Tema Żviluppata

KELLIEMA tal-​esperjenza jafu x’valur għandha tema. Meta jkunu qed jippreparaw taħdita, it-​tema tgħinhom jiffokaw l-​attenzjoni fuq aspett iktar speċifiku u jaħsbu iktar fil-​fond dwaru. Ir-​riżultat hu li minflok ma jitkellmu fuq fuq dwar ħafna punti, huma jiżviluppaw il-​materjal tagħhom b’tali mod li hu iktar taʼ benefiċċju għall-​udjenza tagħhom. Meta kull wieħed mill-​punti prinċipali jkun marbut direttament mat-​tema u jgħin biex tiġi żviluppata, l-​udjenza wkoll tiġi megħjuna tiftakar dawk il-​punti u tifhem l-​importanza tagħhom.

Għalkemm jistaʼ jingħad li t-​tema tiegħek hija s-​suġġett li titkellem dwaru, se ssib li l-​kwalità tat-​taħditiet tiegħek se titjieb jekk tħares lejn it-​tema bħala dik li se tagħtik il-​ħarsa partikulari li permezz tagħha se tiżviluppa s-​suġġett tiegħek. Is-​Saltna, il-​Bibbja, u l-​irxoxt huma suġġetti ġenerali. Hemm diversi temi li jistgħu jiġu żviluppati dwar dawn is-​suġġetti. Hawn għandek xi eżempji: “Is-​Saltna, Gvern Reali,” “Is-​Saltna taʼ Alla Se Tagħmel l-​Art Ġenna,” “Il-​Bibbja Hi Mnebbħa Minn Alla,” “Il-​Bibbja Hi Gwida Prattika Għal Żmienna,” “It-​Tama tal-​Irxoxt Tgħinna Nibqgħu Sodi Meta Niffaċċjaw il-​Persekuzzjoni,” u “L-​Irxoxt Jagħti Tama lil Min Tilef lil Xi Ħadd fil-​Mewt.” Dawn it-​temi kollha jeħtieġu li jiġu żviluppati minn angoli differenti għalkollox.

B’konsistenza mat-​tema li tispikka fil-​Bibbja, matul il-​ministeru tiegħu fuq l-​art, Ġesù Kristu fl-​ippritkar enfasizza t-​tema: “Qorbot is-​saltna tas-​smewwiet.” (Mt. 4:17) Kif ġiet żviluppata dik it-​tema? Fl-​erbaʼ Evanġelji ssir referenza għal dik is-​Saltna iktar minn 110 darbiet. Imma Ġesù għamel iktar milli sempliċement uża t-​terminu “Saltna” ripetutament. Kemm b’dak li għallem u kemm bil-​mirakli li wettaq, Ġesù wera ċar li hu, il-​wieħed li kien preżenti, kien Bin Alla, il-​Messija, il-​wieħed li Ġeħova kien se jagħtih is-​Saltna. Ġesù wera wkoll li permezz tiegħu t-​triq kienet qed tinfetaħ għal oħrajn biex ikollhom sehem f’din is-​Saltna. Hu identifika l-​kwalitajiet li jridu jintwerew minn dawk li kienu se jingħataw dan il-​privileġġ. Permezz tat-​tagħlim tiegħu u l-​għemejjel setgħanin li wettaq, hu wera ċar x’kienet se tfisser is-​Saltna taʼ Alla fil-​ħajja tan-​nies u semma li l-​fatt li keċċa d-​demonji permezz tal-​ispirtu taʼ Alla kien evidenza li ‘s-​saltna t’Alla tassew laħqet’ lis-​semmiegħa tiegħu. (Lq. 11:20) Kien rigward din is-​Saltna li Ġesù inkariga lis-​segwaċi tiegħu biex jagħtu xhieda.—Mt. 10:7; 24:14.

Kif Tuża Tema Adattata. Mhuwiex meħtieġ minnek li tiżviluppa tema bl-​istess mod li tiżviluppaha l-​Bibbja, imma huwa daqstant importanti li jkollok tema adattata.

Jekk l-​għażla tat-​tema titħalla f’idejk, l-​ewwel ikkunsidra l-​mira tal-​preżentazzjoni tiegħek. Imbagħad meta tagħżel il-​punti prinċipali li se jifformaw l-​outline tiegħek, kun ċert li dawn tassew jappoġġaw it-​tema li għażilt.

Jekk tingħata t-​tema, eżamina sew dak li turik li hu l-​mod kif għandu jiġi żviluppat il-​materjal tiegħek. Jistaʼ jkun meħtieġ daqsxejn sforz biex tifhem il-​valur u l-​potenzjal taʼ tema bħal din. Jekk se tkun qed tagħżel il-​materjal li bih se tiżviluppa t-​tema li ġejt inkarigat biha, agħżel bir-​reqqa ħalli tibqaʼ tiffoka fuq it-​tema. Mill-​banda l-​oħra, jekk il-​materjal ikun provdut, xorta jkollok bżonn tanalizza kif se tużah fi qbil mat-​tema. Għandek bżonn ukoll tikkunsidra għala l-​materjal hu importanti għall-​udjenza tiegħek u x’għandha tkun il-​mira tiegħek meta tagħti t-​taħdita. Dan se jgħinek tiddeċiedi x’għandek tenfasizza fl-​għoti tat-​taħdita tiegħek.

Kif Tenfasizza t-​Tema. Biex tagħti enfasi xierqa lit-​tema, trid tpoġġi l-​pedament meta tagħżel u torganizza l-​materjal tiegħek. Jekk tuża biss dak li jappoġġa t-​tema tiegħek u ssegwi l-​prinċipji involuti fit-​tħejjija taʼ outline tajjeb, kważi awtomatikament se tenfasizza t-​tema.

Ir-​ripetizzjoni tistaʼ tgħinek issaħħaħ it-​tema. Ejja nieħdu pereżempju kanzunetta taʼ mħabba. Matul il-​kanzunetta, il-​kantant jesprimi t-​tema, jiġifieri, l-​imħabba li jħoss lejn il-​persuna li jammira. Forsi jirripeti din it-​tema b’diversi modi. Jistaʼ juża diversi forom tal-​kelma “mħabba.” Ukoll, għandu mnejn juża kliem sinonimu, metafori, lingwa poetika, jew tixbihat oħrajn. Xorta waħda, il-​kanzunetta tiffoka fuq l-​istess tema. Dan hu l-​mod kif għandek tuża t-​tema taʼ taħdita. Bħall-​ħsieb dwar l-​imħabba li jfiġġ il-​ħin kollu matul il-​kanzunetta tistaʼ tirripeti kliem prinċipali mit-​tema matul it-​taħdita tiegħek. Biex tvarja tistaʼ tuża kliem sinonimu taʼ dan il-​kliem prinċipali jew terġaʼ tgħid it-​tema fi kliem ieħor.

Dawn il-​prinċipji ma japplikawx biss għal taħditiet minn fuq il-​platform imma wkoll għal diskussjonijiet fil-​ministeru tal-​għalqa. Konversazzjoni kemxejn qasira se tibqaʼ iktar f’moħħ l-​individwu jekk it-​tema tkun tispikka. Dak li jkun se jiftakar iktar malajr l-​istruzzjoni li tingħata fi studju tal-​Bibbja jekk tkun ġiet enfasizzata t-​tema. L-​isforz li tagħmel biex tagħżel u tiżviluppa temi adattati se jikkontribwixxi bil-​kbir biex int tkun iktar effettiv bħala kelliemi u għalliem tal-​Kelma taʼ Alla.