Kapitlu 23

Żomm Sewwa f’Moħħok il-​Jum taʼ Jehovah

1. (a) Meta għall-​ewwel darba tgħallimt li l-​ħelsien mill-​qsim il-​qalb taʼ din is-​sistema qadima kien qrib, kif irreaġixxejt? (b) Liema mistoqsijiet rigward dan għandna nikkunsidraw bis-​serjetà?

BLA DUBJU waħda mill-​ewwel affarijiet li int tgħallimt minn studju tal-​Bibbja kienet li l-​ħelsien mill-​uġigħ il-​qalb tal-​ħajja fis-​sistema preżenti t’affarijiet huwa qrib. Bdejt tirrealizza li l-​iskop t’Alla huwa li l-​art kollha tkun Ġenna. Il-​kriminalità, il-​gwerer, il-​mard u l-​mewt m’humiex se jkunu iktar, u saħansitra wħud maħbubin mejtin se jerġgħu jgħixu. Xi prospett li jferraħ il-​qalb! Kemm dan kollu huwa qrib ġie enfasizzat mill-​evidenza li l-​preżenza inviżibbli taʼ Kristu bħala Sultan ħakkiem bdiet fl-​1914 E.K. u li minn dak iż-​żmien ’l hawn konna u għadna fl-​aħħar jiem taʼ din id-​dinja mill-​agħar. Ipproduċa dak l-​għarfien bidliet f’ħajtek? Juri tassew il-​mod taʼ ħajja tiegħek konvinzjoni li “l-​jum taʼ Jehovah” huwa qrib?

2. (a) Meta se jiġi l-​“jum taʼ Jehovah”? (b) Il-​fatt li Jehovah ma rrivelax “il-​jum jew is-​siegħa” kif wera li kien u għadu taʼ benefiċċju?

² L-​Iskrittura turi b’mod ċar li l-​“ġenerazzjoni” li rat is-​sinjal tal-​preżenza taʼ Kristu kellha tara wkoll il-​“jum il-​kbir taʼ Jehovah” fejn hu jesegwixxi ħaqq kontra dawk kollha li jipprattikaw in-​nuqqas taʼ tjieba. (Matt. 24:34; Sof. 1:14–2:3) Imma l-​Bibbja ma tindikax id-​data eżatta meta Ġesù Kristu se jiġi bħala l-​esekutur taʼ Jehovah kontra s-​sistema t’affarijiet taʼ l-​art taʼ Satana. “Dwar dak il-​jum jew is-​siegħa ħadd ma jaf, la l-​anġli fis-​sema u lanqas l-​Iben, imma l-​Missier,” qal Ġesù. (Mark 13:32) Dan wera li huwa taʼ benefiċċju ferm. B’liema mod? Dan għen biex jikxef x’hemm fil-​qlub tan-​nies. Jekk xi wħud ma jħobbux tassew lil Jehovah, ikunu inklinati li jipposponu l-​“jum” tiegħu f’imħuħhom u jduru lejn ġiri wara affarijiet sekulari li lejhom qlubhom huma inklinati. Jehovah japprova bħala l-​qaddejja tiegħu lil dawk biss li verament iħobbuh u li juru dan billi jaqduh b’ruħhom kollha kemm hi, jiġi meta jiġi t-​tmiem tas-​sistema mill-​agħar. L-​approvazzjoni t’Alla u taʼ Ibnu m’hijiex qiegħda fuq dawk li huma berdin jew taʼ żewġt imħuħ.​—Riv. 3:16; Salm 37:4; 1 Ġwn. 5:3.

3. Ġesù x’qal bħala twissija għalina dwar din il-​kwistjoni?

³ F’kelma taʼ twissija lil dawk li jħobbu lil Jehovah, Ġesù qal: “Ibqgħu ħarsu, ibqgħu mqajmin, għax ma tafux meta ż-​żmien maħtur huwa.” (Mark 13:​33-37) Hu jħeġġiġna biex ma nħallux l-​ikel u x-​xorb jew “l-​anzjetajiet tal-​ħajja” jassorbu tant mill-​attenzjoni tagħna li ma nibqgħux naraw is-​serjetà taż-​żmien.​—Luqa 21:​34-36; Matt. 24:​37-42.

4. Bħalma spjega Pietru, il-​“jum taʼ Jehovah” x’se jġib?

⁴ Iktar tard, l-​appostlu Pietru ta parir lil dawk kollha li għandhom fidi vera biex ‘jistennew u jżommu sewwa f’moħħhom il-​preżenza tal-​jum taʼ Jehovah, li permezz tiegħu s-​smewwiet billi jkunu qegħdin jaqbdu bin-​nar se jinħallu u l-​elementi billi jkunu qegħdin jikwu se jdubu.’ Kemm huwa qrib il-​“jum taʼ Jehovah” huwa fatt li ħadd minna qatt m’għandu jċekken. Is-​smewwiet governattivi viżibbli u s-​soċjetà umana mill-​agħar dalwaqt se jiġu mibdulin bi “smewwiet ġodda u art ġdida” li se jiġu magħmulin minn Alla, u l-​“elementi” kollha li jiġu mas-​sistema dinjija preżenti​—l-​attitudni indipendenti tagħha, il-​mod taʼ ħajja immorali u materjalistiku tagħha—​se jinġiebu għat-​tmiem tagħhom fis-​sħana qerrieda tal-​“jum taʼ Jehovah.” (2 Piet. 3:​10-13) Għandna bżonn nibqgħu attenti, billi nkunu konxji li dawn il-​ġrajjiet li jheżhżu d-​dinja jistgħu jibdew fi kwalunkwe mument.​—Matt. 24:44.

IBQGĦU ATTENTI GĦALL-​ĠRAJJIET LI JWETTQU S-​SINJAL

5. (a) Ir-​risposta taʼ Ġesù għall-​mistoqsija ddokumentata f’​Mattew 24:3 sa liema punt applikat għat-​tmiem tas-​sistema Lhudija? (b) Liema porzjonijiet mit-​tweġiba tiegħu jiffokaw l-​attenzjoni lejn il-​ġrajjiet li seħħew mill-​1914 E.K. ’l quddiem?

⁵ Speċjalment meta nqisu ż-​żmien li qegħdin ngħixu fih, għandna nkunu familjari ħafna mad-​dettalji tas-​sinjal kompost li jidentifika “l-​aħħar jiem,” jew il-​“konklużjoni tas-​sistema t’affarijiet.” Sabiex naqraw is-​sinjal b’mod korrett, irridu nżommu f’moħħna li meta Ġesù wieġeb il-​mistoqsija tad-​dixxipli tiegħu kif inhi rrekordjata f’​Mattew 24:​3, xi ftit minn dak li qal kien japplika għat-​tmiem tas-​sistema Lhudija fl-​ewwel seklu, imma l-​applikar prinċipali kien iwassal ħafna iktar lil hinn minn hekk. Dak li hu ddeskriva fil-​versi 4 sa 22 fil-​fatt kellu twettiq fuq skala żgħira bejn is-​sena 33 u s-​sena 70 E.K. Imma l-​profezija għandha t-​twettiq prinċipali tagħha fi żmienna u tidentifika l-​perijodu mill-​1914 E.K. ’l hawn bħala li huwa ż-​żmien tal-​“preżenza” taʼ Kristu “u l-​konklużjoni tas-​sistema t’affarijiet.” (Ukoll Mark 13:​5-20 u Luqa 21:​8-24) Mattew 24:​23-28 jgħid x’kellu jseħħ mis-​sena 70 E.K. ’l quddiem sa żmien il-​preżenza taʼ Kristu.​—Mark 13:​21-23.

6. (a) Għala għandna noqogħdu attenti personalment għal kif il-​ġrajjiet kurrenti jwettqu “s-​sinjal”? (b) Wieġeb il-​mistoqsijiet li hemm fl-​aħħar taʼ dan il-​paragrafu biex turi kif twettaq is-​“sinjal” mill-​1914 ’l hawn.

⁶ Aħna personalment għandna nkunu qegħdin nosservaw il-​ġrajjiet kurrenti li jwettqu “s-​sinjal.” Li nirrelataw dawn il-​ġrajjiet mal-​profezija tal-​Bibbja se jgħinna nżommu ‘sewwa f’moħħna’ l-​jum taʼ Jehovah. Dan se jgħinna wkoll inkunu persważivi meta nwissu lil oħrajn dwar kemm huwa qrib “jum il-​vendetta min-​naħa t’Alla tagħna.” (Isa. 61:​1, 2) B’dawn l-​oġġettivi f’moħħok, irrevedi l-​aspetti li ġejjin tas-​“sinjal.”

Il-​qawmien imbassar taʼ ‘ġens kontra ġens u saltna kontra saltna’ b’liema mod straordinarju kien imwettaq b’seħħ mill-​1914 E.K.? X’ġara saħansitra f’xhur riċenti li jżid mat-​twettiq?

L-​iskarsezzi taʼ l-​ikel sa liema punt effettwaw l-​art minkejja l-​għarfien xjentifiku tas-​seklu 20?

Kien hemm tassew xi differenza fil-​frekwenza taʼ terremoti f’post wara l-​ieħor mill-​1914 E.K. ’l hawn?

Fl-​1918 liema pesta ħadet iktar ħajjiet milli ħadet il-​gwerra dinjija? Minkejja l-​għarfien mediku, liema mardiet għadhom xorta waħda taʼ proporzjonijiet epidemiċi?

X’jikkonvinċik li l-​kundizzjonijiet deskritti f’2 Timotju 3:​1-5 m’humiex sempliċement il-​mod li l-​ħajja dejjem kienet imma li qegħdin jintensifikaw sa grad li jaħsdek hekk kif nimxu lejn l-​għeluq taʼ l-​aħħar jiem?

IT-​TIFRID TAN-​NIES

7. (a) Ġesù liema ġrajja oħra, deskritta f’​Mattew 13:​36-43, assoċja mal-​konklużjoni tas-​sistema t’affarijiet? (b) Dik it-​tixbieha xi tfisser?

⁷ Hemm ukoll ġrajjiet oħrajn sinjifikanti li Ġesù assoċja b’mod prominenti mal-​konklużjoni tas-​sistema t’affarijiet. Waħda minn dawn hija t-​tifrid taʼ “wlied is-​saltna” minn “ulied il-​wieħed mill-​agħar.” Ġesù tkellem dwar dan fil-​parabbola tiegħu dwar għalqa miżrugħa bil-​qamħ li fuqu għadu żeraʼ ħaxix ħażin. Il-​“qamħ” fit-​tixbieha tiegħu jirrappreżenta lill-​veri Kristjani midlukin. Il-​“ħaxix ħażin” huma t-​taparsi Kristjani. Fil-​konklużjoni tas-​sistema t’affarijiet il-​“ħaxix ħażin”​—dawk li jistqarru li huma Kristjani imma li jagħtu prova li huma “wlied il-​wieħed mill-​agħar” għaliex jibqgħu mqabbdin mad-​dinja li tagħha x-​Xitan huwa ħakkiem—​jiġu mifrudin minn “ulied is-​saltna [t’Alla]” u mmarkati għall-​qerda. (Matt. 13:​36-43) Seħħ dan attwalment?

8. (a) Wara l-​ewwel Gwerra Dinjija, liema tifrid kbir seħħ taʼ dawk kollha li kienu jistqarru li kienu Kristjani? (b) Il-​Kristjani veri midlukin kif taw evidenza li kienu, tabilħaqq, “ulied is-​saltna”?

⁸ Wara l-​ewwel Gwerra Dinjija kien hemm, tabilħaqq, tifrid kbir tal-​persuni kollha li kienu jsostnu li huma Kristjani f’żewġ klassijiet: (1) Il-​kleru tal-​Kristjaneżmu u s-​segwaċi tagħhom, li ħarġu b’appoġġ qawwi għal-​Lega tan-​Nazzjonijiet (issa l-​Ġnus Magħquda), waqt li baqgħu jżommu sod man-​nazzjonaliżmu tagħhom. (2) L-​għadd relattivament żgħir tal-​veri Kristjani midlukin taʼ dik l-​era taʼ wara l-​gwerra, li taw l-​appoġġ sħiħ tagħhom lis-​Saltna Messjanika t’Alla. B’appoġġ fil-​beraħ lill-​gvernijiet tad-​dinja bħala l-​mezz li bih jinkisbu l-​paċi u s-​sigurtà, dawk taʼ l-​ewwel klassi għamluha ċara li ma kinux Kristjani veri. (Ġwn. 17:16) B’kuntrast, il-​qaddejja taʼ Jehovah b’mod korrett identifikaw il-​Lega tan-​Nazzjonijiet bħala “l-​ħaġa moqżieża li tikkaġuna ħerba” taż-​żmien modern, li jirreferi għaliha Mattew 24:15. Billi wrew lilhom infushom li kienu l-​veri “wlied is-​saltna [t’Alla],” huma ħadu l-​inkarigu li jippridkaw “din l-​aħbar tajba tas-​saltna . . . fl-​art abitata kollha.” (Matt. 24:14) B’liema riżultati?

9. (a) Kif ġie mwettaq xogħol kbir taʼ ppridkar? (b) It-​twettiq taʼ dawn il-​profeziji x’jissinjifika?

⁹ Bħalma bassar Ġesù, hu beda xogħol kbir taʼ ppridkar lil nies tal-​ġnus kollha. (Mark 13:10) Dan ix-​xogħol, iddireġut minn Kristu mit-​tron tiegħu tas-​sema, ikompli dritt sal-​preżent, u int effettwat personalment minnu. Il-​maġġoranza taʼ l-​umanità jiddisprezzaw is-​Saltna t’Alla u l-​“ulied” tagħha midlukin bl-​ispirtu u għalhekk se jingħataw għall-​“qtugħ taʼ dejjem” fil-​mewt. Madankollu, lil oħrajn il-​Mulej se jestendi l-​istedina biex jirtu l-​qasam taʼ l-​art tas-​Saltna tiegħu, bil-​ħajja taʼ dejjem quddiemhom. Uħud bħal dawn assoċjaw lilhom infushom maʼ “wlied is-​saltna” li huma midlukin, avolja dawn huma l-​mira taʼ persekuzzjoni krudila. (Matt. 25:​31-46) Huma jgħinuhom lealment biex jippubblikaw il-​messaġġ vitali tas-​Saltna. Folla kbira li tgħodd mal-​miljuni qiegħda tieħu sehem f’dan ix-​xogħol. Il-​messaġġ tas-​Saltna qiegħed jinstemaʼ sa truf l-​art. Dawn il-​ġrajjiet x’jissinjifikaw? Li aħna qegħdin qrib ferm tat-​tmiem taʼ l-​“aħħar jiem” u li l-​“jum taʼ Jehovah” huwa viċin ħafna.

X’HEMM QUDDIEMNA?

10. Għad hemm iktar xogħol taʼ l-​ippridkar x’isir qabel ma jasal il-​“jum taʼ Jehovah”?

¹⁰ Għad hemm profeziji li jridu jitwettqu qabel ma jibda l-​jum il-​kbir taʼ Jehovah li jispira l-​biżaʼ? Iva! It-​tifrid tan-​nies minħabba l-​kwistjoni tas-​Saltna għadu mhux lest. F’xi nħawi fejn kienet imġarrba oppożizzjoni intensa għal snin sħaħ, hemm issa ħsad abbundanti taʼ dixxipli ġodda. U saħansitra fejn in-​nies jiċħdu l-​aħbar tajba, il-​ġustizzja u l-​ħniena taʼ Jehovah huma appoġġjati billi aħna nagħtu x-​xiehda. Mela, inkomplu bix-​xogħol! Ġesù jassigurana li, meta jkun sar, “se jiġi t-​tmiem.”​—Matt. 24:14.

11. (a) Bħalma huwa muri fl-​1 Tessalonkin 5:​2, 3, liema ġrajja taʼ min jinnotaha għad trid isseħħ? (b) Din x’se tfisser għalina?

¹¹ Profezija oħra tal-​Bibbja li hija sinjifikanti ferm tbassar: “Huwa meta huwa li huma qegħdin jgħidu: ‘Paċi u sigurtà!’ imbagħad qerda f’daqqa waħda trid tkun minnufih fuqhom sewwa sew bħall-​weġgħa t’hemm fuq mara tqila; u bl-​ebda mod ma se jaħarbu.” (1 Tess. 5:​2, 3) Liema forma dik il-​proklamazzjoni taʼ “paċi u sigurtà” se tieħu għad irridu naraw. Imma din ċertament li m’hijiex se tfisser li l-​mexxejja dinjin verament ikunu solvew il-​problemi taʼ l-​umanità. Dawk li qegħdin ‘iżommu sewwa f’moħħhom’ il-​jum taʼ Jehovah m’humiex se jiġu żvijati minn dik il-​proklamazzjoni. Huma jafu li, immedjatament wara, se tiġi “qerda f’daqqa waħda.”

12. Liema ġrajjiet se jsegwu immedjatament il-​proklamazzjoni taʼ “paċi u sigurtà,” u b’liema ordni?

¹² L-​ewwel, bħalma turi l-​Iskrittura, il-​ħakkiema politiċi sejrin, fuq bażi globali, iduru kontra Babilonja l-​Kbira, l-​imperu dinji taʼ reliġjon falza, u jġibuha fix-​xejn. (Riv. 17:​15, 16) Huwa tabilħaqq taʼ min jinnota li attitudnijiet ostili speċjalment lejn ir-​reliġjonijiet tal-​Kristjaneżmu qegħdin saħansitra issa juru lilhom infushom. Gvernijiet b’politika antireliġjuża qawwija diġà jeżerċitaw influwenza potenti fil-​Ġnus Magħquda, u l-​pubbliku nnifsu f’pajjiżi tradizzjonalment reliġjużi qiegħed jabbanduna f’numri kbar ir-​reliġjonijiet taʼ missirijietu tal-​qedem. Dan kollu x’ifisser? Li d-​deżolazzjoni tar-​reliġjon falza kollha hija qrib. Imbagħad wara, meta l-​ġnus bi sfida jduru, bil-​forza kollha, kontra dawk li jappoġġjaw is-​sovranità taʼ Jehovah, se tiġi maħlula qilla divina kontra l-​gvernijiet politiċi u dawk li jappoġġjawhom, u dan jirriżulta f’qerda totali għalihom ilkoll. Finalment, Satana nnifsu mad-​demonji tiegħu se jiġi mitfugħ fl-​abbiss, miżmum kompletament milli jinfluwenza lill-​umanità. Dan tabilħaqq se jkun il-​“jum taʼ Jehovah,” il-​jum meta ismu se jitpoġġa fl-​għoli.​—Eżek. 38:​18, 22, 23; Riv. 19:11–20:3.

13. Għala ma jkunx għaqli li tirraġuna li l-​jum taʼ Jehovah għadu ’l bogħod?

¹³ Dan se jiġi eżatt fil-​ħin, skond l-​iskeda t’Alla. M’huwiex se jittardja. (Ħab. 2:3) Ftakar li l-​qerda taʼ Ġerusalemm fis-​sena 70 E.K. ġiet malajr, meta l-​Lhud ma kinux qegħdin jistennewha, meta ħasbu li l-​periklu kien għadda. U xi ngħidu għal Babilonja tal-​qedem? Kienet potenti, kunfidenti, iffortifikata b’ħitan enormi. Imma waqgħet f’lejl wieħed. Hekk, ukoll, “qerda f’daqqa waħda” se tiġi fuq is-​sistema mill-​agħar preżenti. Meta tiġi, jalla ninstabu magħqudin fil-​qima vera, billi nkunu żammejna ‘sewwa f’moħħna’ l-​jum taʼ Jehovah.

Diskussjoni Bħala Reviżjoni

● Għala huwa vitali li nżommu ‘sewwa f’moħħna’ l-​jum taʼ Jehovah? Kif nistgħu nagħmlu dan?

● Kif aħna effettwati personalment mix-​xogħol taʼ ppridkar li qiegħed iseħħ?

● X’għad hemm quddiemna qabel ma jibda l-​jum taʼ Jehovah? Mela x’għandna nkunu qegħdin nagħmlu personalment?