Mistoqsijiet mill-Qarrejja
“It-Torri Taʼ L-Għassa” taʼ l-1 taʼ Novembru, 1995, iffoka fuq dak li Ġesù qal dwar “dan in-nisel,” [“ġenerazzjoni,” “NW”] bħalma naqraw f’Mattew 24:34. Ifisser dan li hemm xi dubju dwar jekk is-Saltna t’Alla ġietx stabbilita fis-sema fl-1914?
Dik id-diskussjoni f’It-Torri Taʼ L-Għassa m’offriet assolutament l-ebda bidla fit-tagħlim fundamentali tagħna dwar l-1914. Ġesù spjega s-sinjal biex jimmarka l-preżenza tiegħu fil-qawwa tas-Saltna. Għandna biżżejjed evidenza li dan is-sinjal għadu għaddej bit-twettiq tiegħu mill-1914 ’l hawn. Il-fatti dwar il-gwerer, il-ġuħ, il-pesti, it-terremoti, u l-evidenzi l-oħrajn jikkonfermaw li mill-1914 ’l hawn, Ġesù kien attiv bħala s-Sultan tas-Saltna t’Alla. Dan jindika li minn dak iż-żmien ’l hawn aħna konna u għadna fil-konklużjoni tas-sistema t’affarijiet.
X’kien, mela, qiegħed jikkjarifika It-Torri Taʼ L-Għassa? Sewwa, iċ-ċavetta kienet is-sens li fih Ġesù uża l-kelma “ġenerazzjoni” f’Mattew 24:34. Dak il-passaġġ jaqra: “Tassew, ngħidilkom, li ma jgħaddix dan in-nisel [“ġenerazzjoni,” NW] sa ma jiġri dan kollu.” Ġesù x’ried ifisser b’“ġenerazzjoni,” kemm fi żmienu u kemm fi żmienna?
Ħafna skritturi jikkonfermaw li Ġesù ma wżax “ġenerazzjoni” biex jirreferi għal xi grupp żgħir jew distint, jiġifieri l-mexxejja Lhud jew id-dixxipli leali tiegħu biss. Minflok, hu uża “ġenerazzjoni” meta kkundanna l-mases taʼ Lhud li rrifjutawh. B’ferħ, iżda, individwi setgħu jagħmlu dak li l-appostlu Pietru ħeġġeġ fil-jum taʼ Pentekoste, biex jindmu u ‘jsalvaw lilhom infushom minn dan in-nisel [“ġenerazzjoni,” NW] ħażin.’—Atti 2:40.
F’dik l-istqarrija, Pietru b’mod ċar ma kienx qed jirreferi preċiżament għal xi età ffissata jew għal xi tul taʼ żmien, lanqas ma kien qed jorbot il-“ġenerazzjoni” maʼ xi data partikulari. Ma qalx li n-nies kellhom jiġu salvati mill-ġenerazzjoni li twieldet fl-istess sena li kien twieled fiha Ġesù jew il-ġenerazzjoni li twieldet fis-sena 29 E.K. Pietru kien qed jitkellem dwar il-Lhud li ma kinux jemmnu taʼ dak il-perijodu—xi wħud forsi kienu xi ftit żgħar, oħrajn kienu akbar—li kienu ġew esposti għat-tagħlim taʼ Ġesù, kienu raw jew semgħu bil-mirakli tiegħu, u ma kinux aċċettawh bħala l-Messija.
Dak evidentement huwa kif Pietru fehem l-użu taʼ Ġesù tal-kelma “ġenerazzjoni” meta hu u tliet appostli oħrajn kienu maʼ Ġesù fuq l-Għolja taż-Żebbuġ. Skond l-istqarrija profetika taʼ Ġesù, il-Lhud taʼ dak il-perijodu—bażikament, il-kontemporanji taʼ Ġesù—kienu se jesperjenzaw jew jisimgħu bi gwerer, terremoti, ġuħ, u evidenzi oħrajn li t-tmiem tas-sistema Lhudija kien fil-qrib. Fil-fatt, dik il-ġenerazzjoni m’għaddietx qabel ġie t-tmiem fis-sena 70 E.K.—Mattew 24:3-14, 34.
Irridu nammettu li aħna mhux dejjem ħadna l-kliem taʼ Ġesù f’dak is-sens. Hemm tendenza għal bnedmin imperfetti li jkunu jridu jkunu speċifiċi dwar id-data taʼ meta se jiġi t-tmiem. Ftakar li saħansitra l-appostli fittxew iżjed speċifikazzjonijiet, billi staqsew: “Mulej, hu dan iż-żmien li fih int se terġaʼ twaqqaf is-Saltna taʼ Iżrael?” (Korsiv tagħna.)—Atti 1:6.
B’intenzjonijiet sinċieri simili, il-qaddejja t’Alla fiż-żminijiet moderni pprovaw jisiltu minn dak li qal Ġesù dwar il-“ġenerazzjoni” xi element taʼ żmien speċifiku kkalkulat mill-1914. Per eżempju, mod wieħed taʼ raġunar kien li ġenerazzjoni tistaʼ tkun taʼ 70 jew 80 sena, komposta minn nies kbar biżżejjed biex jifhmu s-sinjifikat taʼ l-ewwel gwerra dinjija u żviluppi oħrajn; b’hekk nistgħu nikkalkulaw xi ftit jew wisq kemm hu qrib it-tmiem.
Kien kemm kien intenzjonat tajjeb raġunar bħal dan, kien dan jaqbel mal-parir li ssokta jagħti Ġesù? Ġesù qal: “Dwar dak il-jum u s-siegħa ħadd ma jaf xejn la meta se jaslu, la l-anġli tas-sema u lanqas l-Iben; ħadd ħlief il-Missier waħdu. . . . Ishru, mela, għax ma tafuhx il-jum li fih jiġi Sidkom.”—Mattew 24:36-42.
Għalhekk l-informazzjoni riċenti f’It-Torri Taʼ L-Għassa dwar din il-“ġenerazzjoni” ma bidlitx il-fehma tagħna taʼ x’seħħ fl-1914. Imma din tassew tatna fehma iżjed ċara taʼ l-użu taʼ Ġesù tat-terminu “ġenerazzjoni,” billi għenitna naraw li l-użu tiegħu ma kienx bażi għal kalkolu—billi ngħoddu mill-1914—taʼ kemm aħna qrib tat-tmiem.(w97 6/1)