Se Tkun Int Salvat Meta Alla Jaġixxi?

“Kieku dawk il-​jiem ma tqassrux, ħadd mill-​bnedmin ma kien isalva. Iżda minħabba l-​maħturin dawk il-​jiem tqassru.”—MATTEW 24:22.

1, 2. (a) Għala huwa normali li nkunu interessati fil-​futur tagħna? (b) Interess naturali setaʼ kien involut f’liema mistoqsijiet vitali?

KEMM int interessat fik innifsek? Ħafna llum huma interessati żżejjed fihom infushom, billi saru egoċentriċi. Madankollu, il-​Bibbja ma tikkundannax interess xieraq f’dak li jeffettwana. (Efesin 5:33) Dak jinkludi li nkunu interessati fil-​futur tagħna. Mela jkun normali li int tkun trid taf x’għandu l-​futur għalik. Interessat int?

² Nistgħu nkunu żguri li l-​appostli taʼ Ġesù kellhom interess bħal dan fil-​futur tagħhom. (Mattew 19:27) X’aktarx li dak kien fattur meta erbgħa minnhom kienu maʼ Ġesù fuq l-​Għolja taż-​Żebbuġ. Huma staqsew: “Dan meta għad jiġri? U x’se jkun is-​sinjal li dan kollu jkun wasal?” (Mark 13:4) Ġesù ma injorax interess naturali fil-​futur​—l-​interess tagħhom u tagħna. Darba wara l-​oħra enfasizza kif is-​segwaċi tiegħu kellhom jiġu effettwati u x’kellu jkun ir-​riżultat finali.

3. Aħna għala norbtu t-​tweġiba taʼ Ġesù maʼ żmienna?

³ Ir-​risposta taʼ Ġesù fformat profezija bi twettiq ewlieni fi żmienna. Dan nistgħu narawh mill-​gwerer dinjin u konflitti oħrajn fis-​seklu tagħna, it-​terremoti li jtemmu ħesrem numru bla għadd taʼ ħajjiet, l-​iskarsezzi taʼ l-​ikel li jġibu mard u mewt, u l-​pesti​—mill-​influwenza Spanjola li nfirxet maʼ kullimkien fl-​1918 sal-​flaġell kurrenti taʼ l-​AIDS. Madankollu, ħafna mir-​risposta taʼ Ġesù kellu wkoll twettiq li kien iwassal għal, u jinkludi, il-​qerda taʼ Ġerusalemm mir-​Rumani fis-​sena 70 E.K. Ġesù wissa lid-​dixxipli tiegħu: “Ibżgħu għal raskom! Għad jagħtukom f’idejn il-​qrati, isawtukom fis-​sinagogi, u titilgħu quddiem gvernaturi u slaten minħabba fija, biex tagħtu xhieda quddiemhom.”—Mark 13:9.

Dak Li Bassar Ġesù, u Dak Li Seħħ

4. Liema huma xi twissijiet inklużi fit-​tweġiba taʼ Ġesù?

⁴ Ġesù mhux sempliċement bassar kif oħrajn kellhom jittrattaw lid-​dixxipli tiegħu. Hu fetħilhom għajnejhom dwar kif huma nfushom kellhom jaġixxu. Per eżempju: “Meta mbagħad taraw il-​profanazzjoni u l-​ħerba fit-​tempju fejn ma għandhiex tkun​—ħa jifhem min jaqra!—​ħa jaħirbu mbagħad lejn il-​għoljiet dawk li jkunu fil-​Lhudija.” (Mark 13:14) Ir-​rakkont parallel f’Luqa 21:20 jgħid: “Meta mbagħad taraw lil Ġerusalemm magħluqa minn kullimkien bl-​eżerċti.” Dak kif wera li kien eżatt fl-​ewwel każ?

5. Xi ġralhom il-​Lhud fil-​Ġudea fis-​sena 66 E.K.?

⁵ The International Standard Bible Encyclopedia (1982) tgħidilna: “Il-​Lhud kienu dejjem iżjed reżistenti taħt il-​kontroll Ruman u l-​prokuraturi kienu dejjem iżjed vjolenti, krudili, u diżonesti. Irvell fl-​apert faqqaʼ fis-​sena 66 A.D. . . . Il-​gwerra bdiet meta ż-​Żeloti ħatfu lil Masada u mbagħad, taħt Menaħem, immarċjaw għal Ġerusalemm. Fl-​istess waqt Lhud fil-​belt taʼ Ċesarija li kienet taħt gvernatur ġew immassakrati, u l-​aħbar dwar din l-​atroċità nfirxet mal-​pajjiż kollu. Muniti ġodda kienu mmarkati Sena 1 sa Sena 5 tar-​rewwixta.”

6. Ir-​rewwixta Lhudija pproduċiet liema rispons Ruman?

⁶ It-​Tnax-il Leġjun Ruman taħt Ċestjus Gallus immarċja mis-​Sirja, ħarbat il-​Galilija u l-​Ġudea, u mbagħad attakka lill-​kapitali, saħansitra okkupa s-​sezzjoni taʼ fuq taʼ “Ġerusalemm il-​belt qaddisa.” (Neħemija 11:1; Mattew 4:5; 5:35; 27:53) Billi jiġbor fil-​qosor l-​iżviluppi, il-​volum The Roman Siege of Jerusalem jgħid: “Għal ħamest ijiem ir-​Rumani pprovaw jixxabbtu mas-​swar, waqt li ġew miżmumin lura għal darba wara l-​oħra. Fl-​aħħar id-​difensuri, megħlubin mix-​xita taʼ missili, ċedew. Billi fformaw testudo​—it-​tattika li jissiġillaw it-​tarki tagħhom fuq irjushom biex jipproteġu lilhom infushom—​is-suldati Rumani ħaffru mina minn taħt il-​ħajt u pprovaw jagħtu n-​nar lill-​bieb. Paniku terribbli ħakem lid-​difensuri.” Il-​Kristjani ġewwa l-​belt setgħu jiftakru l-​kliem taʼ Ġesù u jagħrfu li ħaġa mistmerra kienet wieqfa f’post qaddis.a Imma bil-​belt iċċirkondata, dawn il-​Kristjani kif setgħu jaħarbu, bħalma kien wissa Ġesù?

7. Meta l-​vittorja kienet kważi f’idejhom fis-​sena 66 E.K., ir-​Rumani x’għamlu?

⁷ L-​istudjuż taʼ l-​istorja Flavjus Josefus jirrakkonta: “Ċestjus [Gallus], li ma kien konxju la tad-​disperazzjoni taʼ l-​assedjati u lanqas tas-​sentimenti tan-​nies, f’daqqa waħda ordna lill-​irġiel tiegħu biex iwaqqfu l-​attakk, abbanduna kull tama għalkemm ma kien sofra ebda telfa, u minkejja li ma kien hemm ebda raġuni rtira mill-​Belt.” (The Jewish War, II, 540 [xix, 7]) Gallus għala rtira? Kienet x’kienet ir-​raġuni, l-​irtirata tiegħu ppermettiet lill-​Kristjani biex jobdu l-​kmand taʼ Ġesù u jaħarbu lejn il-​muntanji u lejn is-​sigurtà.

8. X’kienet it-​tieni fażi taʼ l-​isforz Ruman kontra Ġerusalemm, u dawk li baqgħu ħajjin x’esperjenzaw?

⁸ L-​ubbidjenza salvatilhom ħajjithom. F’qasir żmien ir-​Rumani aġixxew biex itemmu l-​irvell. Il-​kampanja taħt il-​Ġeneral Titus laħqet il-​quċċata tagħha f’assedju fuq Ġerusalemm minn April s’Awissu tas-​sena 70 E.K. Jaqbdek il-​bard meta taqra d-​deskrizzjoni taʼ Josefus dwar kemm sofrew il-​Lhud. Minbarra dawk maqtulin fil-​ġlied mar-​Rumani, Lhud oħrajn ġew maqtulin minn gruppi taʼ Lhud rivali, u l-​ġuħ wassal għall-​kannibaliżmu. Saż-​żmien tal-​vittorja Rumana, 1,100,000 Lhudi kienu mietu.b Mis-​sebgħa u disgħin elf li baqgħu ħajjin, xi wħud ġew mogħtijin il-​mewt mill-​ewwel; oħrajn ittieħdu rsiera. Josefus jgħid: “Dawk ’il fuq minn sbatax-il sena tpoġġew fil-​ktajjen u ntbagħtu għal xogħol iebes fl-​Eġittu, fil-​waqt li għadd kbir ġew ippreżentati minn Titus lill-​provinċji biex jinqerdu fit-​teatri bis-​sejf jew mill-​bhejjem salvaġġi.” Saħansitra waqt li seħħ dan il-​proċess, 11,000 priġunier mietu bil-​ġuħ.

9. Il-​Kristjani għala m’esperjenzawx it-​tmiem li esperjenzaw il-​Lhud, imma liema mistoqsijiet jibqaʼ?

⁹ Il-​Kristjani setgħu jkunu grati li obdew it-​twissija tal-​Mulej u ħarbu mill-​belt qabel ma l-​armata Rumana rritornat. B’hekk huma ġew salvati minn parti minn dik li Ġesù sejjaħ ‘diqa kbira li mill-​bidu tad-​dinja kien għadu qatt ma kien hemm bħalha u anqas ikun hemm’ fuq Ġerusalemm. (Mattew 24:21) Ġesù żied: “U kieku dawk il-​jiem ma tqassrux, ħadd mill-​bnedmin (“laħam,” NW) ma kien isalva. Iżda minħabba l-​maħturin dawk il-​jiem tqassru.” (Mattew 24:22) X’kien ifisser dan f’dak iż-​żmien, u x’ifisser issa?

10. Qabel kif spjegajna Mattew 24:22?

¹⁰ Fil-​passat kien spjegat li l-​‘laħam li kellu jkun salvat’ kien jirreferi għal Lhud li baqgħu ħajjin fit-​tribulazzjoni fuq Ġerusalemm fis-​sena 70 E.K. Il-​Kristjani kienu ħarbu, u għalhekk Alla setaʼ jħalli lir-​Rumani jġibu qerda mgħaġġla. Fi kliem ieħor, minħabba l-​fatt li l-​“maħturin” kienu ’l barra mill-​periklu, il-​jiem tat-​tribulazzjoni setgħu jitqassru, billi b’hekk jippermettu lil xi “laħam” Lhudi li jiġi salvat. Kien maħsub li l-​Lhud li baqgħu ħajjin kienu jiffiguraw bil-​quddiem lil dawk li kellhom jibqgħu ħajjin fit-​tribulazzjoni l-​kbira li ġejja fi żmienna.​—Apokalissi 7:14.

11. Għala jidher li l-​ispjegazzjoni taʼ Mattew 24:22 għandha tiġi kkunsidrata mill-​ġdid?

¹¹ Imma hija dik l-​ispjegazzjoni fi qbil maʼ dak li seħħ fis-​sena 70 E.K.? Ġesù qal li l-​“laħam” uman kellu jiġi ‘salvat’ mit-​tribulazzjoni. Tuża int il-​kelma ‘salvat’ biex tiddeskrivi lis-​97,000 li baqgħu ħajjin, meta tqis li eluf minnhom malajr mietu bil-​ġuħ jew ġew maqtulin f’xi teatru? Josefus jgħid dwar teatru wieħed, f’Ċesarija: “L-​għadd taʼ dawk li mietu f’taqbid maʼ bhejjem salvaġġi jew f’li jiġġieldu kontra xulxin jew billi ġew maħruqin ħajjin jaqbeż l-​2,500.” Għalkemm ma mitux fl-​assedju, ċertament li huma ma ġewx ‘salvati.’ U kien Ġesù se jikkunsidrahom bħala li huma simili għal uħud hienja li jsalvaw mid-​“diqa kbira” li ġejja?

Laħam Salvat​—Kif?

12. Min kienu l-​“magħżulin” taʼ l-​ewwel seklu li Alla kien interessat fihom?

¹² Sas-​sena 70 E.K., Alla ma baqax iqis lil-​Lhud naturali bħala l-​poplu magħżul tiegħu. Ġesù wera li Alla kien irrifjuta lil dak il-​ġens u kien se jħalli lill-​belt kapitali, lit-​tempju, u lis-​sistema taʼ qima tiegħu jintemmu. (Mattew 23:37–24:2) Alla għażel ġens ġdid, Israel spiritwali. (Atti 15:14; Rumani 2:28, 29; Galatin 6:16) Kien kompost minn irġiel u nisa magħżulin mill-​ġnus kollha u midlukin bl-​ispirtu qaddis. (Mattew 22:14; Ġwann 15:19; Atti 10:1, 2, 34, 35, 44, 45) Xi snin qabel l-​attakk minn Ċestjus Gallus, Pietru kiteb lil dawk “magħżulin minn qabel skond il-​ħsieb taʼ Alla, il-​Missier; imqaddsin bl-​Ispirtu s-​Santu.” Dawn l-​uħud midlukin bl-​ispirtu kienu “ġens maħtur, saċerdozju rjali, nazzjon qaddis.” (1 Pietru 1:1, 2; 2:9) Alla kellu jieħu lil uħud magħżulin bħal dawn fis-​sema biex isaltnu maʼ Ġesù.—Kolossin 1:1, 2; 3:12; Titu 1:1; Apokalissi 17:14.

13. Il-​kliem taʼ Ġesù f’Mattew 24:22 liema sens setaʼ kellu?

¹³ Dan l-​identifikar tal-​magħżulin huwa t’għajnuna, ladarba Ġesù bassar li l-​jiem taʼ tribulazzjoni kellhom jitqassru “minħabba l-​maħturin (“magħżulin,” NW).” Il-​kelma Griega tradotta “minħabba” tistaʼ wkoll tiġi tradotta “għall-​benefiċċju taʼ.” (Mark 2:27; Ġwann 12:30; 1 Korintin 8:11; 9:10, 23; 11:9; 2 Timotju 2:10; Apokalissi 2:3) Mela Ġesù setaʼ kien qiegħed jgħid, ‘Li kieku dawk il-​jiem ma jitqassrux, ebda laħam ma se jsalva; imma għall-​benefiċċju tal-​magħżulin dawk il-​jiem se jitqassru.’c (Mattew 24:22) Seħħet xi ħaġa li bbenefikat jew kienet ‘għall-​benefiċċju’ tal-​magħżulin Kristjani maqbudin ġewwa Ġerusalemm?

14. “Laħam” kif ġie salvat meta l-​armata Rumana rtirat bla mistenni minn Ġerusalemm fis-​sena 66 E.K.?

¹⁴ Ftakar li fis-​sena 66 E.K., ir-​Rumani qasmu l-​pajjiż, okkupaw in-​naħa taʼ fuq taʼ Ġerusalemm, u bdew iħaffru mina minn taħt is-​swar. Josefus jikkummenta: “Li kieku ppersevera bl-​assedju ftit ieħor kien jikkonkwista l-​Belt f’daqqa waħda.” Staqsi lilek innifsek, ‘L-​armata Rumana setgħana għala kellha tabbanduna f’daqqa waħda l-​kampanja u “minkejja li ma kien hemm ebda raġuni” tirtira’? Rupert Furneaux, speċjalista f’li jinterpreta l-​istorja militari, jikkummenta: “L-​ebda studjuż taʼ l-​istorja ma rnexxielu jipprovdi raġuni addattata għad-​deċiżjoni stramba u diżastruża taʼ Gallus.” Kienet x’kienet ir-​raġuni, l-​effett kien li t-​tribulazzjoni ġiet imqassra. Ir-​Rumani rtiraw, bil-​Lhud fl-​attakk għal warajhom. Xi ngħidu dwar il-​Kristjani “magħżulin” u midlukin li kienu ġew maqbudin ġewwa? Il-​waqfien taʼ l-​assedju kien ifisser li kienu ġew salvati minn kwalunkwe tbiċċir li kien taʼ theddida matul it-​tribulazzjoni. Għaldaqstant, dawk il-​Kristjani li bbenefikaw mit-​tqassir tat-​tribulazzjoni fis-​sena 66 E.K. kienu l-​“laħam” salvat imsemmi f’Mattew 24:22.

X’Għandu Maħżun Il-​Futur Tiegħek?

15. Għala taħseb li Mattew kapitlu 24 għandu jkun taʼ interess partikulari fi żmienna?

¹⁵ Xi ħadd jistaʼ jistaqsi, ‘Għala għandi nkun interessat b’mod speċjali f’din il-​fehma ċċarata tal-​kliem taʼ Ġesù?’ Sewwa, hemm raġuni abbundanti biex nikkonkludu li l-​profezija taʼ Ġesù kellu jkollha twettiq akbar, ’l hinn minn dak li ġara qabel u inkluża s-​sena 70 E.K.d (Qabbel Mattew 24:7; Luqa 21:10, 11; Apokalissi 6:2-8.) Għal għaxriet taʼ snin, ix-​Xhieda taʼ Jehovah ippridkaw li t-​twettiq ewlieni li qiegħed iseħħ fi żmienna jagħti prova li nistgħu nistennew “diqa kbira” fuq skala kbira fil-​futur qarib. Matulha, kif se jitwettaq il-​kliem profetiku f’Mattew 24:22?

16. Apokalissi liema fatt inkuraġġanti jipprovdi dwar it-​tribulazzjoni kbira li riesqa?

¹⁶ Madwar għoxrin sena wara t-​tribulazzjoni fuq Ġerusalemm, l-​appostlu Ġwanni kiteb il-​ktieb taʼ l-​Apokalissi. Dan ikkonferma li tribulazzjoni kbira kienet għadha trid tiġi. U, billi aħna interessati f’dak li jeffettwana personalment, għandu mnejn iserrħilna rasna li nkunu nafu li l-​Apokalissi jiżgurana profetikament li laħam uman se jibqaʼ ħaj f’din it-​tribulazzjoni kbira li ġejja. Ġwanni bassar “kotra kbira . . . minn kull ġens u tribù, minn kull poplu u lsien.” Dawn min huma? Leħen mis-​sema jwieġeb: “Dawn huma dawk li ġejjin mit-​taħbit il-​kbir.” (Apokalissi 7:9, 14) Iva, huma se jibqgħu ħajjin! Apokalissi joffrilna wkoll dehen fuq kif se jiżviluppaw l-​affarijiet fit-​tribulazzjoni kbira li ġejja u fuq kif se jitwettaq Mattew 24:22.

17. Il-​fażi li biha tibda t-​tribulazzjoni l-​kbira se tinkludi liema ħaġa?

¹⁷ Il-​fażi li biha tibda din it-​tribulazzjoni se tkun attakk fuq prostituta simbolika msejħa “Babel il-​Kbira.” (Apokalissi 14:8; 17:1, 2) Hija tirrappreżenta l-​imperu dinji taʼ reliġjon falza, bil-​Kristjaneżmu li huwa l-​iktar ħati. Skond il-​kliem t’Apokalissi 17:16-18, Alla se jpoġġi l-​idea f’qalb l-​element politiku biex jattakka lil din il-​prostituta simbolika.e Aħseb dwar kif dan jistaʼ jidher għall-​“magħżulin” u midlukin t’Alla, u għal sħabhom, il-​“kotra kbira.” Hekk kif javanza dan l-​attakk qerriedi fuq ir-​reliġjon, għandu mnejn jidher li se jelimina lill-​organizzazzjonijiet reliġjużi kollha, inkluż il-​poplu taʼ Jehovah.

18. Għala jistaʼ jidher li ebda “laħam” m’hu se jsalva matul il-​parti li biha tibda t-​tribulazzjoni l-​kbira?

¹⁸ Dan huwa fejn il-​kliem taʼ Ġesù li nsibu f’Mattew 24:22 se jitwettaq fuq skala kbira. Sewwa sew bħalma l-​magħżulin f’Ġerusalemm dehru li kienu f’riskju, il-​qaddejja taʼ Jehovah jistgħu jidhru li se jkunu fil-​periklu li jiġu eliminati matul l-​attakk fuq ir-​reliġjon, bħal li kieku dak l-​attakk kellu jeqred il-​“laħam” kollu tal-​poplu t’Alla. Madankollu, ejjew inżommu f’moħħna dak li ġara lura fis-​sena 66 E.K. It-​tribulazzjoni kkaġunata mir-​Rumani ġiet imqassra, biex b’hekk tat lill-​magħżulin u midlukin t’Alla opportunità biżżejjed biex jaħarbu u jibqgħu ħajjin. B’hekk, nistgħu nkunu żguri li l-​attakk distruttiv fuq ir-​reliġjon ma jitħalliex joqtol lill-​kongregazzjoni globali t’adoraturi veri. Dan se jseħħ malajr, bħal li kieku “f’jum wieħed.” B’xi mod, iżda, dan se jitqassar, ma jitħalliex iwettaq għalkollox l-​oġġettiv tiegħu, sabiex il-​poplu t’Alla jkun jistaʼ jiġi ‘salvat.’—Apokalissi 18:8.

19. (a) Wara l-​ewwel parti tat-​tribulazzjoni l-​kbira, x’se jkun evidenti? (b) Dan għal liema ħaġa se jwassal?

¹⁹ Elementi oħrajn taʼ l-​organizzazzjoni taʼ fuq l-​art taʼ Satana x-​Xitan wara dan se jkomplu għal xi żmien, billi jibku t-​telfa taʼ trattar mal-​maħbuba antika reliġjuża tagħhom. (Apokalissi 18:9-19) F’xi punt, huma se jinnotaw li l-​veri qaddejja t’Alla għadhom hawn, “jgħammru b’moħħhom mistrieħ: nies bla swar” u jidhru bħala priża faċli. X’sorpriża hemm maħżuna! Billi jwieġeb għal aggressjoni reali jew mhedda kontra l-​qaddejja tiegħu, Alla se jqum f’ġudizzju għall-​għedewwa tiegħu fil-​parti finali tat-​tribulazzjoni l-​kbira.—Eżekjel 38:10-12, 14, 18-23.

20. It-​tieni fażi tat-​tribulazzjoni l-​kbira għala mhix se tpoġġi lill-​poplu t’Alla fil-​periklu?

²⁰ Din it-​tieni fażi tat-​tribulazzjoni l-​kbira se tkun parallel maʼ dak li ġara lil Ġerusalemm u lill-​abitanti tagħha fit-​tieni attakk mir-​Rumani fis-​sena 70 E.K. Se tagħti prova li tkun “diqa kbira li mill-​bidu tad-​dinja għadu qatt ma kien [hemm] bħalha u anqas ikun hawn.” (Mattew 24:21) Aħna nistgħu nkunu żguri, iżda, li l-​magħżulin t’Alla u sħabhom m’humiex se jkunu fiż-​żona tal-​periklu, f’riskju li jinqatlu. Insomma, ma jkunux ħarbu lejn post ġeografiku wieħed. Il-​Kristjani taʼ l-​ewwel seklu f’Ġerusalemm setgħu jaħarbu minn dik il-​belt għar-​reġjun muntanjuż, bħalma kien Pella fuq in-​naħa l-​oħra tal-​Ġordan. Fil-​futur, madankollu, ix-​Xhieda leali t’Alla se jkunu jinsabu mal-​globu kollu, u għalhekk is-​salvezza u l-​protezzjoni m’humiex se jkunu bbażati fuq xi post ġeografiku.

21. Min se jiġġieled fil-​battalja finali, u b’liema riżultat?

²¹ Il-​qerda mhix se tkun mill-​forzi taʼ Ruma jew minn xi aġenzija umana oħra. Minflok, il-​ktieb taʼ l-​Apokalissi jiddeskrivi l-​forzi esekuzzjonali bħala li huma mis-​sema. Iva, dik il-​parti finali tat-​tribulazzjoni l-​kbira se titwettaq, mhux minn xi armata umana, imma mill-​“Verb taʼ Alla,” is-​Sultan Ġesù Kristu, assistit mill-​‘eżerċti li huma fis-​sema,’ inklużi Kristjani midlukin irxoxtati. Is-​“Sultan tas-​slaten u Sid tas-​sidien” se jwettaq esekuzzjoni bil-​wisq iżjed kompleta minn dik li għamlu r-​Rumani fis-​sena 70 E.K. Din se telimina lill-​opponenti umani kollha t’Alla​—slaten, kmandanti militari, nies ħielsa u rsiera, kbar u żgħar. Saħansitra organizzazzjonijiet umani tad-​dinja taʼ Satana se jsibu tmiemhom.—Apokalissi 2:26, 27; 17:14; 19:11-21; 1 Ġwann 5:19.

22. F’liema sens ieħor “laħam” se jiġi salvat?

²² Ftakar li “laħam,” kemm tal-​fdal midlukin u kemm tal-​“kotra kbira,” diġà se jkun ġie salvat meta Babilonja l-​Kbira tispiċċa malajr u kompletament fl-​ewwel parti tat-​tribulazzjoni. Bl-​istess mod fil-​parti finali tat-​tribulazzjoni, “laħam” li jkun ħarab għal fuq in-​naħa taʼ Jehovah se jiġi salvat. Kemm se jkun taʼ kuntrast dan mat-​tmiem tal-​Lhud ribellużi fis-​sena 70 E.K.!

23. Il-​“laħam” li se jibqaʼ ħaj lejn liema ħaġa jistaʼ jħares ’il quddiem?

²³ Billi taħseb dwar il-​possibiltajiet għall-​futur tiegħek stess u dak tal-​maħbubin tiegħek, innota dak li huwa mwiegħed f’Apokalissi 7:16, 17: “Ma jbatux aktar ġuħ, anqas għatx ma jagħmel bihom aktar; ix-​xemx ma taħkimhomx, anqas ebda għomma, ladarba l-​Ħaruf, li hemm f’nofs it-​tron, ikun ir-​ragħaj tagħhom; u hu jwassalhom ħdejn ilmijiet taʼ l-​egħjun tal-​ħajja. U Alla jixxottalhom kull demgħa minn għajnejhom.” Ċertament, dak hu verament li tkun ‘salvat’ f’sens taʼ l-​għaġeb u dejjiemi. (w96 8/15)

[Noti taʼ taħt]

Kif Twieġeb Int?

◻ Liema żewġ fażijiet kien hemm fl-​attakk taʼ l-​armata Rumana fuq Ġerusalemm?

◻ Għala m’huwiex probabbli li s-​97,000 Lhudi li baqgħu ħajjin fis-​sena 70 E.K. kienu jifformaw il-​“laħam” imsemmi f’Mattew 24:22?

◻ Il-​jiem tat-​tribulazzjoni taʼ Ġerusalemm kif kienu mqassra, u “laħam” kif kien b’hekk salvat?

◻ Fit-​tribulazzjoni kbira li riesqa, il-​jiem kif se jitqassru u “laħam” kif se jkun salvat?

[Stampa f’paġna 11]

Munita Lhudija maħruġa wara l-​irvell. Il-​kliem bil-​Lhudi jgħid “Is-​Sena tnejn,” li jfisser is-​sena 67 E.K., it-​tieni sena taʼ l-​awtonomija tagħhom

[Sors]

Pictorial Archive (Near Eastern History) Est.

[Stampa f’paġna 12]

Munita Rumana maħruġa fis-​sena 71 E.K. Fuq ix-​xellug hemm Ruman armat; fuq il-​lemin Lhudija bil-​vistu. Il-​kliem “IVDAEA CAPTA” jfisser “Ġudea fil-​Jasar”

[Sors]

Pictorial Archive (Near Eastern History) Est.