Il-Kelma taʼ Ġeħova Hi Ħajja
Punti Prinċipali mill-Ktieb taʼ Koħèlet
“IL-BNIEDEM imwieled minn mara għandu ħajja qasira, imma tbatija għandu biżżejjed,” qal il-patrijarka Ġob. (Ġob 14:1) Kemm huwa vitali li ma naħlux il-ħajja qasira li għandna fi tħassib u ġiri wara affarijiet li m’humiex siewja! F’liema miri għandna ninvestu l-ħin, l-enerġija, u r-riżorsi tagħna? Liema miri għandna nevitaw? Il-kliem kollu għerf li hu mniżżel fil-ktieb Bibliku taʼ Koħèlet jagħti gwida taʼ min joqgħod fuqha dwar dan. Il-messaġġ li jagħti ‘jistaʼ jagħraf il-ħsibijiet u l-intenzjonijiet tal-qalb’ u jistaʼ jgħinna ngħixu ħajja sinifikanti.—Ebrej 4:12.
Il-ktieb taʼ Koħèlet, li hu miktub minn raġel magħruf għall-għerf tiegħu, is-Sultan Salamun taʼ Iżrael tal-qedem, fih pariri prattiċi fuq dak li għandu valur veru fil-ħajja u dak li m’huwiex taʼ valur. Ladarba Salamun jirreferi għal uħud mill-proġetti taʼ bini li kien għamel, bilfors li hu kiteb il-ktieb taʼ Koħèlet wara li tlestew u qabel ma ta dahru lill-qima vera. (Neħemija 13:26) Dan juri li l-ktieb inkiteb qabel is-sena 1000 Q.E.K., lejn l-aħħar tar-renju t’40 sena taʼ Salamun.
IL-FRUGĦA X’MA TINKLUDIX?
“Kollox frugħa!” jgħid il-kongregatur li jistaqsi: “Xi qligħ għandu l-bniedem mit-taħbit tiegħu kollu, li jġarrab taħt ix-xemx?” (Koħèlet 1:2, 3) L-espressjonijiet “frugħa” u “taħt ix-xemx” jidhru ħafna drabi f’Koħèlet. Il-kelma Ebrajka għal “frugħa” letteralment tfisser “nifs” jew “fwar” u timplika nuqqas taʼ importanza prattika, permanenza, u valur li jdum. L-espressjoni “taħt ix-xemx” tfisser “fuq din l-art” jew “f’din id-dinja.” Għalhekk, kollox—jiġifieri, l-istinkar kollu tal-bniedem li ma jagħtix kas ir-rieda t’Alla—huwa frugħa.
“Qis il-pass li tagħmel inti u tersaq lejn id-dar taʼ Alla . . . biex tismaʼ,” jgħid Salamun. (Koħèlet 4:17 [5:1, NW]) Is-sehem tagħna fil-qima vera t’Alla Ġeħova m’huwiex frugħa. Fil-fatt, biex ikollna ħajja sinifikanti huwa essenzjali li nieħdu ħsieb ir-relazzjoni tagħna miegħu.
Mistoqsijiet Skritturali Mweġbin:
1:4-10—Iċ-ċikli naturali għala huma t’‘għeja’? (Saydon) Il-kongregatur isemmi biss tliet funzjonijiet bażiċi li jagħmlu l-ħajja fuq l-art possibbli—ix-xemx, ir-riħ, u ċ-ċiklu taʼ l-ilma. Fir-realtà, iċ-ċikli naturali huma ħafna u huma kumplessi ħafna. Wieħed jistaʼ jqattaʼ ħajtu kollha jistudja dwarhom u xorta ma jkunx jistaʼ jifhimhom għalkollox. Dan tassew jistaʼ ‘jgħejjik.’ Huwa wkoll frustranti meta tqabbel il-ħajja qasira tagħna mar-ripetizzjoni li ma taqtaʼ qatt taʼ dawn iċ-ċikli. Anki t-tentattivi biex isiru skoperti ġodda huma t’għeja. Wara kollox, l-iskoperti ġodda m’huma xejn iktar minn applikar taʼ prinċipji li l-Alla l-veru stabbilixxa u diġà uża fil-ħolqien.
2:1, 2—Id-daħq għala huwa msejjaħ “ġenn”? Id-daħq jistaʼ jgħinna ninsew il-problemi tagħna għal mument, u l-pjaċir jistaʼ ma jħalliniex nieħdu l-problemi tagħna bis-serjetà. Madankollu, id-daħq ma jneħħilniex id-diffikultajiet tagħna. Għalhekk, il-ġiri wara l-ferħ permezz tad-daħq jissejjaħ “ġenn.”
3:11—Alla x’għamel “tajjeb f’waqtu”? Uħud mill-affarijiet li Alla Ġeħova għamel “tajjeb,” jew sewwa u taʼ benefiċċju, fil-ħin xieraq huma l-ħolqien taʼ Adam u Eva, il-patt permezz tal-qawsalla, il-patt m’Abraham, il-patt Davidiku, il-miġja tal-Messija, u l-ħatra taʼ Ġesù Kristu bħala Sultan tas-Saltna t’Alla. Madankollu, hemm xi ħaġa oħra li Ġeħova se jagħmel ‘tajba’ fil-futur qarib. Nistgħu nkunu fiduċjużi li d-dinja l-ġdida mimlija ġustizzja se ssir realtà fiż-żmien xieraq.—2 Pietru 3:13.
5:8 (5:9, NW)—“Dak li tagħti l-art” kif inhu “għal kulħadd”? L-abitanti kollha taʼ l-art jiddependu minn “dak li tagħti l-art”—mill-prodotti tagħha. Sultan m’huwiex xi eċċezzjoni. Sabiex jirċievi l-prodotti mill-għalqa tiegħu, is-sultan jiddependi mix-xogħol iebes tal-qaddejja tiegħu li jikkultivawlu l-art.
Lezzjonijiet Għalina:
1:15. Huwa kollu għalxejn li naħlu l-ħin u l-enerġija tagħna nipprovaw nirranġaw l-oppressjoni u l-inġustizzja li naraw illum. Is-Saltna t’Alla biss tistaʼ tneħħi l-ħażen.—Danjel 2:44.
2:4-11. Attivitajiet kulturali, bħall-arkitettura, il-ġardinaġġ, u l-mużika, kif ukoll ħajja lussuża huma “ġiri wara r-riħ” minħabba li dawn l-affarijiet la jistgħu jagħtu sinifikat veru lill-ħajja u lanqas jistgħu jġibu ferħ dejjiemi.
2:12-16. L-għerf għandu iktar vantaġġi mill-bluha għax jistaʼ jgħinna nsolvu xi problemi. Madankollu, l-ebda għerf uman m’għandu vantaġġi fuq il-mewt. U anki jekk wieħed jikseb il-fama minħabba li jkollu għerf bħal dan, dak li jkun xorta ma jdumx ma jintesa.
2:24; 3:12, 13, 22. M’huwiex ħażin li wieħed igawdi l-frott taʼ xogħlu.
2:26. L-għerf divin, li jġib il-ferħ, jingħata lil ‘min hu sewwa quddiem Alla.’ Huwa impossibbli li tikseb l-għerf mingħajr ma jkollok relazzjoni tajba m’Alla.
3:16, 17. M’huwiex realistiku li tistenna li ssir ġustizzja f’kull każ. Minflok ma nħossuna ansjużi minħabba dak li qed jiġri fid-dinja llum, għandna nistennew lil Ġeħova biex jirranġa l-affarijiet.
4:4. Xogħol iebes magħmul bis-sengħa jistaʼ jġib sodisfazzjon. Madankollu, jekk naħdmu iebes sempliċement biex inkunu aħjar minn ħaddieħor se noħolqu kompetizzjoni u nistgħu noħolqu malizzja u għira. Ix-xogħol iebes tagħna fil-ministeru Kristjan għandu jiġi minn motivi tajbin.
4:7-12. Ir-relazzjonijiet umani huma iktar importanti minn affarijiet materjali u m’għandniex nitilfuhom minħabba l-ġiri wara r-rikkezzi.
4:13. Il-pożizzjoni u l-età mhux dejjem jirbħu r-rispett. Dawk li għandhom pożizzjonijiet taʼ responsabbiltà għandhom jaġixxu bil-għaqal.
4:15, 16. “Iż-żagħżugħ”—is-suċċessur tas-sultan—għall-ewwel għandu mnejn ikollu l-appoġġ tal-‘kotra li jsir mexxej tagħha,’ imma ‘dawk li jiġu warajhom ma jifirħux bih.’ Tabilħaqq, il-popolarità normalment hija temporanja.
5:1 (5:2, NW). It-talb tagħna għandu jsir bil-ħsieb u b’rispett, u mhux imżejjen b’ħafna kliem.
5:2-6 (5:3-7, NW). Tħassib fuq li jikseb affarijiet materjali jistaʼ jwassal lil individwu biex joqgħod jaħseb fuq interessi egoistiċi. Jistaʼ wkoll iġiegħel lil dak li jkun iħossu ansjuż u joqgħod jaħseb bil-lejl, u dan itellef raqda tajba. Ħafna kliem jistaʼ jġiegħel lil individwu jidher iblah quddiem ħaddieħor u jistaʼ jġagħlu jagħmel wegħda taʼ malajr quddiem Alla. ‘Il-biżaʼ minn Alla’ se jgħinna nevitaw dawn iż-żewġ affarijiet.
6:1-9. X’benefiċċju għandhom il-ġid, il-glorja, ħajja twila, u saħansitra familja kbira jekk iċ-ċirkustanzi ma jħalluniex ingawduhom? U “aħjar tara b’għajnejk,” jew tiffaċċja r-realtajiet, milli “ssiefer bil-ħsieb,” jiġifieri, li tistinka biex taqtaʼ xewqat li huma impossibbli biex taqtagħhom. Mela l-aħjar mod kif ngħixu hu li nkunu kuntenti li għandna “x’nieklu u biex nitgħattew” u fl-istess ħin ingawdu affarijiet tajbin fil-ħajja u niffokaw fuq li nżommu relazzjoni mill-qrib maʼ Ġeħova.—1 Timotju 6:8.
PARIR GĦALL-GĦAREF
Kif nistgħu nieħdu ħsieb isimna, jew ir-reputazzjoni tagħna? X’għandha tkun l-attitudni tagħna lejn il-ħakkiema umani u l-inġustizzji li naraw? Jekk il-mejtin m’huma konxji taʼ xejn, kif għandna nużaw ħajjitna issa? Iż-żgħażagħ b’liema mod jistgħu jużaw il-ħin u l-enerġija tagħhom bil-għaqal? Il-pariri siewja tal-kongregatur fuq dawn l-affarijiet u fuq kwistjonijiet oħrajn huma mniżżlin għalina fil-kapitli 7 sa 12 taʼ Koħèlet.
Mistoqsijiet Skritturali Mweġbin:
7:19—L-għerf kif inhu iktar b’saħħtu minn ‘għaxar [irġiel] bis-setgħa’? Meta jiġi użat b’mod figurattiv fil-Bibbja, in-numru għaxra jirrappreżenta l-kompletezza. Salamun qed jgħid li l-għerf jistaʼ jipproteġi iktar minn numru komplet taʼ gwerriera li jgħassu belt.
10:2—X’jiġifieri li qalb individwu tkun fuq “il-lemin” jew fuq “ix-xellug”? Ladarba l-id il-leminija ħafna drabi tfisser pożizzjoni taʼ favur, il-fatt li qalb dak li jkun qiegħda fuq il-lemin ifisser li qalbu tqanqlu biex jagħmel dak li hu tajjeb. Madankollu, jekk lil individwu tqanqlu biex jagħmel dak li hu ħażin, jingħad li qalbu qiegħda fuq ix-xellug.
10:15—‘It-taħbit taʼ l-iblah’ għala “jifnih”? Jekk individwu ma jkollux dehen, ix-xogħol iebes tiegħu ma jipproduċi xejn taʼ siwi veru. Ma jkollux sodisfazzjon. Xogħol iebes bħal dan iġagħlu jħossu biss mifni.
11:7, 8—Xi tfisser l-istqarrija: “Ħelu tassew id-dawl, u għażiża għall-għajnejn id-dehra tax-xemx”? Id-dawl u x-xemx qegħdin hemm biex iferrħu lill-bnedmin. Salamun hawnhekk qed jgħid li huwa tajjeb li tkun ħaj u li tgawdi qabel ma jiem mudlama, jew ix-xjuħija, jisirqulna l-enerġija.
11:10—“It-tfulija u ż-żgħożija” għala huma frugħa? Jekk ma jintużawx sew, se jkunu frugħa għax l-enerġija taż-żgħożija tgħaddi malajr bħal fwar.
Lezzjonijiet Għalina:
7:6. Id-daħq mhux f’waqtu huwa irritanti u għalxejn daqskemm hu ċ-ċaqċiq tax-xewk li jkun qed jaqbad taħt borma. Nagħmlu tajjeb jekk ngħassu kontrih.
7:21, 22. M’għandniex ninkwetaw iżżejjed dwar dak li jgħidu oħrajn dwarna.
8:2, 3; 10:4. Meta tiġi kritikat jew koreġut minn xi mgħallem ikun għaqli li tibqaʼ kalm. Aħjar hekk milli ‘titlaq tgħaġġel minn quddiemu,’ jiġifieri, taqbad u tirriżenja mill-kariga.
8:8; 9:5-10, 12. Il-ħajja tagħna tistaʼ tintemm ħesrem bħalma l-ħut jinqabad f’xibka jew l-għasafar f’nassa. Iktar minn hekk, fil-mewt ħadd ma jistaʼ jżomm il-forza tal-ħajja milli titlaq, u ħadd ma jistaʼ jaħrab mill-battalja li l-mewt qed tiġġieled kontra l-umanità. Għalhekk, m’għandniex noqogħdu naħlu l-ħin billi nitgħażżnu. Ġeħova jridna nistmaw il-ħajja u ngawduha b’mod xieraq. Sabiex nagħmlu dan għandna npoġġu s-servizz taʼ Ġeħova fl-ewwel post f’ħajjitna.
8:16, 17. Aħna ma nistgħux nifhmu dak kollu li għamel Alla u li ppermetta li jseħħ fost l-umanità, lanqas li kieku kellna nitilfu l-irqad sakemm niksbu l-fehma. Jekk noqogħdu ninkwetaw fuq il-ħażin li nkunu għamilna se nitilfu t-tgawdija tal-ħajja.
9:16-18. L-għerf għandu jiġi stmat anki meta ma jkunx apprezzat. Il-kliem taʼ l-għaref li jintqal bil-kalma huwa preferut iktar mill-għajjat taʼ l-iblah.
10:1. Għandna noqogħdu attenti x’ngħidu u x’nagħmlu. Saħansitra nuqqas wieħed taʼ diskrezzjoni, bħar-rabja, l-użu ħażin taʼ l-alkoħol, jew kondotta sesswali ħażina, anki jekk dawn isiru darba biss, huma biżżejjed biex titħassar reputazzjoni tajba taʼ persuna rispettata.
10:5-11. M’għandniex għalfejn ngħiru għal individwu li għandu pożizzjoni għolja li ma jagħmilx xogħlu sew. Meta dak li jkun ma jagħmilx xogħlu sew, anki fl-iċken ħaġa, ikollu konsegwenzi ħżiena. Għall-kuntrarju, jekk nikkultivaw l-abbiltà li ‘nħaddmu l-għaqal’ se jkun taʼ vantaġġ għalina. Kemm huwa importanti li nsiru tas-sengħa fix-xogħol taʼ l-ippridkar tas-Saltna u li nagħmlu dixxipli!
11:1, 2. Għandna nagħtu minn qalbna. Il-ġenerożità tqanqal lil oħrajn biex juru l-ġenerożità wkoll.—Luqa 6:38.
11:3-6. L-inċertezzi tal-ħajja m’għandhomx jagħmluna indeċiżi.
11:9; 12:1-7. Iż-żgħażagħ iridu jagħtu kont lil Ġeħova. Għalhekk, huma għandhom jużaw il-ħin u l-enerġija tagħhom fis-servizz t’Alla qabel ma x-xjuħija tisirqilhom l-enerġija tagħhom.
“KLIEM L-GĦORRIEF” JIGGWIDANA
Kif għandna nqisu l-“kliem pjaċevoli” (NW) li l-kongregatur fittex li jsib u jikteb? B’kuntrast mal-ħafna kotba t’għerf uman, “kliem l-għorrief hu bħal xpruni, bħal puntali sodi l-ġabriet taʼ qwielhom; lkoll mogħtija minn ragħaj wieħed.” (Koħèlet 12:10-12) Il-kliem taʼ l-għaref li jingħata minn “ragħaj wieħed,” Ġeħova, jagħtina stabbiltà f’ħajjitna.
Jekk napplikaw il-pariri għaqlin li nsibu fil-ktieb taʼ Koħèlet se nkunu tassew megħjunin biex ikollna ħajja mimlija tifsir u hena. Iktar minn hekk, aħna rassigurati: “Ikollhom l-hena dawk li jibżgħu minn Alla.” Għalhekk, jalla jkollna determinazzjoni soda biex ‘nibżgħu minn Alla u l-kmandamenti tiegħu.’—Koħèlet 8:12, 13 (8:12, NW); 12:13, Saydon.
[Stampa f’paġna 15]
Waħda mill-iktar affarijiet tajbin li għamel Alla se ssir realtà fiż-żmien xieraq
[Stampa f’paġna 16]
L-għotjiet t’Alla jinkludu l-ikel, ix-xorb, u l-frott tax-xogħol iebes tagħna