Il-Ħajja u l-Ministeru taʼ Ġesù
Ma Jirnexxilhomx Jarrestawh
WAQT li l-Festa tat-Tabernakli għadha sejra, il-mexxejja reliġjużi jibagħtu lil xi uffiċjali tal-pulizija biex jarrestaw lil Ġesù. Hu ma jippruvax jistaħba. Ġesù jibqaʼ jgħallem fil-beraħ, billi jgħid: “Nibqaʼ ftit ieħor magħkom qabel ma mmur għand dak li bagħatni. Intom se tfittxuni, imma mhux se ssibuni, u fejn inkun intom ma tistgħux tiġu.”
Il-Lhud ma jifhmux, u għalhekk jibdew jistaqsu bejniethom: “Fejn bi ħsiebu jmur dan ir-raġel, biex aħna mhux se nsibuh? Mhux bi ħsiebu jmur għand il-Lhud imxerrdin fost il-Griegi u jgħallem lill-Griegi, hux hekk? X’ifisser dan il-kliem li qal, ‘Intom se tfittxuni, imma mhux se ssibuni, u fejn inkun jien intom ma tistgħux tiġu’?” Ġesù, naturalment, qiegħed jitkellem dwar il-mewt tieġħu li riesqa u l-irxoxt tieġħu lejn is-sema, fejn I-egħdewwa tiegħu ma jistgħux isegwuh.
Jasal is-sebaʼ u l-aħħar jum tal-festa. Kull għodwa tal-festa, qassis ferraʼ l-ilma, li hu ħa mill-għadira taʼ Siloam, u dan l-ilma gelgel lejn il-bażi tal-artal. X’aktarx biex ifakkar lin-nies dwar din iċ-ċerimonja taʼ kuljum, Ġesù jgħajjat: “Jekk xi ħadd huwa bil-għatx, ħa jiġi għandi u jixrob. Dak li jpoġġi fidi fija, sewwa sew bħalma qalet l-lskrittura, ‘Mill-parti l-iktar ġewwinija tiegħu se jgelglu nixxigħat taʼ ilma ħaj.’”
Fil-fatt, Ġesù qiegħed jitkellem hawn dwar il-konsegwenzi grandjużi taʼ meta l-ispirtu qaddis kellu jiġi msawwab. Is-sena taʼ wara, dan it-tiswib tal-ispirtu qaddis iseħħ nhar Pentekoste. Hemmhekk, nixxigħat taʼ ilma ħaj igelglu meta l-mija u għoxrin dixxiplu jibdew jimministraw għan-nies. Imma sa dak iż-żmien, m’hemm ebda spirtu fis-sens li ebda wieħed mid-dixxipli taʼ Kristu ma hu midluk bl-ispirtu qaddis u msejjaħ għall-ħajja fis-sema.
Bi tweġiba għat-tagħlim taʼ Ġesù, xi wħud jibdew igħidu: “Dan hu ċertament Il-Profeta,” li b’mod ċar jirreferi għall-profeta akbar minn Mosè li kien imwiegħed biex jiġi. Oħrajn igħidu: “Dan hu l-Kristu.” Imma oħrajn jipprotestaw: “Il-Kristu mhux fil-fatt ħiereġ mill-Galilija, hux hekk? Ma qalitx l-Iskrittura li l-Kristu ġej min-nisel taʼ David, u minn Betlehem ir-raħal fejn David kien ikun?”
Mela tiżviluppa firda fost il-folla. Xi wħud iridu li Ġesù jiġi arrestat, imma ħadd ma jpoġġi idu fuqu. Meta l-uffiċjali tal-pulizija jiġu lura mingħajr Ġesù, il-qassisin ewlenin u l-Fariżej jistaqsu: “Għala ma ġibtuhx ġewwa?”
“Qatt ma kien hemm bniedem ieħor li tkellem b’dan il-mod,” iwieġbu l-uffiċjali.
Mimlijin rabja, il-mexxejja reliġjużi jinżlu biex jirredikolaw, jirrappreżentaw ħażin, u jgħajru. Huma jgħidu b’disprezz: “Intom ma ġejtux imqarrqin ukoll, hux? Ebda wieħed mill-ħakkiema jew mill-Fariżej ma poġġa fidi fih, hux? Imma din il-folla li ma tafx il-Liġi huma nies misħutin.”
Għal dan, Nikodemu, Fariżew u ħakkiem tal-Lhud (jiġifieri, membru tas-Sinedriju), jissogra jitkellem għal nom Ġesù. Forsi tiftakar li sentejn u nofs qabel, Nikodemu ġie għand Ġesù bil-lejl u esprima fidi fih. Issa Nikodemu jgħid: “Il-liġi tagħna ma tiġġudikax lil bniedem jekk l-ewwel ma tkunx semgħet mingħandu u saret taf x’inhu jagħmel, hux hekk?”
Il-Fariżej huma rrabjati saħansitra iktar li wieħed minnhom stess qiegħed jiddefendi lil Ġesù. “Int m’intix ukoll mill-Galilija, hux?” huma jirrimarkaw b’mod sarkastiku. “Fittex u ara li ebda profeta m’għandu jiġi mqajjem minn ġol-Galilija.”
Għalkemm l-lskrittura ma tgħidx direttament li profeta kellu joħroġ minn ġol-Galilija, hi tipponta lejn il-Kristu bħala li ġej minn hemm, billi tgħid li “dawl kbir” kellu jidher f’dan ir-reġjun. U kontra xi idejat żbaljati, Ġesù kien imwieled f’Betlehem, u hu kien nisel taʼ David. Waqt li l-Fariżej x’aktarx li dan jafuh, huma probabbli li huma responsabbli għat-tixrid tal-idejat żbaljati li n-nies għandhom dwar Ġesù. Ġwann 7:32-52; Isaija 9:1, 2; Mattew 4:13-17.
◆ X’jiġri kull għodwa tal-festa, u Ġesù kif jistaʼ qed jiġbed l-attenzjoni lejn dan?
◆ L-uffiċjali għala ma jirnexxilhomx jarrestaw lil Ġesù, u l-mexxejja reliġjużi kif iwieġbu?
◆ Min hu Nikodemu, x’inhi l-attitudni tiegħu lejn Ġesù, u kif jiġi ttrattat minn sħabu l-Fariżej?
◆ X’evidenza hemm li l-Kristu kellu joħroġ minn ġol-Galilija?