il-​bieb għal ħbiberija persunali miegħu. B’din ir-​relazzjoni b’saħħitha, aħna niksbu “l-​paċi t’Alla.” Din hija paċi li tisboq kull ħaġa oħra minkejja l-​isfidi li nistgħu niffaċċjaw fil-​ħajja.​—Filippin 4:​6, 7.

Iżjed minn hekk, meta nkunu paċifiċi aħna nuru lil Ġeħova liema tip taʼ persuni nixtiequ nkunu. Nistgħu nagħtu prova lil Alla minn issa li se nkunu fi qbil maʼ l-​arranġamenti tiegħu għad-​dinja l-​ġdida taʼ paċi mwiegħda tiegħu. Aħna nistgħu nkunu preżenti biex narawh ineħħi l-​ħżiena u, bħalma qal Ġesù, iħalli l-​ġwejdin “jirtu l-​art.” X’barka tkun din!​—Salm 37:​10, 11; Proverbji 2:​20-​22.

Iva, il-​valur prattiku tal-​kliem taʼ Ġesù, “henjin dawk li jġibu l-​paċi,” jidher ċar. Aħna nistgħu nesperjenzaw qalb kalma, relazzjonijiet sinifikanti, u tama soda għall-​futur. Dawn il-​barkiet jistgħu jkunu tagħna meta nagħmlu l-​almu tagħna biex ‘inżommu l-​paċi mal-​bnedmin kollha.’—Rumani 12:18.

[Stampi f’paġna 30]

“Is-​saħħa tiegħi tjiebet ħafna.”​—Jim

[Stampi f’paġna 30]

“Għamilt ħafna ħbiberiji dejjiema.”—Andy