L-ispiritwalità
Bħalma rajna fl-ewwel artiklu, ħafna nies jikkunsidraw il-Bibbja bħala ktieb qaddis. Huma jsibu li meta jaqrawha u japplikaw il-gwida tagħha, iħossuhom eqreb t’Alla u jibdew jifhmu x’inhu l-iskop tal-ħajja.
Il-Bibbja tuża l-kelma “spiritwalità” biex tirreferi għal attitudni lejn il-ħajja jew għal mod kif wieħed jgħix. (Ġuda 18, 19) Nies li ma jridux lil Alla jiggwidahom, jistrieħu fuq l-opinjoni tagħhom stess, imma dawk li jridu lil Alla jiggwidahom, jgħożżu l-livelli tiegħu.—Efesin 5:1.
TAMA
PRINĊIPJU BIBLIKU: “Skuraġġejt ruħek fi żmien l-hemm? Ma tantx se jkollok qawwa.”—Proverbji 24:10.
XI JFISSER DAN: L-iskuraġġiment jistaʼ jiħdilna s-saħħa li għandna bżonn biex inkampaw mal-problemi tal-ħajja. Mill-banda l-oħra, it-tama tistaʼ tagħtina s-saħħa li jkollna bżonn. Hu taʼ faraġ li tkun taf li l-problemi li qed niffaċċjaw jistgħu jkunu temporanji. Infatti, tistaʼ toħroġ xi ħaġa tajba minnhom.
X’TISTAʼ TAGĦMEL: Aħseb dwar l-affarijiet tajbin li se jiġru fil-futur. Minflok ma toqgħod tinkwieta fuq dak li jistaʼ jiġri jew toqgħod tistenna li jkollok iċ-ċirkustanzi perfetti, aġixxi fi qbil mal-miri tiegħek. Huwa minnu li jistgħu jiġru “ġrajjiet mhux mistennijin.” (Ekkleżjasti 9:11) Imma, fir-realtà, l-affarijiet spiss imorru aħjar milli tkun stennejt. Biex turi dan, il-Bibbja tuża eżempju tal-biedja u tgħid: “Iżraʼ ż-żerriegħa tiegħek fil-għodu u tħallix idek tistrieħ sa fil-għaxija; għax ma tafx fejn se tirnexxi, jekk hux hawnhekk jew hemmhekk, jew jekk hux it-tnejn se jkunu tajbin indaqs.”—Ekkleżjasti 11:6.
TWEĠIBIET GĦAL MISTOQSIJIET IMPORTANTI TAL-ĦAJJA
PRINĊIPJU BIBLIKU: “Għinni nifhem . . . Kelmtek kollha hi verità.”—Salm 119:144, 160.
XI JFISSER DAN: Il-Bibbja tagħti tweġibiet għal mistoqsijiet li tistaʼ tgħid kulħadd isaqsihom. Pereżempju din twieġeb mistoqsijiet bħal
Minn fejn ġejjin?
Għala qegħdin hawn?
X’jiġri meta persuna tmut?
Din il-ħajja biss hemm?
Miljuni taʼ nies madwar id-dinja qed jgħixu ħajja aħjar għax jeżaminaw it-tweġibiet tal-Bibbja għal dawn il-mistoqsijiet u oħrajn.
X’TISTAʼ TAGĦMEL: Eżamina għalik innifsek dak li tgħallem il-Bibbja. Staqsi lil wieħed mix-Xhieda taʼ Ġeħova biex jgħinek tifhem il-Bibbja. Mur fuq il-websajt tagħna, jw.org, jew attendi waħda mil-laqgħat tagħna, li huma b’xejn u miftuħin għall-pubbliku.
PRINĊIPJI OĦRA MILL-BIBBJA
Ara l-vidjow Għala għandek tistudja l-Bibbja? minn fuq jw.org. Hu disponibbli b’iktar minn 880 lingwa
KUN KONXJU TAL-BŻONN SPIRITWALI TIEGĦEK.
“Henjin dawk li huma konxji tal-bżonn spiritwali tagħhom.”—MATTEW 5:3.
SIR AF IKTAR DWAR L-ALLA TAL-BIBBJA
‘Fittex ’l Alla u jirnexxilek issibu, mhuwiex ’il bogħod minn kull wieħed minna.’—ATTI 17:27.
AQRA U MMEDITA FUQ IL-MESSAĠĠ TAL-BIBBJA.
“L-għaxqa tiegħu hi fil-liġi taʼ Ġeħova,a u lejl u nhar jaqra u jimmedita fuq il-liġi tiegħu. . . . U jirnexxi f’kulma jagħmel.”—SALM 1:2, 3.
a Ġeħova hu isem Alla kif jidher fil-Bibbja.