Kapitlu Erbatax

Jehovah Kif Jidderieġi l-​Organizzazzjoni Tiegħu?

1. Liema tagħrif tirrivela l-​Bibbja dwar l-​organizzazzjoni taʼ Jehovah, u għala huwa importanti għalina?

GĦANDU Alla organizzazzjoni? L-​Iskrittura ispirata tgħidilna li għandu. Fil-​Kelma tiegħu, hu jagħtina ħjiel dwar il-​parti taʼ l-​għaġeb taʼ din l-​organizzazzjoni fis-​sema. (Eżekjel 1:​1, 4-14; Danjel 7:​9, 10, 13, 14) Għalkemm ma nistgħux narawha, din il-​parti inviżibbli teffettwa bil-​kbir lill-​aduraturi veri llum. (2 Slaten 6:​15-17) L-​organizzazzjoni taʼ Jehovah għandha wkoll parti viżibbli fuq l-​art. Il-​Bibbja tgħinna nifhmu x’inhi u kif Jehovah jidderiġiha.

Nidentifikaw il-​Parti Viżibbli

2. Alla liema kongregazzjoni ġdida sawwar?

² Għal 1,545 sena, il-​ġens taʼ Iżrael kien il-​kongregazzjoni t’Alla. (Atti 7:38) Imma Iżrael naqas li jżomm mal-​liġijiet t’Alla u ċaħad lil Ibnu. Bħala riżultat, Jehovah ċaħad lil din il-​kongregazzjoni u abbandunaha. Ġesù qal lil-​Lhud: “Ara, darkom għad iħalluhielkom ħerba!” (Mattew 23:38) Imbagħad, Alla sawwar kongregazzjoni ġdida, li magħha għamel patt ġdid. Din il-​kongregazzjoni kellha tkun ifformata minn 144,000 individwu magħżulin minn Alla biex ikunu magħqudin maʼ Ibnu fis-​sema.—Apokalissi 14:​1-4.

3. X’seħħ f’Pentekoste tas-​sena 33 E.K. bħala evidenza ċara li Alla issa kien qed juża kongregazzjoni ġdida?

³ L-​ewwel membri taʼ din il-​kongregazzjoni ġdida kienu midlukin mill-​ispirtu qaddis taʼ Jehovah f’Pentekoste tas-​sena 33 E.K. Rigward din il-​ġrajja straordinarja naqraw: “Meta wasal jum Għid il-​Ħamsin, huma kienu lkoll flimkien f’post wieħed. F’daqqa waħda ġie mis-​sema ħoss bħal taʼ riħ qawwi, u mela d-​dar kollha fejn kienu qegħdin. U dehrulhom ilsna qishom tan-​nar, li tqassmu u qagħdu fuq kull wieħed minnhom. Mtlew ilkoll bl-​Ispirtu s-​Santu.” (Atti 2:​1-4) B’hekk, l-​ispirtu qaddis t’Alla ta evidenza ċara li issa din kienet il-​ġemgħa taʼ nies li Alla kien se juża biex twettaq l-​iskop tiegħu taħt id-​direzzjoni taʼ Ġesù Kristu mis-​sema.

4. Min illum jifforma l-​organizzazzjoni viżibbli taʼ Jehovah?

⁴ Illum, fdal biss mill-​144,000 jinsab fuq l-​art. Imma bi twettiq tal-​profezija Biblika, “kotra kbira” taʼ miljuni taʼ “nagħaġ oħra” ġew imseħbin mal-​fdal midluk. Ġesù, ir-​Ragħaj it-​Tajjeb, għaqqad lil dawn in-​nagħaġ oħra mal-​fdal biex b’hekk ikun hemm biss merħla waħda taħtu bħala r-​Ragħaj wieħed tagħhom. (Apokalissi 7:9; Ġwann 10:​11, 16) Dawn kollha jifformaw kongregazzjoni waħda magħquda, l-​organizzazzjoni viżibbli taʼ Jehovah.

Mibnija fuq it-​Teokrazija

5. Min jidderieġi l-​organizzazzjoni t’Alla, u kif?

⁵ L-​espressjoni Skritturali “l-​Knisja [“il-​kongregazzjoni,” NW] taʼ Alla l-​ħaj” turi ċar min qed jidderiġiha. L-​organizzazzjoni hija teokratika, jew immexxija minn Alla. Jehovah jipprovdi direzzjoni għan-​nies tiegħu permezz taʼ Ġesù, dak li nħatar biex ikun il-​Kap inviżibbli tal-​kongregazzjoni, u permezz tal-​Bibbja, il-​Kelma ispirata Tiegħu stess.—1 Timotju 3:​14, 15; Efesin 1:​22, 23; 2 Timotju 3:​16, 17.

6. (a) Kif intweriet direzzjoni mis-​sema għall-​kongregazzjoni fl-​ewwel seklu? (b) X’juri li Ġesù għadu l-​Kap tal-​kongregazzjoni?

⁶ Din id-​direzzjoni kienet evidenti sew f’Pentekoste. (Atti 2:​14-18, 32, 33) Intweriet meta l-​anġlu taʼ Jehovah idderieġa t-​tixrid taʼ l-​aħbar tajba fl-​Afrika, meta leħen Ġesù ta direzzjonijiet waqt il-​konverżjoni taʼ Sawl taʼ Tarsu, u meta Pietru beda x-​xogħol taʼ l-​ippridkar fost il-​Ġentili. (Atti 8:​26, 27; 9:​3-7; 10:​9-16, 19-22) Imma maż-​żmien, ma nstemgħux iktar ilħna mis-​sema, ma dehrux iktar anġli, u ma ngħatawx iktar għotjiet mirakolużi taʼ l-​ispirtu. Madankollu, Ġesù kien wiegħed: “Ara, jiena magħkom dejjem, sa l-​aħħar taż-​żmien.” (Mattew 28:20; 1 Korintin 13:8) Illum, ix-​Xhieda taʼ Jehovah jirrikonoxxu d-​direzzjoni taʼ Ġesù. Mingħajr din, ikun impossibbli li jiġi proklamat il-​messaġġ tas-​Saltna meta jkun hemm oppożizzjoni ħarxa.

7. (a) Min jifforma “l-​ilsir leali u diskret,” u għala? (b) Liema inkarigu ngħata “l-​ilsir”?

⁷ Ftit qabel mewtu, Ġesù qal lid-​dixxipli tiegħu dwar “l-​ilsir leali u diskret.” Hu bħala s-​Sid kellu jafdalu responsabbiltà speċjali. Dan “l-​ilsir” kellu jkun preżenti meta l-​Mulej telaʼ s-​sema u jkun għadu jaħdem iebes fir-​ritorn inviżibbli taʼ Kristu fil-​qawwa tas-​Saltna. Deskrizzjoni bħal din impossibbli li tapplika għal individwu wieħed, imma tiddeskrivi l-​kongregazzjoni midluka taʼ Kristu. Peress li xtraha b’demmu, Ġesù rrefera għaliha bħala “l-​ilsir” tiegħu. Hu inkariga lill-​membri tagħha biex jagħmlu dixxipli u jitimgħuhom b’mod progressiv, waqt li jagħtuhom ‘jieklu [spiritwalment] fiż-​żmien xieraq.’—Mattew 24:​45-47, NW; 28:19; Isaija 43:10; Luqa 12:42; 1 Pietru 4:10.

8. (a) Liema responsabbiltajiet għandha issa l-​klassi taʼ l-​ilsir? (b) Għala huwa importanti l-​mod kif inwieġbu għall-​istruzzjoni provduta mill-​mezz maħtur minn Alla?

⁸ Ladarba l-​klassi taʼ l-​ilsir kienet qed tagħmel lealment ix-​xogħol tas-​Sid meta reġaʼ ġie b’mod inviżibbli fl-​1914, hemm evidenza li din ġiet fdata b’responsabbiltajiet akbar fl-​1919. Is-​snin li għaddew minn dakinhar ’l hawn kienu ż-​żmien għal xiehda globali dwar is-​Saltna, u kotra kbira t’aduraturi taʼ Jehovah qed tinġabar biex tiġi salvata mit-​tribulazzjoni l-​kbira. (Mattew 24:​14, 21, 22; Apokalissi 7:​9, 10) Dawn ukoll għandhom bżonn taʼ l-​ikel spiritwali, u qed jingħatalhom mill-​klassi taʼ l-​ilsir. Għalhekk, biex nogħġbu lil Jehovah, irridu naċċettaw l-​istruzzjoni li hu jipprovdi b’dan il-​mezz u naġixxu fi qbil magħha.

9, 10. (a) Fl-​ewwel seklu, liema arranġament kien hemm biex isolvi mistoqsijiet rigward duttrini u jagħti direzzjoni rigward l-​ippridkar taʼ l-​aħbar tajba? (b) Liema arranġament biex jorganizza l-​attivitajiet tan-​nies taʼ Jehovah jeżisti llum?

⁹ Kultant iqumu xi mistoqsijiet rigward id-​duttrini u l-​proċeduri. Imbagħad x’jiġri? Atti kapitlu 15 jgħidilna kif ġiet solvuta kwistjoni rigward il-​Ġentili li kkonvertew. Il-​kwistjoni marret għand l-​appostli u l-​irġiel ixjeħ f’Ġerusalemm, li kienu jaqdu bħala ġemgħa ċentrali li tiggverna. Dawn l-​irġiel ma kinux infallibbli, imma Alla użahom. Huma kkunsidraw l-​iskritturi dwar is-​suġġett u wkoll l-​evidenza taʼ kif opera l-​ispirtu t’Alla biex jiftaħ it-​triq għall-​Ġentili. Imbagħad ħadu deċiżjoni. Alla bierek dan l-​arranġament. (Atti 15:​1-29; 16:​4, 5) Din il-​ġemgħa li tiggverna ħatret individwi biex ixerrdu l-​ippridkar tas-​Saltna.

¹⁰ Fi żmienna, il-​Ġemgħa li Tiggverna taʼ l-​organizzazzjoni viżibbli taʼ Jehovah hija fformata minn aħwa midlukin mill-​ispirtu, li huma minn pajjiżi differenti, u tinsab fil-​kwartieri ġenerali tax-​Xhieda taʼ Jehovah. Taħt Ġesù Kristu bħala l-​kap, il-​Ġemgħa li Tiggverna twassal il-​qima pura f’kull pajjiż, waqt li torganizza l-​attivitajiet taʼ l-​ippridkar tax-​Xhieda taʼ Jehovah fl-​għaxriet t’eluf taʼ kongregazzjonijiet tagħhom. Il-​membri tal-​Ġemgħa li Tiggverna jaħsbuha bħall-​appostlu Pawlu, li kiteb lill-​Kristjani sħabu: “Mhux għax irridu nġegħlukom temmnu iżda li naħdmu flimkien għall-​ferħ tagħkom, billi intom qegħdin iżżommu sħaħ fil-​fidi.”—2 Korintin 1:24.

11. (a) Kif jinħatru l-​anzjani u l-​qaddejja ministerjali? (b) Għala għandna nikkooperaw mill-​qrib maʼ dawn l-​uħud maħturin?

¹¹ Ix-​Xhieda taʼ Jehovah mad-​dinja kollha jiddependu mill-​Ġemgħa li Tiggverna biex tagħżel aħwa kwalifikati li, min-​naħa tagħhom, huma awtorizzati biex jaħtru anzjani u qaddejja ministerjali biex jieħdu ħsieb il-​kongregazzjonijiet. Il-​ħtiġijiet għal dawk maħturin jinsabu fil-​Bibbja u jiġi kunsidrat il-​fatt li dawn l-​irġiel m’humiex perfetti u jiżbaljaw. L-​anzjani li jagħmlu r-​rakkomandazzjonijiet u dawk li jagħmlu l-​ħatriet iġorru responsabbiltà serja quddiem Alla. (1 Timotju 3:​1-10, 12, 13; Titu 1:​5-9) Għaldaqstant, huma jitolbu għall-​għajnuna taʼ l-​ispirtu t’Alla u jfittxu l-​gwida mill-​Kelma ispirata tiegħu. (Atti 6:​2-4, 6; 14:23) Ejja nuru l-​apprezzament tagħna għal dawn id-​‘doni fil-​bnedmin,’ li jgħinuna nsiru “ħaġa waħda fil-​fidi.”—Efesin 4:​8, 11-16.

12. Jehovah kif jużahom lin-​nisa fl-​arranġament teokratiku?

¹² L-​Iskrittura tgħid li l-​irġiel għandhom jindokraw il-​kongregazzjoni. Dan ma jbaxxix lin-​nisa, għax xi wħud minnhom huma werrieta fis-​Saltna tas-​sema, u jagħmlu ħafna mix-​xogħol taʼ l-​ippridkar. (Salm 68:12 [68:​11, NW]) Ukoll, billi jieħdu ħsieb lealment ir-​responsabbiltajiet tal-​familja tagħhom, in-​nisa jkomplu jsebbħu r-​reputazzjoni tajba tal-​kongregazzjoni. (Titu 2:​3-5) Imma l-​irġiel li jinħatru huma inkarigati biex jieħdu ħsieb jgħallmu ġewwa l-​kongregazzjoni.—1 Timotju 2:​12, 13.

13. (a) Il-​Bibbja tħeġġeġ lill-​anzjani biex ikollhom liema ħarsa rigward il-​pożizzjoni tagħhom? (b) F’liema privileġġ nistgħu lkoll kemm aħna nieħdu sehem?

¹³ Fid-​dinja, individwu li jkollu pożizzjoni prominenti huwa kunsidrat bħala importanti, imma fl-​organizzazzjoni t’Alla r-​regola hi: “Min hu l-​iżgħar fostkom ilkoll, dak hu l-​kbir.” (Luqa 9:​46-48; 22:​24-26) L-​Iskrittura tagħti parir lill-​anzjani biex joqogħdu attenti u ma jġibux ruħhom bħala li huma superjuri għal dawk li huma l-​wirt t’Alla imma, minflok, ikunu taʼ eżempju għall-​merħla. (1 Pietru 5:​2, 3) Mhux sempliċement xi ftit minnhom, imma x-​Xhieda taʼ Jehovah kollha, irġiel u nisa, għandhom il-​privileġġ li jirrappreżentaw lis-​Sovran taʼ l-​univers, hekk kif jitkellmu b’umiltà f’ismu u jgħidu lin-​nies kullimkien dwar is-​Saltna tiegħu.

14. Uża l-​iskritturi ċitati biex tiddiskuti l-​mistoqsijiet imniżżlin fl-​aħħar tal-​paragrafu.

¹⁴ Nagħmlu tajjeb li nistaqsu lilna nfusna: ‘Napprezza tassew kif Jehovah qed jidderieġi l-​organizzazzjoni viżibbli tiegħu? L-​attitudni, il-​kliem, u l-​azzjonijiet tiegħi juruh dan?’ Li nirriflettu dwar il-​punti li ġejjin jistaʼ jgħin lil kull wieħed u waħda minna nanalizzaw dan.

Jekk tassew nissottometti ruħi għal Kristu bħala l-​Kap tal-​kongregazzjoni, x’għandi nkun qed nagħmel kif inhu indikat fl-​iskritturi li ġejjin? (Mattew 24:14; 28:​19, 20; Ġwann 13:​34, 35)

Meta naċċetta b’apprezzament il-​provvedimenti spiritwali li jiġu permezz tal-​klassi taʼ l-​ilsir rappreżentata mill-​Ġemgħa li Tiggverna, lejn min inkun qed nuri rispett? (Luqa 10:16)

Kif għandu kulħadd fil-​kongregazzjoni, speċjalment l-​anzjani, jittratta wieħed lil ieħor? (Rumani 12:10)

15. (a) X’inkunu qed nuru permezz taʼ l-​attitudni tagħna lejn l-​organizzazzjoni viżibbli taʼ Jehovah? (b) Liema opportunitajiet għandna biex noħorġu lix-​Xitan taʼ giddieb u biex inferrħu qalb Jehovah?

¹⁵ Jehovah qed jiggwidana llum permezz taʼ l-​organizzazzjoni viżibbli tiegħu taħt Kristu. L-​attitudni tagħna lejn dan l-​arranġament turi kif inħossuna dwar il-​kwistjoni tas-​sovranità. (Lhud 13:17) Satana huwa tal-​fehma li l-​interess prinċipali tagħna hu fina nfusna. Imma jekk naqdu fejn ikun hemm il-​bżonn u nevitaw l-​affarijiet li jiġbdu attenzjoni żejda fuqna nfusna, noħorġu lix-​Xitan taʼ giddieb. Jekk inħobbu u nirrispettaw lil dawk li jieħdu t-​tmexxija fostna imma nirrifjutaw li ‘nżiegħlu bin-​nies f’wiċċhom ħalli niksbu xi ħaġa minnhom,’ aħna se nferrħu lil Jehovah. (Ġuda 16; Lhud 13:7) Hekk kif nibqgħu leali lejn l-​organizzazzjoni taʼ Jehovah, nuru li Jehovah huwa Alla tagħna u li aħna nqimuh magħqudin.—1 Korintin 15:58.

Diskussjoni Bħala Reviżjoni

• X’inhi l-​organizzazzjoni viżibbli taʼ Jehovah illum? X’inhu l-​iskop tagħha?

• Min inħatar bħala l-​Kap tal-​kongregazzjoni, u permezz taʼ liema arranġamenti viżibbli qed jipprovdilna direzzjoni kollha mħabba?

• Liema attitudnijiet li jibnuna spiritwalment għandna nikkultivaw lejn dawk fl-​organizzazzjoni taʼ Jehovah?

[Stampi f’paġna 133]

Jehovah jiggwidana permezz taʼ l-​organizzazzjoni viżibbli tiegħu taħt Kristu