Żgħażagħ Ferħanin fis-​Servizz taʼ Jehovah

“Anki tfajjel huwa magħruf mill-​azzjonijiet tiegħu, dwar jekk il-​kondotta tiegħu hix pura u sewwa.”—PROVERBJI 20:11, New International Version.

1. Liema huma xi ftit mill-​affarijiet tal-​għaġeb li l-​Bibbja tgħid dwar Samwel?

IŻ-​ŻAGĦŻUGĦ Samwel probabbli li kellu biss minn tlieta sa ħames snin meta beda “jimministra” fit-​tabernaklu taʼ Jehovah f’Xilo. Wieħed mid-​dmirijiet tiegħu kien li jiftaħ “il-​bibien tad-​dar taʼ Jehovah.” Il-​Bibbja tgħid li “Samwel kien qed isir akbar u iktar gustuż kemm mill-​ħarsa taʼ Jehovah u kemm minn dik tal-​bnedmin.” Meta kiber, hu ġab lura lil Iżrael għall-​qima vera. Hu qeda ’l Alla “l-​jiem kollha taʼ ħajtu.” Saħansitra meta kien “xiħ b’xagħru abjad” hu kien għadu jħeġġeġ lin-​nies biex “jibżgħu minn Jehovah, u . . . jaqduh fil-​verità.” Ma tkunx xi ħaġa ferm sabiħa li kieku n-​nies jistgħu jgħidu dawn l-​affarijiet mill-​aħjar dwarek bl-​istess mod bħalma l-​Bibbja tgħidhom dwar Samwel?—1 Samwel 1:24; 2:18, 26; 3:15; 7:2-4, 15; 12:2, 24.

2. Iż-​żgħar x’jitgħallmu fil-​laqgħat tal-​poplu taʼ Jehovah illum?

² Jekk int wieħed mix-​Xhieda taʼ Jehovah jew wieħed li tattendi l-​laqgħat Kristjani tagħhom, ħares madwarek fis-​Sala tas-​Saltna fejn qed tiġi studjata din il-​lezzjoni. Tara nies taʼ kull età. Wisq probabbli hemm nies li diġà huma ‘xjuħ b’xagħarhom abjad.’ Hemm ukoll ġenituri, żgħażagħ, tfal żgħar, u saħansitra trabi fid-​dirgħajn. L-​iżgħar fosthom diġà qed jitgħallmu? Iva. Staqsi ftit lil dawk li huma stess inġabu għal dawn il-​laqgħat meta kienu żgħar. Huma jgħidulek b’mod onest li, miċ-​ċokon, kienu qed jitgħallmu jirrispettaw ’l Alla, jħobbu lill-​poplu tiegħu, u japprezzaw il-​postijiet fejn jiġi meqjum. Hekk kif igħaddi ż-​żmien, iċ-​ċkejknin jitgħallmu veritajiet tal-​għaġeb. Ħafna żgħażagħ, wara li jikbru fil-​għarfien u fl-​apprezzament, isiru parti mill-​‘irġiel żgħażagħ u xebbiet, irġiel xjuħ u tfal’ li lilhom is-​salmista ħeġġeġ biex ‘ifaħħru lill-​isem taʼ Jehovah, għax ismu biss hu għoli li ma jintlaħaqx.’—Salm 148:12, 13.

3. Kif inhu li żgħażagħ li jafu l-​Bibbja jħarsu lejn il-​ħajja b’mod differenti minn dawk li ma jafuhiex?

³ Jekk int wieħed żagħżugħ li l-​ġenituri jġibuk b’mod regulari għal laqgħat bħal dawn, int imbierek b’mod speċjali. Ħafna żgħażagħ oħra huma inkwetati bil-​problemi tad-​dinja. Xi wħud jistgħu jkunu beżgħanin li l-​bnedmin se jeqirdu l-​art. Inti taf li Alla mhux se jħalli dan jiġri, li mhux se jħalli lill-​bnedmin ikomplu jirrovinaw lil din il-​pjaneta sabiħa. Minflok ma jħalli li jiġri dan, Alla, skond il-​Bibbja, se ‘jġib f’rovina lil dawk li qed jirrovinaw l-​art.’ Inti taf li l-​Bibbja twiegħed li futur mill-​isbaħ fid-​dinja ġdida taʼ tjieba t’Alla hu qrib.—Rivelazzjoni 11:18; Salm 37:29; 2 Pietru 3:13.

Il-​Fidi Tiegħek Stess

4. X’responsabbiltà jpoġġi fuq iż-​żgħażagħ il-​għarfien tal-​mogħdijiet t’Alla, u ż-​żagħżugħ Samwel kif kien taʼ eżempju mill-​aħjar f’dan?

⁴ Għall-​ewwel, il-​mogħdija taʼ verità Kristjana setgħet kienet il-​mira tal-​ġenituri tiegħek. Forsi ġejt għal-​laqgħat Kristjani għaliex ġabuk magħhom, u ħadt sehem f’servizz taʼ tjieba għaliex ħaduk huma. Madankollu, hekk kif igħaddi ż-​żmien, li sservi u tobdi lil Jehovah jistaʼ jsir il-​ferħ tiegħek stess. Omm iż-​żagħżugħ Samwel qabbditu fit-​triq it-​tajba, imma hu personalment kellu jsegwiha. Naqraw: “Saħansitra tfajjel huwa magħruf mill-​azzjonijiet tiegħu, dwar jekk il-​kondotta tiegħu hix pura u sewwa.”—Proverbji 20:11, NIV.

5. (a) Taʼ liema valur kbir hi l-​Bibbja? (b) X’qal Pawlu lil Timotew dwar l-​importanza tal-​Kelma miktuba t’Alla?

⁵ L-​Iskrittura tgħidilna x’irid Alla minna. Turina b’mod ċar kif nogħġbuh, billi tipprovdi għadd kbir taʼ informazzjoni li tistaʼ tagħmlilna ħafna ġid. L-​appostlu Pawlu qal liż-​żagħżugħ li kien igħinu Timotew: “L-​Iskrittura kollha hija mnebbħa minn Alla u taʼ benefiċċju għat-​tagħlim, għat-​twiddib, biex tiddritta l-​affarijiet, biex tiddixxiplina fit-​tjieba, biex il-​bniedem t’Alla jistaʼ jkun kompetenti għalkollox, imgħammar bis-​sħiħ għal kull xogħol tajjeb.”—2 Timotew 3:16, 17.

6. Il-​ktieb taʼ Proverbji xi jgħid dwar l-​importanza tal-​għarfien u tal-​għerf divin?

⁶ Il-​Bibbja tgħidilna wkoll biex ‘nisimgħu mid-​dixxiplina u nsiru għorrief.’ Tgħidilna biex ‘naħżnu bħal teżor’ il-​kmandamenti t’Alla, biex ‘insejħu għall-​fehma,’ u biex ‘nibqgħu nfittxu’ d-​dehen bħal li kieku qed infittxu teżori moħbija taʼ valur. Jekk issegwi dan il-​parir, imbagħad “int se tifhem il-​biżaʼ taʼ Jehovah, u int se ssib il-​għarfien innifsu t’Alla.” Insibu wkoll dan il-​parir: “Issa, O wlied subien, isimgħu minni; iva, henjin huma dawk li jżommu mal-​istess mogħdijiet tiegħi. Isimgħu mid-​dixxiplina u siru għorrief, u turu ebda traskuraġni. Hieni hu l-​bniedem li qed jismaʼ minni . . . Għax dak li jsibni żgur li se jsib il-​ħajja, u se jikseb rieda tajba mingħand Jehovah.” Tistma int lill-​Bibbja daqshekk u tagħmel dik ix-​xorta taʼ sforz biex titgħallem l-​affarijiet li tgħid hi?—Proverbji 2:1-5; 8:32-35.

Akkwista l-​Għarfien

7. Liema huma l-​iktar affarijiet importanti li għandna nitgħallmu?

⁷ Xi żgħażagħ jafu l-​istatistiċi kollha tal-​isport, jew jafu jgħidulek kull ħaġa dwar il-​grupp tal-​mużika favorit tagħhom. Huma jsibu dawn l-​affarijiet ħfief biex jitgħallmuhom u jiftakruhom għaliex huma interessati fihom. Imma l-​iżjed mistoqsija importanti hi, X’jafu dwar Alla? Aħseb ftit dwar x’għamel. Alla għamel l-​univers. Hu ħabbar x’kienu se jagħmlu l-​bnedmin u x’kien se jiġri ħafna qabel ma ġraw l-​affarijiet. Il-​Bibbja mhux biss tgħidilna dwar Alla imma hi tgħallimna kif nistgħu nogħġbuh. Turina kif jistaʼ jkollna ħajja hienja issa u kif nistgħu nakkwistaw ħajja taʼ dejjem fid-​dinja ġdida tiegħu taʼ tjieba. M’huwiex dak iżjed importanti milli tkun taf min rebaħ xi logħba tal-​ballun jew milli titgħallem l-​ismijiet taʼ mużiċisti li n-​nies malajr se jinsewhom?—Isaija 42:5, 9; 46:9, 10; Għamos 3:7.

8. Liema eżempju tajjeb ħallew Ġosija u Ġesù?

⁸ Meta ż-​żagħżugħ Sultan Ġosija kellu 15-il sena, hu “beda jfittex għal dak Alla taʼ David missieru tal-​qedem.” Meta Ġesù kellu 12-il sena, sabuh “bil-​qiegħda f’nofs il-​għalliema” fit-​tempju taʼ Jehovah, “jismaʼ mingħandhom u jistaqsihom.”a Minkejja l-​età tiegħek, żviluppajt int, bħal Ġosija u Ġesù, interess veru f’li titgħallem dwar l-​affarijiet li Alla għamel u li għad irid jagħmel?—2 Kronaki 34:3; Luqa 2:46.

9. (a) Xi problema għandhom ħafna żgħażagħ? (b) X’jistaʼ jagħmel il-​qari u l-​istudju eħfef, u sibt int personalment li dan hu veru?

⁹ Madankollu, tistaʼ tgħid: ‘L-​istudju hu xogħol iebes.’ Ħafna nies, żgħar u kbar, qatt ma qraw biżżejjed biex il-​qari jsir faċli. Iktar ma taqra, iktar il-​qari jsir ħafif. Iktar ma tistudja, it-​tagħlim isir iżjed ħafif, iżżid idejat ġodda mal-​affarijiet li diġà taf u b’hekk tagħmilha eħfef biex tifhimhom u tiftakarhom.

10. (a) Kif tistaʼ tieħu iżjed mil-​laqgħat Kristjani? (b) X’inhi l-​esperjenza tiegħek stess f’dan ir-​rigward?

¹⁰ X’jistaʼ jgħinek biex titgħallem iktar dwar Alla? Forsi tistaʼ tkun iktar regulari f’li tattendi għal-​laqgħat Kristjani. Tistaʼ tipprepara minn qabel u verament tipparteċipa? Per eżempju, tieħu int livell iżjed profond taʼ għarfien minn din il-​lezzjoni billi tfittex it-​testi skritturali li huma ċċitati imma mhux ikkwotati? Ktibt int xi kelma jew tnejn fil-​marġni biex tfakkrek kull wieħed minn dawn it-​testi xi jżid mal-​paragrafu jew mal-​lezzjoni? Għandek int id-​drawwa li tinkludi minn tal-​inqas wieħed minn dawn it-​testi f’xi kumment li juri l-​apprezzament tiegħek għal dik id-​diskussjoni Skritturali? Anzjan tal-​kongregazzjoni li attenda l-​laqgħat b’mod regulari għal ħafna snin igħid: “Insibha ħaġa iebsa li nżomm moħħi fuq xi lezzjoni li ma nkunx verament ippreparajt, imma nsib għaxqa assoluta f’li nsegwi waħda li nkun studjajt bir-​reqqa.”

11. Kif tistaʼ tieħu iżjed minn taħdidiet ibbażati fuq il-​Bibbja, u dan għala hu tant importanti?

¹¹ Meta tismaʼ taħdidiet Bibliċi, tieħu noti qosra biex igħinuk tanalizza kif it-​taħdita qed tiġi żviluppata u biex iżżomm moħħok fuq dak li qed jintqal? Tqabbel int dak li tismaʼ maʼ dak li diġà taf biex tistaʼ tifhmu iktar malajr u tiftakru aħjar? Ġesù talab: “Dan ifisser il-​ħajja taʼ dejjem li jieħdu għarfien dwarek, l-​uniku veru Alla, u dwar dak li inti bgħatt, Ġesù Kristu.” (Ġwann 17:3) Il-​għarfien li jwassal għall-​ħajja m’huwiex l-​aqwa għarfien li tistaʼ possibilment takkwista? Innota xi tgħid il-​Bibbja dwar dan: “Għax Jehovah innifsu jagħti l-​għerf; minn fommu hemm għarfien u dehen. Meta l-​għerf jidħol ġewwa qalbek u l-​għarfien innifsu jsir pjaċevoli għal ruħek stess, l-​abbiltà nfisha li taħseb se tgħasses fuqek, id-​dehen innifsu se jissalvagwardjak.”−Proverbji 2:6, 10, 11.

Ikber fl-​Apprezzament

12. Liema huma xi ftit mill-​affarijiet tal-​għaġeb li Alla għamel għalina?

¹² Napprezzaw verament dak li Alla għamel għalina? Hu ħalaq art sabiħa u ħejjieha għall-​ħajja. Hu ħalaq lill-​ewwel ġenituri tagħna, billi b’hekk għamilha possibbli għalina li nitwieldu. Hu rranġa biex aħna jkollna l-​appoġġ taʼ familji u taʼ kongregazzjoni taʼ mħabba. (Ġenesi 1:27, 28; Ġwann 13:35; Ebrej 10:25) Hu bagħat lill-​Iben imwieled l-​ewwel tiegħu stess fuq l-​art biex igħallimna iktar dwaru Nnifsu u biex jipprovdi r-​rahan li jagħmel possibbli l-​ħajja taʼ dejjem. Tapprezzahom int verament dawn ir-​rigali meraviljużi? Iqanqluk dawn biex taċċetta l-​istedina tiegħu biex titgħallem dwaru u biex taqdih?—Mattew 20:28; Ġwann 1:18; Rumani 5:21.

13. Għala tħossok li Alla jinteressa ruħu fl-​individwi?

¹³ Il-​Ħallieq tal-​univers jinteressa ruħu fin-​nies. Hu sejjaħ lil Abraham “il-​ħabib tiegħi,” u qal lil Mosè: “Jien tassew nafek bl-​isem.” (Isaija 41:8; Eżodu 33:12) Il-​ktieb taʼ Rivelazzjoni jindika li Alla għandu ktieb simboliku, jew “romblu tal-​ħajja,” li fih l-​ismijiet tal-​qaddejja lejali tiegħu “mit-​tisjis tad-​dinja.” Se jkun ismek inkluż hemm?—Rivelazzjoni 3:5; 17:8; 2 Timotew 2:19.

14. Li ssegwi l-​prinċipji t’Alla kif jistaʼ jtejjiblek ħajtek?

¹⁴ Il-​Prinċipji t’Alla jaħdmu. Billi tagħmel l-​affarijiet kif igħid hu jelimina ħafna problemi—immoralità, abbuż taʼ drogi, alkoħoliżmu, tqala mhix mixtieqa, mard venerju, vjolenza, qtil, u lista twila taʼ problemi oħra. Li ssegwi l-​mogħdijiet tiegħu se jgħinek ukoll biex issib ħbieb veri u biex tgħix iżjed hieni. Ma jaqbillekx li tagħmel hekk? (1 Korintin 6:9-11) Saħansitra persuna żagħżugħa li diġà determinata li tagħmel l-​affarijiet kif irid Alla tistaʼ takkwista iżjed saħħa biex tagħmel dak li hu sewwa. Il-​Bibbja tgħid: ‘Ma wieħed lejali Jehovah se jaġixxi bil-​lejaltà.’ Tassigurana wkoll li hu la se “jitlaq lill-​uħud lejali tiegħu” lanqas ma se “jabbanduna lill-​poplu tiegħu.”−Salm 18:25; 37:28; 94:14; Isaija 40:29-31.

Imxi ’l Quddiem f’li Taqdi ’l Alla

15. Salamun liema parir taʼ tjieba ta liż-​żgħażagħ?

¹⁵ Huma l-​miri tiegħek iċċentrati fid-​dinja qadima li qed tmut jew fil-​waħda ġdida taʼ tjieba? Tismaʼ int minn Alla, jew tismaʼ minn persuni b’għerf dinji li jikkontradixxu lilu? Jiġu r-​rikreazzjoni, l-​edukazzjoni għolja, jew xi karriera sekulari li tikkonsma ħafna ħin qabel Alla u s-​servizz tiegħu? Il-​għaref Sultan Salamun kiteb il-​ktieb Bibliku taʼ Ekkleżjasti kollu biex juri x’għandu jiġi l-​ewwel fil-​ħajjiet tagħna. Hu kkonkluda: “Ftakar, issa, fil-​Ħallieq Grandjuż tiegħek f’jiem il-​bidu taʼ rġulitek, qabel ma jiem il-​għawġ jissoktaw jiġu, jew is-​snin ikunu waslu meta int tgħid: ‘Ma nieħu ebda għaxqa fihom.’ Il-​konklużjoni tal-​ħaġa, wara li nstemaʼ kollox, hi: Ibżaʼ mill-​veru Alla u żomm il-​kmandamenti tiegħu. Għax dan hu l-​obbligu kollu tal-​bniedem.”−Ekkleżjasti 12:1, 13.

16. Iż-​żgħażagħ kif jistgħu jistinkaw għal iktar privileġġi?

¹⁶ L-​aħwa Kristjani kollha li huma kbar u li inti tafhom—l-​anzjani, il-​pijunieri, u l-​indokraturi distrettwali u tas-​circuit tiegħek—darba kienu tfal. X’wassal għall-​barkiet li huma jgawdu llum? Huma kienu jħobbu, ’l Alla u riedu jaqduh. Ħafna minnhom fiż-​żgħożija ħadu vantaġġ mill-​ħin żejjed li kellhom biex jakkwistaw għarfien u esperjenza. Huma studjaw u pparteċipaw fil-​laqgħat. Ħadu sehem fit-​tagħlim, u stinkaw għal iżjed privileġġi—xogħol taʼ pijunier, servizz f’Betel, jew xi attività oħra premjanti. Huma ma kinux xi ‘super żgħażagħ’; huma kellhom interessi u tħassib normali bħalma għandek int. Madankollu, applikaw lilhom infushom fi qbil mal-​parir: “Hu x’inhu li qegħdin tagħmlu, aħdmu għalih b’ruħkom kollha qisu għal Jehovah, u mhux għall-​bnedmin.”−Kolossin 3:23; qabbel Luqa 10:27; 2 Timotew 2:15.

17. X’jistaʼ jgħin liż-​żgħażagħ biex jagħmlu progress fis-​servizz t’Alla?

¹⁷ Xi ngħidu għalik? Tapprezza verament affarijiet taʼ tjieba? Tagħżel ħbieb fost dawk li jpoġġu l-​ewwel affarijiet spiritwali? Tinkuraġġixxi lil oħrajn biex jieħdu sehem miegħek f’attività Kristjana? Tmur għas-​servizz Kristjan maʼ wħud akbar, taʼ iżjed esperjenza biex titgħallem minnhom, biex idduq il-​ferħ tagħhom, u biex tiġi nkuraġġit bix-​xogħlijiet mill-​aħjar tagħhom? Waħda Xhud tiftakar dak in-​nhar, kważi 20 sena ilu, meta għall-​ewwel darba persuna akbar minnha stednitha mill-​qalb biex tmur magħha fil-​ministeru tal-​għalqa. Dan, qalet, ikkaġuna l-​bidla f’ħajjitha: “Għall-​ewwel darba kont sejra għax ridt jien, mhux biss għax il-​ġenituri tiegħi kienu qed joħduni.”

18. Liema affarijiet għandek taħseb dwarhom qabel tippreżenta lilek innifsek għall-​magħmudija?

¹⁸ Jekk qed tagħmel progress f’li tagħmel l-​affarijiet kif irid Alla, int malajr forsi tibda taħseb dwar il-​magħmudija. Huwa importanti li tiftakar li l-​magħmudija mhix xi ċeremonja li biha ssir adult żagħżugħ. Ma turix li int qed tikber, lanqas ma hi xi ħaġa li għandek tagħmel għaliex ħbiebek ħadu dak il-​pass. Qabel tistaqsi biex titgħammed, irid ikollok għarfien bażiku tal-​verità u tkun qed tgħix fi qbil mal-​Kelma t’Alla. Irid ikollok esperjenza raġonevoli f’li taqsam dak il-​għarfien maʼ oħrajn u tirrealizza li dan hu parti vitali mill-​vera qima. (Mattew 24:14; 28:19, 20) Għandek tkun taf ukoll li wara li tieħu dan il-​pass Kristjan importanti int tkun mistenni li tgħix fi qbil mal-​prinċipji morali taʼ tjieba tal-​Bibbja.b F’qalbek, int ridt tkun iddedikajt ħajtek lil Missierek tas-​sema taʼ mħabba.—Qabbel Salm 40:8, 9.

19. Persuna meta għandha titgħammed?

¹⁹ Il-​magħmudija hija pass li int tieħu meta tkun iddeċidejt b’mod sod li jiġri x’jigri fil-​bqija taʼ ħajtek, int se taqdi ’l Alla. Huwa sinjal pubbliku li int għamilt dedikazzjoni sħiħa, bla riżerva, u bla limiti lil Jehovah permezz taʼ Ġesù Kristu biex tagħmel ir-​rieda t’Alla. Anzjan Kristjan jiftakar il-​jum, kważi nofs seklu ilu, meta hu rrealizza: “Jien irrid nagħmel xi ħaġa dwar dan!” Michelle, Xhud żagħżugħa mgħammda fi Newcastle, l-​Ingilterra, xi ftit tas-​snin ilu, tgħid: “Fl-​eta taʼ 13-il sena, jien irrealizzajt li għandi niddedika ħajti u nitgħammed; m’hemm xejn li nippreferi nagħmel iżjed milli naqdi ’l Alla.”

20. (a) Liema eżempju mill-​aħjar taw diġà għaxriet taʼ eluf taʼ żgħażagħ? (b) Dan il-​pass kif għandu jitqies?

²⁰ Għaxriet taʼ eluf taʼ żgħażagħ ġew imgħammdin dan l-​aħħar. Huma studjaw il-​Kelma t’Alla u tgħallmu l-​mogħdijiet tiegħu, u mbagħad, bil-​magħmudija tal-​ilma, huma bil-​ferħ ingħaqdu maʼ ħafna oħrajn akbar fl-​età f’li jissimbolizzaw fil-​pubbliku d-​dedikazzjoni tagħhom lil Alla. Huma jafu li l-​magħmudija mhix tmiem imma biss bidu għall-​mod taʼ ħajja verament iddedikat li huma determinati li jsegwu fis-​servizz taʼ Jehovah għal dejjem.

[Noti taʼ taħt]

Kif Se Twieġeb?

◻ Il-​għarfien tal-​Kelma t’Alla għala hu tant importanti?

◻ Kif tistaʼ tieħu iżjed mil-​laqgħat Kristjani?

◻ Liema barkiet mingħand Alla għandhom iqanqluna biex nobduh?

◻ Kif tistaʼ timxi ’l quddiem fis-​servizz t’Alla?

◻ Wieħed meta għandu jitgħammed?