Żgħażagħ—Saħħu x-​Xewqa Tagħkom Biex Taqdu lil Ġeħova

“Ftakar fil-​Ħallieq Grandjuż tiegħek f’jiem żgħożitek.”—EKK. 12:1.

1. Liema stedina ngħatat ukoll lit-​tfal f’Israel?

XI 3,500 sena ilu, Mosè, il-​profeta taʼ Ġeħova, ikkmanda lill-​qassisin u lix-​xjuħ taʼ Israel: “Laqqaʼ l-​poplu, l-​irġiel, in-​nisa, iċ-​ċkejknin . . . , sabiex jisimgħu u sabiex jitgħallmu, għax iridu jibżgħu minn Ġeħova Alla tagħkom u joqogħdu attenti li jwettqu l-​kliem kollu taʼ din il-​liġi.” (Dt. 31:12) Innota min ngħata l-​istruzzjoni biex jattendi l-​laqgħat għall-​qima: l-​irġiel, in-​nisa, u ċ-​ċkejknin. Iva, saħansitra ż-​żgħażagħ kienu fost dawk li ntqalilhom biex jisimgħu, jitgħallmu, u jsegwu d-​direzzjoni taʼ Ġeħova.

2. Ġeħova kif wera l-​interess tiegħu fiż-​żgħażagħ fil-​kongregazzjoni Kristjana tal-​bidu?

² Fl-​ewwel seklu, Ġeħova kompla juri l-​interess tiegħu fiż-​żgħażagħ fost il-​poplu tiegħu. Pereżempju, nebbaħ lill-​appostlu Pawlu biex jinkludi istruzzjonijiet immirati speċifikament lejn iż-​żgħażagħ f’xi ftit mill-​ittri li hu bagħat lill-​kongregazzjonijiet. (Aqra Efesin 6:1; Kolossin 3:20.) Żgħażagħ Kristjani li applikaw dawn il-​pariri kabbru l-​apprezzament tagħhom għal Missierhom tas-​sema kollu mħabba u rċivew il-​barka tiegħu.

3. Iż-​żgħażagħ illum kif juru x-​xewqa tagħhom li jaqdu lil Alla?

³ Illum, huma ż-​żgħażagħ mistidnin biex jiltaqgħu ħalli jqimu lil Ġeħova? Iva! Għalhekk, huwa sors taʼ ferħ għan-​nies kollha t’Alla li josservaw li ħafna qaddejja żgħażagħ t’Alla madwar id-​dinja qed jieħdu bis-​serjetà t-​twissija taʼ Pawlu: “Ħa nagħtu kas xulxin biex nitqanqlu għall-​imħabba u l-​għemejjel tajbin, u ma nabbandunawx il-​laqgħat tagħna flimkien, bħalma ħaduha drawwa jagħmlu xi wħud, imma ninkuraġġixxu lil xulxin, u dan iktar u iktar hekk kif taraw joqrob il-​jum.” (Ebr. 10:24, 25) Iżjed minn hekk, ħafna tfal flimkien mal-​ġenituri tagħhom jieħdu sehem f’li jippritkaw l-​aħbar tajba tas-​Saltna t’Alla. (Mt. 24:14) U bħala espressjoni tal-​imħabba tagħhom mill-​qalb għal Ġeħova, ħafna eluf taʼ żgħażagħ kull sena jippreżentaw lilhom infushom għall-​magħmudija u jgawdu l-​barkiet li jiġu milli jkunu dixxipli taʼ Kristu.—Mt. 16:24; Mk. 10:29, 30.

Aċċetta l-​Istedina—Issa

4. Iż-​żgħażagħ meta jistgħu jaċċettaw l-​istedina t’Alla biex jaqduh?

⁴ Ekkleżjasti 12:1 jgħid: “Ftakar fil-​Ħallieq Grandjuż tiegħek f’jiem żgħożitek.” Intom iż-​żgħażagħ kemm irid ikollkom żmien sabiex taċċettaw din l-​istedina mill-​qalb ħalli tqimu u taqdu lil Ġeħova? M’hemm ebda età msemmija fl-​Iskrittura. Għalhekk, iżżommux lura għax taħsbu li għadkom żgħar wisq biex tagħtu widen lil Ġeħova u biex taqduh. Hi x’inhi l-​età tagħkom, intom imħeġġin biex taċċettaw din l-​istedina mingħajr dewmien.

5. Il-​ġenituri kif jistgħu jgħinu lil uliedhom jagħmlu avanz spiritwali?

⁵ Ħafna minnkom tiġu megħjunin tagħmlu avanz spiritwali minn wieħed mill-​ġenituri tagħkom jew mit-​tnejn li huma. B’dan il-​mod, intom bħal Timotju li għex fi żminijiet Bibliċi. Meta kien għadu tarbija, hu kien mgħallem il-​kitba qaddisa minn ommu, Ewniċe, u minn nanntu Lojs. (2 Tim. 3:14, 15) X’aktarx li l-​ġenituri tiegħek qed iħarrġuk b’mod simili billi jistudjaw il-​Bibbja miegħek, jitolbu miegħek, jiħduk għal-​laqgħat tal-​kongregazzjoni u għall-​assembleat akbar tal-​poplu t’Alla, u jieħdu sehem miegħek fil-​ministeru tal-​għalqa. Fil-​fatt, li jgħallmuk il-​mogħdijiet t’Alla hija responsabbiltà importanti ferm li l-​ġenituri tiegħek irċivew mingħand Ġeħova nnifsu. Tapprezza int l-​imħabba li għandhom għalik u l-​interess li għandhom fik?—Prov. 23:22.

6. (a) Skont Salm 110:3, liema qima togħġob lil Ġeħova? (b) X’se nikkunsidraw issa?

⁶ Xorta waħda, hekk kif tikbru intom iż-​żgħażagħ, Ġeħova jridkom “tagħtu prova lilkom infuskom dwar x’inhi r-​rieda tajba u aċċettabbli u perfetta t’Alla,” sewwasew bħalma għamel Timotju. (Rum. 12:2) Jekk tagħmel hekk, mhux se tieħu sehem fl-​attivitajiet tal-​kongregazzjoni għax il-​ġenituri tiegħek iriduk tagħmel hekk, imma għax int trid tagħmel ir-​rieda t’Alla. Jekk taqdi lil Ġeħova minn rajk, se togħġbu. (Salm 110:3) Allura, kif tistaʼ turi li trid issaħħaħ ix-​xewqa tiegħek li tagħti widen lil Ġeħova u li ssegwi d-​direzzjoni tiegħu? Se nikkunsidraw tliet modi importanti kif tistaʼ tagħmel dan. Dawn huma l-​istudju, it-​talb, u l-​kondotta. Ejja neżaminawhom wieħed wieħed.

Sir Af lil Ġeħova Bħala Persuna

7. Ġesù kif ħalla eżempju bħala student tal-​Iskrittura, u x’għenu jagħmel dan?

⁷ L-​ewwel mod li bih turi li trid tkabbar ix-​xewqa tiegħek biex taqdi lil Ġeħova hu billi taqra l-​Bibbja kuljum. Tistaʼ tissodisfa l-​bżonn spiritwali tiegħek u tieħu għarfien prezzjuż tal-​Bibbja billi taqra l-​Kelma t’Alla regolarment. (Mt. 5:3) Ġesù ħalla eżempju f’dan. Darba minnhom, meta kellu 12-​il sena, il-​ġenituri tiegħu sabuh fit-​tempju “bil-​qiegħda f’nofs l-​għalliema, jismagħhom u jistaqsihom.” (Lq. 2:44-​46) Bħala tifel, Ġesù kien diġà żviluppa xenqa għall-​Iskrittura u fehma tagħha. X’għenu jagħmel dan? Bla dubju, ommu Marija u Ġużeppi, il-​missier adottiv tiegħu, kellhom irwol importanti. Huma kienu qaddejja t’Alla, u lil Ġesù tawh istruzzjoni divina minn ċkunitu.—Mt. 1:18-​20; Lq. 2:41, 51.

8. (a) Il-​ġenituri meta għandhom jibdew idaħħlu f’qalb uliedhom l-​imħabba għall-​Kelma t’Alla? (b) Semmi esperjenza li tikkonferma l-​valur taʼ li tħarreġ lit-​tfal minn mindu jkunu trabi.

⁸ Bl-​istess mod, illum il-​ġenituri li jibżgħu minn Alla jirrikonoxxu l-​valur li jdaħħlu f’qalb uliedhom ix-​xenqa għall-​verità tal-​Bibbja minn mindu jkunu għadhom trabi. (Dt. 6:6-​9) Hekk għamlet Rubi, oħt Kristjana, ftit wara li twieled l-​ewwel iben tagħha, Joseph. Kuljum kienet taqralu minn Il-​Ktieb Tiegħi taʼ Stejjer mill-​Bibbja. Hekk kif beda jikber, għenitu jitgħallem diversi skritturi bl-​amment. Ibbenefika Joseph minn taħriġ bħal dan? Malli tgħallem jitkellem, hu setaʼ jirrakkonta ħafna stejjer tal-​Bibbja fi kliemu stess. U meta kellu ħames snin, ta l-​ewwel taħdita tiegħu fl-​Iskola tal-​Ministeru Teokratiku.

9. Għala hu importanti li taqra l-​Bibbja u timmedita fuq dak li taqra?

⁹ Biex tagħmlu iktar progress spiritwali, intom iż-​żgħażagħ għandkom tagħmlu l-​qari tal-​Bibbja kuljum drawwa li żżommuha matul l-​adoloxxenza tagħkom u anki meta ssiru adulti. (Salm 71:17) Il-​qari tal-​Bibbja għala se jgħinek tagħmel progress? Innota x’qal Ġesù f’talba lil Missieru: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru.” (Ġw. 17:3) Tabilħaqq, hekk kif tieħu iktar għarfien dwar Ġeħova, int se tarah dejjem iktar ċar bħala Persuna reali u tkabbar imħabbtek għalih. (Ebr. 11:27) Għalhekk, kull darba li taqra silta mill-​Bibbja, uża dik l-​opportunità biex titgħallem iktar dwar Ġeħova. Staqsi lilek innifsek: ‘Dan ir-​rakkont x’jgħallimni dwar Ġeħova bħala Persuna? Din is-​silta mill-​Bibbja kif turi l-​imħabba li Alla għandu għalija u l-​interess li għandu fija?’ Il-​fatt li tieħu l-​ħin biex timmedita fuq mistoqsijiet bħal dawn se jgħinek titgħallem kif Ġeħova jaħseb u jħossu u x’jirrikjedi minnek. (Aqra Proverbji 2:1-​5.) Bħaż-​żagħżugħ Timotju, int se ‘ssir konvint’ li dak li titgħallem mill-​Iskrittura hu minnu, u se tiġi mqanqal biex tqim lil Ġeħova minn rajk.—2 Tim. 3:14.

Kif it-​Talb Ikabbar l-​Imħabba Tiegħek Għal Ġeħova

10, 11. It-​talb kif jgħinek issaħħaħ ix-​xewqa tiegħek biex taqdi lil Alla?

¹⁰ It-​tieni mod li bih int tistaʼ ssaħħaħ ix-​xewqa tiegħek li taqdi lil Ġeħova b’qalbek kollha hu permezz tat-​talb tiegħek. F’Salm 65:2 naqraw: “O Semmiegħ it-​talb, għandek jiġu n-​nies taʼ kull xorta.” Saħansitra matul iż-​żmien li Israel kien il-​poplu f’patt m’Alla, barranin li kienu jmorru fit-​tempju taʼ Ġeħova setgħu jersqu lejh bit-​talb. (1 Slat. 8:41, 42) Alla mhux parzjali. Dawk li josservaw il-​kmandamenti tiegħu għandhom l-​assiguranza li hu se jagħtihom widen. (Prov. 15:8) Ċertament li “n-​nies taʼ kull xorta” jinkludu lilkom iż-​żgħażagħ.

¹¹ Int taf li l-​bażi għal kwalunkwe ħbiberija vera hi komunikazzjoni tajba. X’aktarx li tħobb taqsam il-​ħsibijiet, it-​tħassib, u s-​sentimenti tiegħek maʼ ħabib tal-​qalb. B’mod simili, meta toffri talb mill-​qalb tkun qed tikkomunika mal-​Ħallieq Grandjuż tiegħek. (Flp. 4:6, 7) Tkellem maʼ Ġeħova bħallikieku qed tiftaħ qalbek maʼ ġenitur li jħobb jew maʼ ħabib tal-​qalb. Fil-​fatt, hemm rabta soda bejn kif titlob u bejn kif tħossok dwar Ġeħova. Se tinnota li iktar ma tissaħħaħ il-​ħbiberija tiegħek maʼ Ġeħova, iktar se jsir sinifikanti t-​talb tiegħek.

12. (a) Talb sinifikanti għala jinvolvi iktar minn sempliċi kliem? (b) X’se jgħinek tirrealizza li Ġeħova hu qrib tiegħek?

¹² Imma żomm f’moħħok li talba sinifikanti tinvolvi iktar minn sempliċi kliem. Tinkludi l-​iktar sentimenti profondi tiegħek. Fit-​talb tiegħek, esprimi l-​imħabba mill-​qalb u r-​rispett profond għal Ġeħova, u l-​fiduċja sħiħa fih. Hekk kif tinduna kif Ġeħova jwieġeb it-​talb tiegħek, bħal qatt qabel int personalment se tirrealizza li “Ġeħova hu qrib dawk kollha li jsejħulu.” (Salm 145:18) Iva, Ġeħova se jersaq qrib tiegħek, billi jsaħħek biex topponi lix-​Xitan u biex tagħmel l-​aħjar għażliet fil-​ħajja.—Aqra Ġakbu 4:7, 8.

13. (a) Il-​ħbiberija m’Alla kif għenet lil waħda oħt? (b) Il-​ħbiberija m’Alla kif tgħinek tkampa mal-​pressjoni minn dawk tamparek?

¹³ Ikkunsidra kif Cherie ssaħħet għax kellha relazzjoni mill-​qrib maʼ Ġeħova. Fl-​iskola sekondarja, hi rebħet premjijiet għax marret tajjeb fl-​iskola u spikkat fl-​isports. Meta spiċċat l-​iskola offrewlha borża taʼ studju li kienet tippermettilha tkompli tieħu edukazzjoni iktar għolja. “L-​offerta ħajritni,” tgħid Cherie, “u l-​kowċis u l-​istudenti sħabi għamluli pressjoni kbira biex naċċettaha.” Imma hi rrealizzat li jekk tkompli tieħu iktar edukazzjoni kien se jkollha bżonn tqattaʼ l-​biċċa l-​kbira mill-​ħin tagħha tistudja u tipprepara għal avvenimenti sportivi—bi ftit li xejn ħin biex taqdi lil Ġeħova. Cherie x’għamlet? Hi tgħid, “Wara li tlabt lil Ġeħova, irrifjutajt il-​borża taʼ studju u bdejt naqdi bħala pijuniera regulari.” Issa ilha ħames snin taqdi bħala pijuniera. “Ma jiddispjaċini xejn,” tgħid hi. “Il-​fatt li naf li ħadt deċiżjoni li togħġob lil Ġeħova jagħmilni ferħana. Tabilħaqq, jekk tqiegħed is-​Saltna t’Alla l-​ewwel, l-​affarijiet l-​oħrajn kollha se jiżdidulek.”—Mt. 6:33.

Kondotta Tajba Turi li Int Għandek ‘Qalbek Nadifa’

14. Il-​kondotta tajba tiegħek għala hi importanti f’għajnejn Ġeħova?

¹⁴ It-​tielet mod li bih tistaʼ turi li qed taqdi lil Ġeħova minn rajk hu bil-​kondotta tiegħek. Ġeħova jbierek lil żgħażagħ li jibqgħu nodfa moralment. (Aqra Salm 24:3-​5.) Iż-​żagħżugħ Samwel irrifjuta li jimita l-​kondotta immorali taʼ wlied il-​Qassis il-​Kbir Għeli. Il-​kondotta mill-​aħjar taʼ Samwel ġiet notata. Il-​Bibbja tgħid: “Sadanittant, it-​tifel Samwel kien qed jikber u jingħoġob iktar, sew quddiem Ġeħova u sew quddiem il-​bnedmin.”—1 Sam. 2:26.

15. X’inhuma xi raġunijiet għala għandek iżżomm kondotta tajba?

¹⁵ Aħna ngħixu f’dinja li hi mimlija nies li jħobbu lilhom infushom, li huma suppervi, diżubbidjenti lejn il-​ġenituri, ingrati, żleali, feroċi, imkabbrin, iħobbu l-​pjaċiri minflok ma jħobbu lil Alla—biex insemmu ftit mill-​karatteristiki li semma Pawlu. (2 Tim. 3:1-​5) Għalhekk, jistaʼ jkun verament taʼ sfida għalik biex iżżomm kondotta eżemplari minkejja li int imdawwar minn dan l-​ambjent mill-​agħar. Madankollu, kull darba li tagħmel dak li hu sewwa u tirrifjuta li tieħu sehem f’kondotta ħażina, int turi li qiegħed fuq in-​naħa taʼ Ġeħova fil-​kwistjoni tas-​sovranità universali. (Ġob 2:3, 4) Ikollok ukoll is-​sodisfazzjon li taf li qed twieġeb għall-​appell mill-​qalb taʼ Ġeħova: “Ibni, kun għaref u ferraħli qalbi, biex inkun nistaʼ nwieġeb lil min qed jgħajjarni.” (Prov. 27:11) Iktar minn hekk, il-​fatt li taf li għandek l-​approvazzjoni taʼ Ġeħova se jsaħħek fix-​xewqa tiegħek biex taqdih.

16. Waħda oħt kif ferrħet qalb Ġeħova?

¹⁶ Bħala adoloxxenti, oħt Kristjana jisimha Carol żammet mal-​prinċipji tal-​Bibbja meta kienet l-​iskola, u l-​kondotta tajba tagħha ġiet notata. X’ġara? Carol kienet tiġi mwaqqgħa għaċ-​ċajt minn sħaba tal-​klassi għax il-​kuxjenza tagħha mħarrġa minn fuq il-​Bibbja ma ħallithiex tieħu sehem fil-​festi u f’ċerimonji patrijottiċi. F’dawn l-​okkażjonijiet, hi kultant kien ikollha l-​opportunità li tispjega t-​twemmin tagħha lil oħrajn. Ħafna snin wara, Carol irċiviet kartolina minn mara li qabel kienet fil-​klassi tagħha u fiha kitbet: “Dejjem xtaqt nikkuntattjak u nirringrazzjak. Il-​kondotta tajba u l-​eżempju tiegħek bħala żagħżugħa Kristjana, flimkien mal-​waqfa kuraġġuża li ħadt rigward il-​festi, ġew notati. Int kont l-​ewwel kuntatt tiegħi max-​Xhieda taʼ Ġeħova.” L-​eżempju taʼ Carol tant kien ħalla impressjoni qawwija fuq seħbitha tal-​klassi li din iktar tard kienet bdiet tistudja l-​Bibbja. Hi kitbet fil-​kartolina li bagħtet lil Carol li hi ilha Xhud mgħammda għal iktar minn 40 sena! Bħal Carol, intom iż-​żgħażagħ li llum iżżommu b’mod kuraġġuż mal-​prinċipji tal-​Bibbja tistgħu tqanqlu lil individwi taʼ qalb onesta biex isiru jafu lil Ġeħova.

Żgħażagħ li Qed Ifaħħru lil Ġeħova

17, 18. (a) Kif tħossok dwar iż-​żgħażagħ tal-​kongregazzjoni tiegħek? (b) Liema futur hemm jistenna liż-​żgħażagħ li jibżgħu minn Alla?

¹⁷ Ilkoll kemm aħna li qegħdin fl-​organizzazzjoni taʼ Ġeħova madwar id-​dinja nitpaxxew naraw ħafna eluf taʼ żgħażagħ żelużi jieħdu sehem fil-​qima vera. Dawn iż-​żgħażagħ isaħħu x-​xewqa tagħhom li jqimu lil Ġeħova billi jaqraw il-​Bibbja kuljum, billi jitolbu, u billi jġibu ruħhom fi qbil mar-​rieda t’Alla. Żgħażagħ eżemplari bħal dawn huma sors taʼ serħan għall-​ġenituri tagħhom u għan-​nies kollha taʼ Ġeħova.—Prov. 23:24, 25.

¹⁸ Fil-​futur, żgħażagħ leali se jkunu fost dawk li se jibqgħu ħajjin u jidħlu fid-​dinja l-​ġdida mwiegħda minn Alla. (Riv. 7:9, 14) Hemmhekk se jesperjenzaw ħafna barkiet meraviljużi hekk kif ikomplu jkabbru l-​apprezzament tagħhom għal Ġeħova, u se jkunu jistgħu jfaħħruh għal żmien indefinit.—Salm 148:12, 13.

Tistaʼ Tispjega?

• Illum iż-​żgħażagħ kif jistgħu jieħdu sehem fil-​qima vera?

• Biex tibbenefika mill-​qari tal-​Bibbja, għala l-​meditazzjoni hi essen-​ zjali?

• It-​talb kif jgħinek tersaq qrib lejn Ġeħova?

• X’jitwettaq b’kondotta Kristjana tajba?

[Stampa f’paġna 5]

Hija d-​drawwa tiegħek li taqra l-​Bibbja kuljum?