L-Infern—Tortura Eterna jew Qabar Komuni?

QATT qalulek li s-​Santi Padri tal-​bidu, it-​teoloġi medjovali, u r-​Riformisti argumentaw li t-​turmenti li jiġu esperjenzati fl-​infern huma għal dejjem? Jekk inhu hekk, forsi tissorprendi ruħek li tkun taf li xi studjużi tal-​Bibbja meqjusin bħala bravi issa qed jisfidaw dik l-​opinjoni. Fil-​Britannja, wieħed minnhom, John R. W. Stott, jikteb li “l-​Iskrittura tipponta lejn id-​direzzjoni taʼ qerda, u li ‘turment konxju etern’ huwa tradizzjoni li trid iċċedi għall-​awtorità suprema tal-​Iskrittura.”​—Essentials​—A Liberal-Evangelical Dialogue.

X’kien li wasslu għall-​konklużjoni li turment taʼ dejjem m’huwiex ibbażat fuq il-​Bibbja?

Il-​Lezzjoni tal-​Lingwa

L-​ewwel argument tiegħu jinvolvi l-​lingwa. Hu jispjega li meta l-​Bibbja tirreferi għall-​istat finali taʼ dannazzjoni (“Geħenna”), taʼ spiss tuża l-​vokabularju taʼ “qerda,” “il-​verb [Grieg] apollumi (li teqred) u n-​nom apòleia (qerda).” Jirreferu dawn il-​kelmiet għal turment? Stott juri li meta l-​verb huwa attiv u transittiv, “apollumi” ifisser “toqtol.” (Mattew 2:13; 12:14; 21:41) B’hekk, f’​Mattew 10:​28, fejn il-​King James Version issemmi lil Alla bħala li jeqred “kemm ir-​ruħ u l-​ġisem fl-​infern,” l-​idea inerenti hija li jeqred permezz tal-​mewt, mhux b’sofferenza eterna. F’​Mattew 7:​13, 14, Ġesù jagħmel kuntrast bejn it-​‘triq dejqa li tieħu għall-​ħajja’ u t-​‘triq wiesgħa li tieħu għall-​qerda.’ Jikkummenta Stott: “Kienet tidher stramba, għalhekk, li n-​nies li jgħidu li qegħdin isofru qerda huma fil-​fatt mhux meqrudin.” Bir-​raġun, hu jasal għall-​konklużjoni: “Jekk li toqtol ifisser li ċċaħħad il-​ġisem mill-​ħajja, l-​infern kieku jidher li hu ċ-​ċaħda taʼ ħajja kemm fiżika u kemm spiritwali, jiġifieri, estinzjoni taʼ dak li jkun.”​—Essentials, paġni 315-16.

Jinterpretaw Deskrizzjonijiet Infernali

Xorta waħda, ħafna nies reliġjużi se jaqblu mal-​president tas-​Southern Baptist Convention Morris H. Chapman, li qal: “Jien nippriedka dwar infern litterali.” Hu żied: “Il-​Bibbja ssejjaħlu ‘għadira tan-​nar,’ u jien ma naħsibx li dik id-​definizzjoni tistaʼ tiġi mtejba.”

Veru, is-​simboliżmu tan-​nar użat fil-​Bibbja jistaʼ jagħtik stampa mentali taʼ turment. Madankollu, il-​ktieb Essentials jinnota: “Huwa bla dubju minħabba li lkoll kemm aħna esperjenzajna l-​uġigħ kbir taʼ meta wieħed jinħaraq, li n-​nar huwa assoċjat fi mħuħna maʼ ‘turment konxju’. Imma l-​funzjoni prinċipali tan-​nar mhix dik li tikkaġuna wġigħ, imma li tiżżgura qerda, kif jixhdu l-​inċineraturi tad-​dinja.” (Paġna 316) Li żżomm dik id-​distinzjoni sinjifikanti ġewwa moħħok se jgħinek tevita li tagħti tifsira oħra lill-​Iskrittura li attwalment mhix hemm. Xi eżempji:

Rigward dawk li jiġu mitfugħin f’Geħenna, Ġesù qal li “d-​duda tagħhom ma tmutx u n-​nar ma jintefiex.” (Mark 9:47, 48) Influwenzati mill-​kliem fil-​ktieb apokrifu taʼ Ġuditta (“Hu se jibgħat nar u dud f’laħamhom u huma se jibku bl-​uġigħ għal dejjem taʼ dejjem.”—Ġuditta 16:17, The Jerusalem Bible), xi kummentarji Bibliċi jargumentaw li l-​kliem taʼ Ġesù jimplika turment etern. Madankollu, il-​ktieb apokrifu taʼ Ġuditta, billi mhux imnebbaħ minn Alla, m’huwiex kriterju biex jiġi ddeterminat it-​tifsir tal-​kitbiet taʼ Mark. Isaija 66:24, il-​vers mill-​iskrittura li b’mod evidenti Ġesù rrefera għalih, igħid li n-​nar u d-duda qegħdin jeqirdu l-​iġsma mejtin tal-​għedewwa t’Alla. M’hemm ebda ħjiel taʼ turment konxju għal dejjem la fi kliem Isaija u lanqas f’dak taʼ Ġesù. L-​istampa tan-​nar tissimbolizza qerda kompluta.

Rivelazzjoni 14:​9-11 jitkellem dwar xi wħud li huma “tturmentat[i] bin-​nar u l-​kubrit . . . U d-​duħħan tat-​turment tagħhom jitlaʼ għal dejjem taʼ dejjem.”a Jagħti dan prova taʼ turment konxju etern fin-​nar tal-​infern? Fil-​fatt, kulma qed igħid dan il-​passaġġ hu li l-​ħżiena jiġu tturmentati, mhux itturmentati għal dejjem. It-​test jistqarr li huwa d-​duħħan​—l-​evidenza li n-​nar għamel ix-​xogħol tiegħu taʼ qerda—​li jkompli għal dejjem, mhux it-​turment bin-​nar.

Rivelazzjoni 20:​10-15 igħid li ġewwa “l-​għadira tan-​nar u l-​kubrit, . . . se jkunu tturmentati lejl u nhar għal dejjem taʼ dejjem.” Meta taqraha għall-​ewwel darba, forsi tidher li qisha prova taʼ turment konxju etern bin-​nar, imma ċertament li m’hijiex. Għala? Fost raġunijiet oħrajn, “il-​bhima selvaġġa u l-​profeta falz” u “l-​mewt u Ħades” se jispiċċaw f’dik li hi hawn imsejħa “l-​għadira tan-​nar.” Kif tistaʼ faċilment tikkonkludi, il-​bhima, il-​profeta falz, il-​mewt, u Ħades m’humiex persuni litterali; għalhekk, ma jistgħux jesperjenzaw turment konxju. Minflok, jikteb G. B. Caird f’A Commentary on the Revelation of St. John the Divine, “il-​għadira tan-​nar” tfisser “xi ħaġa estinta u minsija għalkollox.” Din ir-​realizzazzjoni tistaʼ malajr tintlaħaq, għax il-​Bibbja nfisha tistqarr dwar il-​għadira tan-​nar: “Din tfisser it-​tieni mewt, il-​għadira tan-​nar.”​—Rivelazzjoni 20:​14.

Nisseparaw it-​Tewmin Teoloġiċi

Minkejja dawn l-​argumenti, ħafna kredenti jinsistu li “qerda” ma tfissirx dak li tgħid il-​kelma imma tfisser turment etern. Għala? Il-​ħsieb tagħhom huwa influwenzat bit-​tewmija reliġjuża tan-​nar tal-​infern​—id-​duttrina tal-​immortalità tar-​ruħ umana. U ladarba l-​knisja tagħhom setgħet għamlitha taʼ omm għal dawn it-​tewmin għal sekli, huma jistgħu jħossu li t-​testi li jitkellmu dwar il-​qerda fil-​fatt ifissru tortura eterna. Wara kollox, ir-​ruħ umana immortali ma tistax ma tibqax teżisti​—jew ħafna hekk jirraġunaw.

Imma innota l-​punt li għamel il-​membru tal-​kleru Anglikan Philip E. Hughes: “Li targumenta li r-​ruħ umana biss hija b’mod essenzjali minn dejjem immortali ifisser li żżomm pożizzjoni li mkien ma hi approvata fit-​tagħlim tal-​Iskrittura, għax kif inhi deskritta fil-​Bibbja n-​natura umana dejjem tidher komposta b’mod integrali kemm mill-​ispiritwali kif ukoll mill-​ġisem. . . . It-​twissija t’Alla fil-​bidu, rigward is-​siġra pprojbita, ‘Fil-​jum li tiekol minnha se tmut,’ kienet indirizzata lill-​bniedem bħala ħlejqa tad-​demm u l-​laħam kif ukoll spiritwali​—jekk hu jiekol minnha, kien ikun bħala tali li kellu jmut. M’hemm ebda suġġeriment li parti minnu maʼ kienet tmut qatt u għalhekk li l-​mewt tiegħu kellha tkun f’parti biss.”​—The True Image​—The Origin and Destiny of Man in Christ.

Bl-istess mod, it-​teologu Clark Pinnock jirrimarka: “Dan il-​konċett [li r-​ruħ umana hija mmortali] influwenza t-​teoloġija għal ħafna żmien, imma mhux mill-​Bibbja. Il-​Bibbja ma tgħallimx l-​immortalità naturali tar-​ruħ.” Eżekjel 18:​4, 20 u Mattew 10:28 jikkonfermawh dan. Barra minn hekk, Ġesù nnifsu tkellem dwar ħabibu mejjet Lażżru bħala li “mar jistrieħ,” jew jorqod. Ġesù qal li hu kien se ‘jqajmu mill-​irqad.’ (Ġwann 11:​11-14) Mela l-​bniedem uman, jew ir-​ruħ umana, Lażżru kien miet, imma saħansitra wara li għadda ftit taż-​żmien, hu setaʼ jiġi rxoxtat, miġjub lura għall-​ħajja mill-​ġdid. Il-​fatti jagħtu prova taʼ dan. Ġesù rxoxta lil Lażżru mill-​mewt.—Ġwann 11:​17-44.

Dawn il-​punti kif jeffettwaw id-​duttrina taʼ turment etern? Lura fis-​seklu 17, il-​kittieb William Temple innota: “Hemm [skritturi] li jitkellmu dwar it-​tfigħ f’nar li ma jintefiex. Imma jekk aħna ma nersqux lejn dawn b’suppożizzjonijiet bil-​quddiem li dak li jiġi mitfugħ fihom ma jistax jinqered, għandna nieħdu l-​impressjoni, mhux li se jinħarqu għal dejjem, imma li jiġu meqrudin.” Dik l-​analiżi korretta għadha tgħodd, għax hi dak li l-​Bibbja attwalment tgħallem.

Bla dubju, għandek raġunijiet li jġagħluk tiddubita l-​idea taʼ turment etern konxju fl-​infern. Jew forsi trid tasal iktar milli sempliċement tiddubita u ssegwi l-​parir tal-​professur tat-​teoloġija Pinnock, li qal: “Il-​lista sħiħa taʼ twemmin li jiċċirkondaw l-​infern, inkluża t-​tortura bla tmiem, . . . għandha tiġi mwarrba f’isem id-​duttrina kredibbli.” Iva, il-​moralità, il-​ġustizzja, u​—l-​iktar importanti—​il-Kelma t’Alla, il-​Bibbja, igħidulek biex tagħmel sewwa sew hekk.

Jekk tagħmel hekk, inti tara li n-​natura vera tal-​infern hija tabilħaqq kredibbli. Inti tistaʼ ssib informazzjoni taʼ għajnuna fuq dan is-​suġġett fil-​ktieb Int Tistaʼ Tgħix għal Dejjem F’Ġenna tal-​Art.b Jekk jogħġbok staqsi għalih meta tiltaqaʼ max-​Xhieda taʼ Jehovah. Aqra l-​kapitli “X’Jiġri fil-​Mewt?” “X’Tip Taʼ Post Hu L-​Infern” u “L-​Irxoxt​—Għal Min, u Fejn?” Int se tiskopri li l-​vera natura tal-​infern mhux talli hija kredibbli imma promettenti wkoll.

[Noti taʼ taħt]