Il-Kelma taʼ Ġeħova Hi Ħajja
Punti Prinċipali mill-Ktieb taʼ Malakija
IT-TEMPJU mibni mill-ġdid f’Ġerusalemm kien ilu li tlesta iktar minn 70 sena. Però, maż-żmien l-ispiritwalità tal-Lhud kienet iddgħajfet ħafna. Anki l-qassisin kienu saru korrotti. Min se jġegħelhom jirrealizzaw f’liema kundizzjoni tassew jinsabu u jipprova jgħinhom jerġgħu jersqu qrib lejn Alla? Ġeħova jagħti dan l-inkarigu lill-profeta Malakija.
L-aħħar ktieb taʼ l-Iskrittura Ebrajka, miktub bi stil qawwi minn Malakija fih profeziji ispirati minn Alla. L-attenzjoni li nagħtu għall-kelma profetika taʼ Malakija tistaʼ tgħinna nippreparaw għall-“jum il-kbir taʼ Ġeħova, jum li jqanqal il-biżaʼ,” meta s-sistema dinjija mill-agħar se tintemm.—Malakija 4:5, NW.
IL-QASSISIN ‘ĠIEGĦLU LIL ĦAFNA JITFIXKLU’
Ġeħova jesprimi kif iħossu dwar Iżrael, billi jgħid: “Ħabbejtkom.” Imma l-qassisin żebilħu l-isem t’Alla. Kif? ‘Billi fuq l-artal tiegħu offrew ikel imniġġes’ u billi offrew “vittma magħtuba jew marida” għas-sagrifiċċju.—Malakija 1:2, 6-8.
Il-qassisin ‘ġiegħlu lil ħafna jitfixklu bit-tagħlim tagħhom.’ In-nies kienu qed ‘jaġixxu bil-qerq bejniethom.’ Xi wħud ħadu nisa barranin. Oħrajn qarrqu bil-‘mara taʼ żgħożithom.’—Malakija 2:8, 10, 11, 14-16.
Mistoqsijiet Skritturali Mweġbin:
2:2—Ġeħova b’liema mod ‘seħet il-barkiet’ tal-qassisin li ma kinux qed iħarsu l-liġi t’Alla? Alla għamel dan fis-sens li l-barka li jitolbu għaliha dawn il-qassisin kienet se ssir saħta.
2:3—X’kien ifisser li l-qassisin ikollhom ‘il-ħmieġ imwaddab maʼ wiċċhom’? Skond il-Liġi, il-ħmieġ taʼ l-annimali għas-sagrifiċċju kellu jittieħed barra l-kamp u jiġi maħruq. (Levitiku 16:27) It-twaddib tal-ħmieġ maʼ wiċċ il-qassisin kien ifisser li Ġeħova rrifjuta s-sagrifiċċji u li dawk li offrewhom kienu mistmerrin minnu.
2:13—Taʼ min kien id-dmugħ li bih l-artal taʼ Ġeħova ġie miksi? Dan kien id-dmugħ tan-nisa li marru fis-santwarju tat-tempju u fetħu qalbhom maʼ Ġeħova. X’ġegħelhom jitnikktu b’dan il-mod? L-irġiel tagħhom, li kienu Lhud, kienu ddivorzjawhom għal raġunijiet illeġittimi u kienu telquhom. X’aktarx dan għamluh biex jiżżewġu nisa barranin li kienu iżgħar fl-età.
Lezzjonijiet Għalina:
1:10. Ġeħova ma ħax pjaċir bl-offerti tal-qassisin rgħibin, li kienu jitolbu ħlas anki għal servizzi sempliċi bħal li jagħlqu l-bibien jew iqabbdu n-nar taʼ l-artali. Kemm hu importanti li l-atti taʼ qima tagħna, inkluż dak li nagħmlu fil-ministeru Kristjan, ikunu mqanqlin minn imħabba mhix egoista għal Alla u għal għajrna, u mhux għal qligħ finanzjarju!—Mattew 22:37-39; 2 Korintin 11:7.
1:14; 2:17. Ġeħova ma jittollerax l-ipokrisija.
2:7-9. Dawk li jingħataw il-privileġġ li jgħallmu fil-kongregazzjoni għandhom ikunu ċerti li dak li jgħallmu jkun fi qbil mal-Kelma t’Alla, l-Iskrittura Mqaddsa, u maʼ pubblikazzjonijiet tal-“prokuratur leali” bbażati fuq il-Bibbja.—Luqa 12:42; Ġakbu 3:11.
2:10, 11. Ġeħova jistenna li l-qaddejja tiegħu jieħdu bis-serjetà l-parir li jiżżewġu “biss fil-Mulej.”—1 Korintin 7:39.
2:15, 16. Aduraturi veri għandhom jonoraw il-wegħda taż-żwieġ mal-mara taʼ żgħożithom.
“JIDĦOL FIT-TEMPJU TIEGĦU S-SID” VERU
(Malakija 3:1-24 [3:1–4:6, NW])
“Minnufih jidħol fit-tempju tiegħu s-Sid [veru, Alla Ġeħova]” maʼ “l-anġlu tal-patt [Ġesù Kristu].” Alla ‘se jersaq lejn il-poplu tiegħu biex jagħmel il-ġustizzja’ u jsir xhud ħafif kontra dawk kollha li jagħmlu kull tip taʼ ħażen. Iktar minn hekk, se jkun hemm “ktieb it-tifkiriet” għal dawk li jibżgħu minn Ġeħova.—Malakija 3:1, 3, 5, 16.
Il-jum li qed “jaqbad qisu forn” se jiġi u jiblaʼ lill-ħżiena kollha. Qabel il-miġja taʼ dak il-jum, se jintbagħat profeta biex “idawwar qalb il-missirijiet lejn uliedhom u qalb l-ulied lejn missirijiethom.”—Malakija 3:19, 23, 24 (4:1, 5, 6, NW).
Mistoqsijiet Skritturali Mweġbin:
3:1-3—Meta marru fit-tempju “s-Sid [veru]” u “l-anġlu tal-patt,” u min intbagħat qabilhom? Ġeħova mar fit-tempju tiegħu permezz taʼ rappreżentant u fl-10 taʼ Nisan tas-sena 33 E.K. naddaf it-tempju. Din kienet l-okkażjoni meta Ġesù daħal fit-tempju u keċċa ’l barra lil dawk li kienu qed jixtru u jbigħu. (Marku 11:15) Dan kien tliet snin u nofs wara li Ġesù kien ġie midluk bħala Sultan-Nominat. Fi qbil maʼ dan, jidher li tliet snin u nofs wara li ġie maħtur bħala Sultan fis-sema, Ġesù akkumpanja lil Ġeħova fit-tempju spiritwali u sab li l-poplu t’Alla kellu bżonn jindaf. Fl-ewwel seklu, Ġwanni l-Għammied intbagħat biex jipprepara lil-Lhud għall-miġja taʼ Ġesù Kristu. Fi żmienna, intbagħat messaġġier biex jipprepara t-triq għall-miġja taʼ Ġeħova fit-tempju spiritwali tiegħu. Saħansitra lura fil-bidu taʼ l-1880, grupp taʼ studenti tal-Bibbja bdew jieħdu sehem f’xogħol t’edukazzjoni Biblika biex jgħallmu lil individwi sinċieri ħafna veritajiet bażiċi mill-Bibbja.
3:10—L-għoti taʼ l-għexur, jew “id-dieċmi,” jirrappreżenta l-għoti taʼ dak kollu li għandna lil Ġeħova? Il-Liġi Mosajka tneħħiet fuq il-bażi tal-mewt taʼ Ġesù; għalhekk, l-għoti taʼ l-għexur m’huwiex obbligu bħala parti mill-qima llum. Madankollu, dan l-għoti għandu tifsir simboliku. (Efesin 2:15) Dan ma jirrappreżentax li aħna nagħtu dak kollu li għandna. Filwaqt li l-għexur kienu jingħataw sena wara l-oħra, aħna nagħtu dak kollu li għandna lil Ġeħova darba biss—meta niddedikaw lilna nfusna lilu u nissimbolizzaw id-dedikazzjoni tagħna bil-magħmudija fl-ilma. Minn dak iż-żmien ’il quddiem, dak kollu li għandna jsir taʼ Ġeħova. Xorta waħda, hu jħallina nagħżlu porzjon minn dak li għandna—wieħed minn kull għaxra simboliku—biex nużawh fis-servizz tiegħu. Huwa dak li ċ-ċirkustanzi tagħna jippermettu u dak li qalbna tqanqalna biex nużaw. L-offerti li nagħtu lil Ġeħova jinkludu l-ħin, l-enerġija, u r-riżorsi li nużaw fl-ippridkar tas-Saltna u fix-xogħol taʼ li nagħmlu dixxipli. Inkluż maʼ dan hemm ukoll l-attendenza għal-laqgħat Kristjani, iż-żjajjar li nagħmlu lil sħabna fit-twemmin li jkunu morda jew imdaħħlin fiż-żmien, u l-appoġġ finanzjarju li nagħtu lill-qima vera.
3:21 (4:3, NW)—Il-qaddejja taʼ Ġeħova b’liema mod se ‘jisħqu l-ħżiena’? Il-poplu t’Alla fuq l-art mhux se ‘jisħaq il-ħżiena’ b’mod letterali, jiġifieri, billi jieħu sehem f’li jesegwixxi l-ġudizzju Tiegħu fuqhom. Minflok, dan jissuġġerixxi li l-qaddejja taʼ Ġeħova fuq l-art se jagħmlu dan b’mod figurattiv billi b’qalbhom kollha jipparteċipaw fiċ-ċelebrazzjoni tar-rebħa li se tiġi wara t-tmiem tad-dinja taʼ Satana.—Salm 145:20; Rivelazzjoni 20:1-3.
3:22 (4:4, NW)—Għala għandna ‘niftakru fil-Liġi taʼ Mosè’? Il-Kristjani m’għadhomx marbutin b’din il-Liġi, madankollu sservi bħala “dell taʼ l-affarijiet tajbin li għandhom jiġu.” (Ebrej 10:1) Għalhekk, li nagħtu attenzjoni lil-Liġi Mosajka jistaʼ jgħinna naraw kif l-affarijiet miktubin fiha qed jitwettqu. (Luqa 24:44, 45) Iktar minn hekk, il-Liġi fiha “rappreżentazzjonijiet tipiċi taʼ l-affarijiet fis-smewwiet.” Huwa essenzjali li nistudjawha jekk irridu niksbu dehen fit-tagħlim u l-kondotta Kristjana.—Ebrej 9:23.
3:23, 24 (4:5, 6, NW)—Il-“profeta Elija” lil min jirrappreżenta? Kien imbassar li “Elija” kien se jagħmel xogħol taʼ tiġdid, dak li jipprepara qlub in-nies. Fl-ewwel seklu, Ġesù Kristu identifika lil Ġwanni l-Għammied bħala “Elija.” (Mattew 11:12-14; Marku 9:11-13) Dak li jirrappreżentah illum intbagħat “qabel jiġi l-jum il-kbir taʼ Ġeħova, jum li jqanqal il-biżaʼ.” (NW) Illum Elija m’hu ħadd ħlief “l-ilsir leali u għaqli.” (Mattew 24:45) Din il-klassi taʼ Kristjani midlukin b’mod diliġenti qed tagħmel ix-xogħol taʼ tiġdid spiritwali.
Lezzjonijiet Għalina:
3:10. Jekk nonqsu li nagħtu lil Ġeħova l-aħjar tagħna, inkunu qed inċaħħdu lilna nfusna mill-barka tiegħu.
3:14, 15. Minħabba l-eżempju ħażin tal-qassisin, il-Lhud bdew iqisu s-servizz li jingħata lil Alla bħala xi ħaġa insinifikanti. Dawk li għandhom pożizzjoni taʼ responsabbiltà fil-kongregazzjoni Kristjana għandhom ikunu eżemplari.—1 Pietru 5:1-3.
3:16. Ġeħova jżomm isem dawk li jibżgħu minnu u li huma leali lejh fi “ktieb it-tifkiriet.” Hu jiftakarhom u se jsalvahom meta jġib it-tmiem lid-dinja mill-agħar taʼ Satana. Għalhekk, jalla qatt ma niddgħajfu fid-determinazzjoni tagħna li nżommu l-integrità tagħna lejn Alla.—Ġob 27:5, KŻ.
3:19 (4:1, NW). Dakinhar li jagħtu kont lil Ġeħova, kemm il-“fergħa” u kif ukoll l-“għerq” se jkollhom l-istess tmiem—tfal żgħar jirċievu l-istess ġudizzju tal-ġenituri tagħhom. X’responsabbiltà għandhom il-ġenituri lejn uliedhom li huma taħt l-età! Missirijiet u ommijiet Kristjani jridu jaħdmu iebes biex jiksbu l-approvazzjoni t’Alla u jkomplu jkollhom relazzjoni tajba miegħu.—1 Korintin 7:14.
“Ibżaʼ mill-Alla l-Veru”
Min se jiġi salvat fil-“jum il-kbir taʼ Ġeħova, jum li jqanqal il-biżaʼ”? (Malakija 4:5, NW) Ġeħova jgħid: “Għalikom li tibżgħu minn Ismi titlaʼ x-xemx tal-ġustizzja, bis-salvazzjoni fuq ġwenħajha; u intom toħorġu taqbżu qiskom għoġiela tal-mandra.”—Malakija 3:20 (4:2, NW).
“Ix-xemx tal-ġustizzja,” Ġesù Kristu, jiddi fuq dawk li b’mod riverenzjali jibżgħu mill-isem t’Alla u jgawdu l-favur taʼ Ġeħova. (Ġwanni 8:12) Għalihom, hemm ukoll “fejqan fir-raġġi tagħha”—fejqan spiritwali issa u fejqan fiżiku, mentali, u emozzjonali fid-dinja l-ġdida t’Alla. (Rivelazzjoni 22:1, 2) Eċċitati u ferħanin, huma jaġixxu ‘qishom għoġiela tal-mandra.’ B’dawn il-barkiet quddiemna, ejja nagħtu attenzjoni sħiħa għall-parir tas-Sultan Salamun: “[“Ibżaʼ mill-Alla l-veru,” NW] u ħares il-kmandamenti tiegħu, għax f’dan jinġabar il-bniedem kollu.”—Koħèlet 12:13.
[Stampa f’paġna 26]
Il-profeta Malakija, qaddej żeluż u devot t’Alla
[Stampa f’paġna 29]
Dak li ngħallmu għandu jkun fi qbil mal-Bibbja
[Stampa f’paġna 29]
Il-qaddejja taʼ Ġeħova jonoraw il-wegħda taż-żwieġ tagħhom