Kif Issib il-​Ferħ Veru

ID-​DALAI LAMA, il-​mexxej reliġjuż tal-​Buddisti, qal: “Jien nemmen li l-​iskop kollu tal-​ħajja tagħna hu li nfittxu l-​ferħ.” Imbagħad spjega li kien jemmen li l-​ferħ jistaʼ jinkiseb bit-​taħriġ jew l-​iddixxiplinar tal-​moħħ u l-​qalb. “Il-​moħħ,” hu qal, “huwa t-​tagħmir bażiku kollu li għandna bżonn biex niksbu l-​ferħ komplet.” It-​twemmin f’Alla m’huwiex bżonnjuż, isostni hu.a

B’kuntrast, ikkunsidra lil Ġesù li kellu fidi soda f’Alla u li t-​tagħlim tiegħu effettwa lil mijiet taʼ miljuni taʼ nies matul is-​sekli. Ġesù kien interessat fil-​ferħ tan-​nies. Hu beda l-​Priedka tiegħu taʼ fuq il-​Muntanja, li hi magħrufa minn kulħadd, b’disaʼ beatitudnijiet, jiġifieri disaʼ espressjonijiet li jibdew bil-​kelma: “Henjin . . . ” (Mattew 5:​1-12) F’dik l-​istess priedka lis-​semmiegħa tiegħu għallimhom jeżaminaw, isaffu, u jiddixxiplinaw imħuħhom u qlubhom billi jbiddlu ħsibijiet vjolenti, immorali, u egoistiċi maʼ dawk paċifiċi, nodfa, u taʼ mħabba. (Mattew 5:​21, 22, 27, 28; 6:​19-21) Bħalma ħeġġeġ wieħed mid-​dixxipli tiegħu iktar tard, aħna għandna nkomplu ‘naħsbu’ dwar l-​affarijiet li huma ‘veri, xierqa, ġusti, safjin, taʼ mħabba, taʼ ġieħ, taʼ virtù, u li ħaqqhom tifħir.’—Filippin 4:8.

Ġesù kien jaf li l-​ferħ veru jinvolvi r-​relazzjonijiet tagħna m’oħrajn. Aħna l-​bnedmin m’aħniex maħluqin biex inkunu waħedna, u għalhekk qatt ma nistgħu nkunu verament ferħanin jekk ninqatgħu għalina waħedna, jew jekk dejjem nillitikaw maʼ dawk taʼ madwarna. Nistgħu nkunu ferħanin biss jekk inħossuna maħbubin u jekk inħobbu lil oħrajn. Ġesù għallimna li l-​bażi għal imħabba bħal din hi r-​relazzjoni tagħna m’Alla. Hawn speċjalment tidher id-​differenza kbira bejn it-​tagħlim taʼ Ġesù u t-​tagħlim tad-​Dalai Lama, għax Ġesù għallem li l-​bnedmin ma jistgħux ikunu verament ferħanin jekk ikunu indipendenti minn Alla. Dan għala hu hekk?—Mattew 4:4; 22:​37-39.

Aħseb Dwar il-​Ħtiġijiet Spiritwali Tiegħek

Waħda mill-​beatitudnijiet hi: “Henjin huma dawk konxji tal-​bżonn spiritwali tagħhom.” (Mattew 5:​3, NW) Ġesù għala qal hekk? Għaliex, kontra taʼ l-​annimali, aħna għandna bżonnijiet spiritwali. Minħabba li ġejna maħluqin fix-​xbieha t’Alla, aħna nistgħu nikkultivaw sa ċertu punt kwalitajiet bħalma huma l-​imħabba, il-​ġustizzja, il-​ħniena, u l-​għerf. (Ġenesi 1:27; Mikea 6:8; 1 Ġwann 4:8) Il-​bżonnijiet spiritwali tagħna jinkludu l-​ħtieġa li ħajjitna jkollha skop.

Kif nistgħu nissodisfaw dawn il-​bżonnijiet spiritwali? Żgur li mhux permezz taʼ xi meditazzjoni traxxendentali (fejn wieħed iġiegħel lil moħħu jirrilassa billi jirrepeti litanija speċjali darba wara l-​oħra) jew b’xi sempliċi eżami tagħna nfusna. Minflok Ġesù qal: “Il-​bniedem mhux bil-​ħobż biss jgħix, iżda b’kull kelma li toħroġ minn fomm Alla.” (Mattew 4:4) Innota li Ġesù qal li Alla hu l-​għajn taʼ “kull kelma” li hija vitali għal ħajjitna. Ċerti mistoqsijiet li jkollna Alla biss jistaʼ jgħinna nwiġbuhom. Dan id-​dehen hu speċjalment f’waqtu llum minħabba li dejjem qed jiżdiedu t-​teoriji dwar l-​iskop tal-​ħajja u dwar kif wieħed jistaʼ jikseb il-​ferħ. Il-​ħwienet tal-​kotba għandhom sezzjonijiet sħaħ taʼ xogħlijiet taʼ kitba li jwegħdu saħħa, rikkezzi, u ferħ lill-​qarrejja. Ġew stabbiliti websites fuq l-​Internet li għandhom x’jaqsmu speċifikament mal-​ferħ.

Madankollu, il-​ħsieb tal-​bniedem f’dawn l-​oqsma hu taʼ spiss żbaljat. Hemm it-​tendenza li jiffoka fuq xewqat egoisti jew fuq li wieħed jogħġob lilu nnifsu. Hu bbażat fuq għarfien u esperjenza limitati, u taʼ spiss ikun mibni fuq suppożizzjonijiet foloz. Per eżempju, xi awturi taʼ kotba li juruk kif tistaʼ tgħin lilek innifsek qegħdin iktar u iktar jibbażaw l-​ideat tagħhom fuq it-​teorija taʼ “psikoloġija evoluzzjonarja.” Din tasal biex tgħid li l-​emozzjonijiet tal-​bniedem ġejjin minn dawk li jgħidu li huma l-​antenati tagħna, jiġifieri l-​annimali. Il-​verità hi li, biex jinstab il-​ferħ, kwalunkwe sforz ibbażat fuq teorija li tinjora l-​irwol tal-​Ħallieq tagħna ma jistaʼ qatt ikun validu, u dan fl-​aħħar mill-​aħħar se jwassal għal diżappunt. Profeta tal-​qedem qal: “L-​għorrief [“jaqgħu fl-​għajb,” NW]. . . . Arawhom, ċaħdu l-​kelma tal-​Mulej, u issa x’għerf baqgħalhom?”—Ġeremija 8:9.

Alla Jehovah jaf kif aħna magħmulin u x’se jagħmilna verament henjin. Jaf għala poġġa l-​bniedem fuq l-​art u x’hemm lest għalih fil-​futur, u din l-​informazzjoni jagħtihielna fil-​Bibbja. Dak li hemm rivelat f’dan il-​ktieb ispirat idoqq għal widnejn dawk l-​individwi li jridu jitgħallmu u dan iġagħalhom iħossuhom ferħanin. (Luqa 10:21; Ġwann 8:32) Hekk ġralhom tnejn mid-​dixxipli taʼ Ġesù. Dawn kienu qalbhom sewda wara li miet Ġesù. Imma meta saru jafu minn fomm Ġesù rxoxtat innifsu dwar l-​irwol tiegħu fl-​iskop t’Alla għas-​salvazzjoni tal-​bnedmin, huma qalu: “Ma kinitx imkebbsa qalbna ġewwa fina huwa u jkellimna fit-​triq u jfissrilna l-​Iskrittura?”—Luqa 24:32.

Dan il-​ferħ ikompli jiżdied meta nħallu l-​verità tal-​Bibbja tiggwidana f’ħajjitna. F’dan ir-​rigward, il-​ferħ jistaʼ jitqabbel maʼ qawsalla. Jibda jidher meta l-​kundizzjonijiet huma favorevoli, imma jibbrilla iktar, saħansitra jsir qawsalla doppja, meta l-​kundizzjonijiet ikunu perfetti. Issa ejja nagħtu ħarsa lejn ftit eżempji taʼ kif jistaʼ jkollna iktar ferħ meta napplikaw it-​tagħlim tal-​Bibbja.

Żomm Ħajtek Sempliċi

L-​ewwel, ejja nħarsu lejn il-​parir li jagħti Ġesù dwar il-​ġid materjali. Wara li wissa kontra li nagħmlu l-​ġid materjali l-​iktar ħaġa importanti f’ħajjitna, hu uża espressjoni mhux tas-​soltu, meta qal: “Jekk mela għajnek hija [“sempliċi,” NW], ġismek kollu jkun imdawwal.” (Mattew 6:​19-22) Bażikament, hu qal li jekk moħħna jkun mitfugħ il-​ħin kollu fuq il-​ġid materjali, il-​poter, jew kwalunkwe mira oħra li jistaʼ jkollna, se nitilfu dawk l-​affarijiet li huma verament importanti. Wara kollox, bħalma qal Ġesù f’okkażjoni oħra, “imqar jekk wieħed ikollu bir-​radam, ħajtu ma tiddependix mill-​ġid li jkollu.” (Luqa 12:15) Jekk inpoġġu fl-​ewwel post l-​affarijiet li huma verament importanti, bħal ngħidu aħna r-​relazzjoni tagħna m’Alla, kwistjonijiet tal-​familja, u affarijiet relatati oħra, allura ‘għajnejna’ se jkunu “sempliċi,” u safjin.

Innota li Ġesù ma kienx qed jgħid li għandna ngħixu bħal eremiti jew li għandna niċċaħħdu minn kollox. Wara kollox, lanqas Ġesù nnifsu m’għamel hekk. (Mattew 11:19; Ġwann 2:​1-11) Minflok, hu għallem li dawk li jqisu ħajjithom sempliċement bħala opportunità biex igeddsu l-​ġid materjali jkunu bażikament qed jaħlu ħajjithom.

Meta psikoterapista f’San Francisco, fl-​Istati Uniti, ikkummenta dwar dawk li saru għonja ħafna f’qasir żmien qal li għalihom il-​flus kienu “l-​għerq taʼ l-​istress u l-​konfużjoni.” Hu żied li dawn in-​nies “jixtru żewġt idjar jekk mhux tlieta, karozza, u jonfqu partita flus f’ħafna affarijiet. U meta ma jirnexxilhomx jiksbu li jridu [jiġifieri, li jkunu ferħanin], huma jsiru dipressi, iħossuhom ma jiswew għal xejn, u ma jkunux jafu x’se jaqbdu jagħmlu b’ħajjithom.” Mill-​banda l-​oħra, dawk li jagħtu kas il-​parir taʼ Ġesù biex jgħaddu ħajja iktar sempliċi materjalment u jħallu l-​wisaʼ għall-​affarijiet spiritwali x’aktarx li iktar se jsibu l-​ferħ veru.

Tom, bennej li jgħix fil-​Ħawajj, mar jaqdi bħala volontier fil-​bini taʼ postijiet għall-​qima fil-​gżejjer tal-​Paċifiku fejn in-​nies ftit għandhom ġid materjali. Tom innota xi ħaġa dwar dawn in-​nies umlin. Hu qal: “L-​aħwa Kristjani f’dawn il-​gżejjer kienu verament ferħanin. Huma għenuni nara b’mod iktar ċar li l-​flus u l-​ġid materjali m’humiex is-​sigriet għall-​ferħ.” Hu osserva wkoll lill-​volontieri li kienu qed jaħdmu miegħu fil-​gżejjer u nnota kemm kienu kuntenti. “Kieku riedu setgħu jaqilgħu partita flus,” qal Tom. “Imma għażlu li jpoġġu l-​affarijiet spiritwali l-​ewwel post u li jżommu ħajjithom sempliċi.” Dawn l-​eżempji qanqlu lil Tom biex ħajtu jagħmilha iktar sempliċi ħalli jkun jistaʼ jiddedika iktar ħin għall-​familja tiegħu u għall-​affarijiet spiritwali. Qatt ma ddispjaċieh li kien ħa dan il-​pass.

Il-​Ferħ u l-​Istima Tiegħek Innifsek

Ma tistax tkun ferħan jekk tħossok nieqes mid-​dinjità persunali, jew mill-​istima tiegħek innifsek. Minħabba l-​imperfezzjoni u d-​dgħjufijiet li jiġu magħha, xi wħud m’għandhomx fiduċja fihom infushom, u ħafna minnhom ilhom iħossuhom hekk minn tfulithom. Forsi tħossha iebsa li teħles minn sentimenti li jkunu rabbew l-​għeruq ġewwa fik, imma dan huwa possibbli. Is-​soluzzjoni qegħda f’li napplikaw il-​Kelma t’Alla.

Il-Bibbja tispjega kif iħossu l-​Ħallieq dwarna. M’hijiex l-​opinjoni tiegħu iktar importanti minn dik taʼ kwalunkwe bniedem, saħansitra minn dik tagħna nfusna? Alla, li hu l-​istess personifikazzjoni taʼ l-​imħabba, iħares lejna mingħajr preġudizzju jew malizzja. Hu jarana taʼ li aħna, kif ukoll dak li nistgħu nsiru. (1 Samwel 16:7; 1 Ġwann 4:8) Fil-​fatt, lil dawk li jridu jogħġbuh iqishom bħala prezzjużi, iva, għeżież, minkejja l-​imperfezzjonijiet li jkollhom.—Danjel 9:23; Ħaggaj 2:7.

M’għandniex xi ngħidu, Alla ma jinjorax id-​dgħjufijiet u d-​dnubiet tagħna. Hu jistenna li aħna nagħmlu ħilitna kollha biex nagħmlu s-​sewwa, u jappoġġana meta nagħmlu dan. (Luqa13:24) Xorta waħda, il-​Bibbja tgħid: “Bħalma jħenn il-​missier għal uliedu, hekk iħenn il-​Mulej għal min għandu l-​biżaʼ tiegħu.” Din tgħid ukoll: “Jekk tal-​ħtijiet int tagħti kas, Mulej, Sidi, min jistaʼ jżomm sħiħ? Imma għandek hemm il-​maħfra, biex hekk inqimuk fil-​biżaʼ tiegħek.”—Salm 103:13; 130:​3, 4.

Għalhekk, tgħallem ara lilek innifsek bil-​mod li jarak Alla. Meta tkun taf li hu jqis lil dawk li jħobbuh bħala għeżież, u li għandu fiduċja fihom, dan se jgħinek tkun iktar ferħan, avolja forsi tħoss li ma jixraqlekx.—1 Ġwann 3:​19, 20.

It-​Tama—Importanti Ferm għall-​Ferħ

Idea li saret popolari reċentement, imsejħa psikoloġija pożittiva, issostni li l-​ottimiżmu, li jiġi milli wieħed jaħseb b’mod pożittiv u milli jiffoka fuq il-​kapaċitajiet persunali tiegħu, jistaʼ jwassal għall-​ferħ. Kważi kulħadd jaqbel li ħarsa ottimista lejn il-​ħajja u l-​futur iżżidilna l-​ferħ. Madankollu, ottimiżmu bħal dan irid ikun ibbażat fuq il-​fatti, mhux sempliċement fuq ħolm. Barra minn hekk, l-​ebda ammont taʼ ottimiżmu jew ħsieb pożittiv ma se jneħħi l-​gwerer, il-​ġuħ, il-​pesti, it-​tniġġis, ix-​xjuħija, il-​mard, jew il-​mewt, affarijiet li jitilfulna l-​ferħ. Minkejja dan, l-​ottimiżmu għandu postu.

Interessanti li l-​Bibbja ma tużahiex il-​kelma ottimiżmu, imma tuża kelma iktar qawwija. Din hi l-​kelma tama. Vine’s Complete Expository Dictionary jagħti t-​tifsira tal-​kelma “tama” kif inhi użata fil-​Bibbja bħala “stennija favorevoli u fiduċjuża, . . . l-​antiċipazzjoni hienja taʼ xi ħaġa tajba.” Kif tintuża fil-​Bibbja, il-​kelma tama hija iktar minn ħarsa ottimista taʼ xi sitwazzjoni. Tirreferi wkoll għal dik il-​ħaġa li għaliha tkun qed tittama. (Efesin 4:4; 1 Pietru 1:3) Per eżempju, it-​tama Kristjana hi li dawk l-​affarijiet koroh li ssemmew fil-​paragrafu taʼ qabel dalwaqt se jispiċċaw. (Salm 37:​9-11, 29) Imma din tinkludi iktar minn hekk.

Il-Kristjani jħarsu ’l quddiem lejn iż-​żmien meta wħud leali se jiksbu ħajja perfetta fuq art magħmula ġenna. (Luqa 23:​42, 43) Dwar din it-​tama nsibu xi ħaġa oħra f’Apokalissi 21:​3, 4, li tgħid: “Din hi l-​għamara taʼ Alla mal-​bnedmin; u hu jgħammar magħhom, u huma jkunu l-​poplu tiegħu, u Alla nnifsu jkun magħhom, Alla tagħhom. Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.”

Kulmin jistenna li jkollu futur bħal dan għandu għalfejn ikun ferħan, avolja fil-​preżent iċ-​ċirkustanzi tiegħu ma tantx huma sbieħ. (Ġakbu 1:12) Għalhekk, għala ma tfittixx fil-​Bibbja u tiskopri għala għandek temminha? Saħħaħ it-​tama tiegħek billi tqattaʼ xi ftit tal-​ħin kuljum taqra l-​Bibbja. B’hekk, dan se jgħinek tikber spiritwalment, tevita dawk l-​affarijiet li jġagħlu lin-​nies jitilfu l-​ferħ, u tibni ġewwa fik dak is-​sens taʼ kuntentizza. Iva, is-​sigriet fundamentali għall-​ferħ veru hu li nagħmlu r-​rieda t’Alla. (Koħèlet 12:13) Ħajja mibnija fuq l-​ubbidjenza lejn il-​preċetti tal-​Bibbja hija ħajja ferħana, għax Ġesù qal: “Hienja dawk li jisimgħu l-​kelma taʼ Alla u jħarsuha!”—Luqa 11:28.

[Nota taʼ taħt]

[Stampi f’paġna 5]

Il-​ferħ ma jistax jinstab f’li wieħed igeddes il-​ġid materjali, jew f’li jinqataʼ għalih waħdu, jew f’li jafda fuq l-​għarfien limitat tal-​bniedem

[Stampa f’paġna 6]

Ħajja mibnija fuq l-​ubbidjenza lejn il-​Kelma t’Alla hija ħajja ferħana

[Stampa f’paġna 7]

It-​tama Kristjana tagħmilna persuni ferħanin