‘Henjin Huma Dawk li Ssaportew’

1. Mill-​1914 ’il hawn, liema sitwazzjoni fuq l-​art wettqet Mattew 24:3-8, u liema stqarrijiet rigward il-​Lega tal-​Ġnus u l-​Ġnus Magħquda fallew?

FIL-​KTIEB tiegħu The Present Age, Robert Nisbet jitkellem dwar “il-​Gwerra tal-​Ħamsa u Sebgħin Sena li kompliet tistaʼ tgħid bla waqfien mill-​1914.” Iva, ‘gwerer u rapporti taʼ gwerer,’ inklużi gwerer dinjin—dak hu li ħabbar Ġesù Kristu għal dan iż-​żmien tat-​tmiem. (Mattew 24:3-8) Il-​Lega tan-​Nazzjonijiet inħolqot fl-​1920 “biex tippreveni l-​gwerra għal dejjem.” Kemm falliet b’mod miżerabbli! Il-​Ġnus Magħquda ġiet organizzata fl-​1945 “biex issalva ġenerazzjonijiet li għad iridu jiġu mill-​flaġell tal-​gwerra.” Iżda l-​ktieb taʼ Max Harrelson Fires All Around the Horizon jirrakkonta: “Bil-​kemm kien hemm jum wieħed minn mindu ntemmet it-​Tieni Gwerra Dinjija meta ma kienx hemm xi ġlied x’imkien.”

2. Xi nies x’jistaqsu rigward il-​kundizzjonijiet tad-​dinja, iżda x’mistoqsijiet għandna nistaqsu?

² It-​terroriżmu u l-​vjolenza, il-​korruzzjoni u l-​faqar, drogi u pestilenzi—dawn kollha jżidu mal-​istampa tal-​biki. Xi nies jistgħu jistaqsu: ‘L-​umanità kif tistaʼ tkompli tissaporti dawn il-​kundizzjonijiet taʼ nkwiet?’ Iktar importanti, iżda, għandna nistaqsu: ‘Alla kif qed jissaporti l-​ħerba tal-​ħolqien tiegħu fuq l-​art? Kemm se jdum iktar iħalli lil irġiel mill-​agħar jirrovinaw l-​art u jitfgħu tmaqdir fuq l-​isem prezzjuż tiegħu?’

3. (a) X’mistoqsija staqsa l-​profeta Isaija, u għala? (b) Xi tweġiba ta Jehovah, u dan x’jindika għal żmienna?

³ Il-​profeta Isaija qajjem mistoqsija simili. Hu ġie mqabbad jiddikjara lin-​nies taʼ pajjiżu messaġġ mingħand Jehovah. Iżda hu ġie mwissi bil-​quddiem li huma ma kinux se jagħtu kas la tiegħu u lanqas taʼ Dak Alla li bagħtu. Għalhekk Isaija staqsa: “Kemm żmien, O Jehovah?” Iva, kemm kien se jdum jippriedka Isaija lil dan il-​poplu rasu iebsa, u kemm kien se jdum Jehovah jissaportihom b’mod inġurjuż jirrifjutaw li jagħtu kas tal-​messaġġ tiegħu? Jehovah wieġeb: “Sakemm l-​ibliet attwalment jitfarrku f’rovini, biex ikunu mingħajr abitant, u d-​djar ikunu mingħajr bniedem, u l-​art infisha tkun irvinata f’ħerba.” (Isaija 6:8-11) Bl-​istess mod illum, Alla jissaporti tmaqdir bħal dan saż-​żmien maħtur tiegħu biex jesegwixxi ġudizzju fuq dinja li fiha l-​ħati ewlieni kien il-​Kristjaneżmu mhux lejali.

4. X’kien ir-​riżultat tas-​sabar taʼ Ġob, u x’garanzija jagħtina dan illum?

⁴ Jehovah ilu jissaporti l-​isfidi taʼ stmerrija taʼ Satana. Xi 3,600 sena ilu, il-​lejali Ġob ukoll issaporta, billi wieġeb għall-​isfida taʼ Satana li hu ma setax iżomm l-​integrità taħt prova. Kemm ferraħ qalb Jehovah dan! (Ġob 2:6-10; 27:5; Proverbji 27:11) Bħalma stqarr iktar tard Ġakbu, ħu Ġesù mill-​omm: “Ħares! Aħna nippronunzjaw henjin lil dawk li ssaportew. Intom smajtu bis-​sabar taʼ Ġob u rajtu t-​tmiem li tah Jehovah, illi Jehovah hu teneru ferm fl-​affezzjoni u ħanin.” Bl-​istess mod, dawk li jissaportu maʼ Jehovah illum huma aċċertati minn riżultat hieni.—Ġakbu 5:11.

5. Ġesù kif wera li kien meħtieġ is-​sabar mill-​poplu t’Alla llum, u waqt li jagħmlu liema xogħol se jkollhom bżonn tas-​sabar?

⁵ Ġesù wera ċar li kien se jkun meħtieġ is-​sabar mill-​poplu t’Alla fi żmienna. Meta bassar is-​sinjal “tal-​konklużjoni tas-​sistema taʼ affarijiet,” hu qal: “Dak li jissaporti sat-​tmiem hu dak li se jsalva.” Tissaporti f’liema ħaġa? Il-​kliem taʼ Ġesù li jiġi preċiż wara jwieġeb: “U din l-​aħbar tajba tas-​saltna se tkun ippridkata mal-​art abitata kollha bħala xiehda lill-​ġnus kollha.” (Mattew 24:3, 13, 14) Imbagħad biss ‘se jiġi t-​tmiem.’—Ara wkoll Mark 13:10, 13; Luqa 21:17-19.

Għala Jehovah Jissaporti

6. Jehovah għala huwa eżempju li jispikka tas-​sabar, u x’inhi raġuni waħda għala ssaporta hekk?

⁶ L-​appostlu Pawlu jispjega li “Alla, għalkemm għandu r-​rieda li juri l-​korla tiegħu u li jagħmel il-​qawwa tiegħu magħrufa, ittollera b’ħafna sabar fit-​tul lil reċipjenti tal-​korla li jixirqilhom il-​qerda.” (Rumani 9:22) Jehovah għala ssaporta l-​eżistenza kontinwa tal-​ħżiena, dawn ir-​reċipjenti tal-​korla? Raġuni waħda hi din: biex juri li ħakma umana, indipendenti mill-​Ħallieq tal-​bniedem, hija ddestinata li tfalli. (Ġeremija 10:23) Dalwaqt, is-​sovranità t’Alla se tiġi vvindikata hekk kif hu jagħti prova li hu biss jistaʼ jġib il-​paċi, armonija, u kuntentizza lill-​familja umana, permezz tal-​ħakma tas-​Saltna taʼ Ġesù.—Salm 37:9-11; 45:1, 6, 7.

7. Għal liema raġuni oħra ssaporta Jehovah u liema benefiċċju ġab dan għal miljuni taʼ nies mill-​1930 ’il hawn?

⁷ Iktar minn hekk, Jehovah issaporta “sabiex jagħmel magħrufin ir-​rikkezzi tal-​glorja tiegħu fuq reċipjenti tal-​ħniena.” (Rumani 9:23) Dawn ir-​reċipjenti tal-​ħniena huma wħud midlukin li żammew l-​integrità li huma “mixtrijin minn fost il-​bnedmin” biex jirrenjaw maʼ Ġesù Kristu fis-​Saltna tiegħu tas-​sema. L-​issiġillar tal-​144,000 kompla minn żmien l-​appostli. Issa qed joqrob lejn it-​tmiem. (Rivelazzjoni 7:3. 14:1, 4) U ħares! Mill-​1930 ’il hawn is-​sabar kontinwu taʼ Jehovah ippermetta l-​ġbir taʼ miljuni taʼ oħrajn, “folla kbira . . . mill-​ġnus kollha,” li jifirħu fil-​prospett li jinħelsu fit-​tribulazzjoni finali biex jirtu ħajja taʼ dejjem f’ġenna tal-​art. (Rivelazzjoni 7:4, 9, 10, 13-17) Int wieħed minn dik il-​folla kbira? Jekk iva, m’intix ferħan li Jehovah issaporta l-​preżenza taʼ reċipjenti tal-​korla sa issa? Madankollu, int trid tkompli tissaporti, bħalma ssaporta Jehovah.

Is-​Sabar Ippremjat

8. Għala lkoll kemm aħna għandna bżonn nissaportu, u liema eżempju taʼ sabar għandna nikkonsidraw mill-​qrib?

⁸ Ilkoll kemm aħna għandna bżonn nissaportu jekk irridu nirċievu l-​wegħdiet. Wara li stqarr din il-​verità bażika f’Ebrej 10:36, l-​appostlu Pawlu jiddeskrivi fid-​dettal il-​fidi taʼ kwalità eċċellenti u s-​sabar taʼ “sħaba [kbira] taʼ xhieda” taż-​żminijiet tal-​qedem. Imbagħad hu jammonina biex “niġru bis-​sabar it-​tiġrija li hi mqiegħda quddiemna, hekk kif aħna nħarsu fissi lejn l-​Aġent Ewlieni u Dak li Jipperfezzjona l-​fidi tagħna, Ġesù. Għall-​ferħ li tqiegħed quddiemu,” Ġesù ssaporta f’servizz b’qalbu kollha, billi qatt ma neħħa minn quddiem għajnejh il-​premju. Kemm isaħħaħna l-​eżempju tiegħu biex aħna wkoll nissaportu!—Ebrej 12:1, 2.

9. X’irriżulta minn eżempji taʼ sabar taż-​żmien modern?

⁹ Eżempji taʼ sabar taż-​żmien modern ukoll huma kotrana. Int forsi taf, jew kont taf, lil xi aħwa rġiel u nisa li kienu jispikkaw minħabba s-​sabar tagħhom. Kemm tqanqalna l-​fedeltà tagħhom! U kull sena, hekk kif ix-​Xhieda taʼ Jehovah jirrapportaw l-​attività dinjija tagħhom lill-​Watch Tower Society jaslu iktar rakkonti eċċitanti taʼ sabar u taʼ żamma taʼ integrità. Dawn jenfasizzaw ix-​xogħol grandjuż li twettaq matul l-​1989 hekk kif dawn ix-​Xhieda ‘żiedu mal-​fidi tagħhom is-​sabar.’—2 Pietru 1:5, 6.

L-​Iktar Sena Grandjuża Tagħna

10. (a) Kemm artijiet u gruppi taʼ gżejjer ħadu sehem fl-​ippridkar tal-​aħbar tajba tas-​Saltna fl-​1989, u kemm ħadu sehem f’dan ix-​xogħol? (b) Kemm pijunieri rrapportaw fl-​ogħla xahar, u x’kien il-​għadd totali taʼ sigħat imqattgħin fis-​servizz tal-​għalqa?

¹⁰ Ir-​rapport tas-​servizz tal-​1989 juri li 212 artijiet u gruppi taʼ gżejjer ħadu sehem f’li jippridkaw is-​Saltna li ġejja taʼ Jehovah. Għażiż qarrej tat-​Torri tal-​Għassa, kont int ipprivileġġat bħala wieħed mit-​3,787,188 li ħadu sehem f’dan ix-​xogħol grandjuż? Kont int wieħed mit-​808,184 li rrapportaw bħala pijunieri fix-​xahar l-​iktar għoli għal dak is-​servizz? Kulma kkontribwejt lejn il-​għadd totali globali tal-​1989 taʼ 835,426,538 sigħat mqattgħin fis-​servizz tal-​għalqa, għandek għalfejn tkun hieni.—Salm 104:33, 34; Filippin 4:4.

11. (a) Liema attendenza għall-​Mafkar tat-​22 taʼ Marzu 1989 hija kawża għall-​ferħ, u għala? (b) Kemm ġew imgħammdin?

¹¹ Ifraħ, ukoll, f’dak it-​total splendidu taʼ 9,479,O64 li attendew, fit-​22 taʼ Marzu tas-​sena l-​oħra, għaċ-​ċelebrazzjoni tal-​Mafkar tal-​mewt taʼ Ġesù! Dan jindika potenzjal taʼ 5,691,876 xandara oħra tas-​Saltna, jekk dawn l-​uħud bħal ngħaġ li għandhom interess jistgħu b’imħabba jiġu kondotti għal ġol-​maqjel tan-​ngħaġ, biex ikollhom sehem regulari f’li jaqdu lil Jehovah. Nistgħu ngħinuhom f’dan? (Ġwann l0:16; Rivelazzjoni 7: 9, 15) Ħafna diġà qed iwieġbu, kif indikat mit-​total grandjuż taʼ 263,855 Xhieda ġodda mgħammdin matul is-​sena taʼ servizz 1989.

12. Liema huma xi fatturi (a) rigward il-​fabbriki tal-​Watch Tower Society? (b) rigward tqassim taʼ rivisti u abbonamenti?

¹² Il-​għatx għall-​pubblikazzjonijiet—Bibbji, kotba, “brochures,” rivisti—kien bla tmiem. Per eżempju, il-​fabbriki tal-​Watchtower fi New York użaw xi 15,000 tunnellati taʼ karta fl-​istampar taʼ 35,811,000 Bibbji u kotba, żjieda taʼ l01 fil-​mija fuq l-​1988. Fabbriki kbar oħra tal-​Watch Tower Society , b’mod notevoli fil-​Ġermanja, l-​Italja, u l-​Ġappun, ħadmu sigħat żejda, biex jappoġġaw lill-​“irsir fidil u għaqli” f’li jqassam “l-​ikel [spiritwali] fiż-​żmien xieraq.” (Mattew 24:46) Matul April u Mejju, tqassim mill-​abjar b’mod eċċezzjonali taʼ rivisti u abbonamenti ġie rrapportat f’għadd taʼ pajjiżi, b’enfasi speċjali fuq id-​distribuzzjoni tal-​ħarġiet tat-​Torri tal-​Għassa dwar “Babilonja l-​Kbira.” (Rivelazzjoni 17:5) Bla dubju, f’dan ix-​xahar taʼ April, pijunieri awżiljarji u Xhieda oħra se joħorgu fi qtajja fil-​għalqa tad-​dinja f’dik li se terġaʼ tkun l-​ifjen kampanja tagħna taʼ għoti taʼ xiehda għas-​sena taʼ servizz 1990.—Qabbel Isaija 40:31; Rumani 12:11, 12.

13. X’ġara dan l-​aħħar fl-​Ungerija u fil-​Polonja?

¹³ Ix-​xogħol tagħna fl-​Ungerija u fil-​Polonja ġie legalizzat dan l-​aħħar. Aħna grati lejn l-​awtoritajiet f’dawn l-​artijiet li huma issa juru din il-​konsiderazzjoni għax-​Xhieda taʼ Jehovah. F’dan ir-​rigward, it-​talb tal-​fratellanza dinjija ġie mismugħ, “sabiex aħna nistgħu nibqgħu ngħaddu ħajja ħiemda u kwieta bid-​devozzjoni sħiħa lejn Alla u bis-​serjetà.”−1 Timotew 2:1, 2.

14. Semmi xi punti memorabbli mill-​konvenzjonijiet Distrettwali “Devozzjoni lejn Alla” fil-​Polonja.

¹⁴ “Devozzjoni lejn Alla”! Iva, il-​konvenzjonijiet Distrettwali “Devozzjoni lejn Alla” setgħu jinżammu saħansitra fil-​Polonja, fi tliet postijiet, matul Awissu! Kemm laqgħuna b’mod meraviljuż il-​91,024 ħutna Pollakki! (Ebrej 13:1, 2, 16) Qisu b’xi miraklu, għaxriet taʼ eluf taʼ aħwa—Ċekoslovakki, Ġermaniżi, Russi, u oħrajn—akkwistaw il-​viża biex imorru bix-​xarabank, bil-​ferrovija, u saħansitra bil-​mixi. Eluf oħra ġew bl-​ajru mill-​Amerka, l-​Ewropa tal-​Punent, u minn pajjiżi tant ’il bogħod bħall-​gżejjer tal-​Paċifiku u l-​Ġappun. L-​istadji enormi, li nġabu xummiema minn ħutna, bil-​kemm kienu biżżejjed biex jakkomodaw 65,710 f’Chorzów, 40,442 f’Poznan, u 60,366 ġewwa Varsavja—attendenza grandjuża totali taʼ 166,518! F’kull ċentru l-​ispettaklu tal-​magħmudija qanqal dmugħ taʼ emozzjoni taʼ ferħ. F’Poznan, kandidat taʼ 9 snin u ieħor taʼ 90 sena ġew imgħammdin, u t-​total taʼ 6,093 imgħammdin fit-​tliet konvenzjonijiet kien jinkludi ħafna “teenagers”, li ħafna minnhom minn pajjiżi fejn intqal li r-​reliġjon se tmut max-​xjuħ. Mhux hekk il-​vera reliġjon ibbażata fuq il-​Kelma t’Alla! (Qabbel Salmi 148:12, 13; Atti 2:41; 4:4.) Kemm ġie ppremjat b’mod tal-​għaġeb is-​sabar taʼ ħutna fl-​Ewropa tal-​Lvant!

Fedeltà Kontinwa Taħt Prova

15. Ix-​Xhieda fil-​Libanu kif urew sabar u sodizza, u b’liema riżultati mill-​aħjar?

¹⁵ Bħall-​appostlu Pawlu, ix-​Xhieda taʼ Jehovah huma mistennija li juru s-​sabar taħt ħafna ċirkustanzi varjati. (2 Korintin 11:24-27) Fil-​Libanu l-​gwerra ċivili għaddejja bla waqfien. Ħutna kif qed jirreaġixxu? B’sodizza u determinazzjoni. Is-​sena 1989 rat ħafna sparar u bombardjar, iżda saħansitra fejn dawn kienu l-​iktar qawwija, l-​aħwa kienu determinati li ma jnaqqsux fix-​xogħol. Kongregazzjoni f’Bejrut tirrapporta: “Gruppi regulari għas-​servizz tal-​għalqa ġew organizzati f’kull lejla tal-​ġimgħa. Minkejja kundizzjonijiet diffiċli taʼ sigurtà, l-​aħwa ma ġewx skuraġġiti. Aħna lħaqna iżjed territorju minn qatt qabel. F’April kellna quċċata fil-​għadd taʼ pijunieri. Inbdew studji tal-​Bibbja ġodda, u iżjed rivisti u kotba tqassmu.”

16. Ħutna fil-​Kolumbja kif urew sabar billi ħadu l-​aħbar tajba fi bliet fejn ma kienx hemm Xhieda?

¹⁶ Il-​Kolumbja kienet fl-​aħbarijiet minħabba t-​traffikar tad-​drogi u l-​vjolenza. Iżda s-​sabar lejali taʼ Kristjani hemm ukoll huwa aħbar. Dan l-​aħħar, pijunieri speċjali temporanji ntbagħtu f’31 bliet taʼ għaxart elef jew iktar abitanti fejn ma kien hemm ebda Xhieda. F’belt minnhom, meta persuni li bdew jieħdu nteress indunaw li l-​pijunieri kienu se jdumu hemm biss għal ftit xhur, huma talbu lill-​pijunieri biex jibqgħu hemm. F’oħra, 18-il persuna li wrew interess iffirmaw ittra taʼ apprezzament għall-​għajnuna spiritwali mogħtija matul iż-​żjara taʼ tliet xhur tal-​pijunieri u talbu għal iktar għajnuna. “Dan hu xogħol serju,” qalu. M’hemmx għalfejn ngħidu, fiż-​żewġ każi saru arranġamenti biex jibqaʼ jiġi kkultivat l-​interess. Li tiżviluppa dan it-​territorju ’l bogħod jitlob sabar, iżda x-​xogħol iebes tal-​pijunieri li jagħmlu dan jiġi mbierek bil-​kotra.

17, 18. (a) Taħt liema ċirkustanzi ssaportew ix-​Xhieda taʼ Jehovah fl-​Italja? (b) Ix-​Xhieda kif marru minkejja t-​tixrid taʼ gideb dwarhom?

¹⁷ Fl-​Italja, ix-​Xhieda taʼ Jehovah jiffaċċjaw oppożizzjoni qawwija mill-​kleru, iżda bis-​saħħa taʼ Jehovah huma ssaportew. F’diversi parroċċi, il-​kleru qassmu “stickers” biex jitwaħħlu mal-​bibien tad-​djar tan-​nies tal-​parroċċa tagħhom li jgħidu lix-​Xhieda taʼ Jehovah biex ma jċemplux il-​qanpiena tal-​bieb. Ħafna qassisin qabbdu lil xi tfal subien biex iwaħħlu dawn l-​“stickers” mal-​bibien kollha taʼ post partikulari—saħansitra fid-​djar tal-​familji tax-​Xhieda! Ix-​Xhieda, madankollu, ma jiġux skuraġġiti faċilment, u taʼ spiss jużaw l-​“istickers” biex jibdew konverżazzjoni. Iktar minn hekk l-​istampa u t-​televiżjoni nazzjonali taw importanza kbira lil din il-​kwistjoni, billi kkundannaw l-​intolleranza reliġjuża murija u billi enfasizzaw li tattiċi bħal dawn huma verament sinjal taʼ djufija min-​naħa tal-​knisja. Wieħed professur tal-​università tant ġie offiż bil-​kontroversja tal-​“istickers” kontra x-​Xhieda li hu abbona fil-​Watchtower u l-​Awake!

¹⁸ Il-​Knisja Kattolika fl-​Italja saħansitra tuża l-​apostati biex jifirxu gideb dwar il-​poplu t’Alla, iżda dan ma jirnexxix lanqas għaliex il-​172,382 pubblikaturi huma magħrufin ħafna u rrispettati. Wieħed raġel qal lil xi Xhieda li żaruh li hu kien qara affarijiet ħżiena dwarna f’letteratura miktuba minn ex-Xhieda. Hu kien jopponi ħafna, għalhekk, meta ħuh sar wieħed mix-​Xhieda taʼ Jehovah. Wara ftit, iżda, hu nnota x’effett tajjeb kellha fuq ħuh il-​bidla fir-​reliġjon li hu kien għamel. Hu ħaseb: ‘Kif jistaʼ jkun li xi ħaġa tant ħażina tipproduċi riżultati hekk tajbin?’ Għaldaqstant, hu talab għal studju tal-​Bibbja max-​Xhieda li ġew iżuruh.—Qabbel Kolossin 3:8-10.

Negħlbu l-​Indifferenza

19, 20. (a) X’sitwazzjoni rrikjediet is-​sabar min-​naħa taʼ Xhieda fil-​Finlandja, u x’inhu verament sinjifikanti rigward stħarriġ mill-​knisja? (b) Liema esperjenza turi l-​importanza tas-​sabar f’li nippridkaw l-​aħbar tajba?

¹⁹ F’pajjiżi fejn ix-​Xhieda jżuru n-​nies taʼ sikwit, hemm taʼ spiss indifferenza mifruxa għall-​aħbar tajba. Dan hu ċertament il-​każ fil-​Finlandja. Il-​knisja f’dak il-​pajjiż ik-konduċiet stħarriġ u sabet li 70 fil-​mija tal-​popolazzjoni ma jiħdux gost bix-​Xhieda jżuruhom. Madankollu, 30 fil-​mija ma joġġezzjonawx bil-​qawwa, u minn dawn, 4 fil-​mija qalu li huma fil-​fatt jogħġbuhom ix-​Xhieda taʼ Jehovah. Din hi figura sinjifikanti. Erbgħa fil-​mija tal-​popolazzjoni tal-​Finlandja tirrappreżenta 200,000 ruħ. Qabbel dak mal-​figura tal-​pubblikaturi fil-​preżent taʼ 17,303!

²⁰ Wieħed pubblikatur li kien fis-​servizz kellu l-​attenzjoni tiegħu miġbuda lejn dan l-​istħarriġ u ġie mistoqsi: “Ma tafx li 70 fil-​mija minna nqisukom bħala mhux mixtieqa? Għala tibqgħu tiġu wara l-​bibien tagħna?” Il-​pubblikatur wieġeb: “Iva, iżda dak l-​istess studju wera li 4 fil-​mija minnkom għandhom grazzja magħna. Aħna qed nippruvaw insibu lil dawk in-​nies. Anki li kieku kienu biss 1 fil-​mija, aħna xorta waħda konna mmorru minn dar għal dar nippruvaw infittxuhom.” Ir-​raġel ħasibha ftit u qal: “Huwa l-​messaġġ tagħkom daqshekk importanti għalihom?” Il-​pubblikatur wieġeb billi staqsa: “Tixtieq tisimgħu?” Ma damx ir-​raġel ma beda juri nteress fl-​aħbar tajba.

X’Għandu Maħżun il-​Futur

21. (a) Liema xorta taʼ ġlieda rridu niġġieldu f’din is-​sistema, u għala? (b) X’nistgħu forsi jkollna nissaportu, u minn xiex tiżgurana l-​profezija taʼ Ħabakkuk?

²¹ Xi ngħidu għalina Ikoll illum? Determinati aħna li nissaportu maʼ Jehovah u Kristu Ġesù dritt sat-​tmiem? Jistaʼ m’għadx baqaʼ wisq, iżda aħna rridu nissaportu! Fis-​sistema taʼ Satana, aħna rridu niġġieldu ġlieda iebsa għall-​fidi, hekk kif l-​immoralità, il-​korruzzjoni, u l-​mibgħeda tad-​dinja jdawruna fuq kull naħa. (Ġuda 3, 20, 21) Forsi jkollna nissaportu xi persekuzzjoni taʼ xi għamla jew oħra. Saħansitra issa eluf minn ħutna qed isofru f’ħabsijiet, u xi wħud jiġu msawtin b’mod krudil. Dawn huma grati għat-​talb tagħna. (2 Tessalonkin 3:1, 2) Dalwaqt ferm, is-​sistema preżenti ma tkunx iżjed! Kif stqarr Ħabakkuk: “Il-​viżjon hi għal żmien maħtur, u tibqaʼ tilheġ lejn it-​tmiem, u mhux se tgħid gidba. Anki jekk għandha tittardja, ibqaʼ fi stennija għaliha; għax hi se sseħħ bla ma tonqos. Mhix se tkun tard.”—Ħabakkuk 2: 3.

22. Liema riżultat nistgħu bil-​fiduċja nistennew jekk neżerċitaw il-​paċenzja tal-​profeti u s-​sabar taʼ Ġob?

²² Id-​dixxiplu Ġakbu b’imħabba jgħidilna: “Ħuti, ħudu bħala mudell taʼ li tissaportu l-​ħażen u li teżerċitaw il-​paċenzja lill-​profeti, li tkellmu f’isem Jehovah.” Aħna llum li nitkellmu f’isem Jehovah nistgħu nkunu nies li jżommu l-​integrità matul provi ħorox, bħalma kienu Isaija, Ġeremija, Danjel, u oħrajn. Bħal Ġob, aħna nistgħu nissaportu. Kemm ġie ppremjat b’mod tal-​għaġeb għas-​sabar tiegħu! Il-​ħniena u l-​qalb tajba bl-​imħabba taʼ Jehovah se jġibulna premjijiet simili—jekk nissaportu sat-​tmiem. U jalla l-​kliem taʼ Ġakbu jitwettaq għal kull wieħed minna: “Ħares! Aħna nippronunzjawhom henjin lil dawk li ssaportew.”−Ġakbu 5:10, 11; Ġob 42:10-13.

Kif Se Twieġeb?

◻ Liema ħtieġa għal sabar enfasizza Ġesù?

◻ Għal liema raġunijiet issaporta Jehovah?

◻ Liema huma xi punti notevoli fix-​xogħol grandjuż imwettaq matul l-​1989?

◻ Is-​sabar taʼ ħutna fil-​Polonja kif ġie ppremjat?

◻ Ix-​Xhieda fil-​Libanu, fil-​Kolumbja, u fl-​Italja kif urew fedeltà taħt prova?