Xhieda Kristjani Favur is-​Sovranità Divina

“[Għandkom] ixxandru l-​glorja taʼ dak li sejħilkom mid-​dlam għad-​dawl tiegħu taʼ l-​għaġeb.”—1 PIETRU 2:9.

1. Liema xiehda effettiva ngħatat dwar Jehovah fiż-​żminijiet taʼ qabel il-​Kristjanità?

FIŻ-​ŻMINIJIET taʼ qabel il-​Kristjanità, linja twila taʼ xhieda bil-​qlubija xehdu li Jehovah hu l-​uniku Alla veru. (Lhud 11:4–12:1) B’saħħithom fil-​fidi tagħhom, huma bla biżaʼ obdew il-​liġijiet taʼ Jehovah u rrifjutaw li jagħmlu kompromess fi kwistjonijiet taʼ qima. Taw xiehda qawwija favur is-​sovranità universali taʼ Jehovah.— Salm 18:22-24; 47:2, 3 [Salm 18:21-23; 47:1, 2] NW.

2. (a) Min hu l-​aqwa Xhud taʼ Jehovah? (b) Min ħa post il-​ġens taʼ Iżrael bħala xhud taʼ Jehovah? Kif nafu?

² L-​aħħar u l-​aqwa xhud taʼ qabel il-​Kristjanità kien Ġwanni l-​Battista. (Mattew 11:11) Kien ipprivileġġjat f’li jħabbar il-​miġja tal-​Wieħed Magħżul, u introduċa lil Ġesù bħala l-​Messija mwiegħed. (Ġwann 1:29-34) Ġesù hu l-​aqwa xhud taʼ Jehovah, “ix-​xhud leali u veru.” (Apokalissi 3:14, NW) Minħabba li Iżrael tal-​laħam irrifjutaw lil Ġesù, Jehovah irrifjuta lilhom u ħatar ġens ġdid, l-​Iżrael spiritwali t’Alla, biex ikun ix-​xhud tiegħu. (Isaija 42:8-12; Ġwann 1:11, 12; Galatin 6:16) Pietru kkwota profezija dwar Iżrael u wera li kienet tapplika għall-​“Iżrael t’Alla,” il-​kongregazzjoni Kristjana, meta qal: “Intom ġens maħtur, saċerdozju rjali, nazzjon qaddis, poplu li Alla kiseb għalih, biex ixxandru l-​glorja taʼ dak li sejħilkom mid-​dlam għad-​dawl tiegħu taʼ l-​għaġeb.”—1 Pietru 2:9; Eżodu 19:5, 6; Isaija 43:21; 60:2.

3. Liema hija r-​responsabbiltà primarja taʼ l-​Iżrael t’Alla u tal-​“kotra kbira”?

³ Kliem Pietru juri li r-​responsabbiltà primarja taʼ l-​Iżrael t’Alla hija li jagħti xiehda pubblika dwar il-​glorja taʼ Jehovah. Fi żmienna dan il-​ġens spiritwali ngħaqdet miegħu “kotra kbira” taʼ xhieda li wkoll jigglorifikaw lil Alla pubblikament. Huma jgħajtu b’leħen għoli biex kulħadd jismaʼ: “Is-​salvazzjoni nafuha lil Alla tagħna li qiegħed fuq it-​tron, u lill-​Ħaruf.” (Apokalissi 7:9, 10; Isaija 60:8-10) L-​Iżrael t’Alla u sħabhom kif jistgħu jwettqu x-​xiehda tagħhom? Bil-​fidi u l-​ubbidjenza tagħhom.

Xhieda Foloz

4. Il-​Lhud taʼ żmien Ġesù għala kienu xhieda foloz?

⁴ Fidi u ubbidjenza jinvolvu li tgħix bi prinċipji taʼ tjieba. L-​importanza taʼ dan tidher f’dak li Ġesù qal dwar il-​mexxejja reliġjużi Lhud taʼ żmienu. Dawn “fuq il-​kattedra taʼ Mosè qagħdu” bħala għalliema tal-​Liġi. Huma saħansitra bagħtu missjunarji biex jikkonvertu lil dawk li ma kinux jemmnu. Madankollu, Ġesù qalilhom: “Intom taqsmu l-​ibħra u taħartu d-​dinja kollha biex iddawru bniedem għar-​reliġjon tagħkom, u meta tiġbduh għal magħkom tagħmluh bniedem ħaqqu l-​infern darbtejn aktar minnkom!” Dawn ir-​reliġjonisti kienu xhieda foloz​—arroganti, ipokriti, u bla mħabba. (Mattew 23:1-12, 15) F’okkażjoni minnhom Ġesù qal lil xi Lhud: “Intom ġejjin minn missierkom, li hu x-​xitan, u x-​xewqat taʼ missierkom tridu tagħmlu.” Għala qal ħaġa bħal din lil membri tal-​ġens magħżul t’Alla? Għaliex ma ridux jagħtu kas tal-​kliem taʼ l-​aqwa Xhud taʼ Jehovah.—Ġwann 8:41, 44, 47.

5. Kif nafu li l-​Kristjaneżmu ta xiehda falza dwar Alla?

⁵ B’mod simili, matul is-​sekli li għaddew miż-​żmien taʼ Ġesù ’l hawn, mijiet taʼ miljuni fil-​Kristjaneżmu sostnew li huma d-​dixxipli tiegħu. Madankollu, m’għamlux ir-​rieda t’Alla u għalhekk Ġesù ma jirrikonoxxihomx. (Mattew 7:21-23; 1 Korintin 13:1-3) Il-​Kristjaneżmu bagħat missjunarji, li ħafna minnhom bla dubju kienu sinċieri. Madankollu, għallmu lin-​nies biex iqimu lil alla Trinitarjan li jaħraq lill-​midinbin fin-​nar taʼ l-​infern, u l-​biċċa l-​kbira mill-​ikkonvertiti tagħhom juru ftit li xejn evidenza li huma Kristjani. Per eżempju, il-​pajjiż Afrikan taʼ l-​Irwanda kien għalqa fertili għall-​missjunarji Kattoliċi Rumani. Xorta waħda, Kattoliċi Irwandiżi ngħaqdu b’qalbhom kollha fil-​ġlied etniku riċenti f’dak il-​pajjiż. Il-​frott f’dik l-​għalqa missjunarja juri li ma ħax xiehda Kristjana ġenwina mill-​Kristjaneżmu.—Mattew 7:15-20.

Ngħixu Bi Prinċipji Divini

6. Kondotta xierqa b’liema modi hija parti vitali mill-​għoti taʼ xiehda?

⁶ Kondotta żbaljata minn dawk li jsostnu li huma Kristjani ġġib tmaqdir fuq “it-​triq tal-​verità.” (2 Pietru 2:2) Kristjan ġenwin jgħix fi qbil maʼ prinċipji divini. Ma jisraqx, ma jigdibx, ma jqarraqx, jew ma jikkommettix immoralità. (Rumani 2:22) Ċertament li ma joqtolx lill-​ġar tiegħu. Irġiel miżżewġin Kristjani jindokraw b’imħabba lill-​familji tagħhom. Nisa miżżewġin bir-​rispett jappoġġjaw dak l-​indokrar. It-​tfal huma mħarrġin mill-​ġenituri tagħhom u huma b’hekk imħejjijin biex ikunu adulti Kristjani responsabbli. (Efesin 5:21–6:4) Veru, ilkoll kemm aħna imperfetti u nagħmlu żbalji. Imma Kristjan veru jirrispetta l-​livelli tal-​Bibbja u jagħmel sforz ġenwin biex japplikahom. Dan huwa innotat minn oħrajn u jagħti xiehda mill-​aħjar. Xi drabi, dawk li qabel kienu jopponu l-​verità osservaw il-​kondotta xierqa taʼ xi Kristjan u ġew mirbuħin.—1 Pietru 2:12, 15; 3:1.

7. Kemm huwa importanti li l-​Kristjani jħobbu lil xulxin?

⁷ Ġesù wera aspett vitali taʼ kondotta Kristjana meta qal: “Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba bejnietkom.” (Ġwann 13:35) Id-​dinja taʼ Satana hija kkaratterizzata b’“inġustizzja u ħażen, regħba, dnewwa; imtlew bl-​għira, qtil, ġlied, qerq, malizzja, tqassis kontra xulxin, għedewwa t’Alla, insolenti, kburin, intefħu bihom infushom, ħolqu l-​ħażen, diżubbidjenti għall-​ġenituri tagħhom.” (Rumani 1:29, 30) F’ambjent bħal dan, organizzazzjoni dinjija kkaratterizzata bl-​imħabba tkun evidenza qawwija taʼ l-​ispirtu t’Alla fl-​azzjoni​—xiehda effettiva. Ix-​Xhieda taʼ Jehovah jifformaw organizzazzjoni bħal din.—1 Pietru 2:17.

Ix-​Xhieda Huma Studenti Tal-​Bibbja

8, 9. (a) Is-​salmista kif kien imsaħħaħ mill-​istudju tiegħu tal-​Liġi t’Alla u l-​meditazzjoni fuqha? (b) Studju tal-​Bibbja u meditazzjoni b’liema modi se jsaħħuna biex nibqgħu nagħtu xiehda?

⁸ Biex jirnexxilu jagħti xiehda mill-​aħjar, Kristjan irid ikun jaf u jħobb il-​prinċipji divini taʼ Jehovah u verament jobgħod il-​korruzzjoni tad-​dinja. (Salm 97:10) Id-​dinja hija perswassiva f’li tippromwovi l-​ħsieb tagħha stess, u l-​ispirtu tagħha jistaʼ jkun diffiċli biex tirreżistih. (Efesin 2:1-3; 1 Ġwann 2:15, 16) X’jistaʼ jgħinna nżommu l-​attitudni mentali xierqa? Studju regulari u sinjifikanti tal-​Bibbja. Il-​kittieb taʼ Salm 119 irrepeta ħafna drabi l-​imħabba tiegħu għal-​Liġi taʼ Jehovah. Qraha u mmedita fuqha kontinwament, “il-​jum kollu.” (Salm 119:92, 93, 97-105) Bħala riżultat setaʼ jikteb: “Il-​qerq nobogħdu u nistkerrhu, imma l-​liġi tiegħek inħobbha.” Iktar minn hekk, l-​imħabba profonda tiegħu qanqlitu biex jaġixxi. Jgħid: “Sebaʼ darbiet kuljum infaħħrek għad-​digrieti ġusti tiegħek.”—Salm 119:163, 164.

⁹ B’mod simili, l-​istudju regulari tagħna tal-​Kelma t’Alla u l-​meditazzjoni fuqha se jmiss lil qalbna u jqanqalna biex ‘infaħħruh’​—nagħtu xiehda dwar Jehovah—​taʼ spiss, saħansitra “sebaʼ darbiet kuljum.” (Rumani 10:10) F’armonija maʼ dan, il-​kittieb taʼ l-​ewwel salm jgħid li wieħed li jimmedita regolarment fuq il-​kliem taʼ Jehovah “hu bħal siġra mħawla ħdejn nixxigħat taʼ l-​ilma, li tagħmel il-​frott fi żmienha, u l-​weraq tagħha ma jitbielx; hu jirnexxi f’kulma jagħmel.” (Salm 1:3) L-​appostlu Pawlu wkoll wera l-​qawwa tal-​Kelma t’Alla meta kiteb: “L-​Iskrittura kollha hija mnebbha minn Alla, u tiswa biex wieħed jgħallem, iċanfar, iwiddeb u jrawwem fis-​sewwa, biex hekk il-​bniedem t’Alla jkun perfett, imħejji għal kull ħidma tajba.”—2 Timotju 3:16, 17.

10. X’inhu evidenti dwar il-​poplu taʼ Jehovah f’dawn l-​aħħar jiem?

¹⁰ Iż-​żjieda mgħaġġla fl-​għadd t’adoraturi veri f’dan is-​seklu 20 jindika l-​barka taʼ Jehovah. Mingħajr ebda dubju, bħala grupp, dawn ix-​xhieda taż-​żmien modern favur is-​sovranità divina kkultivaw imħabba għal-​liġi taʼ Jehovah fi qlubhom. Bħas-​salmista, huma mqanqlin li jobdu l-​liġi Tiegħu u jagħtu xiehda fedelment “lejl u nhar” dwar il-​glorja taʼ Jehovah.—Apokalissi 7:15.

Ix-​Xogħlijiet Setgħanin Taʼ Jehovah

11, 12. Xi twettaq bil-​mirakli li saru minn Ġesù u s-​segwaċi tiegħu?

¹¹ Fl-​ewwel seklu, spirtu qaddis ta l-​qawwa lil xhieda Kristjani leali biex iwettqu l-​mirakli, liema ħaġa tat prova qawwija li x-​xiehda tagħhom kienet vera. Meta Ġwanni l-​Battista kien fil-​ħabs, bagħat xi dixxipli biex jistaqsu lil Ġesù: “Inti huwa dak li għandu jiġi, jew nistennew lil ħaddieħor?” Ġesù ma weġibx iva jew le. Minflok, qal: “Morru agħtu lil Ġwanni l-​aħbar taʼ dak li smajtu u rajtu: l-​għomja jaraw, iz-​zopop jimxu, l-​imġiddmin ifiqu, it-​torox jisimgħu, il-​mejtin iqumu, il-​Bxara t-​tajba titħabbar lill-​foqra. Hieni hu min ma jitfixkilx minħabba fija!” (Mattew 11:3-6) Dawn ix-​xogħlijiet potenti servew bħala xiehda lil Ġwanni li Ġesù kien tabilħaqq “Dak li għandu jiġi.”—Atti 2:22.

¹² B’mod simili, xi wħud mis-​segwaċi taʼ Ġesù fejqu lill-​morda u saħansitra qajmu lill-​mejtin. (Atti 5:15, 16; 20:9-12) Dawn il-​mirakli kienu bħal xiehda mingħand Alla għan-​nom tagħhom. (Lhud 2:4) U xogħlijiet bħal dawn urew il-​qawwa li tistaʼ kollox taʼ Jehovah. Per eżempju, huwa veru li Satana, “il-​prinċep tad-​dinja,” għandu l-​mezzi biex jikkaġuna l-​mewt. (Ġwann 14:30; Lhud 2:14) Imma meta Pietru qajjem lill-​mara leali Dorkas mill-​mewt, hu setaʼ biss għamel dan bil-​qawwa taʼ Jehovah, ladarba Hu biss jistaʼ jagħti lura l-​ħajja.—Salm 16:10; Salm 36:10 [Salm 36:9] NW; Atti 2:25-27; 9:36-43.

13. (a) Il-​mirakli tal-​Bibbja b’liema mod għadhom jixhdu dwar il-​qawwa taʼ Jehovah? (b) It-​twettieq tal-​profezija kif jilgħab parti ewlenija f’li jagħti prova tad-​Divinità taʼ Jehovah?

¹³ Illum, dawk ix-​xogħlijiet mirakolużi m’għadhomx iseħħu. L-​iskop tagħhom spiċċa. (1 Korintin 13:8) Minkejja dan, għad għandna r-​rekord tagħhom fil-​Bibbja, li xehdu dwaru ħafna li raw b’għajnejhom stess. Meta Kristjani llum jiġbdu l-​attenzjoni lejn dawn ir-​rakkonti storiċi, dawk ix-​xogħlijiet għadhom qegħdin jagħtu xiehda effettiva favur il-​qawwa taʼ Jehovah. (1 Korintin 15:3-6) Jerġaʼ, lura fi żmien Isaija, Jehovah indika li profezija eżatta hija prova li tispikka li Hu dak Alla veru. (Isaija 46:8-11) Ħafna profeziji spirati b’mod divin qegħdin jitwettqu llum​—għadd minnhom fuq il-​kongregazzjoni Kristjana. (Isaija 60:8-10; Danjel 12:6-12; Malakija 3:17, 18; Mattew 24:9; Apokalissi 11:1-13) Minbarra li jindika ċar li qegħdin ngħixu fl-​“aħħar tad-​dinja,” it-​twettieq taʼ dawn il-​profeziji jivvindika lil Jehovah bħala l-​uniku Alla veru.—2 Timotju 3:1.

14. L-​istorja moderna tax-​Xhieda taʼ Jehovah b’liema modi hija xiehda qawwija li Jehovah hu l-​Mulej Sovran?

¹⁴ Finalment, Jehovah għadu jagħmel affarijiet kbar, affarijiet taʼ l-​għaġeb, għan-​nies tiegħu. Id-​dawl li dejjem jiżdied fuq il-​verità tal-​Bibbja huwa dirett mill-​ispirtu taʼ Jehovah. (Salm 86:10; Apokalissi 4:5, 6) Iż-​żjidiet li jispikkaw irrapportati madwar id-​dinja huma evidenza li Jehovah qiegħed ‘ifittex jagħmel dan kollu f’waqtu.’ (Isaija 60:22) Meta faqqgħet persekuzzjoni ħarxa f’pajjiż wara l-​ieħor matul l-​aħħar jiem, is-​sabar kuraġġuż tan-​nies taʼ Jehovah kien possibbli minħabba l-​appoġġ li jsaħħaħ taʼ l-​ispirtu qaddis. Salm 18:2, 3, 18, 19 [Salm 18:1, 2, 17, 18, NW]; 2 Korintin 1:8-10 Iva, l-​istorja moderna tax-​Xhieda taʼ Jehovah fiha nfisha hija xiehda qawwija li Jehovah hu l-​Mulej Sovran.—Żakkarija 4:6.

L-​Aħbar Tajba Trid Tiġi Ppridkata

15. Liema xiehda mifruxa kellha tingħata mill-​kongregazzjoni Kristjana?

¹⁵ Jehovah ħatar lil Iżrael bħala x-​xhud tiegħu għall-​ġnus. (Isaija 43:10) Madankollu, ftit Iżraeliti biss kienu kkmandati b’mod divin biex imorru u jippridkaw lil uħud m’humiex Iżraeliti, u dan kien normalment sabiex iħabbru l-​ġudizzji taʼ Jehovah. (Ġeremija 1:5; Ġona 1:1, 2) Minkejja dan, profeziji fl-​Iskrittura Ebrajka jindikaw li Jehovah xi darba kellu jdawwar l-​attenzjoni tiegħu lejn il-​ġnus b’mod estensiv, u dan għamlu permezz taʼ l-​Iżrael spiritwali t’Alla. (Isaija 2:2-4; 62:2) Qabel ma telaʼ s-​sema, Ġesù kkmanda lis-​segwaċi tiegħu: “Morru, mela, agħmlu dixxipli mill-​ġnus kollha.” (Mattew 28:19) Fil-​waqt li Ġesù kien ikkonċentra fuq in-​“ngħaġ li ntilfu mid-​dar taʼ Iżrael,” is-​segwaċi tiegħu ntbagħtu lejn “il-​ġnus kollha,” saħansitra “sa truf l-​art.” (Mattew 15:24; Atti 1:8) Ix-​xiehda Kristjana kellha tinstemaʼ mill-​bnedmin kollha.

16. Liema inkarigu wettqet il-​kongregazzjoni Kristjana taʼ l-​ewwel seklu, u sa liema punt?

¹⁶ Pawlu wera li dan fehmu tajjeb. Sas-​sena 61 E.K., setaʼ jgħid li l-​aħbar tajba kienet ‘qiegħda tikber u tagħti l-​frott fid-​dinja kollha.’ L-​aħbar tajba ma kenitx illimitata biss għal ġens wieħed jew setta waħda, bħal dik li kienet tieħu sehem fil-​‘qima taʼ l-​anġli.’ Minflok, kienet ippridkata bil-​miftuħ “lill-​ħlejjaq kollha taħt is-​smewwiet.” (Kolossin 1:6, 23; 2:13, 14, 16-18) B’hekk, l-​Iżrael t’Alla fl-​ewwel seklu wettaq l-​inkarigu tiegħu li ‘jxandar il-​glorja taʼ dak li sejħilhom mid-​dlam għad-​dawl tiegħu taʼ l-​għaġeb.’

17. Mattew 24:14 kif għadu qiegħed jiġi mwettaq bil-​kbir?

¹⁷ Xorta waħda, dak ix-​xogħol taʼ pridkar fl-​ewwel seklu kien biss dehra bil-​quddiem taʼ dak li kellu jitwettaq matul l-​aħħar jiem. Billi ħares ’il quddiem speċjalment lejn żmienna, Ġesù qal: “Din il-​Bxara t-​tajba tas-​Saltna tixxandar fid-​dinja kollha, biex il-​ġnus kollha jkollhom xiehda. Imbagħad jiġi t-​tmiem.” (Mattew 24:14; Mark 13:10) Twettqet din il-​profezija? Tabilħaqq li twettqet. Minn bidu żgħir fl-​1919, l-​ippridkar taʼ l-​aħbar tajba issa estenda għal iktar minn 230 pajjiż. Ix-​xiehda qiegħda tinstemaʼ fit-​Tramuntana ffriżata u fit-​tropiċi sħan u umdin. Kontinenti kbar qegħdin jingħataw xiehda, u gżejjer remoti qegħdin jiġu mfittxijin sabiex l-​abitanti tagħhom jistgħu jieħdu xiehda. Saħansitra f’nofs taʼ taqlib kbir, bħall-​gwerra fil-​Bożnja u Ħerzegovina, l-​aħbar tajba tibqaʼ tiġi ppridkata. Bħal fl-​ewwel seklu, ix-​xiehda qiegħda tagħti l-​frott “fid-​dinja kollha.” L-​aħbar tajba hija mħabbra fil-​beraħ “lill-​ħlejjaq kollha taħt is-​smewwiet.” Ir-​riżultat? L-​ewwel, l-​uħud li kien baqaʼ taʼ l-​Iżrael t’Alla nġabru “minn kull tribù u lsien, minn kull poplu u ġens.” It-​tieni, il-​miljuni tal-​“kotra kbira” bdew jiddaħħlu minn “kull ġens u tribù, minn kull poplu u lsien.” (Apokalissi 5:9; 7:9) Mattew 24:14 ikompli jitwettaq bil-​kbir.

18. Liema huma xi affarijiet li qegħdin jiġu mwettqin mill-​ippridkar dinji taʼ l-​aħbar tajba?

¹⁸ L-​ippridkar dinji taʼ l-​aħbar tajba jgħin biex jagħti prova li l-​preżenza rjali taʼ Ġesù bdiet. (Mattew 24:3) Jerġaʼ, huwa l-​mezz ewlieni li bih “il-​ħsad taʼ l-​art” qiegħed jiġi maħsud, peress li jidderieġi lin-​nies lejn l-​unika tama vera għall-​umanità, is-​Saltna taʼ Jehovah. (Apokalissi 14:15, 16) Ladarba l-​Kristjani ġenwini biss jieħdu sehem fl-​ippridkar taʼ l-​aħbar tajba, dan ix-​xogħol importanti jgħin biex jiddistingwi lill-​Kristjani veri minn dawk foloz. (Malakija 3:18) B’dan il-​mod, jirriżulta fis-​salvazzjoni taʼ dawk li jippridkaw kif ukoll taʼ dawk li jwieġbu. (1 Timotju 4:16) L-​iktar importanti, l-​ippridkar taʼ l-​aħbar tajba jġib tifħir u unur lil Alla Jehovah, il-​wieħed li kkmanda li għandu jsir, li jappoġġja lil dawk li jagħmluh, u li jġiegħlu jagħti l-​frott.—2 Korintin 4:7.

19. Il-​Kristjani kollha liema determinazzjoni huma nkuraġġiti li jkollhom hekk kif jidħlu fis-​sena ġdida taʼ servizz?

¹⁹ Mhux taʼ b’xejn li l-​appostlu Pawlu ġie mqanqal biex jgħid: “Ħażin għalija jekk ma nxandarx l-​Evanġelju.” (1 Korintin 9:16) Il-​Kristjani llum iħossuhom l-​istess. Huwa privileġġ grandjuż u responsabbiltà kbira li nkunu “ħaddiema m’Alla,” inxerrdu d-​dawl tal-​verità f’din id-​dinja mudlama. (1 Korintin 3:9; Isaija 60:2, 3) Ix-​xogħol li kellu bidu żgħir fl-​1919 laħaq issa proporzjonijiet taʼ l-​għaġeb. Kważi ħames miljun Kristjan qegħdin jagħtu xiehda favur is-​sovranità divina hekk kif iqattgħu iktar minn biljun siegħa fis-​sena biex iġibu l-​messaġġ taʼ salvazzjoni lil oħrajn. X’ferħ li jkollok parti f’dan ix-​xogħol taʼ taqdis taʼ l-​isem taʼ Jehovah! Hekk kif nidħlu fis-​sena taʼ servizz 1996, ejjew inkunu determinati li ma nmajnawx. Minflok, iżjed minn qatt qabel se nagħtu kas il-​kliem taʼ Pawlu lil Timotju: “Ippriedka l-​kelma, kun qiegħed tagħmel dan b’urġenza.” (2 Timotju 4:2, NW) Hekk kif nagħmlu dan, nitolbu bi qlubna kollha li Jehovah jibqaʼ jbierek l-​isforzi tagħna. (w95 9/1)

Tiftakar Int?

◻ Min ħa post Iżrael bħala x-​“xhud” taʼ Jehovah għall-​ġnus?

◻ Kondotta Kristjana kif tikkontribwixxi għall-​għoti taʼ xiehda?

◻ Studju tal-​Bibbja u meditazzjoni fuqha għala huma essenzjali għax-​Xhud Kristjan?

◻ X’jitwettaq bl-​ippridkar taʼ l-​aħbar tajba?

[Stampi f’paġna 29]

Mhux talli m’hijiex restritta, imma talli l-​aħbar tajba qiegħda issa tiġi ddikjara-​ta “lill-​ħlejjaq kollha taħt is-​smewwiet”