Afda f’Jehovah!

“Afda f’Jehovah b’Qalbek Kollha.”—PROVERBJI 3:5.

1. Proverbji 3:5 kif impressjona lil wieħed żagħżugħ, u b’liema riżultat dejjiemi?

MISSJUNARJU li ilu jaqdi għal ħafna snin jikteb: “‘AFDA FIL-​MULEJ BIL-​QALB MINN TIEGĦEK KOLLHA; U LA TISTRIEĦX FUQ IL-​FEHMA MINN TIEGĦEK STESS.’ Dawk il-​kelmiet mill-​Bibbja, ġo inkwatru u mdendlin maʼ ħajt f’dar li kont qed inżur, ġibduli l-​attenzjoni. Għall-​kumplament taʼ dik il-​ġurnata jien qgħadt naħseb dwarhom. Nistaʼ jien, staqsejt lili nnifsi, nafda f’Alla b’qalbi kollha?” Dan l-​individwu dak iż-​żmien kellu 21 sena. Billi għandu 90 sena u għadu jaqdi fedelment bħala anzjan f’Perth, fl-​Awstralja, hu jistaʼ jħares lura lejn ħajja mogħnija bil-​frott taʼ fiduċja b’qalb sħiħa f’Jehovah, inklużi 26 sena rigorużi taʼ xogħol taʼ pijunier f’oqsma ġodda missjunarji fis-​Ceylon (issa Sri Lanka), fil-​Burma (issa Myanmar), fil-​Malaya, fit-​Tajlandja, fl-​Indja, u fil-​Pakistan.a

2. Proverbji 3:5 liema fiduċja għandu jibni fina?

² “Afda f’Jehovah b’qalbek kollha”​—dawk il-​kelmiet taʼ Proverbji 3:5, kif jinqraw fin-​New World Translation, għandhom iqanqluna lkoll biex inkomlu niddedikaw il-​ħajjiet tagħna b’qalb sħiħa lil Jehovah, fiduċjużi li hu jistaʼ jsaħħaħ il-​fidi tagħna, saħansitra sal-​punt li negħlbu ostakli bħal muntanji. (Mattew 17:20) Ejjew issa neżaminaw Proverbji 3:5 fil-​kuntest tiegħu.

Struzzjoni Taʼ Missier

3. (a) Liema inkuraġġiment jistaʼ jinstab fl-​ewwel disaʼ kapitli taʼ Proverbji? (b) Għala għandna nagħtu attenzjoni mill-​qrib lejn Proverbji 3:1, 2?

³ L-​ewwel disaʼ kapitli tal-​ktieb Bibliku taʼ Proverbji jiddu bi struzzjoni taʼ missier, pariri għaqlin mingħand Jehovah għal dawk kollha li jħarsu ’l quddiem lejn li jgawdu stat taʼ iben fis-​smewwiet jew “[i]l-libertà glorjuża tat-​tfal t’Alla” f’ġenna taʼ l-​art. (Rumani 8:18-21, 23) Hawn insibu pariri għaqlin li jistgħu jintużaw minn ġenituri fit-​trobbija taʼ wlied subien u bniet. Notevoli huma l-​pariri taʼ Proverbji kapitlu 3, li jibdew bit-​twissija: “Ibni, il-​liġi tiegħi tinsihiex, u l-​kmandamenti tiegħi jalla qalbek tosserva.” Hekk kif l-​aħħar jiem tad-​dinja mill-​agħar taʼ Satana jimxu ’l quddiem lejn il-​final tagħhom, jalla nagħtu iżjed attenzjoni mill-​qrib lejn it-​tfakkiriet taʼ Jehovah. Il-​mogħdija setgħet dehret twila, imma l-​wegħda lil dawk kollha li jissaportu hi li “tul taʼ jiem u snin taʼ ħajja u paċi se jiżdidulek”​—ħajja eterna fis-​sistema ġdida taʼ Jehovah.—Proverbji 3:1, 2.

4, 5. (a) Liema relazzjoni hienja hi deskritta fi Ġwann 5:19, 20? (b) Il-​pariri f’Dewteronomju 11:18-21 kif għadhom japplikaw sa żmienna?

⁴ Relazzjoni hienja bejn missier u iben tistaʼ tkun l-​iktar prezzjuża. Il-​Ħallieq tagħna, Alla Jehovah, ħa ħsieb biex tkun hekk. Kristu Ġesù qal dwar ir-​relazzjoni intima tiegħu stess maʼ Jehovah: “L-​Iben ma jistaʼ jagħmel lanqas ħaġa waħda minn rajh, imma dak biss li hu jilmaħ lill-​Missier jagħmel. Għax huma x’inhuma l-​affarijiet li jagħmel Dak, dawn l-​affarijiet l-​Iben ukoll jagħmel bl-​istess manjiera. Għax il-​Missier għandu affezzjoni lejn l-​Iben u jurih l-​affarijiet kollha li hu nnifsu jagħmel.” (Ġwann 5:19, 20) Jehovah kellu l-​iskop li intimità simili kellha teżisti bejnu u l-​familja kollha tiegħu fuq l-​art, kif ukoll bejn missirijiet umani u t-​tfal tagħhom.

⁵ Relazzjoni taʼ fiduċja fil-​familja kienet inkuraġġita f’Iżrael tal-​qedem. Jehovah ta parir lil missirijiet hemmhekk: “Tridu tapplikaw dawn il-​kelmiet tiegħi għal qalbkom u ruħkom u torbtuhom bħala sinjal fuq idkom, u jridu jservu bħala qafla bejn għajnejkom. Tridu wkoll tgħallmuhom lil uliedkom, sabiex titkellem dwarhom meta toqgħod bil-​qiegħda f’darek u meta timxi fit-​triq u meta timtedd u meta tqum. U trid tiktibhom fuq il-​koxox tal-​bieb taʼ darek u fuq ix-​xtiebi tiegħek, sabiex jiemkom u jiem uliedkom jistgħu jkunu ħafna fuq il-​ħamrija li Jehovah ħalef lil missirijietkom tal-​qedem li jagħti lilhom, bħall-​jiem tas-​smewwiet għal fuq l-​art.” (Dewteronomju 11:18-21) Il-​Kelma mnebbħa taʼ l-​Għalliem Grandjuż tagħna, Alla Jehovah, tistaʼ tabilħaqq isservi biex tgħaqqad lilu b’mod intimu maʼ ġenituri u wliedhom, kif ukoll maʼ l-​oħrajn kollha li qegħdin jaqduh fil-​kongregazzjoni Kristjana.—Isaija 30:20, 21.

6. Kif nistgħu nsibu favur m’Alla u mal-​bniedem?

⁶ Pariri għaqlin taʼ missier għall-​poplu t’Alla, kbar u żgħar, jissoktaw fil-​versi 3 u 4 taʼ Proverbji kapitlu 3: “Jalla l-​qalb tajba bl-​imħabba u dak li hu veru nfushom ma jitilqukx. Orbothom madwar gerżumtek. Iktibhom fuq it-​tavla taʼ qalbek, u għalhekk sib favur u dehen tajjeb f’għajnejn Alla u l-​bniedem taʼ l-​art.” Alla Jehovah innifsu jispikka f’li juri qalb tajba bl-​imħabba u dak li hu veru. Kif jistqarr Salm 25:10, “il-​passaġġi kollha taʼ Jehovah huma qalb tajba bl-​imħabba u l-​ħaġa vera.” Biex nimitaw lil Jehovah, aħna għandna ngħożżu dawn il-​kwalitajiet u l-​qawwa protettiva tagħhom, billi nistmawhom daqs li kieku kienu kullana imprezzabbli u nnaqqxuhom b’mod li ma jitħassarx fuq qlubna. B’mod ferventi, allura, nistgħu nitolbu: “O Jehovah, . . . ħalli l-​qalb tajba bl-​imħabba tiegħek u l-​ħaġa vera tiegħek infushom jissalvagwardjawni l-​ħin kollu.”—Salm 40:11.

Fiduċja Dejjiema

7. Jehovah b’liema modi wera li hu taʼ min joqgħod fuqu?

⁷ Il-​fiduċja hija definita mill-​Webster’s Ninth New Collegiate Dictionary bħala “dipendenza assigurata fuq il-​karattru, l-​abbiltà, is-​saħħa, jew il-​verità taʼ xi ħadd jew xi ħaġa.” Il-​karattru taʼ Jehovah hu ankrat fis-​sod fil-​qalb tajba bl-​imħabba tiegħu. U jistaʼ jkollna fiduċja sħiħa fl-​abbiltà tiegħu li jagħmel dak li wiegħed, għax ismu stess, Jehovah, jidentifikah bħala l-​Oriġinatur il-​kbir taʼ skop. (Eżodu 3:14; 6:2-8) Bħala l-​Ħallieq, hu l-​Għajn taʼ saħħa u enerġija dinamika. (Isaija 40:26, 29) Hu l-​personifikazzjoni tal-​verità, għax “huwa impossibbli għal Alla li jigdeb.” (Ebrej 6:18) Għaldaqstant, niġu inkuraġġiti biex inpoġġu fiduċja sħiħa f’Jehovah, Alla tagħna, is-​Sors il-​kbir taʼ kull verità, li għandu l-​qawwa li tistaʼ kollox biex jipproteġi lil dawk li jafdaw fih u biex iġib l-​iskopijiet grandjużi kollha tiegħu għal suċċess glorjuż.—Salm 91:1, 2; Isaija 55:8-11.

8, 9. Il-​fiduċja għala hi nieqsa b’mod tal-​biki fid-​dinja, u n-​nies taʼ Jehovah kif jipprovdu kuntrast?

⁸ Fid-​dinja degradanti taʼ madwarna, il-​fiduċja sfortunatament hi nieqsa. Minflok, insibu regħba u korruzzjoni kullimkien. Il-​qoxra taʼ quddiem tal-​ħarġa taʼ Mejju taʼ l-​1993 tar-​rivista World Press Review kienet tixgħel bil-​messaġġ: “THE CORRUPTION BOOM​—Flus bil-​Qerq fl-​Ordni Ġdida tad-​Dinja. L-​industrija tal-​korruzzjoni testendi mill-​Brażil sal-​Ġermanja, mill-​Istati Uniti sa l-​Arġentina, minn Spanja sal-​Peru, mill-​Italja sal-​Messiku, mill-​Vatikan sar-​Russja.” Ibbażata kif inhi fuq il-​mibgħeda, ir-​regħba, u n-​nuqqas taʼ fiduċja, l-​hekk imsejħa ordni ġdida tad-​dinja tal-​bniedem mhix taħsad għajr miżerji li dejjem jiżdiedu għall-​umanità.

⁹ F’kuntrast maʼ ġnus politiċi, ix-​Xhieda taʼ Jehovah huma henjin li jkunu “l-​ġens li Alla tiegħu hu Jehovah.” Huma biss jistgħu bl-​onestà kollha jgħidu, “F’Alla aħna nafdaw.” Kull wieħed minnhom jistaʼ jgħajjat bil-​ferħ: “F’unjoni m’Alla jien se nfaħħar lill-​kelma tiegħu. . . . F’Alla jien poġġejt il-​fiduċja tiegħi. M’inix se nibżaʼ.”—Salm 33:12; 56:4, 11.

10. X’saħħaħ lil ħafna żgħażagħ Kristjani biex iżommu l-​integrità?

¹⁰ F’art Asjatika fejn eluf taʼ Xhieda żgħażagħ sofrew swat aħrax u tfigħ fil-​ħabs, fiduċja f’Jehovah għenet lill-​maġġoranza l-​kbira biex jissaportu. Lejl wieħed fil-​ħabs, Xhud żagħżugħ li kien ġarrab torturi orribbli ħassu li ma setax jissaporti iżjed. Iżda żagħżugħ ieħor ġie ħdejh inkiss inkiss fid-​dlam. Hu qal minn taħt l-​ilsien: “Iċċedix; jien għamilt kompromess u ma nistax ikolli paċi tal-​moħħ minn dak in-​nhar ’il hawn.” L-​ewwel żagħżugħ ġedded id-​determinazzjoni tiegħu biex iżomm sod. Nistgħu jkollna fiduċja sħiħa f’Jehovah li hu se jgħinna negħlbu kwalunkwe u kull sforz minn Satana biex iherri l-​integrità tagħna.—Ġeremija 7:3-7; 17:1-8; 38:6-13, 15-17.

11. Kif aħna stimulati biex nafdaw f’Jehovah?

¹¹ L-​ewwel kmandament jaqra f’parti: “Trid tħobb lil Jehovah Alla tiegħek b’qalbek kollha.” (Mark 12:30) Hekk kif nimmeditaw fuq il-​Kelma t’Alla, il-​veritajiet grandjużi li qegħdin nitgħallmu jinżlu ’l isfel fil-​fond f’qalbna sabiex niġu mqanqlin biex niddedikaw kulma għandna fis-​servizz t’Alla tagħna taʼ l-​għaġeb, il-​Mulej Sovran Jehovah. Huwa b’qalb imfawra b’apprezzament lejh​—għal dak kollu li għallimna, li għamel magħna, u li għad irid jagħmel għalina—​li aħna niġu stimulati biex nafdaw b’mod sħiħ fis-​salvazzjoni tiegħu.—Isaija 12:2.

12. Matul is-​snin, ħafna Kristjani kif urew il-​fiduċja tagħhom f’Jehovah?

¹² Din il-​fiduċja tistaʼ tiġi kkultivata matul is-​snin. Xhud umli taʼ Jehovah li qeda fedelment għal iktar minn 50 sena fil-​kwartieri ġenerali tal-​Watch Tower Society fi Brooklyn, minn April taʼ l-​1927, kiteb: “Meta spiċċa dak ix-​xahar jien irċevejt għotja taʼ 5 dollari ġewwa invilops b’kartolina sabiħa li kellha fuqha t-​test Bibliku fi Proverbji 3:5, 6 . . . Kien hemm kull raġuni biex nafda f’Jehovah, għax fil-​kwartieri ġenerali jien malajr bdejt napprezza li Jehovah kellu ‘rsir fidil u diskret’ li fedelment kien qed jieħu ħsieb taʼ l-​interessi kollha tas-​Saltna hawn fuq l-​art.—Mattew 24:45-47.”b Qalb dan il-​Kristjan kienet mitfugħa, mhux fuq l-​imħabba tal-​flus, imma fuq li jikseb “teżor li qatt ma jfalli fis-​smewwiet.” B’mod simili llum, l-​eluf li jaqdu fid-​djar taʼ Betel tal-​Watch Tower Society maʼ l-​art kollha jagħmlu hekk taħt speċi taʼ wegħda legali taʼ faqar. Huma jafdaw f’Jehovah biex jipprovdilhom il-​bżonnijiet tagħhom taʼ kuljum.—Luqa 12:29-31, 33, 34.

Strieħ Fuq Jehovah

13, 14. (a) Fejn biss jistgħu jinstabu pariri maturi? (b) X’irid jiġi evitat sabiex nibqgħu weqfin fil-​persekuzzjoni?

¹³ Missierna tas-​sema jammonina: “Tistrieħx fuq il-​fehma tiegħek stess.” (Proverbji 3:5) Uħud li jagħtu l-​pariri u psikoloġi tad-​dinja qatt ma jistgħu jittamaw li javviċinaw l-​għerf u l-​fehma li juri Jehovah. “Il-​fehma tiegħu hi lil hinn mill-​irrakkontar.” (Salm 147:5) Minflok ma nistrieħu fuq l-​għerf taʼ rġiel prominenti tad-​dinja jew fuq l-​emozzjonijiet m’humiex informati tajjeb tagħna stess, ejjew inħarsu lejn Jehovah, il-​Kelma tiegħu, u l-​anzjani fil-​kongregazzjoni Kristjana għal pariri maturi.—Salm 55:22; 1 Korintin 2:5.

¹⁴ L-​għerf uman jew il-​pożizzjoni prominenti m’huma se jwassluna mkien fil-​jum li qed joqrob bil-​għaġla taʼ prova ħarxa. (Isaija 29:14; 1 Korintin 2:14) Fil-​Ġappun matul it-​Tieni Gwerra Dinjija, ragħaj kapaċi iżda kburi tal-​poplu t’Alla għażel li jistrieħ fuq il-​fehma tiegħu stess. Taħt pressjoni hu sar apostata, u l-​biċċa l-​kbira tal-​merħla wkoll ċediet taħt il-​persekuzzjoni. Oħt Ġappuniża leali, li bil-​kuraġġ baqgħet ħajja wara trattament terribbli f’ċelel tal-​ħabs mimlijin ħmieġ, ikkummentat: “Dawk li baqgħu leali ma kellhom ebda abbiltajiet speċjali u ma kinux jagħtu fil-​għajn. Ċertament ilkoll kemm aħna rridu dejjem nafdaw f’Jehovah b’qalbna kollha.”c

15. Liema kwalità qaddisa hi essenzjali jekk irridu nogħġbu lil Jehovah?

¹⁵ Li nafdaw f’Jehovah, minflok fil-​fehma tagħna stess, jinvolvi umiltà. Kemm hi importanti din il-​kwalità għal dawk kollha li jridu jogħġbu lil Jehovah! Iva, saħansitra Alla tagħna, għalkemm Mulej Sovran taʼ l-​univers kollu, juri umiltà fl-​aġir tiegħu mal-​ħolqien intelliġenti tiegħu. Għandna għalfejn inkunu grati taʼ dak. “Hu qiegħed jiddenja ruħu biex iħares lejn is-​sema u l-​art, jerfaʼ lill-​wieħed baxx mill-​istess trab.” (Salm 113:6, 7) Mill-​ħniena kbira tiegħu, hu jaħfrilna d-​djufijiet tagħna fuq il-​bażi taʼ l-​akbar għotja tiegħu lill-​bnedmin, is-​sagrifiċċju prezzjuż taʼ rahan taʼ Ibnu l-​maħbub, Kristu Ġesù. Kemm għandna għalfejn inkunu grati taʼ din il-​qalb tajba mhix mistħoqqa!

16. Aħwa rġiel kif jistgħu jistinkaw għal privileġġi fil-​kongregazzjoni?

¹⁶ Ġesù nnifsu jfakkarna: “Kulmin jeżalta lilu nnifsu se jkun umiljat, u kulmin jumilja lilu nnifsu se jkun eżaltat.” (Mattew 23:12) B’umiltà, aħwa rġiel imgħammdin għandhom jistinkaw għal responsabbiltajiet fil-​kongregazzjoni Kristjana. Madankollu, indokraturi għandhom iqisu l-​ħatra tagħhom, mhux bħala xi kariga taʼ unur, imma bħala l-​opportunità biex iwettqu xogħol, b’umiltà, b’apprezzament, b’ħeġġa, kif għamel Ġesù, li qal: “Missieri baqaʼ jaħdem s’issa, u jien nibqaʼ naħdem.”—Ġwann 5:17; 1 Pietru 5:2, 3.

17. X’għandna lkoll napprezzaw, billi jwassalna għal liema attività?

¹⁷ Jalla dejjem b’umiltà u bit-​talb napprezzaw li aħna m’aħniex għajr trab f’għajnejn Jehovah. Kemm għandna għalfejn inkunu ferħanin, allura, li “l-​qalb tajba bl-​imħabba taʼ Jehovah hija minn żmien indefinit saħansitra sa żmien indefinit lejn dawk li qegħdin jibżgħu minnu, u t-​tjieba tiegħu lil ulied l-​ulied”! (Salm 103:14, 17) Ilkoll kemm aħna għalhekk għandna nkunu studenti akkaniti tal-​Kelma t’Alla. Il-​ħin li nqattgħu fi studju persunali u tal-​familja, u fil-​laqgħat tal-​kongregazzjoni, għandu jkun fost l-​iktar sigħat prezzjużi tagħna kull ġimgħa. B’dan il-​mod aħna nibnu “l-​għarfien tal-​Wieħed l-​Iktar Qaddis.” Dak hu “dak li l-​fehma hi.”—Proverbji 9:10.

“Fil-​Mogħdijiet Kollha Tiegħek . . . ”

18, 19. Kif nistgħu napplikaw Proverbji 3:6 fil-​ħajjiet tagħna, u b’liema riżultat?

¹⁸ Billi jidderiġina lejn Jehovah, is-​Sors divin tal-​fehma, Proverbji 3:6 imbagħad jistqarr: “Fil-​mogħdijiet kollha tiegħek agħti kas tiegħu, u hu nnifsu se jiddritta l-​passaġġi tiegħek.” Li nagħtu kas taʼ Jehovah jinvolvi li nżommu qrib tiegħu bit-​talb. Inkunu fejn inkunu u fi kwalunkwe sitwazzjoni li tistaʼ tqum, aħna għandna aċċess immedjat għalih bit-​talb. Hekk kif nagħmlu xogħolna taʼ kuljum, hekk kif nippreparaw għas-​servizz taʼ l-​għalqa, hekk kif immorru minn dar għal dar nipproklamaw is-​Saltna tiegħu, it-​talba kostanti tagħna tistaʼ tkun li hu jbierek l-​attività tagħna. B’hekk, jistaʼ jkollna l-​privileġġ inestimabbli u l-​ferħ taʼ li ‘nimxu m’Alla,’ fiduċjużi li hu se ‘jiddritta l-​passaġġi tagħna,’ kif hu għamel għal Enok, Noè, u għal Iżraeliti leali, bħal Ġożwè u Danjel, li lkoll kellhom il-​biżaʼ t’Alla.—Ġenesi 5:22; 6:9; Dewteronomju 8:6; Ġożwè 22:5; Danjel 6:23; ara wkoll Ġakbu 4:8, 10.

¹⁹ Meta nagħmlu l-​petizzjonijiet tagħna magħrufin lil Jehovah, nistgħu nkunu fiduċjużi li ‘l-​paċi t’Alla li tisboq kull ħsieb se tgħasses lil qlubna u l-​qawwiet mentali tagħna permezz taʼ Kristu Ġesù.’ (Filippin 4:7) Din il-​paċi t’Alla, riflessa fuq wiċċ ferrieħi, tistaʼ tirrikkmanda l-​messaġġ tagħna lill-​inkwilini li niltaqgħu magħhom fix-​xogħol tagħna taʼ ppridkar. (Kolossin 4:5, 6) Tistaʼ wkoll tinkuraġġixxi lil dawk li forsi huma maħqurin mill-​pressjonijiet jew l-​inġustizzji tant komuni fid-​dinja tal-​lum, kif juri r-​rakkont li ġej.d

20, 21. (a) Matul it-​terrur Nażista, l-​integrità tax-​Xhieda taʼ Jehovah kif inkuraġġiet lil oħrajn? (b) Il-​leħen taʼ Jehovah liema determinazzjoni għandu jqajjem fina?

²⁰ Max Liebster, Lhudi naturali li donnu b’miraklu baqaʼ ħaj wara l-​Olokawst, iddeskriva l-​vjaġġ tiegħu lejn kamp tal-​qerda Nażista f’dawn il-​kelmiet: “Konna msakkrin ġo vaguni tal-​ferrovija li ġew mibdulin f’ċelel żgħar għal żewġ persuni. Mitfugħ b’daqqa taʼ sieq f’wieħed minnhom, jien ġejt wiċċ imb’wiċċ maʼ priġunier li għajnejh kienu jirriflettu serenità. Hu kien hemm minħabba r-​rispett tiegħu lejn il-​liġi t’Alla, billi għażel il-​ħabs u possibilment il-​mewt biex ma jxerridx id-​demm taʼ nies oħrajn. Hu kien wieħed mix-​Xhieda taʼ Jehovah. It-​tfal tiegħu kienu ttiħdulu, u martu kienet ġiet mogħtija l-​mewt. Hu kien qed jistenna l-​istess ħaġa. Il-​vjaġġ taʼ 14-il ġurnata ġabli tweġiba għat-​talb tiegħi, għax kien matul dan l-​istess vjaġġ lejn il-​mewt li jien sibt it-​tama taʼ ħajja taʼ dejjem.”

²¹ Wara li nħeles mill-​“għar taʼ l-​iljuni” taʼ Auschwitz, kif kien laqqmu, u wara l-​magħmudija tiegħu, dan il-​ħu żżewweġ lil waħda mix-​Xhieda taʼ Jehovah li hi nfisha kienet ġiet mitfugħa l-​ħabs u li missierha kien sofra fil-​kamp taʼ konċentrament taʼ Dachau. Waqt li missierha kien hemm, hu samaʼ li martu u bintu ċ-​ċkejkna kienu ġew arrestati. Hu ddeskriva r-​reazzjoni tiegħu: “Bdejt ninkwieta ħafna. Imbagħad darba minnhom waqt li kont fil-​kju biex nidħol ninħasel, smajt leħen jikkwota Proverbji 3:5, 6 . . . Beda jidwi bħal leħen nieżel mis-​sema. Kien eżatt dak li kelli bżonn biex nerġaʼ nikseb il-​bilanċ tiegħi.” Attwalment, il-​leħen kien taʼ priġunier ieħor li kien qed jikkwota dan it-​test, imma l-​ġrajja tenfasizza x’qawwa tistaʼ teżerċtia fuqna l-​Kelma t’Alla. (Ebrej 4:12) Jalla l-​leħen taʼ Jehovah jkellimna b’mod qawwi llum permezz tal-​kelmiet tat-​test tagħna tas-​sena 1994: “Afda f’Jehovah b’qalbek kollha”! [w93 12/15]

[Noti taʼ taħt]

Fil-​Qosor

◻ Liema xorta taʼ pariri huma ppreżentati fi Proverbji?

◻ Fiduċja f’Jehovah kif se tibbenefikana?

◻ X’inhu involut f’li nistrieħu fuq Jehovah?

◻ Għala għandna nagħtu kas taʼ Jehovah fil-​mogħdijiet tagħna kollha?

◻ Jehovah kif jagħmel dritti l-​passaġġi tagħna?

[Stampi f’paġna 14]

Il-​messaġġ ferrieħi tas-​Saltna jappella għal nies taʼ qalb onesta