Ħarba Lejn is-​Salvezza Qabel it-​“Tribulazzjoni l-​Kbira”

“Meta mbagħad taraw lil Ġerusalemm magħluqa minn kullimkien bl-​eżerċti, . . . ħa jaħirbu mbagħad lejn il-​muntanji dawk li jkunu fil-​Lhudija.”—LUQA 21:20, 21.

1. Ħarba għala hija urġenti għal dawk li għadhom parti mid-​dinja?

GĦAL dawk kollha li huma parti mid-​dinja taʼ Satana, ħarba hija urġenti. Jekk iridu jiġu skansati meta s-​sistema preżenti t’affarijiet tinkines minn fuq l-​art, huma għandhom juru evidenza konvinċenti li ħadu l-​waqfa tagħhom fiż-​żgur fuq in-​naħa taʼ Jehovah u li m’għadhomx iżjed jagħmlu parti mid-​dinja li tagħha Satana hu l-​ħakkiem.—Ġakbu 4:4; 1 Ġwann 2:17.

2, 3. Liema mistoqsijiet f’konnessjoni mal-​kliem taʼ Ġesù ddokumentat f’Mattew 24:15-22 sejrin niddiskutu?

² Fil-​profezija kbira tiegħu dwar il-​konklużjoni tas-​sistema t’affarijiet, Ġesù enfasizza l-​ħtieġa vitali għal ħarba bħal din. Aħna taʼ spiss niddiskutu dak li hu ddokumentat f’Mattew 24:4-14; madankollu, dak li jiġi wara m’huwiex inqas importanti. Ninkuraġġuk tiftaħ il-​Bibbja tiegħek issa u taqra versi 15 sa 22 (NW).

³ Xi tfisser dik il-​profezija? Fl-​ewwel seklu, x’kienet “[i]l-ħaġa moqżieża li tikkaġuna ħerba”? X’kien jindika li din tkun “f’post qaddis”? Taʼ liema sinjifikat huwa dak l-​iżvilupp għalina?

“Ħalli L-​Qarrej Juża D-​Dixxerniment”

4. (a) Danjel 9:27 x’qal li kellu jsegwi wara li l-​Lhud jiċħdu lill-​Messija? (b) Meta rrefera għal dan, evidentement, Ġesù għala qal, “Ħalli l-​qarrej juża d-​dixxerniment”?

⁴ Innota li f’Mattew 24:15 Ġesù rrefera għal dak li kien miktub fil-​ktieb taʼ Danjel. F’kapitlu 9 taʼ dak il-​ktieb hemm profezija li bassret il-​miġja tal-​Messija u l-​ġudizzju li kellu jiġi esegwit fuq il-​ġens Lhudi talli m’aċċettahx. L-​aħħar parti taʼ vers 27 (NW) tgħid: “U fuq il-​ġewnaħ t’affarijiet moqżieża se jkun hemm il-​wieħed li qiegħed jikkaġuna ħerba.” Tradizzjoni bikrija Lhudija applikat dik il-​parti tal-​profezija taʼ Danjel għall-​ipprofanar tat-​tempju taʼ Jehovah f’Ġerusalemm minn Antijoku IV fit-​tieni seklu Q.E.K. Imma Ġesù wissa: “Ħalli l-​qarrej juża d-​dixxerniment.” Id-​desakrazzjoni tat-​tempju minn Antijoku IV, għalkemm ċertament moqżieża, ma rriżultatx f’ħerba​—taʼ Ġerusalemm, tat-​tempju, jew tal-​ġens Lhudi. Mela Ġesù evidentement kien qiegħed iwissi lis-​semmiegħa tiegħu li t-​twettiq taʼ dan ma kienx fil-​passat imma kien għad irid jiġi.

5. (a) Paragun taʼ rakkonti tal-​Vanġelu kif jgħinna nidentifikaw il-​“ħaġa moqżieża” taʼ l-​ewwel seklu? (b) Sestjus Gallus għala ħa b’għaġla truppi Rumani lejn Ġerusalemm fis-​sena 66 E.K.?

⁵ X’kienet “[i]l-ħaġa moqżieża” li għaliha kellhom joqogħdu għassa? Huwa notevoli li r-​rakkont taʼ Mattew (NW) jgħid: “Meta tilmħu l-​ħaġa moqżieża li tikkaġuna ħerba . . . wieqfa f’post qaddis.” Madankollu, ir-​rakkont parallel f’Luqa 21:20 jaqra: “Meta mbagħad taraw lil Ġerusalemm magħluqa minn kullimkien bl-​eżerċti [kkampjati], tkunu tafu li l-​qerda tagħha tkun waslet.” (Korsiv tagħna.) Fis-​sena 66 E.K., Kristjani li kienu jgħixu f’Ġerusalemm raw tabilħaqq dak li kien bassar Ġesù. Serje taʼ inċidenti li jinvolvu konflitt bejn il-​Lhud u uffiċjali Rumani wasslu biex Ġerusalemm issir qiegħa taħraq taʼ rvell kontra Ruma. Bħala riżultat, faqqgħet vjolenza mal-​Ġudea kollha, fis-​Samarija, il-​Galilija, id-​Dekapolis, u l-​Feniċja, lejn it-​Tramuntana għal ġos-​Sirja, u lejn in-​Nofs in-​Nhar għal ġo l-​Eġittu. Sabiex jirrestawra xi miżura taʼ paċi lil dik il-​parti taʼ l-​Imperu Ruman, Sestjus Gallus ħa b’għaġla forzi militari mis-​Sirja lejn Ġerusalemm, li dwarha l-​Lhud tkellmu bħala li kienet il-​“belt qaddisa” tagħhom.—Neħemija 11:1; Isaija 52:1.

6. Kif kien veru li “ħaġa moqżieża” li setgħet tikkaġuna ħerba kienet “wieqfa f’post qaddis”?

⁶ Kienet id-​drawwa tal-​leġjuni Rumani li jġorru standardi, jew bnadar, li kienu jqisuhom bħala sagri imma li l-​Lhud kienu jqisuhom bħala idolatrużi. Taʼ interess, il-​kelma Ebrajka tradotta “ħaġa moqżieża” fil-​ktieb taʼ Danjel hija wżata prinċipalment għal idoli u idolatrija.a (Dewteronomju 29:16 [Dewteronomju 29:17, NW]) Minkejja reżistenza mil-​Lhud, il-​forzi Rumani bil-​bnadar idolatrużi tagħhom ippenetraw ġewwa Ġerusalemm f’Novembru tas-​sena 66 E.K. u mbagħad bdew iħaffru mina minn taħt il-​ħajt tat-​tempju lejn it-​Tramuntana. Ma kienx hemm dubju dwar dan​—“ħaġa moqżieża” li setgħet tikkaġuna ħerba kompleta lil Ġerusalemm kienet “wieqfa f’post qaddis”! Imma kif setaʼ xi ħadd jaħrab?

Ħarba Kienet Urġenti!

7. L-​armata Rumana x’għamlet bla ma kien mistenni?

⁷ F’daqqa waħda u għall-​ebda raġuni apparenti minn ħarsa umana, meta kien donnu li Ġerusalemm setgħet tintrebaħ faċilment, l-​armata Rumana irtirat. Ir-​rivoluzzjonarji Lhud ġrew wara t-​truppi Rumani li kienu qegħdin jirtiraw imma sa Antipatris biss, madwar 30 mil minn Ġerusalemm. Imbagħad reġgħu lura. Meta waslu f’Ġerusalemm, inġabru fit-​tempju biex ifasslu l-​istrateġija futura tagħhom għall-​gwerra. Ġew ingaġġati żgħażagħ biex isaħħu l-​fortifikazzjonijiet u biex jaqdu fil-​militar. Kienu l-​Kristjani se jinqabdu f’dan? Saħansitra li kellhom jevitaw dan, kienu se jibqgħu huma fiż-​żona tal-​periklu meta l-​armati Rumani rritornaw?

8. Il-​Kristjani liema azzjoni urġenti ħadu b’ubbidjenza għall-​kliem profetiku taʼ Ġesù?

⁸ Kristjani f’Ġerusalemm u fil-​Ġudea kollha malajr aġixxew fuq it-​twissija profetika mogħtija minn Ġesù Kristu u ħarbu ’l barra miż-​żona tal-​periklu. Ħarba kienet urġenti! Fil-​ħin erħewlha għal ġor-​reġjuni muntanjużi, b’xi wħud li possibilment issetiljaw f’Pella, fil-​provinċja taʼ Perea. Dawk li daħħlu f’qalbhom it-​twissija taʼ Ġesù ma darux lura bi bluha biex jipprovaw isalvaw il-​ġid materjali tagħhom. (Qabbel Luqa 14:33.) Billi telqu taħt dawk iċ-​ċirkostanzi, nisa tqal u ommijiet li jreddgħu ċertament li sabu l-​vjaġġ wieħed iebes biex jagħmluh bil-​mixi. Il-​ħarba tagħhom ma kenitx imfixkla minn restrizzjonijiet taʼ jum is-​Sabat, u għalkemm ix-​xitwa kienet qrib, kienet għadha ma waslitx. Dawk li kienu taw kas tat-​twissija taʼ Ġesù biex jaħarbu bil-​għaġla malajr kienu ’l barra minn Ġerusalemm u l-​Ġudea qawwijin u sħaħ. Il-​ħajjiet tagħhom kienu jiddependu minn dan.—Qabbel Ġakbu 3:17.

9. Il-​forzi Rumani wara kemm irritornaw, u b’liema riżultat?

⁹ Eżatt fis-​sena taʼ wara, fis-​67 E.K., ir-​Rumani ġeddew l-​azzjonijiet taʼ gwerra kontra l-​Lhud. L-​ewwel, ġiet imrażżna l-​Galilija. Is-​sena taʼ wara, il-​Ġudea ġiet imħarbta. Sas-​sena 70 E.K., il-​forzi Rumani ċċirkondaw lil Ġerusalemm infisha. (Luqa 19:43) Il-​ġuħ sar estremament qalil. Dawk maqbudin fil-​belt daru għal xulxin. Kulmin ipprova jaħrab ġie mbiċċer. Dak li esperjenzaw kien, bħalma qal Ġesù, “tribulazzjoni kbira.”—Mattew 24:21, NW.

10. Jekk naqraw b’dixxerniment, x’se ninnotaw iktar?

¹⁰ Issodisfa għalkollox dan dak li kien bassar Ġesù? Le, kellu jiġi iżjed. Jekk, bħalma wissa Ġesù, naqraw l-​Iskrittura b’dixxerniment, m’aħniex se nonqsu li ninnotaw dak li għad irid jiġi. Se naħsbu wkoll serjament dwar l-​implikazzjonijiet tiegħu fil-​ħajjiet tagħna stess.

Il-​“Ħaġa Moqżieża” Taż-​Żmien Modern

11. Danjel f’liema żewġ passaġġi oħrajn jirreferi għall-​“ħaġa moqżieża,” u liema perijodu taʼ żmien qiegħed jiġi diskuss hemmhekk?

¹¹ Innota li, flimkien maʼ dak li rajna f’Danjel 9:27, hemm, f’Danjel 11:31 u 12:11, iżjed referenzi għall-​“ħaġa moqżieża li tikkaġuna ħerba.” Fl-​ebda wieħed minn dawn il-​każi taʼ l-​aħħar ma qiegħda tiġi diskussa l-​qerda taʼ Ġerusalemm. Fil-​fatt, dak li jintqal f’Danjel 12:11 jidher biss żewġ versi wara referenza għaż-​“żmien taʼ l-​aħħar.” (Danjel 12:9) Aħna ilna ngħixu f’perijodu taʼ żmien bħal dan mill-​1914 ’l hawn. Mela għandna bżonn noqogħdu għassa biex nidentifikaw il-​“ħaġa moqżieża li tikkaġuna ħerba” taż-​żmien modern u mbagħad inkunu żguri li noħorġu miż-​żona tal-​periklu.

12, 13. Għala huwa xieraq li tiddeskrivi lil-​Lega tan-​Nazzjonijiet bħala l-​“ħaġa moqżieża” taż-​żmien modern?

¹² X’inhi dik il-​“ħaġa moqżieża” taż-​żmien modern? L-​evidenza tipponta lejn il-​Lega tan-​Nazzjonijiet, li bdiet topera fl-​1920, ftit wara li d-​dinja daħlet fiż-​żmien tat-​tmiem tagħha. Imma dik kif setgħet tkun “ħaġa moqżieża li tikkaġuna ħerba”?

¹³ Ftakar, il-​kelma Ebrajka għal “ħaġa moqżieża” hija wżata fil-​Bibbja prinċipalment b’referenza għal idoli u prattiċi idolatrużi. Kienet il-​Lega idolizzata? Tabilħaqq li kienet! Il-​kleru poġġieha “f’post qaddis,” u s-​segwaċi tagħhom issoktaw jagħtuha devozzjoni appassjonanti. Il-​Kunsill Federali tal-​Knejjes taʼ Kristu fl-​Amerka ddikjara li l-​Lega kellha tkun “l-​espressjoni politika tas-​Saltna t’Alla fuq l-​art.” Is-​Senat taʼ l-​Istati Uniti rċieva dilluvju taʼ ittri minn gruppi reliġjużi biex iħeġġuh jirratifika l-​Patt tal-​Lega tan-​Nazzjonijiet. Il-​ġemgħa ġenerali taʼ Battisti, Kongregazzjonalisti, u Presbiterjani fil-​Britannja faħħruha bħala “l-​uniku strument disponibbli biex tinkiseb [paċi fuq l-​art].”​—Ara Apokalissi 13:14, 15.

14, 15. Il-​Lega u iktar tard il-​Ġnus Magħquda b’liema mod irnexxielhom ikunu “f’post qaddis”?

¹⁴ Is-​Saltna Messjanika t’Alla kienet ġiet stabbilita fis-​smewwiet fl-​1914, imma l-​ġnus issoktaw jiġġieldu għas-​sovranità tagħhom stess. (Salm 2:1-6) Meta ġiet proposta l-​Lega tan-​Nazzjonijiet, il-​ġnus li kienu għadhom kif iġġieldu fl-​ewwel gwerra dinjija, kif ukoll il-​kleru li kien bierek it-​truppi tagħhom, kienu diġà wrew li kienu abbandunaw il-​liġi t’Alla. Ma kinux qegħdin iħarsu lejn Kristu bħala Sultan. B’hekk assenjaw lil organizzazzjoni umana l-​irwol tas-​Saltna t’Alla; huma poġġew lil-​Lega tan-​Nazzjonijiet “f’post qaddis,” post fejn ma kienx jixirqilha.

¹⁵ Bħala suċċessura tal-​Lega, il-​Ġnus Magħquda bdiet teżisti fl-​24 t’Ottubru, 1945. Iktar tard, il-​papiet taʼ Ruma laqgħu lill-​Ġnus Magħquda bħala “t-​tama aħħarija għal armonija u paċi” u “l-​forum suprem taʼ paċi u ġustizzja.” Iva, il-​Lega tan-​Nazzjonijiet, flimkien mas-​suċċessura tagħha, il-​Ġnus Magħquda, verament saru idolu, “ħaġa moqżieża” fil-​ħarsa t’Alla u tal-​poplu tiegħu.

Taħrab Minn Xiex?

16. Dawk li jħobbu t-​tjieba minn liema ħaġa għandhom bżonn jaħarbu llum?

¹⁶ Malli ‘jilmħu’ dan, malli jirrikonoxxu x’inhi dik l-​organizzazzjoni internazzjonali u kif qiegħda tiġi idolizzata, dawk li jħobbu t-​tjieba għandhom bżonn jaħarbu lejn is-​salvezza. Jaħarbu ’l barra minn xiex? ’Il barra minn dik li hija l-​antitip taż-​żmien modern taʼ Ġerusalemm żleali, jiġifieri, il-​Kristjaneżmu, u ’l barra minn Babilonja l-​Kbira kollha, is-​sistema dinjija taʼ reliġjon falza.—Apokalissi 18:4.

17, 18. Il-​“ħaġa moqżieża” taż-​żmien modern liema ħerba se tikkaġuna?

¹⁷ Ftakar, ukoll, li fl-​ewwel seklu, meta l-​armata Rumana bl-​istandardi idolatrużi tagħha daħlet fil-​belt qaddisa tal-​Lhud, din kienet hemmhekk biex iġġib ħerba lil Ġerusalemm u lis-​sistema tagħha taʼ qima. Fi żmienna l-​ħerba se tiġi, mhux biss fuq belt waħda, lanqas fuq il-​Kristjaneżmu biss, imma fuq is-​sistema dinjija kollha kemm hi taʼ reliġjon falza.—Apokalissi 18:5-8.

¹⁸ F’Apokalissi 17:16 huwa mbassar li bhima salvaġġa figurattiva lewn l-​iskarlat, li tat prova li hija l-​Ġnus Magħquda, se ddur fuq Babilonja l-​Kbira li hi bħal prostituta u teqridha b’mod vjolenti. Billi juża lingwaġġ grafiku, dan jgħid: “L-​għaxart iqrun u l-​Bhima li rajt, dawn ikollhom mibgħeda għall-​Mara żienja, jagħmluha bħal deżert u jneżżgħuha, u jiklulha laħamha u jaħarquha bin-​nar.” X’se jkun ifisser dan huwa tal-​biżaʼ li tikkontempla. Se jirriżulta fit-​tmiem taʼ kull xorta taʼ reliġjon falza f’kull parti taʼ l-​art. Dan tabilħaqq se juri li t-​tribulazzjoni l-​kbira tkun bdiet.

19. Liema elementi fformaw parti mill-​Ġnus Magħquda minn mindu twaqqfet, u dan għala huwa sinjifikanti?

¹⁹ Huwa notevoli li minn mindu bdiet topera l-​Ġnus Magħquda fl-​1945, elementi ateistiċi u antireliġjużi kienu prominenti fis-​sħubija tagħha. F’diversi żminijiet mad-​dinja kollha, elementi radikali bħal dawn kienu strumentali f’li jikkaġunaw li prattiċi reliġjużi jew jiġu ristretti severament jew ipprojbiti kompletament. Fl-​aħħar ftit tas-​snin, madankollu, kien hemm tnaqqis f’ħafna postijiet taʼ pressjoni mill-​gvern fuq gruppi reliġjużi. Għal xi nies dan għandu mnejn jidher li kwalunkwe periklu għar-​reliġjon għadda.

20. Ir-​reliġjonijiet tad-​dinja liema xorta taʼ reputazzjoni għamlu għalihom infushom?

²⁰ Ir-​reliġjonijiet taʼ Babilonja l-​Kbira jibqgħu jkunu forza taʼ tħarbit b’mod vjolenti fid-​dinja. Titli taʼ gazzetti taʼ spiss jidentifikaw fazzjonijiet li jiggwerraw u gruppi terroristiċi billi jsemmu r-​reliġjon li dawn iħaddnu. Pulizija u suldati taʼ kontra l-​irvellijiet kellhom jidħlu b’forza f’tempji biex iwaqqfu l-​vjolenza bejn fazzjonijiet reliġjużi rivali. Ġemgħat reliġjużi ffinanzjaw rivoluzzjoni politika. Mibgħeda reliġjuża sfrattat sforzi mill-​Ġnus Magħquda biex iżżomm relazzjonijiet stabbli bejn gruppi etniċi. F’li jsegwu l-​mira taʼ paċi u sigurtà, elementi minn ġewwa l-​Ġnus Magħquda kieku jixtiequ jaraw li kwalunkwe influwenza reliġjuża li tfixkilhom tiġi eliminata.

21. (a) Min se jiddetermina meta Babilonja l-​Kbira għandha tinqered? (b) X’inhu urġenti li tagħmel qabel dak iż-​żmien?

²¹ Hemm ukoll fattur importanti ieħor x’tikkunsidra. Għalkemm il-​qran militarizzati minn ġewwa l-​Ġnus Magħquda se jintużaw biex jeqirdu lil Babilonja l-​Kbira, dik il-​qerda fil-​fatt se tkun espressjoni taʼ ġudizzju divin. L-​esekuzzjoni taʼ ġudizzju se tiġi fiż-​żmien maħtur t’Alla. (Apokalissi 17:17) X’għandna nagħmlu sadattant? “Oħorġu minnha”​—oħroġ minn Babilonja l-​Kbira—​twieġeb il-​Bibbja.—Apokalissi 18:4.

22, 23. X’tinvolvi ħarba bħal din?

²² Din il-​ħarba lejn salvezza m’hijiex xi ċaqliqa ġeografika, bħalma għamlu Kristjani Lhud meta abbandunaw lil Ġerusalemm. Hija ħarba ’l barra mir-​reliġjonijiet tal-​Kristjaneżmu, iva, ’il barra minn kwalunkwe parti taʼ Babilonja l-​Kbira. Tfisser li wieħed jissepara lilu nnifsu kompletament mhux biss minn organizzazzjonijiet reliġjużi foloz imma wkoll mid-​drawwiet tagħhom u l-​ispirtu li jiġġeneraw. Hija ħarba lejn il-​post taʼ salvezza ġewwa l-​organizzazzjoni teokratika taʼ Jehovah.—Efesin 5:7-11.

²³ Meta l-​qaddejja midlukin taʼ Jehovah għall-​ewwel darba identifikaw il-​ħaġa moqżieża taż-​żmien modern, il-​Lega tan-​Nazzjonijiet, wara l-​Ewwel Gwerra Dinjija, kif irreaġixxew ix-​Xhieda? Kienu diġà qatgħu s-​sħubijiet tagħhom minn mal-​knejjes tal-​Kristjaneżmu. Imma bil-​mod il-​mod irrealizzaw li kienu għadhom iżommu maʼ xi drawwiet u prattiċi tal-​Kristjaneżmu, bħalma huma l-​użu tas-​salib u ċ-​ċelebrazzjoni tal-​Milied u festi pagani oħrajn. Meta tgħallmu l-​verità dwar dawn l-​affarijiet, aġixxew fil-​pront. Ħadu bis-​serjetà l-​parir f’Isaija 52:11: “Itilqu, itilqu, oħorġu minn hemm, tmissu xejn imniġġes. Oħorġu minn ġo nofsha! Tnaddfu, intom li ġġorru tagħmir il-​Mulej.”

24. Speċjalment mill-​1935 ’l hawn, min ingħaqad fil-​ħarba?

²⁴ Speċjalment mill-​1935 ’il quddiem, folla li dejjem tikber t’oħrajn, nies li ħaddnu l-​prospett li jgħixu għal dejjem fuq l-​art magħmula ġenna, bdew jieħdu azzjoni simili. Huma wkoll ‘lemħu l-​ħaġa moqżieża wieqfa f’post qaddis,’ u rrikonoxxew xi tfisser. Wara li ħadu d-​deċiżjoni tagħhom li jaħarbu, talbu biex l-​ismijiet tagħhom jitneħħew minn reġistri taʼ sħubija t’organizzazzjonijiet li huma parti minn Babilonja l-​Kbira.—2 Korintin 6:14-17.

25. X’inhu meħtieġ minn dak li jkun minbarra li jaqtaʼ xi rabtiet li jistaʼ jkollu maʼ reliġjon falza?

²⁵ Madankollu, li taħrab minn Babilonja l-​Kbira jinvolvi ferm iżjed milli tabbanduna r-​reliġjon falza. Hemm iżjed involut milli tattendi għal xi ftit laqgħat fis-​Sala tas-​Saltna jew toħroġ tippriedka l-​aħbar tajba f’servizz taʼ l-​għalqa darba jew tnejn fix-​xahar. Wieħed jistaʼ jkun fiżikament barra minn Babilonja l-​Kbira, imma ħallieha hu verament warajh? Issepara hu lilu nnifsu mid-​dinja li tagħha Babilonja l-​Kbira hija parti prominenti? Għadu jżomm maʼ dawk l-​affarijiet li jirriflettu l-​ispirtu tagħha​—spirtu li jinjora l-​livelli taʼ tjieba t’Alla? Qiegħed hu jittratta l-​immoralità sesswali u l-​fedeltà fiż-​żwieġ ħafif ħafif? Jenfasizza l-​interessi persunali u materjali iżjed mill-​interessi spiritwali? Hu ma jridx iħalli lilu nnifsu jiġi mfassal fuq din is-​sistema t’affarijiet.—Mattew 6:24; 1 Pietru 4:3, 4.

Tħalli Xejn Ifixkel Il-​Ħarba Tiegħek!

26. X’se jgħinna biex mhux sempliċement nibdew il-​ħarba imma nispiċċawha b’suċċess?

²⁶ Fil-​ħarba tagħna lejn is-​salvezza, huwa imperattiv li ma nħarsux b’xenqa lejn l-​affarijiet taʼ warajna. (Luqa 9:​62) Għandna bżonn inżommu mħuħna u qlubna msammrin sod fuq is-​Saltna t’Alla u t-​tjieba tiegħu. Iddeterminati aħna li nuru l-​fidi tagħna billi nfittxu l-​ewwel dawn l-​affarijiet, b’fiduċja li Jehovah se jbierek korsa leali bħal din? (Mattew 6:31-33) Il-​konvinzjonijiet tagħna bbażati Skritturalment għandhom iqanqluna għal dak l-​għan hekk kif nistennew bil-​ħerqa li jiġu żvelati żviluppi sinjifikanti fuq ix-​xena dinjija.

27. Għala huwa importanti li taħseb serjament dwar il-​mistoqsijiet li jsiru hawnhekk?

²⁷ L-​esekuzzjoni taʼ ġudizzju divin se tibda bil-​qerda taʼ Babilonja l-​Kbira. Dak l-​imperu taʼ reliġjon falza bħal prostituta se jiġi eliminat mill-​eżistenza għal dejjem. Dak iż-​żmien huwa ferm fil-​qrib! X’se tkun il-​pożizzjoni tagħna bħala individwi meta jasal dak iż-​żmien notevoli? U fil-​quċċata tat-​tribulazzjoni l-​kbira, meta l-​bqija tas-​sistema mill-​agħar taʼ Satana tiġi meqruda, fuq liema naħa se ninstabu? Jekk nieħdu l-​azzjoni meħtieġa issa, is-​salvezza tagħna hija żgurata. Jehovah jgħidilna: “Min jismaʼ lili jgħix moħħu mistrieħ.” (Proverbji 1:33) Billi nkomplu naqdu lil Jehovah lealment u mimlijin ferħ matul il-​konklużjoni taʼ din is-​sistema, nistgħu nikkwalifikaw biex naqdu lil Jehovah għal dejjem. (w96 6/1)

[Nota taʼ taħt]

Tiftakar Int?

◻ X’inhi l-​“ħaġa moqżieża” taż-​żmien modern?

◻ F’liema sens hija “l-​ħaġa moqżieża . . . f’post qaddis”?

◻ X’inhu involut f’ħarba lejn is-​salvezza issa?

◻ Azzjoni bħal din għala hi urġenti?

[Stampa f’paġna 29]

Biex jibqgħu ħajjin, is-​segwaċi taʼ Ġesù kellhom jaħarbu bla dewmien