Iżżi Ħajr—Is-​Saltna Messjanika taʼ Jehovah Taħkem

“Niżżuk ħajr, Alla Jehovah, li Tistaʼ Kollox, . . . għaliex int ħadt il-​qawwa kbira tiegħek u bdejt taħkem bħala sultan.”—RIVELAZZJONI 11:17.

1. Il-​president tal-​Watch Tower Society xi stqarr wara ż-​żjara tiegħu fl-​Ewropa fl-​1911?

KMIENI fl-​1911, il-​president tal-​Watch Tower Society, C. T. Russell, ta serje taʼ taħdidiet fuq il-​Bibbja fi bliet ewlenin fl-​Ewropa. Billi kkummenta fuq dak il-​vjaġġ, Russell kiteb dan li ġej f’The Watch Tower tal-​15 taʼ Mejju, 1911: “Aħna bqajna skantati li sibna tant evidenzi taʼ prosperità kullimkien . . . Il-​qarrejja tagħna jafu li għal xi snin aħna konna qed nistennew li din l-​Era tagħlaq bi żmien taʼ nkwiet ikrah, u nistennewha li tfaqqaʼ f’daqqa b’qawwa mhux wisq wara Ottubru, 1914, li, sa fejn nistgħu nifhmu l-​Iskrittura, hija d-​data li fiha ż-​Żminijiet tal-​Ġentili — it-​tħollija tad-​dominji tal-​art mill-​Ġentili — se jintemmu; iż-​żmien, għalhekk, meta s-​saltna tal-​Messija se jkun imissha tibda teżerċita l-​qawwa tagħha.” Kienet imwettqa din l-​istennija?

2. Il-​paċi kif tkissret fl-​1914, u b’liema konsegwenzi tal-​biki?

² Matul l-​ewwel nofs tal-​1914, id-​dinja dehret fis-​sigurtà u ħielsa mill-​gwerra. Imma l-​paċi tkissret f’daqqa bil-​qtil tal-​eredi tat-​tron Awstrijak minn wieħed Serbjan fit-​28 taʼ Ġunju, 1914. L-​Awstrija u l-​Ungerija malajr iddikjaraw gwerra kontra s-​Serbja. Ir-​Russja żammet mas-​Serbja, u għalhekk il-​Ġermanja ddikjarat gwerra kontra r-​Russja fl-​1 t’Awissu. Imbagħad il-​Ġermanja ddikjarat gwerra kontra Franza fit-​3 t’Awissu; il-​Gran Britannja kontra l-​Ġermanja fl-​4 t’Awissu; Montenegro kontra l-​Awstrija u l-​Ungerija fis-​7 t’Awissu; il-​Ġappun kontra l-​Ġermanja fit-​23 t’Awissu; l-​Awstrija u l-​Ungerija kontra l-​Belġju fit-​28 t’Awissu. Ħafna kienu jemmnu li l-​gwerra malajr kienet se tintemm. Minflok, hija żdiedet għall-​agħar gwerra fl-​istorja sa dak iż-​żmien, b’19 iktar pajjiżi jindaħlu biex iżommu maʼ naħa jew maʼ oħra f’banju taʼ dmija internazzjonali li sewa iktar minn 13,000,000 ħajja militari u ċivili, b’iżjed minn 21,000,000 immankati u feruti.

3, 4. X’ġara fil-​kwartieri ġenerali tas-​Soċjetà l-​Ġimgħa fil-​għodu tat-​2 t’Ottubru, 1914?

³ Il-​Ġimgħa fil-​għodu, it-​2 t’Ottubru, 1914, Russell annunzja lill-​istaff tal-​kwartieri ġenerali tal-​Watch Tower Society fi Brooklyn, New York: “Iż-​żminijiet tal-​Ġentili ntemmu; is-​slaten tagħhom kellhom il-​jum tagħhom.” Dan intlaqaʼ minn applaws b’entużjażmu mill-​familja f’Betel, “id-​dar t’Alla.”

⁴ X’ġustifikazzjoni kellhom C. T. Russell u sħabu biex ikunu tant ferħanin f’dik il-​għodwa t’Ottubru? Minfejn toriġina l-​espressjoni “Żminijiet il-​Ġentili”? X’evidenza hemm li Żminijiet il-​Ġentili ntemmu f’Ottubru 1914? U dak kif għandu jeffettwa lilek?

Ġerusalemm u Żminijiet il-​Ġentili

5. Fejn toriġina l-​espressjoni “Żminijiet il-​Ġentili”?

⁵ L-​espressjoni “Żminijiet il-​Ġentili,” jew iż-​“żminijiet maħtura tal-​ġnus,” tiġi mill-​profezija kbira taʼ Ġesù rigward il-​qerda taʼ Ġerusalemm. (Luqa 21:5-36 King James Version) Jumejn qabel ma taha, Ġesù ppreżenta lilu nnifsu lill-​abitanti taʼ Ġerusalemm bħala l-​Messija tagħhom. Fil-​waqt li hu bl-​umiltà rikeb fuq ħmar lejn il-​belt, folol taʼ Lhud għajtu bi trijonf, l-​istess bħalma bassar Żakkarija 9:9: “Imbierek hu l-​Wieħed li ġej bħala s-​Sultan f’isem Jehovah,” huma għajtu.—Luqa 19:28-40.

6, 7. Liema ħtija terribbli taʼ demm ġabu fuqhom infushom il-​Ġudeani tal-​ewwel seklu, u b’liema konsegwenzi?

⁶ Imma Ġesù kien jaf li l-​opinjoni pubblika malajr kienet se ddur kontra tiegħu minħabba l-​mibgħeda qattiela tal-​mexxejja reliġjużi taʼ Ġerusalemm taħt l-​influwenza taʼ missierhom, ix-​Xitan. (Ġenesi 3:15; Ġwann 8:44) Ftit wara dan, fl-​14 taʼ Nisan, folla taʼ Lhud għajtet biex Ġesù jingħata l-​mewt. “Demmu jiġi fuqna u fuq uliedna,” huma għajtu quddiem il-​gvernatur Ruman li kien indeċiż. (Mattew 27:24, 25) Minflok aċċettaw lil Ġesù bħala Sultan Messjaniku, il-​qassisin ewlenin iddikjaraw: “M’għandna l-​ebda sultan ħlief lil Ċesri.” (Ġwann 19:15) Il-​Messija veru ġie mbagħad imsammar maʼ zokk tat-​tortura biex imut, billi ġie akkużat b’mod falz bħala xewwiexi kontra Ruma u midgħi kontra dak Alla tal-​Lhud.—Mark 14:61-64; Luqa 23:2; Ġwann 18:36; 19:7.

⁷ Korla divina żgur li kienet se tiġi fuq l-​abitanti tal-​Ġudea minħabba l-​ħtija taʼ demm terribbli tagħhom. Ġerusalemm, bit-​tempju manjifiku tagħha, ma setgħetx tissejjaħ iżjed, “il-​belt tas-​Sultan il-​kbir,” Jehovah. (Mattew 5:35; Luqa 13:33-35) Xi ġranet qabel il-​mewt taʼ Ġesù, id-​dixxipli tiegħu tkellmu b’ammirazzjoni dwar il-​bini tat-​tempju taʼ dik il-​belt. Bi tweġiba, Ġesù ħabbar: “Inkwantu għal dawn l-​affarijiet li qegħdin tilmħu, se jiġu l-​jiem li fihom mhux se titħalla hawn ġebla fuq ġebla u ma tiġix mitfugħa ’l isfel.—Luqa 21:5, 6.

8. Meta Ġesù ta “s-​sinjal” taʼ ġrajjiet li kienu jwasslu għall-​qerda taʼ Ġerusalemm, x’kien hemm involut iżjed?

⁸ Id-​dixxipli taʼ Ġesù staqsew sorpriżi: “Għalliem, meta se jkunu attwalment dawn l-​affarijiet, u x’se jkun is-​sinjal meta dawn l-​affarijiet huma ddestinati li jseħħu?” (Luqa 21:7) Bi tweġiba Ġesù ħabbar bi preċiżjoni l-​ġrajjiet li wasslu għall-​qerda taʼ Ġerusalemm, u żied din il-​frażi sinjifikanti: “Ġerusalemm se tkun mirfusa ’l isfel mill-​Ġentili, sakemm iż-​żminijiet tal-​Ġentili jkunu twettqu.” (Luqa 21:8-24, KJ) Ġesù b’hekk ipponta ’l quddiem lejn xi ħaġa li kellha tiġi wara l-​qerda taʼ Ġerusalemm—xi ħaġa li kellha tistenna “sakemm iż-​żminijiet tal-​Ġentili jkunu twettqu.” B’referenza għas-​“sinjal,” Ġesù qal: “Meta taraw dawn l-​affarijiet iseħħu, kunu afu li s-​saltna t’Alla hija qrib.” (Luqa 21:31) Għalhekk, is-​sinjal kien se jkollu twettieq doppju. L-​ewwel twettieq, jew dak fuq skala żgħira, kien se jindika li ‘l-​ħerba taʼ Ġerusalemm qorbot.’ (Luqa 21:20) It-​tieni twettieq, u dak akbar, kien se jiġi meta Żminijiet il-​Ġentili jkunu ntemmu, u kien jindika li “s-​saltna t’Alla hija qrib.”—Qabbel Mattew 24:3.

Ġerusalemm tal-​Art Mibdula minn Belt Superjuri

9. Ġerusalemm fuq l-​art meta tilfet l-​istat iffavorit tagħha, u minn xiex ġiet mibdula?

⁹ Billi qal “Ġerusalemm se tkun mirfusa ’l isfel mill-​ġnus sakemm iż-​żminijiet tal-​ġnus ikunu twettqu,” kien Ġesù qed jissuġġerixxi li l-​belt tal-​art se tiġi eventwalment restawrata għal favur divin? Le. Wara l-​qtil tal-​Iben maħbub t’Alla, Ġerusalemm tal-​art tilfet l-​istat speċjali tagħha għal dejjem u ġiet mibdula minn belt bil-​wisq iżjed superjuri, “belt taʼ Alla l-​ħaj, Ġerusalemm tas-​sema.”—Ebrej 12:22; Mattew 23:37,38; 27:50,51.

10. Xi tfisser l-​espressjoni “Ġerusalemm tas-​sema”?

¹⁰ L-​espressjoni “Ġerusalemm tas-​sema” hija wżata fil-​Bibbja biex tiddeskrivi s-​Saltna tas-​sema li ma tistax tiġi meqruda u li lejha ġew imsejħin Kristjani midlukin.a (Ebrej 11:10; 12:22, 28) Meta l-​appostlu Pawlu kiteb dan, il-​belt fuq l-​art bit-​tempju tagħha kienet għadha wisq ammirata mil-​Lhud. B’hekk, Pawlu fakkar lill-​Kristjani Ebrej li “m’għandniex hawn belt li tibqaʼ, imma qegħdin infittxu bil-​ħrara dik li ġejja.”—Ebrej 13:14.

Għala Tissejjaħ Ġerusalemm tas-​Sema

11. Sakemm Ġerusalemm tal-​art tilfet il-​favur taʼ Jehovah, x’kienet tirrappreżenta?

¹¹ Ġerusalemm kienet ilha żmien twil il-​kapitali tal-​ġens taʼ Iżrael, li s-​slaten tagħha kienu jintqalu li “jpoġġu fuq it-​tron taʼ Jehovah.” (1 Kronaki 29:23) Ukoll, Jehovah għamel patt maʼ David li l-​istat taʼ sultan kellu jibqaʼ fil-​familja tiegħu għal dejjem. Bħalma kapitali moderni, bħal Washington, Moska, Canberra, u Pretorja, jintużaw biex jidentifikaw il-​gvernijiet rispettivi tagħhom, l-​istess Ġerusalemm tintuża fil-​Bibbja biex tirrappreżenta s-​saltna taʼ David.—2 Samwel 7:16; Luqa 1:32.

12. It-​terminu “Żminijiet il-​Ġentili” kif għandu jiġi applikat?

¹² Is-​saltna taʼ David kellha dominju limitat, li kien jestendi biss sal-​limiti tal-​art deċiżi minn Alla taʼ Iżrael tal-​qedem. Ġerusalemm fuq l-​art kienet għalhekk biss tip tas-​Saltna Messjanika vera li kellha taħkem mis-​sema u jkollha l-​art kollha bħala d-​dominju tagħha. (Salm 2:2, 7, 8; Danjel 7:13, 14; 2 Timotew 4:18) B’hekk, il-​ktieb The Time Is At Hand, ippubblikat mill-​Watch Tower Society fl-​1889, stqarr b’mod ċar: “It-​terminu ‘Żminijiet il-​Ġentili’ kien applikat mill-​Mulej tagħna għal dak l-​intervall tal-​istorja tal-​art bejn it-​tneħħija tas-​Saltna tipika t’Alla, is-​Saltna taʼ Iżrael (Eżek. 21:25-27), u l-​introduzzjoni u t-​twaqqif tal-​antitip tagħha, il-​vera Saltna t’Alla.”

Żminijiet il-​Ġentili—Kemm Huma Twal?

13. Meta bdew Żminijiet il-​Ġentili, u għala twieġeb hekk?

¹³ Is-​saltna tipika t’Alla ġiet imwaqqaʼ mis-​sultan Babilonjan Nebukadneżżar fis-​sena 607 Q.E.K. Sas-​sebaʼ xahar Lhudi, madwar nofs Ottubru, l-​art saret ħerba.b (2 Slaten 25:8, 9, 22, 25, 26) Bi prova li dan ġara bil-​permess divin, Alla Jehovah ta lil Nebukadneżżar ħolma. Kienet tinvolvi siġra li ġiet imqaċċta u tħalliet tikber mill-​ġdid wara perijodu taʼ “sebaʼ żminijiet.” Il-​ħolma kellha twettieq inizzjali meta Nebukadneżżar reġaʼ tpoġġa fuq it-​tron tiegħu wara stat temporanju taʼ ġenn.—Danjel 4:10-17, 28-36.

14. X’kien il-​punt prinċipali tal-​ħolma taʼ Nebukadneżżar?

¹⁴ Madankollu, it-​tema tal-​ħolma taʼ Nebukadneżżar uriet li t-​twettieq prinċipali tagħha kien jinvolvi s-​saltna tipika t’Alla, li lilha dak is-​sultan Ġentil kien ingħatalu permess li ‘jqaċċatha.’ Il-​ħolma kkonkludiet b’din l-​istqarrija taʼ skop: “Biex in-​nies li jgħixu jistgħu jkunu jafu li l-​Iktar Għoli hu Ħakkiem fis-​saltna tal-​bnedmin u li lil dak li jrid hu, hu jagħtiha u jqiegħed fuqha saħansitra lill-​iktar wieħed baxx mill-​bnedmin.—Danjel 4:17.

15. Ġesù Kristu kif ikkwalifika bħala “l-​iktar wieħed baxx mill-​bnedmin”? (Mattew 11:29)

¹⁵ Persuna waħda biss saret tikkwalifika fl-​aspetti kollha biex tissejjaħ “l-​iktar wieħed baxx mill-​bnedmin.” L-​Iben uniġenitu t’Alla ta prova tiegħu nnifsu li kien hekk billi minn jeddu ħalla l-​glorja tiegħu tas-​sema biex jitwieled bħala bniedem, bħala Ġesù, li sofra l-​iktar mewta umiljanti u krudili minn idejn Satana. (Filippin 2:3, 5-11) Wara l-​irxoxt tiegħu lura għall-​glorja fis-​sema, Ġesù kellu jistenna sakemm intemm il-​perijodu taʼ sebaʼ żminijiet taʼ ħakma Ġentili qabel ma ġie mogħti t-​tron bħala s-​Sultan Messjaniku fuq il-​bnedmin.—Ebrej 10:12, 13.

16. Il-​ktieb taʼ Rivelazzjoni kif igħin lill-​Kristjani biex jikkalkolaw meta ntemmu s-​sebaʼ żminijiet?

¹⁶ Imma x-​Xhieda taʼ Jehovah kif waslu biex jifhmu t-​tul tas-​sebaʼ żminijiet? Il-​Bibbja tirrivela li “żmien u żminijiet u nofs żmien,” jew tliet żminijiet u nofs, jammontaw għal 1,260 jum. (Rivelazzjoni 12:6, 14) Għalhekk, id-​doppju taʼ dak in-​numru, jew sebaʼ żminijiet, kien jammonta għal 2,520 jum. Fuq il-​bażi tal-​gwida profetika taʼ “jum għal sena,” is-​sebaʼ zminijiet jammontaw għal 2,520 sena. (Numri 14:34; Eżekjel 4:6) B’dan il-​kalkolu, iż-​Żminijiet tal-​Ġentili, li bdew f’Ottubru tas-​sena 607 Q.E.K., intemmu 2,520 sena wara f’Ottubru tal-​1914.

17. Liema taħbira taʼ ferħ kienet waslet biex issir magħrufa fl-​1914?

¹⁷ F’Ottubru tal-​1914, Alla Jehovah waqqaf lil Ibnu l-​maħbub, il-​Mulej Ġesù Kristu, fuq it-​tron fis-​Saltna tas-​sema. Fl-​aħhar, il-​viżjoni taʼ Rivelazzjoni tal-​appostlu Kristjan Ġwanni bdiet issir realtà, u t-​taħbira setgħet issir: “Is-​saltna tad-​dinja tassew saret is-​saltna tal-​Mulej tagħna [Jehovah] u tal-​Kristu tiegħu, u hu [Jehovah] se jaħkem bħala sultan għal dejjem taʼ dejjem.” (Rivelazzjoni 1:10; 4:1; 11:15) X’aħbar glorjuża hi din u x’raġuni għall-​akbar hena min-​naħa tal-​werrieta bi sħab u s-​sudditi kollha taʼ dik is-​Saltna!—Rivelazzjoni 11:17.

18. Kundizzjonijiet taʼ niket għala ħaqru lill-​umanità mill-​1914 ’il hawn?

¹⁸ Veru, għall-​biċċa l-​kbira tal-​bnedmin, ma kienx hemm wisq kuntentiżża fuq l-​art mill-​1914 ’il hawn. Imma l-​kundizzjonijiet taʼ gwaj fuq l-​art huma prova li l-​ħakma taʼ Satana waslet biex tintemm. Kif nafuh dan? Il-​ktieb taʼ Rivelazzjoni jindika li t-​twaqqif tas-​Saltna t’Alla kien se jirriżulta fi gwerra fis-​sema. Satana u d-​demonji tiegħu kellhom jiġu mwaddba ’l barra mis-​sema u llimitati għall-​viċinanza tal-​art tagħna. Wara li ra din ir-​rebħa permezz taʼ viżjoni profetika, Ġwanni semaʼ leħen qawwi jgħid: “Ifirħu, intom is-​smewwiet u intom li toqogħdu fihom! Gwaj għall-​art u għall-​baħar, għaliex ix-​Xitan niżel għandkom, billi għandu rabja kbira, għax jaf li għandu perijodu qasir taʼ żmien.”—Rivelazzjoni 12:1-12.

19. Kristjani veri għala huma tant grati li huma ħajjin f’dan iż-​żmien?

¹⁹ Kundizzjonijiet dinjin li dejjem jeħżienu mill-​1914 ’il hawn huma prova li l-​viżjoni taʼ Ġwanni saret realtà u li t-​tmiem tal-​bnedmin kollha li jirrifjutaw li jissottomettu lilhom infushom lejn is-​sovranità t’Alla qed joqrob perikolożament viċin. (Luqa 21:10, 11, 25-32) Kemm hu eċċitanti li tkun tgħix f’dan iż-​żmien tal-​għaġeb meta Alla Jehovah, li Jistaʼ Kollox, se jissetilja l-​kwistjoni l-​kbira tas-​sovranità tiegħu għal fuq l-​art! Imbagħad, l-​art se tinbidel f’ġenna sabiħa, u l-​bnedmin taʼ tjieba li jibqgħu ħajjin se jintrefgħu għall-​perfezzjoni. Saħansitra l-​mejtin se jiġu mqajmin u jingħataw l-​opportunità biex jikkwalifikaw għall-​ħajja taʼ dejjem.—Rivelazzjoni 20:1-3, 12, 13; 21:3-5.

Bżonn Modern għal Aġġustament

20. (a) Fuq l-​art, min ta prova li kienu l-​veri qaddejja taʼ Jehovah qabel l-​1914? (b) Liema aġġustamenti kienu lesti li jagħmlu Kristjani midlukin lejali?

²⁰ Għal 38 sena qabel l-​1914, l-​Istudenti tal-​Bibbja, kif kienu jissejħu x-​Xhieda taʼ Jehovah dak iż-​żmien, ippuntaw lejn dik id-​data bħala s-​sena meta ż-​Żminijiet tal-​Ġentili kellhom jintemmu.c Xi prova li tispikka hi dik li huma kienu l-​qaddeja veri taʼ Jehovah! Madankollu, bħall-​qaddejja t’Alla tal-​ewwel seklu, huma wkoll kellhom xi stennijiet żballjati. Per eżempju, huma stennew li l-​għadd sħiħ taʼ Kristjani midlukin kien se jiġi mqajjem għas-​sema sa Ottubru tal-​1914. Huma ħasbu wkoll li l-​gwerra li bdiet fl-​1914 kienet se twassal direttament għat-​tmiem tad-​dinja taʼ Satana.

21. X’dixxiplina ġarrbu l-​Kristjani veri matul l-​Ewwel Gwerra Dinjija?

²¹ Maż-​żmien, madankollu, Kristjani midlukin irrealizzaw li kien hemm wisq xogħol għalihom x’jagħmlu fuq l-​art. Minħabba l-​persistenza tagħhom fil-​għoti taʼ xiehda pubblika matul l-​Ewwel Gwerra Dinjija, huma ġarrbu persekuzzjoni feroċi mill-​awtoritajiet politiċi, imxewxa mill-​kleru tal-​Kristjaneżmu. (Salm 2:1-6) L-​attività tal-​Kristjani veri ngħatat daqqa qawwija fil-​21 taʼ Ġunju, 1918, meta uffiċjali ewlenin tal-​Watch Tower Society fl-​Istati Uniti ġew issentenzjati għal 20 sena ħabs fuq akkużi foloz.

22, 23. (a) Kristjani midlukin lejali x’għamlu mill-​l919 ’il hawn, u b’liema rispons doppju? (b) X’inhi Ġerusalemm antitipika mhix lejali?

²² L-​Ewwel Gwerra Dinjija ntemmet f’daqqa f’Novembru tal-​1918. Imbagħad, fil-​25 taʼ Marzu, 1919, l-​uffiċjali tal-​Watch Tower Society inħelsu mill-​ħabs. Huma iktar tard ġew meħlusa għalkollox minn kull akkuża. Perijodu mhux mistenni taʼ paċi nfetaħ għal dawk il-​Kristjani midlukin lejali, simili għall-​opportunitajiet li ppreżentaw lilhom infushom lid-​dixxipli tal-​bidu taʼ Kristu wara li ngħataw qawwa mill-​ispirtu qaddis fis-​sena 33 E.K.—Atti 2:17-21, 41.

²³ Mill-​1919 ’il hawn, Kristjani midlukin lejali bħala grupp b’mod żeluż obdew il-​kmand involut fil-​kliem taʼ Ġesù f’​Mattew 24:14: “Din l-​aħbar tajba tas-​saltna se tkun ippridkata mal-​art abitata kollha bħala xiehda lill-​ġnus kollha; u mbagħad se jiġi t-​tmiem.” Bħala riżultat, kważi erbaʼ miljuni min-​“ngħaġ oħra” taʼ Kristu ddedikaw ħajjithom biex jaqdu lil Jehovah f’għaqda mal-​fdal midluk. (Ġwann 10:16) Il-​Kristjaneżmu, taħt l-​influwenza tal-​kleru tiegħu, ikompli jirrifjuta l-​messaġġ tas-​Saltna. Il-​preferenza tiegħu għal skemi politiċi umani u l-​persekuzzjoni tiegħu fuq ix-​Xhieda taʼ Jehovah jixbhu lit-​trattament tal-​biżaʼ mogħti lil Kristu mill-​abitanti tal-​Ġudea tal-​ewwel seklu. Sewwa sew bħalma Jehovah esegwixxa l-​ġudizzju tiegħu fuq Ġerusalemm, hekk se jagħmel lil Ġerusalemm antitipika mhix lejali, jiġifieri, il-​Kristjaneżmu. U bħalma l-​ġenerazzjoni li semgħet il-​messaġġ taʼ ġudizzju taʼ Kristu għexet biex iġġarrab il-​qerda li bassar, l-​istess il-​ġenerazzjoni preżenti mill-​1914 ’il hawn “bl-​ebda mod ma se tgħaddi” qabel tiġi t-​“tribulazzjoni kbira” mbassra.—Mattew 24:21, 22, 34.

24. Biex nibqgħu ħajjin għal ġod-​dinja ġdida t’Alla, x’irridu nagħmlu?

²⁴ X’irridu nagħmlu biex nibqgħu ħajjin fit-​tribulazzjoni kbira u nibqgħu ngħixu ġod-​dinja ġdida t’Alla? Minkejja stennijiet żballjati li xi ħadd minna setaʼ kellu, irridu ngħassu kontra li norqdu rigward id-​dmirijiet Kristjani tagħna. (Ħabakkuk 2:3; 1 Tessalonkin 5:1-6) Dawk li kapaċi jiftakru ġrajjiet mill-​1914 qed isiru dejjem iżjed ftit. B’hekk, irridu noqogħdu attenti; m’hemmx ħin x’nitilfu. (Mattew 24:42) Dawk kollha li jridu jibqgħu ħajjin fit-​tmiem tad-​dinja mill-​agħar taʼ Satana jridu jaġixxu issa b’tali mod li juri qbil mal-​kliem imnebbaħ: “Niżżuk ħajr, Alla Jehovah, li Tistaʼ Kollox, . . . għaliex int ħadt il-​qawwa kbira tiegħek u bdejt taħkem bħal sultan.”—Rivelazzjoni 11:17.

[Noti taʼ taħt]

Kif Se Twieġeb?

◻ Ġerusalemm tal-​qedem x’kienet tirrappreżenta, imma kif tilfet l-​istat onorat tagħha?

◻ Meta bdew u ntemmu Żminijiet il-​Ġentili, u b’liema riżultat imbassar?

◻ Il-​qerda taʼ Ġerusalemm mhix lejali x’kienet tiffigura bil-​quddiem?

◻ Kif nafu li t-​tribulazzjoni kbira hi fil-​qrib, u x’irridu nagħmlu biex nibqgħu ħajjin?