Il-​ħarsa Tal-​bibbja

Il-​Kristjani kif Għandhom Iqisuha l-​Quddiesa?

KATTOLIĊI devoti jaqblu maʼ Papa Ġwanni Pawlu II, li skond The New York Times, dan l-​aħħar “afferma mill-​ġdid li l-​knisja tqisu bħal dnub jekk Kattoliku ma jmurx il-​Quddies.” X’inhi l-​Quddiesa? Il-​knisja u l-​Bibbja jaqblu fuq dan is-​suġġett?

Fil-ktieb Things Catholics Are Asked About, il-​qassis Kattoliku Martin J. Scott jiddefinixxi l-​quddiesa kif ġej: “Il-​Quddiesa hija s-​sagrifiċċju mingħajr demm tal-​Ġisem u d-​Demm taʼ Kristu. Il-​Kalvarju kien is-​sagrifiċċju mdemmi taʼ Kristu. Bażikament, il-​Quddiesa hija l-​istess sagrifiċċju tas-​salib. Din m’hijiex xi figura tad-​diskors, xi metafora, jew esaġerazzjoni.” Hu jistqarr ukoll: “Il-​Quddiesa ssostni li tniżżel l-​Iben t’Alla fuq l-​artali tagħna, u li toffrih bħala sagrifiċċju lil Alla.”

Il-​Quddiesa Hija Skritturali?

Kattoliċi sinċieri jemmnu li l-​Quddiesa hija bbażata fuq tagħlim Skritturali. Bħala prova, huma jippontaw lejn il-​kliem li Ġesù qal waqt dik li hi magħrufa minn kulħadd bħala l-​Aħħar Ċena. Hu u jqassam il-​ħobż u l-​inbid lill-​appostli tiegħu, Ġesù qal b’referenza għall-​ħobż: “Dan hu ġismi.” B’referenza għall-​inbid, hu qal: “Dan huwa demmi.” (Mattew 26:​26-28) Il-​Kattoliċi jemmnu li meta lissen dan il-​kliem, Ġesù attwalment bidel il-​ħobż u l-​inbid fil-​ġisem u d-​demm tiegħu. Madankollu, in-​New Catholic Encyclopedia (1967) twissi: “M’għandniex inserrħu moħħna li l-​kliem ‘Dan hu ġismi’ jew ‘Dan huwa demmi’ huwa letterali. . . . Għaliex fi frażijiet bħal ‘il-​ħsad hu tmiem id-​dinja’ (Mt 13.39) jew ‘Jiena d-​dielja vera’ (Ġw 15:1) il-​[verb “hu”] ifisser biss li jissinjifika jew jirrappreżenta.” B’hekk, saħansitra din l-​enċiklopedija awtorevoli tammetti li l-​kliem f’Mattew 26:​26-28 ma jagħtix prova li l-​ħobż u l-​inbid inbidlu fil-​ġisem u d-​demm letterali taʼ Ġesù fl-​Aħħar Ċena.

Xi wħud jistgħu jiftakru dak li Ġesù darba qal: “Jiena hu l-​ħobż il-​ħaj, li niżel mis-​sema. . . . Min jiekol ġismi u jixrob demmi għandu l-​ħajja taʼ dejjem.” (Ġwann 6:​51, 54) Xi wħud minn dawk li kienu qed jisimgħu lil Ġesù ħadu kliemu letteralment u baqgħu skandalizzati. (Ġwann 6:60) Imma nistgħu nistaqsu, Ġesù bidel ġismu f’ħobż f’dik l-​okkażjoni? Dażgur li le! Hu kien qed jitkellem simbolikament. Qabbel lilu nnifsu mal-​ħobż għaliex permezz tas-​sagrifiċċju tiegħu kellu jagħti l-​ħajja lill-​umanità. Ġwann 6:​35, 40 jindika b’mod ċar li wieħed kellu jiekol u jixrob billi jeżerċita fidi f’Ġesù Kristu.

Ladarba l-​Quddiesa hija rit prinċipali tal-​Knisja Kattolika, wieħed jistaʼ jistenna li l-​Iskrittura tappoġġaha. Imma dan ma tagħmlux. The Catholic Encyclopedia (edizzjoni taʼ l-​1913) spjegat għala: “Is-​sors ewlieni tad-​duttrina tagħna . . . hija t-​tradizzjoni, li sa mill-​iktar żminijiet bikrija tiddikjara l-​valur impetratorju [supplikanti] li għandu s-​Sagrifiċċju tal-​Quddiesa.” Iva, il-​Quddiesa Kattolika Rumana hija bbażata fuq it-​tradizzjoni, mhux fuq il-​Bibbja.

Hi kemm hi emmnuta b’sinċerità, tradizzjoni li tikkontradixxi l-​Bibbja hija inaċċettabbli għal Alla. Ġesù ċanfar lill-​mexxejja reliġjużi taʼ żmienu: “Hekk iġġibu fix-​xejn il-​liġi taʼ Alla minħabba t-​tradizzjoni tagħkom.” (Mattew 15:6) Ladarba Ġesù kien jgħożż il-​Kelma t’Alla, ejja neżaminaw it-​tagħlim li jirrigwarda l-​Quddiesa fid-​dawl taʼ l-​Iskrittura Mqaddsa.

Kristu Sagrifikat​—Kemm Spiss?

Il-​Knisja Kattolika tgħallem li kull darba li tiġi ċelebrata l-​Quddiesa, Ġesù jiġi sagrifikat, għalkemm issostni li hu fil-​fatt ma jmutx u li s-​sagrifiċċju huwa mingħajr demm. Taqbel il-​Bibbja maʼ din il-​ħarsa? Innota x’hemm miktub f’Lhud 10:​12, 14: “Wara li offra sagrifiċċju wieħed għad-​dnubiet, [Ġesù] qagħad għal dejjem fuq in-​naħa tal-​lemin taʼ Alla . . . Għax hu b’offerta waħda għamel perfetti għal dejjem lil dawk li huwa jqaddes.”

Madankollu, Kattoliku sinċier għandu mnejn joġġezzjona: ‘Ma jkollux Ġesù għalfejn joffri lilu nnifsu taʼ spiss? Aħna lkoll nidinbu ħafna drabi.’ It-​tweġiba tal-​Bibbja hija dokumentata f’Lhud 9:​25, 26, li skond in-​New Jerusalem Bible tgħid: “[Kristu] m’għandux għalfejn joffri lilu nnifsu darba wara l-​oħra. . . . Hu deher darba għal dejjem, fit-​tmiem taʼ l-​aħħar żmien, biex jiddisponi mid-​dnub billi jissagrifika lilu nnifsu.” Innota dan sewwa: Kristu “m’għandux għalfejn joffri lilu nnifsu darba wara l-​oħra.” F’Rumani 5:​19, l-​appostlu Pawlu jispjega għala: “Bid-​diżubbidjenza taʼ bniedem wieħed [Adam] il-​ħafna saru midinbin, hekk ukoll bl-​ubbidjenza taʼ wieħed [Ġesù] il-​ħafna jsiru ġusti.” L-​att wieħed taʼ diżubbidjenza min-​naħa taʼ Adam għamilna lkoll suġġetti għall-​mewt; l-​att wieħed taʼ redenzjoni min-​naħa taʼ Ġesù qiegħed il-​bażi għalina lkoll li neżerċitaw fidi f’dak is-​sagrifiċċju biex jinħafrulna dnubietna issa u biex ingawdu ħajja taʼ dejjem fil-​futur.

X’differenza tagħmel jekk Ġesù kienx sagrifikat darba jew jekk jiġix sagrifikat taʼ spiss? Hija kwistjoni t’apprezzament għall-​valur tas-​sagrifiċċju taʼ Ġesù. Din kienet l-​akbar għotja li qatt ngħatat​—għotja tant prezzjuża u tant perfetta li qatt ma se jkun hemm ħtieġa li tirrepeti ruħha.

Is-sagrifiċċju taʼ Ġesù ċertament jistħoqqlu li niftakruh. Imma hemm differenza bejn li tiftakar xi ġrajja u li tirrepetiha. Per eżempju, raġel u mara li jiċċelebraw l-​anniversarju taż-​żwieġ tagħhom għandhom mnejn jiftakru l-​ġurnata li fiha żżewġu, mingħajr ma attwalment jirrepetu ċ-​ċerimonja. Kull sena, ix-​Xhieda taʼ Jehovah josservaw l-​anniversarju tal-​mewt taʼ Ġesù, u dan jagħmluh bil-​mod li kkmanda Ġesù​—“b’tifkira,” mhux b’sagrifiċċju, tiegħu. (Luqa 22:19) Iktar minn hekk, matul is-​sena kollha, dawn il-​Kristjani jagħmlu ħilithom biex jikkultivaw relazzjoni taʼ mħabba m’Alla Jehovah permezz taʼ Ġesù Kristu billi jġibu ħajjithom, l-​azzjonijiet tagħhom, u t-​twemmin tagħhom fi qbil maʼ l-​Iskrittura Mqaddsa.

Taʼ spiss, li jagħmlu dan ikun ifisser li jagħmlu bidliet fil-​mod taʼ ħsieb tagħhom. Imma x-​Xhieda jithennew bl-​għarfien li jekk huma jappoġġaw lealment il-​Kelma t’Alla minflok it-​tradizzjoni tal-​bnedmin, se jiġu mberkin. U jekk jeżerċitaw fidi fid-​demm sagrifikat taʼ Ġesù, li xxerred darba għal dejjem kważi elfejn sena ilu, dan se jnaddafhom minn kull dnub.​—1 Ġwann 1:​8, 9.

[Stampa f’paġna 26]

Il-​quddiesa taʼ San Eġidju (dettall)

[Sors]

Erich Lessing/Art Resource, NY