“L-​Ilsir Leali” Jgħaddi mill-​Prova!

“Issa wasal iż-​żmien tal-​ġudizzju, li jibda mid-​dar taʼ Alla.” —1 Pietru 4:17.

1. Ġesù x’sab meta spezzjona l-​“ilsir”?

F’PENTEKOSTE tas-​sena 33 E.K., Ġesù ħatar “ilsir” biex jipprovdi l-​ikel fil-​ħin lil “niesu.” Fl-​1914, Ġesù ngħata t-​tron bħala Sultan, u malajr wasal il-​waqt biex dan l-​“ilsir” jiġi spezzjonat. Fil-​parti l-​kbira, hu sab li “l-​ilsir” kien wera li hu “leali u diskret” (NW). Għalhekk, hu ħatru “fuq ġidu kollu.” (Mattew 24:45-47) Madankollu, kien hemm ukoll qaddej ħażin, li la kien leali u lanqas diskret.

“Il-​Qaddej Ħażin”

2, 3. Minfejn ġie dak il-​“qaddej ħażin,” u kif ifforma?

² Ġesù tkellem dwar il-​qaddej ħażin eżatt wara li tkellem dwar “l-​ilsir leali u diskret.” Hu qal: “Jekk dak il-​qaddej ħażin jibda jgħid f’qalbu, ‘Sidi jiddawwar ma jiġi,’ u jaqbad isawwat lil sħabu l-​oħra, u jiekol u jixrob mas-​sakranazzi, sid dak il-​qaddej jasal f’jum li hu ma jkunx jistennieh, f’siegħa li fiha jieħdu għal għarrieda, u jagħmlu bċejjeċ u jagħtih li ħaqqhom in-​nies taʼ wiċċ b’ieħor: hemmhekk ikun hemm il-​biki u t-​tgħażżiż tas-​snien.” (Mattew 24:48-51) L-​espressjoni “dak il-​qaddej ħażin” tiġbdilna l-​attenzjoni lejn il-​kliem li Ġesù qal qabel dwar l-​ilsir leali u diskret. (Korsiv tagħna.) Iva, il-​“qaddej ħażin” qabel kien jagħmel parti mill-​ilsir leali u diskret.a Dan kif?

³ Qabel l-​1914, ħafna mill-​membri tal-​klassi taʼ l-​ilsir leali kellhom tama qawwija li jiltaqgħu maʼ l-​Għarus fis-​sema f’dik is-​sena, imma t-​tama tagħhom ma saritx realtà. Minħabba dan l-​iżvilupp u żviluppi oħra, ħafna kienu diżappuntati u ftit minnhom irrabjaw. Xi wħud minn dawn bdew ‘isawtu’ bi kliemhom lil dawk li qabel kienu ħuthom u ngħaqdu mas-​“sakranazzi,” gruppi reliġjużi tal-​Kristjaneżmu.—Isaija 28:1-3; 32:6.

4. Ġesù kif ittrattah lill-​“qaddej ħażin” u lil dawk kollha li wrew l-​istess spirtu tiegħu?

⁴ Dawn l-​uħud li qabel kienu Kristjani ġew identifikati bħala l-​“qaddej ħażin,” u Ġesù kkastigahom tant li ‘għamilhom bċejjeċ.’ Kif? Hu ċaħadhom, u huma tilfu t-​tama tagħhom taʼ ħajja fis-​sema. Madankollu, huma ma ġewx meqrudin mill-​ewwel. L-​ewwel kellhom jgħaddu minn perijodu taʼ biki u tgħażżiż tas-​snien “fid-​dlam” li hemm barra l-​kongregazzjoni Kristjana. (Mattew 8:12) Minn dawk is-​snin tal-​bidu, ftit individwi midlukin oħra wrew l-​istess spirtu ħażin, u għalhekk identifikaw ruħhom mal-​“qaddej ħażin.” Xi wħud min-​“nagħaġ oħra” imitaw in-​nuqqas taʼ lealtà tagħhom. (Ġwanni 10:16) Dawn l-​uħud kollha li huma għedewwa taʼ Kristu jispiċċaw l-​istess, “’il barra fid-​dlam” spiritwali.

5. L-​ilsir leali u diskret kif irreaġixxa b’kuntrast mal-​“qaddej ħażin”?

⁵ Xorta waħda, il-​membri taʼ l-​ilsir leali u diskret għaddew mill-​istess prova bħal dak il-​“qaddej ħażin.” Madankollu, minflok ma rrabjaw huma aġġustaw ruħhom. (2 Korintin 13:11) L-​imħabba tagħhom għal Jehovah u għal ħuthom issaħħet. Bħala riżultat, huma servew bħala “kolonna u pedament tal-​verità” f’dan iż-​żmien imqalleb taʼ “l-​aħħar tad-​dinja.”—1 Timotju 3:15; 2 Timotju 3:1.

Ix-​Xebbiet l-​Għaqlin u l-​Boloh

6. (a) Ġesù kif wera kemm hi diskreta l-​klassi taʼ l-​ilsir leali? (b) Qabel l-​1914, liema messaġġ ipproklamaw il-​Kristjani midlukin?

⁶ Wara li tkellem dwar “il-​qaddej ħażin,” Ġesù qal żewġ parabboli biex juri għala xi Kristjani midlukin kienu se juru li huma leali u diskreti waqt li oħrajn ma kinux se jagħmlu dan.b Biex juri xi jfisser li tkun diskret, hu qal: “Is-​Saltna tas-​Smewwiet ixebbhuha maʼ għaxar xebbiet li ħarġu bl-​imsiebaħ tagħhom biex jilqgħu l-​għarus. Ħamsa minnhom kienu boloh u ħamsa għaqlin [jew, “diskreti,” NW], għax il-​boloh ħadu l-​imsiebaħ imma ma ħadux żejt magħhom, waqt li l-​għaqlin [“d-​diskreti,” NW] ħadu mhux biss l-​imsiebaħ iżda wkoll iż-​żejt fil-​kwies.” (Mattew 25:1-4) L-​għaxar xebbiet ifakkruna fil-​Kristjani midlukin qabel l-​1914. Huma kienu kkalkulaw li l-​għarus, Ġesù Kristu, kien wasal biex ifeġġ. Għalhekk, huma “ħarġu” biex jiltaqgħu miegħu, waqt li ppridkaw bil-​qlubija ż-​żminijiet stabbiliti tal-​ġnus.—Luqa 21:24.

7. Il-​Kristjani midlukin meta u għala kienu bħallikieku “raqdu”?

⁷ Kellhom raġun. Iż-​żminijiet stabbiliti veru ntemmu fl-​1914, u s-​Saltna t’Alla f’idejn Ġesù Kristu bdiet taħkem. Imma dan beda jseħħ fis-​smewwiet inviżibbli. Fuq l-​art, il-​bnedmin bdew ibatu l-​gwaj imbassar. (Apokalissi 12:10, 12) Imbagħad ġie ż-​żmien taʼ prova. Peress li ma kellhomx fehma ċara, il-​Kristjani midlukin ħasbu li “l-​għarus iddawwar ma ġie.” Waqt li ħassewhom imħawdin u kienu qed jiffaċċjaw oppożizzjoni mid-​dinja, ħafna minnhom battew u prattikament waqqfu x-​xogħol organizzat taʼ l-​ippridkar pubbliku. Bħax-​xebbiet fil-​parabbola, spiritwalment kien “ħadhom in-​ngħas u raqdu,” l-​istess bħalma għamlu dawk l-​uħud żleali li kienu jgħidu li huma Kristjani wara li mietu l-​appostli taʼ Ġesù.—Mattew 25:5; Apokalissi 11:7; 12:17.

8. X’wassal għall-​għajta: “Ara l-​għarus!” u l-​Kristjani midlukin x’kellhom jagħmlu f’dan il-​waqt?

⁸ Imbagħad fl-​1919 seħħet xi ħaġa li ma kinux qed jistennewha. Naqraw: “F’nofs taʼ lejl instemaʼ min jgħajjat,’ ‘Ara l-​għarus! Oħorġu ilqgħuh!’ Dawk ix-​xebbiet qamu lkoll u ħejjew l-​imsiebaħ tagħhom.” (Mattew 25:6, 7) Sewwa sew meta l-​affarijiet kienu jidhru bla tama, kien hemm is-​sejħa biex isiru attivi! Fl-​1918, Ġesù, “l-​anġlu tal-​patt,” kien ġie fit-​tempju spiritwali taʼ Jehovah biex jispezzjona u jnaddaf il-​kongregazzjoni t’Alla. (Malakija 3:1) Issa, il-​Kristjani midlukin kien jeħtiġilhom joħorġu u jiltaqgħu miegħu fil-​btieħi taʼ l-​art taʼ dan it-​tempju. Kien wasal iż-​żmien għalihom li ‘jiddu.’—Isaija 60:1; Filippin 2:14, 15.

9, 10. Fl-​1919, għala xi Kristjani kienu “għaqlin” u oħrajn “boloh”?

⁹ Imma stenna! Fil-​parabbola xi wħud mix-​xebbiet kellhom problema. Ġesù kompla: “Il-​boloh qalu lill-​għaqlin, ‘Agħtuna ftit żejt minn tagħkom, għax l-​imsiebaħ tagħna jintfew.’” (Mattew 25:8) Mingħajr żejt, l-​imsiebaħ ma kinux se jitfgħu d-​dawl. Għalhekk, id-​dawl tal-​musbieħ ifakkarna fil-​Kelma t’Alla taʼ verità u fl-​ispirtu qaddis tiegħu, li jagħtu l-​qawwa lill-​aduraturi veri sabiex iġorru d-​dawl. (Salm 119:130; Danjel 5:14) Qabel l-​1919, Kristjani midlukin għaqlin b’mod ħabrieki fittxew li jagħrfu x’inhi r-​rieda t’Alla għalihom, minkejja l-​kundizzjoni dgħajfa li kienu fiha f’dak iż-​żmien. Għalhekk, meta ġiet is-​sejħa biex jagħtu d-​dawl, huma kienu lesti.—2 Timotju 4:2; Lhud 10:24, 25.

¹⁰ Madankollu, ċerti midlukin ma kinux preparati biex jagħmlu s-​sagrifiċċji jew sforz persunali iktar ħabrieki—għalkemm kellhom xewqa kbira li jkunu maʼ l-​Għarus. Għalhekk, meta wasal il-​waqt biex isiru attivi fl-​ippridkar taʼ l-​aħbar tajba, huma ma kinux lesti. (Mattew 24:14) Huma saħansitra pprovaw itellfu lil sħabhom li kienu żelużi billi, fil-​fatt, bdew jitolbuhom ftit mill-​provvista taż-​żejt tagħhom. Fil-​parabbola taʼ Ġesù, kif wieġbu x-​xebbiet għaqlin? Huma qalu: “Għandu mnejn ma jibqax biżżejjed, la għalina u lanqas għalikom! L-​aħjar, morru għand tal-​ħanut u ixtru għalikom.” (Mattew 25:9) B’mod simili, Kristjani midlukin leali fl-​1919 ma riedu jagħmlu xejn li jnaqqas il-​kapaċità tagħhom li jġorru d-​dawl. B’hekk, huma għaddew mill-​ispezzjoni.

11. Xi ġralhom ix-​xebbiet boloh?

¹¹ Ġesù jikkonkludi: “Xħin [ix-xebbiet boloh] marru biex jixtru jiġi l-​għarus; dawk li kienu lesti daħlu miegħu għall-​festa tat-​tieġ, u l-​bieb ingħalaq. Saflaħħar waslu wkoll ix-​xebbiet l-​oħra, u bdew jgħidu, ‘Sinjur, Sinjur, iftħilna!’ Iżda hu weġibhom u qal, ‘Tassew, ngħidilkom, lilkom ma nafkomx.’” (Mattew 25:10-12) Iva, xi wħud ma kinux lesti għall-​wasla taʼ l-​Għarus. Għalhekk, huma m’għaddewx mill-​ispezzjoni u tilfu l-​opportunità li jattendu għall-​festa taż-​żwieġ fis-​sema. X’ħasra!

Il-​Parabbola tat-​Talenti

12. (a) Ġesù x’uża biex juri x’inhi l-​lealtà? (b) Min kien dak li “siefer”?

¹² Wara li ta tixbiha dwar l-​għaqal, Ġesù kompla b’tixbiha dwar il-​lealtà. Hu qal: “Dan bħal wieħed li kien se jsiefer, u sejjaħ lill-​qaddejja tiegħu u ħallielhom ġidu f’idejhom. Lil wieħed tah ħames talenti, lil ieħor tnejn, u lil ieħor wieħed, kull wieħed skond il-​ħila tiegħu. U siefer.” (Mattew 25:14, 15) Ir-​raġel fil-​parabbola hu Ġesù nnifsu, li “siefer” meta telaʼ s-​sema fis-​sena 33 E.K. Imma qabel ma telaʼ, Ġesù ħalla “ġidu” f’idejn id-​dixxipli leali. Kif?

13. Ġesù kif ħejja għalqa kbira t’attività u ta l-​awtorità lill-​“qaddejja” tiegħu biex iħaddmu n-​negozju?

¹³ Waqt il-​ministeru tiegħu fuq l-​art, Ġesù beda jipprepara għalqa kbira t’attività billi ppriedka l-​aħbar tajba tas-​Saltna madwar l-​art taʼ Iżrael. (Mattew 9:35-38) Qabel ma “siefer,” hu ħalla din l-​għalqa f’idejn id-​dixxipli leali tiegħu, billi qalilhom: “Morru, mela, agħmlu dixxipli mill-​ġnus kollha, u għammduhom fl-​isem tal-​Missier u taʼ l-​Iben u taʼ l-​Ispirtu s-​Santu, u għallmuhom iħarsu dak kollu li ordnajtilkom jien.” (Mattew 28:18-20) B’dan il-​kliem Ġesù ta l-​awtorità lill-​“qaddejja” tiegħu biex iħaddmu n-​negozju sakemm jiġi lura, “kull wieħed skond il-​ħila tiegħu.”

14. Għala mhux kulħadd kien mistenni li jagħmel l-​istess ammont taʼ negozju?

¹⁴ Din l-​espressjoni tindika li mhux il-​Kristjani taʼ l-​ewwel seklu kollha kellhom l-​istess ċirkustanzi jew possibbiltajiet. Xi wħud, bħal Pawlu u Timotju, kienu f’ċirkustanzi li jippermettulhom ikollhom l-​akbar sehem possibbli fix-​xogħol taʼ l-​ippridkar u tat-​tagħlim. Iċ-​ċirkustanzi taʼ l-​oħrajn għandhom mnejn illimitaw bil-​kbir il-​libertà li setaʼ kellhom biex jaġixxu. Per eżempju, xi Kristjani kienu lsiera, u oħrajn kienu morda, avanzati fiż-​żmien, jew kellhom responsabbiltajiet tal-​familja. M’għandniex xi ngħidu, ċerti privileġġi fil-​kongregazzjonijiet ma kinux disponibbli għad-​dixxipli kollha. In-​nisa midlukin u xi rġiel midlukin ma kinux jgħallmu fil-​kongregazzjoni. (1 Korintin 14:34; 1 Timotju 3:1; Ġakbu 3:1) Xorta waħda, kienet x’kienet is-​sitwazzjoni persunali tagħhom, id-​dixxipli midlukin kollha taʼ Kristu—irġiel u nisa—ġew inkarigati jieħdu sehem fin-​negozju, jiġifieri, jużaw sew l-​opportunitajiet u ċ-​ċirkustanzi tagħhom fil-​ministeru Kristjan. Il-​Kristjani taʼ żmienna jagħmlu bħalhom.

Jibda ż-​Żmien taʼ l-​Ispezzjoni!

15, 16. (a) Meta kien iż-​żmien li jsiru l-​kontijiet? (b) Liema opportunitajiet ġodda biex ‘iħaddmu’ n-​negozju ngħataw lil uħud leali?

¹⁵ Il-​parabbola tkompli: “Wara ħafna, sid dawk il-​qaddejja raġaʼ lura u beda jagħmel il-​kontijiet magħhom.” (Mattew 25:19) Fl-​1914—ħafna żmien wara s-​sena 33 E.K.—Kristu Ġesù beda l-​preżenza rjali tiegħu. Tliet snin u nofs wara, fl-​1918, hu ġie fit-​tempju spiritwali t’Alla u wettaq il-​kliem taʼ Pietru: “Issa wasal iż-​żmien tal-​ġudizzju, li jibda mid-​dar taʼ Alla.” (1 Pietru 4:17; Malakija 3:1) Kien il-​waqt li jagħmlu l-​kontijiet.

¹⁶ L-​ilsiera, l-​aħwa midlukin taʼ Ġesù, x’kienu għamlu bit-​“talenti” tas-​Sultan? Mis-​sena 33 E.K. ’l quddiem, inkluż is-​snin li jwasslu sa l-​1914, ħafna kienu dawk li ħadmu iebes biex ‘iħaddmu’ n-​negozju taʼ Ġesù. (Mattew 25:16) Anki matul l-​ewwel gwerra dinjija, huma wrew xewqa kbira biex jaqdu lis-​Sid. Issa kien xieraq li wħud leali jingħataw opportunitajiet ġodda biex ‘iħaddmu’ n-​negozju. Iż-​żmien tat-​tmiem taʼ din is-​sistema dinjija kien wasal. L-​aħbar tajba kellha tiġi pridkata madwar id-​dinja. “Il-​ħsad taʼ l-​art” kellu jsir. (Apokalissi 14:6, 7, 14-16) Kellhom jinstabu l-​aħħar membri tal-​klassi tal-​qamħ u kellha tinġabar “kotra kbira” taʼ nagħaġ oħra.—Apokalissi 7:9; Mattew 13:24-30.

17. Il-​Kristjani midlukin leali kif ‘daħlu fl-​hena taʼ sidhom’?

¹⁷ Iż-​żmien tal-​ħsad huwa żmien taʼ ferħ. (Salm 126:6) Allura, huwa xieraq li meta fl-​1919 Ġesù fada responsabbiltà akbar f’idejn ħutu l-​midlukin leali, hu qal: “Int kont fidil fil-​ftit, u jien se nafdak fuq ħafna; idħol fl-​hena taʼ sidek.’” (Mattew 25:21, 23, korsiv tagħna.) Iktar minn hekk, l-​hena tas-​Sid bħala s-​Sultan maħtur ġdid tas-​Saltna t’Alla jisboq dak kollu li nistgħu nimmaġinaw. (Salm 45:2, 3, 7, 8 [45:1, 2, 6, 7, NW]) Il-​membri tal-​klassi taʼ l-​ilsir leali jħossu l-​istess hena meta jirrappreżentaw lis-​Sultan u jżidu l-​interessi tiegħu fuq l-​art. (2 Korintin 5:20) L-​għaxqa tagħhom tidher fil-​kliem profetiku taʼ Isaija 61:10: “Nifraħ fuq li nifraħ bil-​Mulej, taqbeż bil-​ferħ ruħi b’Alla tiegħi. Għax hu libbisni bi lbies is-​salvazzjoni.”

18. Xi wħud għala m’għaddewx mill-​ispezzjoni, u b’liema riżultat?

¹⁸ B’dispjaċir, xi wħud m’għaddewx mill-​ispezzjoni. Naqraw: “Resaq ukoll dak li kien ħa talent wieħed, u qal, ‘Sinjur, lilek nafek bħala raġel aħrax, taħsad fejn ma żrajtx u tiġbor fejn ma xerridtx. Bżajt, u mort ħbejt it-​talent tiegħek fl-​art. Hawn, ara, għandek dak li hu tiegħek.’” (Mattew 25:24, 25) Bl-​istess mod, xi Kristjani midlukin m’għamlu xejn biex ‘iħaddmu’ n-​negozju. Qabel l-​1914 ma qasmux it-​tama tagħhom bil-​ħeġġa kollha m’oħrajn, u ma ridux jibdew fl-​1919. Ġesù kif wieġeb għad-​diżrispett tagħhom? Hu ħadilhom il-​privileġġi kollha. Huma ġew mitfugħin “’il barra fid-​dlam; hemmhekk ikun hemm il-​biki u t-​tgħażżiż tas-​snien.”—Mattew 25:28, 30.

L-​Ispezzjoni Tkompli

19. B’liema mod ikompli lproċess taʼ l-​ispezzjoni, u x’inhuma determinati li jagħmlu l-​Kristjani midlukin kollha?

¹⁹ M’għandniex xi ngħidu, il-​maġġuranza minn dawk li kellhom isiru l-​ilsira midlukin taʼ Kristu matul iż-​żmien tat-​tmiem kienu għadhom ma bdewx jaqdu lil Jehovah meta Ġesù beda l-​ispezzjoni tiegħu fl-​1918. Tilfuha l-​ispezzjoni? Lanqas xejn! Il-​proċess taʼ l-​ispezzjoni beda biss fl-​1918/19 meta l-​ilsir leali u diskret bħala klassi għadda mill-​prova. Il-​Kristjani midlukin b’mod individwali jkomplu jiġu spezzjonati sakemm jiġu siġillati b’mod permanenti. (Apokalissi 7:1-3) Peress li jirrealizzaw dan, l-​aħwa midlukin taʼ Kristu huma determinati li jkomplu ‘jħaddmu’ n-​negozju lealment. Huma determinati li jkunu għaqlin billi jżommu provvista abbundanti taʼ żejt ħalli d-​dawl jibqaʼ jiddi ħafna. Huma jafu li meta kull wieħed minnhom itemm lealment il-​ħajja tiegħu fuq l-​art, Ġesù se jilqgħu fil-​post fejn se jgħammar fis-​sema.—Mattew 24:13; Ġwanni 14:2-4; 1 Korintin 15:50, 51.

20. (a) Illum, x’inhuma determinati li jagħmlu n-​nagħaġ oħra? (b) Il-​Kristjani midlukin taʼ xiex huma konxji?

²⁰ Il-​kotra kbira taʼ nagħaġ oħra imitaw lil ħuthom il-​midlukin. Huma jafu li l-​għarfien li għandhom taʼ l-​iskopijiet t’Alla jġib miegħu responsabbiltà kbira. (Eżekjel 3:17-21) Għalhekk, bl-​għajnuna tal-​Kelma taʼ Jehovah u taʼ l-​ispirtu qaddis, huma jżommu l-​provvista taʼ żejt tagħhom abbundanti permezz taʼ l-​istudju u s-​sħubija fil-​laqgħat. U huma jħallu d-​dawl tagħhom jiddi billi jieħdu sehem fix-​xogħol taʼ l-​ippridkar u tat-​tagħlim, u b’hekk ‘iħaddmu’ n-​negozju flimkien maʼ ħuthom il-​midlukin. Madankollu, il-​Kristjani midlukin huma konxji ħafna tal-​fatt li t-​talenti ngħatawlhom f’idejhom. Huma jridu jagħtu kont għall-​mod kif ġid il-​Mulej jitqassam fuq l-​art. Avolja ftit fin-​numru, huma ma jistgħux iħallu r-​responsabbiltà tagħhom f’idejn il-​kotra l-​kbira. B’dan f’moħħu, l-​ilsir leali u diskret ikompli jieħu t-​tmexxija biex jieħu ħsieb in-​negozju tas-​Sultan, filwaqt li jinsab grat għall-​appoġġ tal-​membri devoti tal-​kotra l-​kbira. Dawn jagħrfu r-​responsabbiltà taʼ ħuthom il-​midlukin u jħossuhom privileġġati li għandhom lilhom biex jaħdmu magħhom u jindokrawhom.

21. Liema twissija tapplika għall-​Kristjani kollha minn qabel l-​1919 sal-​ġurnata taʼ llum?

²¹ Għalhekk, għalkemm dawn iż-​żewġ parabboli jitfgħu d-​dawl fuq il-​ġrajjiet li seħħew fl-​1919 jew ftit qabel jew wara, dawn japplikaw bażikament għall-​Kristjani veri kollha matul l-​aħħar jiem. B’dan il-​mod, filwaqt li t-​twissija li Ġesù ta fl-​aħħar tal-​parabbola dwar l-​għaxar xebbiet tapplika l-​ewwelnett għall-​Kristjani midlukin qabel l-​1919, b’mod ġenerali din għadha tapplika għal kull Kristjan. Mela, jalla lkoll kemm aħna ngħożżu l-​kliem taʼ Ġesù: “Ishru, mela, għaliex la tafu l-​jum u lanqas is-​siegħa.”—Mattew 25:13.

[Noti taʼ taħt]

Tistaʼ Tispjega?

• Ġesù meta spezzjona lis-​segwaċi tiegħu u x’sab?

• Xi wħud mill-​Kristjani midlukin għala żviluppaw spirtu bħal tal-​“qaddej ħażin”?

• Kif nistgħu nuru li aħna għaqlin b’mod spiritwali?

• Waqt li nimitaw l-​aħwa midlukin u leali taʼ Ġesù, b’liema mod nistgħu nkomplu ‘nħaddmu’ n-​negozju?

[Kaxxa f’paġna 16]

ĠESÙ META JIĠI?

F’Mattew kapitli 24 u 25, jintqal li Ġesù “jiġi” f’sens differenti. Hu m’għandux għalfejn jiċċaqlaq minn postu sabiex “jiġi.” Minflok hu “jiġi” fis-​sens taʼ li jitfaʼ l-​attenzjoni tiegħu fuq il-​bnedmin jew fuq is-​segwaċi tiegħu, spiss biex jagħmel ħaqq. Għalhekk, fl-​1914 hu “ġie” biex jibda l-​preżenza tiegħu bħala Sultan maħtur. (Mattew 16:28; 17:1; Atti 1:11) Fl-​1918 hu “ġie” bħala anġlu tal-​patt u beda jagħmel ħaqq minn dawk li jgħidu li jaqdu lil Jehovah. (Malakija 3:1-3; 1 Pietru 4:17) F’Armageddon, hu se “jiġi” biex jagħmel ħaqq mill-​għedewwa taʼ Jehovah.—Apokalissi 19:11-16.

Il-​miġja (jew, il-​wasla) li ssemmiet kemm-il darba f’Mattew 24:29-44 u 25:31-46 isseħħ fit-​“taħbit il-​kbir,” jew tribulazzjoni l-​kbira. (Apokalissi 7:14) Mill-​banda l-​oħra, il-​miġja li tissemma kemm-il darba f’Mattew 24:45 sa 25:30 hija relatata mal-​ħaqq li jagħmel minn dawk li mill-​1918 ’l hawn sostnew li huma d-​dixxipli tiegħu. Per eżempju, ma jkunx raġunevoli li ngħidu li l-​premju taʼ l-​ilsir leali, il-​ħaqq tax-​xebbiet boloh, u l-​ħaqq taʼ l-​ilsir għażżien, li ħeba t-​talent taʼ Sidu, se jseħħu meta Ġesù “jiġi” fit-​tribulazzjoni l-​kbira. Dan kieku jkun jindika li ħafna mill-​midlukin m’humiex se jkunu leali f’dak iż-​żmien, u b’hekk se jkollu jiħdilhom posthom ħaddieħor. Madankollu, Apokalissi 7:3 jindika li l-​ilsiera midlukin kollha taʼ Kristu se jkunu ġew ‘siġillati’ sa dak iż-​żmien.

[Stampa f’paġna 14]

Il-​“qaddej ħażin” ma ngħata l-​ebda barka fl-​1919

[Stampa f’paġna 15]

Ix-​xebbiet għaqlin kienu lesti meta wasal l-​għarus

[Stampa f’paġna 17]

Il-​qaddejja leali kienu ‘ħaddmu’ n-​negozju

Il-​qaddej għażżien ma ħaddmux

[Stampi f’paġna 18]

Il-​midlukin u l-​“kotra kbira” jkomplu jħallu d-​dawl tagħhom jiddi