Tikkundanna Int lid-​Dinja Permezz tal-​Fidi Tiegħek?

“Bil-​fidi Noè . . . bena arka biex isalva n-​nies taʼ daru; u permezz taʼ din il-​fidi hu kkundanna lid-​dinja.”—Ebrej 11:7.

1, 2. X’nistgħu nitgħallmu minn eżami tal-​ħajja taʼ Noè?

JEHOVAH ta lil Noè u l-​familja tiegħu—tmienja min-​nies biss fil-​għadd—il-​privileġġ li jkunu l-​uniċi bnedmin li jsalvaw mill-​Għarqa. Il-​ħajjiet tal-​bqija tan-​nies li għexu fi żmien Noè ġew imqassra meta Alla kinishom għal ġo qabar tal-​ilma. Peress li Noè huwa għalhekk l-​antenat komuni tagħna, għandna għax inkunu ferm grati għall-​fidi li wera.

² Nistgħu nitgħallmu wisq billi neżaminaw il-​ħajja taʼ Noè. L-​Iskrittura tgħidilna għala Alla ffavorih b’salvazzjoni filwaqt li Hu qered in-​nies tal-​ġenerazzjoni taʼ Noè. Din l-​istess kitba divina turi ċar li l-​ġenerazzjoni tagħna tiffaċċja ġudiżzju simili mingħand Alla. Rigward dan, Ġesù qal: “Se jkun hemm tribulazzjoni kbira li bħalha ma ġratx sa mill-​bidu tad-​dinja s’issa, le, lanqas ma se terġaʼ tiġri.” (Mattew 24:21) Billi nimitaw il-​fidi taʼ Noè, jistaʼ jkollna t-​tama żgura li nibqgħu ħajjin fil-​qerda li riesqa taʼ din is-​sistema preżenti mill-​agħar.—Rumani 15:4; qabbel Ebrej 13:7.

3. Jehovah għala ġab il-​Għarqa?

³ Matul l-​1,656 sena mill-​ħolqien taʼ Adam sad-​Dulluvju, ftit ferm bnedmin kellhom l-​inklinazzjoni li jagħmlu t-​tajjeb. Il-​moralità waqgħet għal-​livell estremament baxx. “Jehovah ra li l-​ħażen tal-​bniedem kien kotran fl-​art u kull xaqliba tal-​ħsibijiet taʼ qalbu kienet biss ħażina l-​ħin kollu.” (Ġenesi 6:5) Il-​vjolenza, il-​ġiri wara l-​pjaċiri, u l-​preżenza taʼ anġli immaterjalizzati li żżewġu nisa u produċew nisel taʼ ġganti kienu fost il-​fatturi li wasslu għall-​esekuzzjoni tal-​ġudiżzju t’Alla fuq dik id-​dinja qadima taʼ bnedmin. Lil Noè, Jehovah qallu: “It-​tmiem taʼ kull laħam ġie quddiemi, għaliex l-​art mimlija vjolenza minħabba fihom.” Il-​paċenzja tal-​Ħallieq, l-​“Imħallef tal-​art kollha,” kienet intemmet.—Ġenesi 6:13; 18:25.

Noè Mexa maʼ Alla

4. (a) Jehovah kif ħares lejn Noè, u għala? (b) Fil-​waqt li l-​ġustizzja t’Alla talbet il-​qerda taʼ dik id-​dinja mill-​agħar, l-​imħabba tiegħu kif intweriet għan-​nom taʼ Noè u l-​familja tiegħu?

⁴ Kemm kien differenti Noè min-​nies taʼ żmienu! Hu “sab favur f’għajnejn Jehovah. . . . Noè kien raġel taʼ tjieba. Hu wera li kien bla ħtija fost in-​nies taʼ żmienu. Noè mexa mal-​veru Alla.” (Ġenesi 6:8, 9) Noè kif mexa maʼ Alla? Billi għamel affarijiet tajbin bħal li ppriedka bħala wieħed li jappoġġa t-​tjieba u li bena l-​arka b’fidi u ubbidjenza. B’hekk, għalkemm dik id-​dinja qadima ġiet meqruda għaliex kienet kompletament imħassra, Alla “żamm lil Noè, predikatur tat-​tjieba, qawwi u sħiħ flimkien maʼ sebgħa oħra meta ġieb dulluvju fuq dinja taʼ nies mingħajr Alla.” (2 Pietru 2:5) Iva, Alla tagħna taʼ mħabba u ġustizzja, Jehovah, ma qeridx it-​tajbin mal-​ħżiena. Hu ta struzzjoni lil Noè biex jibni arka kbira biex isalva lilu nnifsu, lin-​nies taʼ daru, u għadd taʼ annimali, kollha biex jerġgħu jimlew l-​art wara d-​Dulluvju. U Noè “għamel preċiż hekk.”—Ġenesi 6:22.

5. L-​Iskrittura kif tiddeskrivi t-​tjieba u l-​fidi taʼ Noè?

⁵ Meta l-​arka kienet lesta, Alla qal lil Noè: “Mur, int u taʼ darek kollha, ġewwa l-​arka, għaliex inti l-​wieħed li jien rajt li hu taʼ tjieba quddiemi fost din il-​ġenerazzjoni.” Pawlu jiġbor kollox fil-​qosor b’dan il-​mod: “Bil-​fidi Noè, wara li ngħata twissija divina taʼ affarijiet li kienu għadhom ma ntlemħux, wera biżaʼ t’Alla u bena arka biex isalva n-​nies taʼ daru; u permezz taʼ din il-​fidi hu kkundanna lid-​dinja, u sar werriet tat-​tjieba li hi skond il-​fidi.”—Ġenesi 7:1; Ebrej 11:7.

6. Noè kif ikkundanna lid-​dinja taʼ żmienu permezz tal-​fidi tiegħu?

⁶ Noè kellu fidi li tispikka. Hu emmen dak li Alla qal dwar il-​qerda taʼ dik il-​ġenerazzjoni. Noè kellu biżaʼ qawwi li jonqos li jogħġob lil Jehovah u b’ubbidjenza bena l-​arka skond ordnijiet mogħtija minn Alla. Barra minn dan, bħala predikatur tat-​tjieba, Noè qal lill-​oħrajn dwar il-​qerda li kienet riesqa. Għalkemm huma ma tawx kas taʼ kliemu, hu rrifjuta li jħalli lil dik id-​dinja mill-​agħar ‘tagħsru fil-​forma tagħha.’ (Rumani 12:2, Phillips) Minflok, permezz tal-​fidi tiegħu, Noè ikkundanna lid-​dinja minħabba l-​ħażen tagħha u wera li kien jixirqilha l-​qerda. L-​ubbidjenza u l-​atti taʼ tjieba tiegħu wrew li oħrajn minbarra hu u l-​familja tiegħu setgħu salvaw li kieku kienu lesti li jbiddlu l-​istil taʼ ħajjithom. Tabilħaqq, Noè wera bil-​provi li, minkejja pressjonijiet mil-​laħam imperfett tiegħu stess, mid-​dinja mill-​agħar taʼ madwaru, u mix-​Xitan kien possibbli li jgħix ħajja li togħġob lil Alla.

Għala Alla Se Jeqred Din is-​Sistema

7. Kif nafu li qed ingħixu fl-​aħħar jiem?

⁷ Kull perijodu taʼ għaxar snin taʼ dan is-​seklu 20 ra lid-​dinja tegħreq iktar fil-​fond fil-​ħażen. B’mod partikulari kien dan hekk minn mindu bdiet l-​Ewwel Gwerra Dinjija. L-​umanità tant saret imgħaddsa f’affarijiet bħalma huma immoralità sesswali, kriminalità, vjolenza, ġlied, mibgħeda, regħba, u użu ħażin tad-​demm li dawk li jħobbu dak li hu sewwa jiddubitaw jekk il-​kundizzjonijiet jistgħux possibilment jeħżienu iżjed. Madankollu, il-​Bibbja ħabbret l-​iżvilupp fil-​ġenerazzjoni tagħna taʼ ħażen estrem, li jagħti iktar prova li ninsabu fl-​“aħħar jiem.”−2 Timotew 3:l-5; Mattew 24:34.

8. Xi wħud x’qalu dwar rikonoxximent tad-​dnub?

⁸ Illum, il-​kunċett tad-​dnub ġie nnewtraliżzat fl-​imħuh tal-​biċċa l-​kbira tal-​bnedmin. Fuq 40 sena ilu, Papa Piju XII osserva: “Id-​dnub taʼ dan is-​seklu hu t-​telfien taʼ kull sens taʼ dnub.” Il-​ġenerazzjoni preżenti tirrifjuta li tikkonoxxi d-​dnub u l-​ħtija. Fil-​ktieb tiegħu Whatever Became of Sin? Dr. Karl Menninger stqarr: “L-​istess kelma ‘dnub’ . . . kważi sparixxiet għalkollox—il-​kelma, flimkien mal-​ideja. Għala? M’għadhomx in-​nies jagħmlu dnubiet iżjed?” Ħafna nies tilfu l-​abbiltà li jagħrfu t-​tajjeb mill-​ħażin. Iżda aħna ma nistagħġbux b’dan, għax Ġesù ħabbar żviluppi bħal dawn meta ddiskuta ‘s-​sinjal tal-​preżenza tiegħu’ fiż-​“żmien tat-​tmiem.”−Mattew 24:3; Danjel 12:4.

Mudell taʼ Ġudiżzju Mwaqqaf fi Żmien Noè

9. Ġesù kif qabbel żmien Noè maʼ dak li kellu jiġri matul il-​preżenza Tiegħu?

⁹ Ġesù għamel xebh bejn ġrajjiet taʼ żmien Noè u dak li kellu jiġri matul il-​preżenza Tiegħu fil-​qawwa tas-​Saltna, li bdiet fl-​1914. Hu qal: “Sewwa sew bħalma kienu jiem Noè, hekk se tkun il-​preżenza taʼ [Ġesù] Bin il-​bniedem. Għax bħalma kienu f’dawk il-​jiem qabel id-​dulluvju, jieklu u jixorbu, irġiel jiżżewġu u nisa jingħataw għaż-​żwieġ, sal-​jum li Noè daħal ġewwa l-​arka; u ma tawx kas sakemm ġie d-​dulluvju u kinishom ilkoll, hekk se tkun il-​preżenza taʼ Bin il-​bniedem.”—Mattew 24:37-39.

10. In-​nies inġenerali kif ma jagħtux kas taʼ ġrajjiet sinjifikanti assoċjati mal-​preżenza taʼ Kristu?

¹⁰ Iva, bħal fi żmien Noè, in-​nies illum ma jagħtux kas. Billi għandhom ħafna x’jagħmlu bil-​għixien taʼ kuljum u interessi egoistiċi, huma ma jridux jagħrfu li l-​kundizzjonijiet preżenti huma differenti b’mod sinjifikanti minn dawk tal-​passat u jaqblu eżatt maʼ dak li Ġesù qal li kellu jimmarka ż-​żmien tat-​tmiem. Għal snin sħaħ, ix-​Xhieda taʼ Jehovah ilhom igħidu lil ġenerazzjoni moderna li l-​preżenza taʼ Ġesù bħala Sultan Messjaniku fis-​sema bdiet fl-​1914 u sseħħ fl-​istess żmien tal-​“konklużjoni tas-​sistema taʼ affarijiet.” (Mattew 24:3) Il-​biċċa l-​kbira tan-​nies jiżżuffjettaw bil-​messaġġ tas-​Saltna, iżda anki dan kien imbassar meta l-​appostlu Pietru kiteb: “Tafu dan l-​ewwel, li fl-​aħħar jiem se jiġu dawk li jwaqqgħu għaċ-​ċajt bit-​twaqqigħ għaċ-​ċajt tagħhom, jissoktaw skond ix-​xewqat tagħhom stess u jgħidu: ‘Fejn hi din il-​preżenza mwiegħda tiegħu? Għax minn dak in-​nhar li missirijietna tal-​qedem raqdu fil-​mewt, l-​affarijiet kollha qed ikomplu eżatt bħal mill-​bidu tal-​ħolqien.’”—2 Pietru 3:3, 4.

11. Il-​ġenerazzjoni tal-​lum għala se tkun mingħajr skuża meta tasal it-​tribulazzjoni kbira?

¹¹ Madankollu, il-​ġenerazzjoni tal-​lum se tkun mingħajr skuża meta tasal it-​tribulazzjoni kbira. Għala? Għaliex hemm rakkonti Bibliċi taʼ ġudizzji divini tal-​qedem li jwaqqfu mudell għal dak li se jagħmel Alla fi żmienna. (Ġuda 5-7) Profezija Biblika li qed titwettaq quddiem għajnejna stess turi b’mod konklussiv fejn ninsabu fil-​medda taż-​żmien. Din il-​ġenerazzjoni għandha wkoll quddiemha l-​attività tal-​ippridkar tax-​Xhieda taʼ Jehovah u r-​rapport tagħhom taʼ żamma taʼ integrità bħal dik taʼ Noè.

12. Fil-​qosor, Pietru kif iqabbel il-​qerda tad-​dinja taʼ żmien Noè maʼ dik li se tiġi fuq “is-​smewwiet u l-​art li huma issa”?

¹² Pietru jispjega x’se jiġri lil dawk li ma jagħtux kas taʼ dawn il-​fatti. Bħal Ġesù, l-​appostlu jagħmel dan billi jirreferi għal dak li ġara fi żmien Noè, billi qal: “Skond ix-​xewqa tagħhom, dan il-​fatt jaħrab l-​attenzjoni tagħhom, li kien hemm smewwiet mill-​qedem u art niexfa marsusa ’l barra mill-​ilma u f’nofs l-​ilma bil-​kelma t’Alla; u b’dawk il-​mezzi d-​dinja taʼ dak iż-​żmien sofriet qerda meta kienet imgħarrqa bl-​ilma. Iżda bl-​istess kelma s-​smewwiet u l-​art li huma issa huma maħżunin għan-​nar u qed jiġu merfugħin għal jum il-​ġudizzju u taʼ qerda għan-​nies taʼ mingħajr Alla.”−2 Pietru 3:5-7.

13. Minħabba l-​ġrajjiet sinjifikanti li hemm quddiemna, liema parir mingħand Pietru għandna nagħtu kas?

¹³ B’dan il-​ġudizzju ċert t’Alla quddiem wiċċna ejjew ma nitqarrqux jew nitbeżżgħu minn min iwaqqaʼ għaċ-​ċajt. M’għandniex għalfejn nispiċċaw bħalhom. Pietru jwissi: “Ladarba dawn l-​affarijiet kollha għandhom idubu, liema xorta taʼ persuni għandkom tkunu f’atti qaddisa taʼ kondotta u f’egħmejjel taʼ devozzjoni lejn Alla, waqt li tistennew u żżommu qrib f’moħħkom il-​preżenza tal-​jum taʼ Jehovah, li permezz tiegħu s-​smewwiet billi jkunu jaqbdu bin-​nar se jinħallu u l-​elementi billi jkunu jikwu se jdubu! Iżda hemm smewwiet ġodda u art ġdida li aħna qegħdin nistennew skond il-​wegħda tiegħu, u f’dawn għandha tgħammar it-​tjieba.”−2 Pietru 3:1l-13.

Imita l-​Fidi taʼ Noè Biex Issalva

14. Liema mistoqsijiet jistgħu jgħinuna neżaminaw lilna nfusna?

¹⁴ Illum, niffaċċjaw l-​istess sfidi bħal dawk li ffaċċjaw Noè u l-​familja tiegħu f’li nsiru u nibqgħu kandidati għas-​salvazzjoni. Bħal Noè, ix-​Xhieda taʼ Jehovah qed jikkundannaw lid-​dinja bil-​fidi tagħhom appoġġata b’xogħlijiet tajbin. Iżda kull wieħed minna jistaʼ jistaqsi lilu nnifsu: ‘Personalment jien kif sejjer? Li kellha t-​tribulazzjoni kbira tiġi għada, jiġġudikani Alla bħala li jixraqli li nsalva? Bħal Noè, li “wera li kien bla ħtija fost in-​nies taʼ żmienu,” għandi jien il-​kuraġġ li nkun differenti mid-​dinja? Jew xi drabi huwa diffiċli li tara d-​differenza bejni u bejn persuna tad-​dinja minħabba l-​mod kif naġixxi, nitkellem, jew nilbes?’ (Ġenesi 6:9) Ġesù qal dwar id-​dixxipli tiegħu: “Ma huma ebda parti mid-​dinja, bħalma jien ma jien ebda parti mid-​dinja.”−Ġwann 17:16; qabbel 1 Ġwann 4:4-6.

15. (a) Skond 1 Pietru 4:3, 4, kif għandna nħarsu lejn il-​ħsibijiet u l-​kondotta tagħna taʼ qabel tad-​dinja? (b) X’għandna nagħmlu jekk niġu kkritikati minn ħbieb taʼ qabel tad-​dinja?

¹⁵ Pietru jwissi: “Iż-​żmien li għadda kien biżżejjed għalikom biex tkunu ħdimtu r-​rieda tal-​ġnus meta ssoktajtu f’egħmejjel taʼ kondotta laxka, xenqiet, eċċessi fl-​inbid, xalar żejjed, logħob bix-​xorb, u idolatriji illegali. Għaliex ma komplejtux tiġru magħhom f’din il-​korsa u ma tinżlux fil-​baxx bħalhom, jikkonfondu u jibqgħu jitkellmu b’abbuż dwarkom.” (1 Pietru 4:3, 4) Il-​ħbieb tiegħek taʼ qabel tad-​dinja jistgħu jitkellmu b’abbuż dwarek għaliex int qed timxi maʼ Alla u m’għadekx tiġri magħhom. Iżda, bħal Noè, int tistaʼ tikkundannaħom bil-​fidi u bix-​xogħlijiet tajba tiegħek imwettqa bil-​modestja.—Mikea 6:8.

16. Alla kif ħares lejn Noè, u x’mistoqsijiet jistgħu jgħinuna neżaminaw il-​ħsibijiet u l-​kondotta tagħna?

¹⁶ Alla kien iqis lil Noè bħala raġel taʼ tjieba. Dak il-​patrijarka lejali “sab favur f’għajnejn Jehovah.” (Ġenesi 6:8) Meta int teżamina l-​ħsibijiet u l-​kondotta tiegħek fid-​dawl tal-​livelli t’Alla, tħoss int li hu japprova dak li qed tagħmel, il-​postijiet kollha fejn tmur? Tbabas int xi drabi f’divertiment li jbaxxi, li issa hu tant prevalenti? Il-​Kelma t’Alla tgħid li aħna għandna naħsbu dwar affarijiet indaf, bnini, u li jibnu. (Filippin 4:8) Qiegħed int tistudja b’mod għaqli l-​Kelma t’Alla sabiex ‘tħarreġ is-​setgħat tal-​fehma tiegħek biex tiddistingwi sew it-​tajjeb u sew il-​ħażin’? (Ebrej 5:14) Twarrab int ħbieb ħżiena u tgħożż sħubija maʼ adoraturi sħab taʼ Jehovah fil-​laqgħat Kristjani u f’okkażjonijiet oħra?—1 Korintin 15:33; Ebrej 10:24, 25; Ġakbu 4:4.

17. Bħala Xhieda taʼ Jehovah, kif nistgħu nkunu bħal Noè?

¹⁷ Wara li tirrapporta fuq it-​tlestija tal-​arka, l-​Iskrittura tgħid: “Noè issokta jagħmel skond dak kollu li Alla kien ikkmandah. Għamel preċiż hekk.” (Ġenesi 6:22) Dak ir-​raġel taʼ tjieba kien ukoll ħabrieki f’li jippriedka bħala xhud taʼ Jehovah. Bħal Noè, int tistaʼ tkun wieħed li jappoġġa bis-​sħiħ dak li hu sewwa bħala predikatur regulari tat-​tjieba. Ippersevera f’li ssemmaʼ t-​twissija tat-​tmiem taʼ din id-​dinja mill-​agħar, għalkemm ftit jisimgħu. Aħdem f’għaqda maʼ wħud li jemmnu bħalek biex jitlesta x-​xogħol taʼ trawwim taʼ dixxipli qabel it-​tmiem.—Mattew 28:19, 20.

18. Jehovah fuq liema bażi qiegħed jiddetermina min għandu jsalva fit-​tribulazzjoni kbira?

¹⁸ Billi japplika l-​istess livelli taʼ tjieba u ġustizzja bħalma għamel fi żmien Noè Alla issa qed jiddetermina min għandu jsalva u min għandu jintilef matul it-​tribulazzjoni kbira. Ġesù xebbah ix-​xogħol preżenti taʼ frid maʼ dak taʼ ragħaj li jissepara n-​ngħaġ mill-​mogħoż. (Mattew 25:3l-46) Nies li jiċċentraw il-​ħajjiet tagħhom fuq xewqat u ġiri egoistiċi ma jridux lid-​dinja qadima li tintemm u ma jsalvawx. Iżda dawk li jevitaw li jiġu nvoluti fil-​ħmieġ taʼ din id-​dinja, li jżommu fidi qawwija f’Alla, u li jibqgħu jippridkaw il-​messaġġ tas-​Saltna, billi jsemmgħu t-​twissija dwar il-​ġudizzju li ġej taʼ Jehovah, se jgawdu favur divin bħala dawk li jsalvaw. Qal Ġesù: “Imbagħad żewġt irġiel se jkunu fil-​għalqa: wieħed se jittieħed u l-​ieħor ikun abbandunat; żewġ nisa se jkunu jitħnu fil-​mitħna tal-​id: waħda se tittieħed u l-​oħra tkun abbandunata.”—Mattew 24:40, 41; 2 Tessalonkin 1:6-9; Rivelazzjoni 22:12-15.

Iret Barkiet Maʼ Noè

19. Liema ġbir ħabbru Isaija u Mikea għall-​aħħar jum?

¹⁹ Fi profeziji li jixxiebhu, il-​profeti t’Alla Isaija u Mikea t-​tnejn iddeskrivew x’kellu jiġri matul l-​aħħar jiem. Huma raw bil-​quddiem dak li aħna naraw qiegħed jitwettaq illum—gelgul taʼ nies taʼ tjieba f’qalbhom ħerġin mid-​dinja qadima u telgħin lejn il-​muntanja simbolika taʼ qima vera. Lil oħrajn huma joffru l-​istedina: “Ejjew u ħa nitilgħu lejn il-​muntanja taʼ Jehovah, lejn dar Alla taʼ Ġakobb; u hu se jistruwina dwar mogħdijietu, u aħna se nimxu fil-​passaġġi tiegħu.” (Isaija 2:2, 3; Mikea 4:1, 2) Miexi int maʼ din il-​folla hienja?

20. Liema barkiet se jitgawdew minn dawk li jikkundannaw lid-​dinja permezz tal-​fidi tagħhom?

²⁰ Isaija u Mikea semmew ukoll il-​barkiet li se jitgawdew minn dawk li jikkundannaw lid-​dinja bil-​fidi tagħhom. Paċi u ġustizzja veri se jiddominaw fosthom, u mhux se jitgħallmu gwerra aktar. Huma se jkollhom it-​tama ċerta taʼ wirt mingħand Jehovah u se “joqogħdu bil-​qiegħda, kull wieħed taħt id-​dielja tiegħu u taħt it-​tina tiegħu.” Iżda kull persuna trid tieħu deċiżjoni soda, għax Mikea juri li żewġ mogħdijiet huma possibbli, meta qal: “Il-​popli kollha, min-​naħa tagħhom, se jimxu kull wieħed f’isem alla tiegħu; iżda aħna, min-​naħa tagħna, se nimxu fl-​isem taʼ Jehovah Alla tagħna għal żmien indefinit, saħansitra għal dejjem.”−Mikea 4:3-5; Isaija 2:4.

21. Kif tistaʼ int tieħu sehem mill-​barka grandjuża taʼ ħajja eterna fuq l-​art?

²¹ L-​Iskrittura turi ċar x’inhu meħtieġ biex insalvaw fit-​tribulazzjoni kbira: fidi qawwija. Noè kellu fidi bħal din, iżda int għandek? Jekk iva, bħalu int se ssir “werriet tat-​tjieba li hi skond il-​fidi.” (Ebrej 11:7) Noè salva mill-​qerda maħruġa minn Alla li ġiet fuq il-​ġenerazzjoni tiegħu. Mhux biss għex għal 350 sena wara l-​Għarqa iżda hu se jiġi rxoxtat bil-​prospett li jgħix fuq l-​art għal dejjem. X’barka grandjuża! (Ebrej 11:13-16) Int tistaʼ tieħu sehem f’dik il-​barka maʼ Noè, l-​familja tiegħu, u miljuni taʼ oħrajn li jħobbu t-​tjieba. Kif? Billi tissaporti sat-​tmiem u tikkundanna d-​dinja permezz tal-​fidi tiegħek.

Tiftakar?

◻ Studju tal-​ħajja taʼ Noè għala hu mportanti għall-​Kristjani?

◻ Taʼ xiex ma jagħtux kas nies taʼ din il-​ġenerazzjoni li se ◻ jwassal għall-​qerda tagħhom?

◻ Bħal Noè, kif nistgħu nikkundannaw lil din id-​dinja?

◻ Kif nistgħu nkunu bħal Noè bħala predikatur tat-​tjieba?