Ħajja Sinifikanti—Jekk Timxi Wara l-​Eżempju taʼ Ġesù

BĦALMA rajna fl-​artiklu taʼ qabel dan, Ġesù għex ħajja sinifikanti. Mela, jekk irridu li ħajjitna jkollha skop, nagħmlu tajjeb li nimitaw l-​eżempju tiegħu u nieħdu l-​pariri tiegħu.

Infatti, Ġeħova jħeġġiġna nagħmlu eżatt dan, bħalma turi l-​iskrittura t’hawn fuq. Li nimxu bħalma mexa Ġesù jinvolvi li nfasslu ħajjitna kollha fuq l-​eżempju u t-​tagħlim tiegħu. Jekk nagħmlu hekk se niġu megħjunin niksbu l-​approvazzjoni t’Alla u jkollna ħajja sinifikanti.

It-​tagħlim taʼ Ġesù inkluda prinċipji li jistgħu jgħinuna nimxu kif mexa hu. Għadd minnhom insibuhom fil-​prietka famuża tiegħu taʼ fuq il-​muntanja. Ejja nikkunsidraw ftit mill-​prinċipji u kif nistgħu napplikawhom f’ħajjitna.

PRINĊIPJU: “Henjin dawk li huma konxji tal-​bżonn spiritwali tagħhom.”—Mattew 5:3.

KIF DAN IL-​PRINĊIPJU JIKKONTRIBWIXXI GĦAL ĦAJJA SINIFIKANTI:

Ġesù wera li l-​bnedmin huma maħluqin bil-​bżonn li jkunu jafu lil Alla. Aħna nixxennqu li nsiru nafu t-​tweġibiet għal mistoqsijiet bħalma huma: Għala qegħdin hawn? Għala hawn tant sofferenza fuq l-​art? Alla veru jimpurtah minna? Hemm ħajja wara l-​mewt? Sabiex ikollna ħajja sinifikanti hemm bżonn li nkunu nafu t-​tweġibiet għal dawn il-​mistoqsijiet. Ġesù kien jaf li hemm sors wieħed biss taʼ min joqgħod fuqu li jistaʼ jwieġeb dawn il-​mistoqsijiet—il-​Kelma t’Alla. F’talba lil Missieru, Ġesù qal: “Kelmtek hi l-​verità.” (Ġwanni 17:17) Tistaʼ verament il-​Kelma t’Alla tgħinna nissodisfaw il-​bżonn li nkunu nafu lil Alla u nkunu ferħanin?

EŻEMPJU REALI:

Bħala l-​kantant taʼ grupp popolari, Esa kellu ċans kbir li jsir stilla tal-​mużika rokk. Minkejja dan, Esa ħass li kellu xi ħaġa nieqsa f’ħajtu. “Għalkemm kont nieħu pjaċir inkun fil-​grupp, xtaqt li kelli iktar skop f’ħajti,” jgħid hu. Maż-​żmien, Esa ltaqaʼ maʼ wieħed mix-​Xhieda taʼ Ġeħova. Esa jgħid: “Ibbombardjajtu bil-​mistoqsijiet. It-​tweġibiet loġiċi tiegħu bbażati fuq il-​Bibbja affaxxinawni, u għalhekk aċċettajt li hu jistudja l-​Bibbja miegħi.” Dak li Esa tgħallem mill-​istudju tiegħu tal-​Bibbja messlu qalbu u qanqlu jiddedika ħajtu lil Ġeħova. “Fil-​passat dejjem kelli problemi u kriżi waħda wara l-​oħra,” jgħid hu. “Issa għandi skop veru f’ħajti.”

PRINĊIPJU: “Henjin dawk li jħennu.” —Mattew 5:7.

KIF DAN IL-​PRINĊIPJU JIKKONTRIBWIXXI GĦAL ĦAJJA SINIFIKANTI:

Il-​ħniena tinvolvi li tagħder lil oħrajn—turi qalb tajba u konsiderazzjoni lejhom. Ġesù wera l-​ħniena maʼ dawk fil-​bżonn. Imqanqal minn mogħdrija profonda, hu ħa l-​inizjattiva biex iġib serħan mit-​tbatija lill-​oħrajn. (Mattew 14:14; 20:30-​34) Meta aħna nimitaw lil Ġesù u nuru l-​ħniena, ħajjitna tkun iktar sinifikanti, għax dawk li juru l-​ħniena m’oħrajn jiksbu l-​ferħ. (Atti 20:35) Aħna nistgħu nuru l-​ħniena m’oħrajn bil-​kliem u bl-​għemejjel tajbin tagħna, u b’hekk inġibu serħan lil dawk fil-​bżonn. Veru li jekk nuru l-​ħniena nħossuna aħjar?

EŻEMPJU REALI:

Maria u żewġha, Carlos, huma taʼ eżempju f’li juru l-​ħniena. Missier Maria hu armel u f’dawn l-​aħħar snin intefaʼ f’qiegħ taʼ sodda. Maria u Carlos ħaduh joqgħod magħhom u qegħdin jieħdu ħsieb il-​bżonnijiet kollha tiegħu. Min jaf kemm-​il darba qattgħu ljieli bla rqad u saħansitra ġrew bih l-​isptar minħabba xi kriżi tad-​dijabete. Huma jgħidu li kultant ikunu għajjenin mejta. Imma huma henjin, sewwasew bħalma qal Ġesù, għax għandhom is-​sodisfazzjon li qed jagħtu lil missier Maria dak li għandu bżonn.

PRINĊIPJU: “Henjin dawk li jġibu l-​paċi.” —Mattew 5:9.

KIF DAN IL-​PRINĊIPJU JIKKONTRIBWIXXI GĦAL ĦAJJA SINIFIKANTI:

Ħajtek kif tkun iktar sinifikanti jekk tkun wieħed li jġib il-​paċi? Mod wieħed hu li ngawdu relazzjonijiet aħjar maʼ dawk taʼ madwarna. Nagħmlu sew li napplikaw il-​parir tal-​Bibbja: “Jekk inhu possibbli, sakemm jiddependi minnkom, żommu l-​paċi mal-​bnedmin kollha.” (Rumani 12:18) “Il-​bnedmin kollha” jinkludu membri tal-​familja u oħrajn li forsi m’għandhomx l-​istess twemmin tagħna. Tistaʼ ħajjitna tkun verament iktar sinifikanti jekk inżommu “l-​paċi mal-​bnedmin kollha”?

EŻEMPJU REALI:

Ikkunsidra l-​esperjenza taʼ mara jisimha Nair. Maż-​żmien, hi ffaċċjat ħafna pressjonijiet li kienu taʼ sfida għaliha biex iżżomm il-​paċi, speċjalment fil-​familja tagħha stess. Mindu abbandunaha żewġha 15-​il sena ilu, hi rabbiet lil uliedha waħedha. Wieħed minn uliedha kellu problema bid-​drogi u taʼ spiss kien jitlef il-​kontroll u jhedded lilha u lil bintha. Nair temmen li dak li tgħallmet mill-​Bibbja saħħaħha biex iżżomm il-​paċi, anke taħt provi ebsin bħal dawn. Hi tipprova ma targumentax u ma tiġġilidx, u tistinka biex tkun qalbha tajba, tagħder, u tifhem lil oħrajn. (Efesin 4:31, 32) Hi konvinta li ladarba tgħallmet iżżomm il-​paċi jistaʼ jkollha l-​aqwa relazzjonijiet possibbli mal-​membri tal-​familja u m’oħrajn.

IKKUNSIDRA L-​FUTUR

Jekk insegwu l-​pariri għaqlin taʼ Ġesù, se nsibu l-​ferħ u l-​kuntentizza fil-​ħajja. Però, biex ikollna ħajja verament sinifikanti, jeħtieġ ukoll li nkunu nafu x’hemm fil-​futur. Wara kollox, kemm tistaʼ tkun sinifikanti l-​ħajja jekk kulma nafu hu li fil-​futur eventwalment se nixjieħu, nimirdu, u mbagħad immutu? Imma dawn huma r-​realtajiet tal-​ħajja f’din id-​dinja.

Iżda, hemm aħbar tajba! Ġeħova għandu ħafna barkiet maħżunin għal dawk kollha li jistinkaw biex ‘jimxu bħalma mexa Ġesù.’ Ġeħova jwiegħed li dalwaqt se jġib dinja ġdida ġusta, fejn il-​bnedmin kollha se jgħixu bħalma kien l-​iskop taʼ Ġeħova—għal dejjem f’saħħa perfetta. Il-​Kelma tiegħu tgħid: “Ara! It-​tinda t’Alla hi mal-​bnedmin, u hu jgħammar magħhom, u huma jkunu l-​popli tiegħu. U Alla stess ikun magħhom. U jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.”—Rivelazzjoni 21:3, 4.

Maria, il-​mara taʼ 84 sena li ssemmiet fl-​ewwel artiklu taʼ din is-​serje, tifraħ bil-​prospett li tara dak il-​kliem jitwettaq. Xi ngħidu għalik? Tixtieq tkun taf iktar dwar il-​“ħajja vera”—dik li ġejja taħt is-​Saltna t’Alla? (1 Timotju 6:19) Jekk inhu hekk, tistaʼ tistaqsi lix-​Xhieda taʼ Ġeħova fil-​lokalità tiegħek jew tikteb lill-​pubblikaturi taʼ din ir-​rivista.a