“Jekk il-​Melħ Jaqtaʼ”

ĠEW miġġildin gwerer sħaħ minħabba fih. Kien jintuża bħalma llum nużaw il-​flus. Fiċ-​Ċina tal-​qedem id-​deheb biss kien jissuperah fil-​valur. Iva, il-​melħ ilu żmien twil jitqies mill-​bniedem bħala prodott prezzjuż ferm. Sal-​ġurnata tal-​lum jiġi attribwit bi propjetajiet antisettiċi taʼ fejqan, u kull fejn tmur issibu jintuża biex itejjeb it-​togħma u bħala preservattiv taʼ l-​ikel.

Meta tqis l-​użu differenti u l-​ħafna kwalitajiet mixtieqa tal-​melħ, ma tiħodhiex bi kbira li jintuża b’mod figurattiv fil-​Bibbja. Per eżempju, il-​Liġi Mosajka rrikjediet li kulma kien jiġi offrut fuq l-​artal lil Jehovah kellhom jagħmlulu l-​melħ. (Levitiku 2:13) Dan ma kienx isir biex itejjeb it-​togħma tas-​sagrifiċċji, imma x’aktarx minħabba li l-​melħ irrappreżenta ħelsien mill-​korruzzjoni jew taħsir.

Ġesù Kristu, fil-​famuża Priedka tiegħu taʼ fuq il-​Muntanja, qal lis-​segwaċi tiegħu: “Intom il-​melħ taʼ l-​art.” (Mattew 5:13) B’din l-​istqarrija, Ġesù implika li l-​ippridkar tagħhom lill-​oħrajn dwar is-​Saltna t’Alla kien se jkollu influwenza li kellha l-​potenzjal li tippreserva lis-​semmiegħa tagħhom, jew li ssalvalhom ħajjithom. Tabilħaqq, dawk li applikaw il-​kliem taʼ Ġesù kienu se jkunu protetti mit-​taħsir morali u spiritwali fil-​komunitajiet fejn kienu jgħixu u jaqdu.—1 Pietru 4:1-3.

Madankollu, Ġesù kompla jagħti t-​twissija: “Imma jekk il-​melħ jaqtaʼ, . . . ma jibqaʼ tajjeb għal xejn iżjed ħlief biex jintrema barra u jintrifes min-​nies.” Meta kkummenta fuq dan, l-​istudjuż tal-​Bibbja Albert Barnes qal li l-​melħ li kienu jafu bih Ġesù u l-​appostli tiegħu “ma kienx pur, imma kien imħallat b’ħaxix u ħamrija.” Mela kieku l-​melħ kellu jaqtaʼ, kieku kien iħalli warajh “kwantità konsiderevoli taʼ sustanzi.” “Dan,” innota Barnes, “ma kien ikun tajjeb għal xejn ħlief . . . biex titfgħu fil-​passaġġi jew fit-​toroq, bħalma nagħmlu biż-​żrar.”

Sabiex jagħtu kas taʼ din it-​twissija, il-​Kristjani għandhom joqogħdu attenti sabiex ma jiqfux jieħdu sehem f’xiehda pubblika, jew inkella, ma jerġgħux jaqgħu f’korsa taʼ kondotta li tiċħad lil Alla. Jekk jagħmlu hekk, huma jiddeterjoraw spiritwalment u jistgħu jsiru bla użu, bħall-​‘melħ li qataʼ.’