Se Tagħti Int Kas it-Twissija t’Alla?

IN-​NIES taʼ spiss jinjoraw twissijiet li jsalvaw il-​ħajja. Il-​biċċa l-​kbira mill-​abitanti taʼ Pompej għażlu li jinjoraw il-​ħsejjes irrabjati tal-​Muntanja Vessuvju. Bl-​istess manjiera, il-​biċċa l-​kbira tan-​nies illum qegħdin jinjoraw it-​twissijiet taʼ katastrofi globali li ġejja. Imma għal dawk li huma lesti li jiffaċċjaw il-​fatti, it-​twissija hija reali daqs il-​leħħiet tas-​sajjetti u n-​nar li ħareġ mill-​Muntanja Vessuvju lura fl-​ewwel seklu. Żewġ gwerer dinjin, mijiet taʼ konflitti iżgħar bl-​armi, ġuħ, terremoti kbar, pesti, mewġa wara l-​oħra taʼ delitti u vjolenza, u kampanja taʼ ppridkar madwar id-​dinja kollha flimkien jikkostitwixxu twissija drammatika li s-​soċjetà umana qiegħda bil-​ħeffa tersaq lejn kriżi katakliżmika.

Il-Bibbja tagħmel din it-​tbassira li tolqtok: “Se jkun hemm tribulazzjoni kbira li bħalha ma seħħitx sa mill-​bidu tad-​dinja s’issa, le, lanqas ma se terġaʼ sseħħ.” (Mattew 24:21) Kif kien fil-​każ tad-​diżastru taʼ Pompej, se jkun hemm min jaħrab​—“folla kbira, li l-​ebda bniedem ma kellu l-​ħila jgħodd, mill-​ġnus u t-​tribujiet u l-​popli u l-​ilsna kollha,” se jsalvaw, jiġifieri, “joħorġu mit-​tribulazzjoni l-​kbira.”—Rivelazzjoni 7:​9, 14.

Il-mistoqsija hi, Meta se tiġi din il-​qerda? Hemm raġuni interessanti ħafna biex wieħed jemmen li t-​tribulazzjoni hija imminenti. Milli jidher b’moħħhom fiż-​żmien, id-dixxipli taʼ Ġesù staqsew: “X’se jkun is-​sinjal tal-​preżenza tiegħek u tal-​konklużjoni tas-​sistema taʼ affarijiet?” (Mattew 24:3) Innota t-​tweġiba li ta Ġesù Kristu.

Gwerra​—Fattur Prominenti tas-​Sinjal Kompost

Ġesù ma bassarx sempliċement ġrajja waħda li tispikka. Minflok, hu tkellem dwar serje taʼ ġrajjiet li, meta teħodhom flimkien, se jikkostitwixxu twissija divina​—sinjal kompost tal-​konklużjoni tas-​sistema taʼ affarijiet. L-​ewwel ġrajja mbassra hija deskritta f’​Mattew 24:7: “Ġens se jqum kontra ġens u saltna kontra saltna.” Fi profezija parallela f’​Rivelazzjoni 6:4, il-​Bibbja bassret li ‘l-​paċi kellha tittieħed lil hinn mill-​art.’ Dan kien ifisser gwerra fuq skala li qatt ma kien hawn bħalha.

L-istorja tgħidilna li din il-​profezija dwar gwerra globali rat it-​twettieq tagħha mis-​sena memorabbli tal-​1914. Il-​ktieb American Adventures igħid rigward is-​snin taʼ qabel l-​1914: “Bosta Amerikani daħlu fis-​seklu l-​ġdid mimlijin bit-​tama. Dawn kienu ‘s-​snin it-​tajbin’ u baqgħu sejrin sa inqas mill-​ewwel għoxrin sena tas-​seklu. . . . Imbagħad, fit-​28 taʼ Lulju, 1914, din il-​burdata ġiet sfrattata b’kelma waħda: gwerra.” Hekk bdiet l-​Ewwel Gwerra Dinjija, li damet mill-​1914 sal-​1918 u kienet imsejħa minn xi wħud bħala “l-​gwerra li ttemm il-​gwerer kollha.” Tmienja u għoxrin pajjiż kienu involuti direttament fiha. U jekk tinkludi l-​artijiet li qdew bħala d-​dipendenti tagħhom, il-​pajjiżi involuti fil-​glied irrappreżentaw kważi 90 fil-​mija tal-​popolazzjoni tad-​dinja f’dak iż-​żmien.

L-Ewwel Gwerra Dinjija rat ukoll l-​użu taʼ strumenti ġodda u verament qattiela tal-​gwerra bħalma huma l-​machine gun, il-​gass velenuż, flame throwers, tankijiet, ajruplani, u sottomarini. Kważi għaxar miljun suldat ġew maqtulin​—iktar mis-​suldati kollha fil-​gwerer kbar kollha li ġew miġġielda matul il-​100 sena taʼ qabel! Madwar 21 miljun ġew feruti. Verament, kienet gwerra globali, li mmarkat l-​1914 bħala l-​bidu taʼ “l-​aħħar jiem.” (2 Timotew 3:1) Madankollu, il-​gwerra kienet biss fattur wieħed tas-​sinjal taʼ Ġesù.

Fatturi Oħra tas-​Sinjal

Ġesù żied: “Se jkun hemm nuqqas taʼ ikel u terremoti f’post wara l-​ieħor. Dawn l-​affarijiet kollha huma bidu taʼ weġgħat taʼ hemm.” (Mattew 24:7, 8) Luqa 21:11 iżid “pesti” maʼ dik il-​lista. Qabel ma spiċċat l-​Ewwel Gwerra Dinjija, l-​epidemija tal-​influwenza Spanjola bdiet tiknes l-​art. Eventwalment, qatlet ’il fuq minn 20 miljun, iktar minn dawk kollha li kienu mietu fil-​gwerra.

Matul il-​gwerra u wara, miljuni taʼ nies oħra mietu bil-​ġuħ. It-​terremoti wkoll ħallew ħafna vittmi. Fl-​1915 ’il fuq minn 30,000 mietu fl-​Italja; fl-​1920 madwar 200,000 għosfru fiċ-​Ċina; fl-​1923 kważi 143,000 mietu fil-​Ġappun. Xorta waħda, kif indika Ġesù, dan kollu kien biss bidu taʼ weġgħat taʼ hemm. Dizzjunarju wieħed jiddefinixxi l-​kelma “weġgħa” bħala “skoss qasir li jinfed bl-​uġigħ.” Din id-​dinja ilha għaddejja minn skoss taʼ wġigħ għall-​ieħor b’intensità u bi frekwenza li dejjem jiżdiedu mill-​1914 ’il hawn. Per eżempju, 21 sena biss wara l-​Ewwel Gwerra Dinjija ġiet it-​tieni gwerra dinjija, li ħasdet 50 miljun vittma u daħħlet lill-​umanità fl-​era nukleari.

Fi snin riċenti ntqal ħafna dwar jerġaʼ kaġun ieħor taʼ hemm: il-​qerda tal-​ambjent mill-​bniedem. Għalkemm Ġesù ma semmiex speċifikament dan fil-​profezija tiegħu, Rivelazzjoni 11:18 jindika li qabel il-​qerda li ġejja, il-​bniedem se jkun qiegħed ‘jirrovina l-​art.’ L-​evidenza li dan ir-​rovinar qed iseħħ hija abbundanti. Ikkwotat fil-​ktieb State of the World 1988, il-​konsulent tal-​ambjent Norman Myers jagħti dan il-​messaġġ li jkexkex: “L-​ebda ġenerazzjoni fl-​imgħoddi ma ffaċċjat il-​prospett taʼ estinzjoni tal-​massa f’ħajjitha. L-​ebda ġenerazzjoni fil-​futur ma se tiffaċċja sfida simili: jekk din il-​ġenerazzjoni preżenti tonqos li ssib soluzzjoni għal dan, tkun saret il-​ħsara u mhux se jkun hemm ‘it-​tieni ċans.’”

Ikkunsidra r-​rapport fil-​ħarġa tas-​17 taʼ Frar, 1992, tar-​rivista Newsweek dwar in-​nuqqas tal-​ozone fl-​atmosfera. Alexandra Allen, speċjalista tal-​Greenpeace dwar l-​ozone, ġiet ikkwotata li wissiet li t-​telf tal-​ozone “issa jammonta għal theddida għall-​futur tal-​ħajja kollha fuq l-​art.”—Ara l-​kaxxa f’din il-​paġna għal iktar evidenza tar-​rovinar ambjentali tal-​art.

Nuqqas taʼ spazju ma jippermettix diskussjoni dettaljata tal-​aspetti kollha tal-​profezija taʼ Ġesù. (Ara t-​tabella f’paġna 5 għal ħarsa fuq fuq taʼ fatturi profetiċi oħrajn.) Fattur wieħed li ma jistax jiġi injorat, iżda, huwa deskritt f’​Mattew 24:14: “Din l-​aħbar tajba tas-​saltna se tkun ippridkata fl-​art abitata kollha għal xiehda lill-​ġnus kollha; u mbagħad se jiġi t-​tmiem.” Hemm ftit li xejn dubju dwar min qiegħed jagħmel dan ix-​xogħol globali taʼ ppridkar. Ix-​Xhieda taʼ Jehovah f’229 art qattgħu ’l fuq minn biljun siegħa f’dan ix-​xogħol fis-​sena 1992 biss. Ix-​xogħol tagħhom jikkostitwixxi wieħed mill-​iktar provi viżibbli li aħna qegħdin ingħixu fl-​aħħar jiem.

Tkunx Imqarraq!

Xi wħud jistgħu jargumentaw, iżda, li dan il-​paroli kollu dwar “l-​aħħar jiem” huwa sempliċement pessimiżmu. ‘Xi ngħidu dwar it-​tmiem tal-​Komuniżmu fl-​Ewropa tal-​Lvant?’ huma jistaqsu, ‘jew l-​isforzi tas-​superpotenzi biex iġibu l-​paċi? M’hijiex din evidenza li l-​affarijiet sejrin għall-​aħjar?’ Le. Innota li Ġesù ma qalx li d-​dinja kollha se tkun kontinwament involuta fi gwerer, terremoti, u ġuħ matul l-​aħħar jiem. Sabiex l-​aħbar tajba tiġi mxandra mad-​dinja kollha, irid ikun hemm minn tal-​inqas xi perijodi taʼ kalma relattiva.

Ftakar, ukoll, li Ġesù qabbel l-​aħħar jiem mal-​jiem taʼ qabel id-​dulluvju taʼ żmien Noè. F’dak iż-​żmien in-​nies kienu preokkupati b’li jieklu, jixorbu, u jiżżewġu​—l-​attivitajiet normali tal-​ħajja. (Mattew 24:37-39) Dan kien jindika li waqt li l-​kundizzjonijiet matul l-​aħħar jiem kienu se jkunu taʼ hemm, l-​affarijiet ma kinux se jaslu sal-​punt fejn l-​affarijiet normali tal-​ħajja kienu se jkunu impossibbli. Bħal fi żmien Noè, l-​maġġoranza vasta tal-​umanità tant huma preokkupati bl-​affarijiet taʼ kuljum li ma jagħtux kas tas-​serjetà taż-​żminijiet.

Għalhekk, ikun perikoluż li taqaʼ f’indifferenza minħabba xi żviluppi politiċi li jidhru favorevoli. (Qabbel 1 Tessalonkin 5:3.) L-​evidenza tidher ċara li l-​profezija taʼ Ġesù qiegħda tiġi mwettqa issa​—twissija li l-​qerda qiegħda qrib!

Ir-​Riżultati Glorjużi

Il-​qerda taʼ Pompej ġabet mewt u miżerja. Madankollu, it-​tmiem taʼ din is-​sistema preżenti se jiftaħ it-​triq għall-​ħajja taʼ dejjem fuq art ġenna mill-​isbaħ. (Rivelazzjoni 21:​3, 4) Il-​gvernijiet umani li joħolqu firdiet ma jimlewx iktar lill-​art bil-​gwerer. Il-​bniedem qatt iktar ma se jitriegħed bil-​biżaʼ għat-​theddida taʼ olokawst nukleari. Dawk il-​fabbriki li jarmu kimiċi tossiċi fl-​ambjent se jkunu spiċċaw.—Danjel 2:44.

F’dak iż-​żmien kulmin ikun ħaj ikun wieħed li jħobb it-​tjieba u ħabib sinċier, kompletament ubbidjenti lejn il-​ħakma tas-​Saltna. (Salm 37:​10, 11) L-​isptarijiet, il-​funerali, u ċ-​ċimiterji se jkunu affarijiet tal-imgħoddi. Id-​divorzju, is-​separazzjoni, id-​dipressjoni, u l-​abbuż fuq it-​tfal ukoll m’humiex se jibqgħu jeżistu.​—Isaija 25:8; 65:17.

Trid int issalva f’dawn l-​aħħar jiem u tibqaʼ ħaj biex tara d-​dinja ġdida u glorjuża t’Alla? Allura ‘ibqaʼ mqajjem, għax ma tafx meta ż-​żmien maħtur hu.’ (Mark 13:33) Minkejja dan, il-​ġrajjiet dinjin jagħmluha evidenti li ż-​żmien maħtur huwa qrib​—qrib b’mod perikoluż għal ħafna. M’hemmx ħin x’titlef. Mela, ħu azzjoni li ssalva l-​ħajja, u fittex lil dawk li qegħdin jagħtu kas is-​sinjal globali tal-​aħħar jiem. Dawn tistaʼ tagħrafhom malajr, għax huma biss qegħdin jobdu l-​kmand taʼ Ġesù biex jippridkaw l-​aħbar tajba tas-​Saltna mad-​dinja kollha. Flimkien maʼ wħud bħal dawn, jalla tieħu l-​passi biex tingħaqad mas-​Sultan, Kristu Ġesù, li dwaru jingħad: “F’ismu ġnus se jittamaw.”—Mattew 12:18, 21.

[Kaxxa f’paġna 5]

Erbgħa u Għoxrin Karatteristika tas-Sinjal

1. Gwerer li qatt ma kien hawn bħalhom​—Mattew 24:​6, 7; Rivelazzjoni 6:4

2. Terremoti​—Mattew 24:7; Mark 13:8

3. Nuqqas taʼ ikel​—Mattew 24:7; Mark 13:8

4. Pesti​—Luqa 21:11; Rivelazzjoni 6:8

5. Żjieda fil-​ksur tal-​liġi​—Mattew 24:12

6. Irrovinar tal-​art​—Rivelazzjoni 11:18

7. L-​imħabba tibred​—Mattew 24:12

8. Dehriet tal-​biżaʼ​—Luqa 21:11

9. Imħabba esaġerata tal-​flus​—2 Timotew 3:2

10. Diżubbidjenza lejn il-​ġenituri​—2 Timotew 3:2

11. Iħobbu l-​pjaċiri iktar milli lil Alla​—2 Timotew 3:4

12. L-​imħabba tagħna nfusna tiddomina​—2 Timotew 3:2

13. Nuqqas inġenerali taʼ affezzjoni naturali​—2 Timotew 3:3

14. Nies li m’humiex lesti li jiftiehmu​—2 Timotew 3:3

15. Kontroll fuqhom infushom nieqes f’kull livell tas-​soċjetà​ —2 Timotew 3:3

16. Nuqqas taʼ mħabba lejn it-​tjubija mifrux maʼ kullimkien​—2 Timotew 3:3

17. Ħafna b’ipokrezija jsostnu li huma Kristjani​—2 Timotew 3:5

18. Ikel u xorb eċċessiv minn xi wħud​—Luqa 21:34

19. Dawk li jwaqqgħu għaċ-​ċajt jirrifjutaw is-​sinjal​—2 Pietru 3:3, 4

20. Ħafna profeti foloz huma attivi​—Mattew 24:5, 11; Mark 13:6

21. L-​ippridkar tal-​aħbar tajba tas-​Saltna stabbilita t’Alla​—Mattew 24:14; Mark 13:10

22. Persekuzzjoni tal-​Kristjani veri​—Mattew 24:9; Luqa 21:12

23. L-​għajta taʼ paċi u sigurtà bħala quċċata tal-​aħħar jiem​—1 Tessalonkin 5:3

24. In-​nies ma jagħtux kas tal-​periklu​—Mattew 24:39

[Kaxxa f’paġna 6]

Problemi Ambjentali—Sinjal taż-​Żminijiet

◻ L-​għata protettiva tal-​ozone f’latitudnijiet li huma popolati ħafna tal-​Emisferu tat-​Tramuntana qed tirqaq bil-​ħeffa d-​doppju taʼ li ħasbu x-​xjenzati ftit taʼ snin ilu biss.

◻ Minimu taʼ 140 speċi taʼ pjanti u annimali qed jiġu estinti kull jum.

◻ Livelli atmosferiċi taʼ carbon dioxide li jżomm is-​sħana huma issa 26 fil-​mija ogħla mill-​konċentrazzjoni pre-industrijali, u jkomplu jogħlew.

◻ Wiċċ l-​art kien iktar sħun fl-​1990 milli qatt kien mindu bdew jinżammu bil-​miktub it-​temperaturi fin-​nofs tas-​seklu 19; sitta mis-​sebaʼ snin l-​iktar sħan iddokumentati seħħew mill-​1980 ’il hawn.

◻ Il-​foresti qegħdin igħibu b’rata taʼ xi 10,000,000 tomna kull sena, medda taʼ madwar nofs il-​Finlandja.

◻ Il-​popolazzjoni tad-​dinja qiegħda tikber bi 92 miljun persuna fis-​sena​—bejn wieħed u ieħor daqs li kieku nżidu Messiku ieħor kull sena; minn dan it-​total, 88 miljun qed jiżdiedu f’pajjiżi li qegħdin jiżżviluppaw.

◻ Madwar 1.2 biljun ruħ huma neqsin mill-​ilma li huwa tajjeb għax-​xorb.

[Stampa f’paġna 7]

Wara l-​qerda se tiġi d-​dinja l-​ġdida glorjuża t’Alla